“Dar Paged E Michan’ Rorad”

“NGAM felan’gad ko ngiyal’ nra yog e girdi’ e thin nib tagan ngomed mi yad ngongliy e tin nib kireb ngomed ma yad be tunguy urngin mit e thin nib kireb nib togopuluw ngomed ni bochan e gimed girdieg,” aram e thin ni yog Jesus ngak e pi apostal rok. (Matthew 5:11) Pi Mich Rok Jehovah e ngiyal’ n’ey e yad ba felfelan’ nbochan, e kar puluwnaged e yafas rorad ko motochiyel ni i fil Kristus ngorad nge tin i rin’, ma kar pared ni “gathi yad girdien e fayleng” ma yad be par u mathilin e am ma yad ba yul’yul’ ku Got u tan urngin ban’en ni be buch.​—John 17:14; Matthew 4:8-10.

Murung’agen e n’en ni buch ko Pi Mich Rok Jehovah ko nam nu Soviet Union fram ni dar paged e michan’ rorad, ni ba muun ngay e piin ni ur moyed u Estonia, ma Toomas Paul ni Lutheran theologian maku ma piliyeg e Bible e i yoloy ko babyor rok ni Kirik keses küla (Fare Galesiya u Lukngun fare Binaw) ni gaar: “Bochuw e girdi’ ni kar rung’aged e n’en ni ke buch ni kakadbul ko April 1, 1951. Kar puruy’gad ni ngan chuweg e Pi Mich Rok Jehovah nge urngin e girdi’ ni ma ayuwegrad​—ma 279 e girdi’ ni kan kolrad ni ngan fekrad nga Siberia. . . . Kar pied ngorad e babyor ni ngar yoloyed ni ngar paged e michan’ rorad ma rayog ni yad ra par ndab ku ni chuwegrad. . . . Urngin ni kan kol fram, e 353 e girdi’ ni kan kalbusnagrad, ni ba muun ngay 175 e girdi’ ni ma un ko ulung rorad. Dar paged e michan’ rorad​—ni mus nga Siberia. De yoor girdien e Galesiya ko [Estonian Lutheran] ni bay e michan’ rorad ni taareb rogon ko Pi Mich Rok Jehovah.”

Pi Mich Rok Jehovah u ga’ngin yang e fayleng e ma pagan’rad ngak Got ni ra ayuwegrad ni nga ra pared nib yul’yul’ mu ur folgad rok ni yugu demtrug rogon e skeng ni ra yib. Kar felfelan’gad ya kar nanged ni taw’ath rorad ko yul’yul’ e ri baga’.​—Matthew 5:12.