Ngad Adaged ni Ngaud Fal’eged i Lemnag Ban’en

BOCH e girdi’ e yad ra lemnag ni ngan fal’eg i lemnag ban’en me pi’ magaran ngorad. Maku yad ma lemnag nre n’ey e ban’en nrib mo’maw’ ni bochan e ngam par ni taab n’en e ga be fal’eg i lemnag. Ere yad ma lemnag ni yad ba kireb, ya darur tedan’rad ngaur fal’eged i lemnag e tin ni yad ma fil, nib ga’ nnap’an ni yad ra guy ni be yog e Bible nthingar ni rin’. (Filippi 4:8) Machane, thingar da adaged ni ngaud fal’eged i lemnag e tin riyul’ ni kad filed u murung’agen Jehovah, nge pi fel’ngin, nge pi n’en ni ke ngongliy ni yira ngat ngay, nge tin nib m’agan’ ngay ni fan ngodad. Mang fan?

Jehovah Got ni Pilung rodad e ir e Th’abi Tolang u ga’ngin yang e palpalth’ib ma boor ban’en ni be rin’ ni fan e nge lebug e n’en nib m’agan’ ngay. (John 5:17) Yugu aram rogon, ma ku manang laniyan’ e pi tapigpig rok ni be’ nge be’. Manang David e re n’ey, aram fan ni gaar: “Somol, ga be guy lanin’ug, ma ga manangeg. Ga manang urngin e tin ni gu ma rin’; ra mpar u urel ma ba tamilangan’um u urngin e tin ni gu be lemnag.”​—Psalm 139:1, 2.

Dabisiy nsom’on nra beeg be’ e re thin ney e ra mulan’, ma sana ra gaar u wan’, ‘Yugu aram rogon ni ma par Got u “orel,” machane manang gubin ban’en nib kireb ni ma yib nga lanin’ug.’ Riyul’, nib fel’ ni ngaud lemgad ni aray rogon, ya ra ayuwegdad ni ngad siyeged e lem nib kireb. Ma faanra kad lemnaged ban’en nib kireb, ma rayog ni ngad wenigniged ku Got, ya ba pagan’dad ngay nra n’ag fan u wan’ ni bochan e michan’ rodad ko fare biyul ni maligach ni pi’ Jesus. (1 John 1:8, 9; 2:1, 2) Machane, thingar dab da paged talin ni ma yaliy Jehovah e tin nib fel’ ko pi tapigpig rok. Ma ri baadag ni ma guydad ni gad be fal’eg i lemnag e tin nib fel’ ni ke rin’ ni fan ngodad.

Sana ga ra fith ni lungum, “Ri manang Got gubin ban’en nib fel’ ni ma lemnag e pi tapigpig rok, fa?” Arrogon, gubin ma manang. I tamilangnag Jesus gelngin feni ri ma lemnagdad Jehovah u nap’an ni yog ni mus ko nochi arche’ ni sparrow ni ma lemnagrad ni gaar: “Ka ba ga’ famed ngak boor fa nochi arche’ ni sparrow fithingan!” (Luke 12:6, 7) Arche’ ni sparrow e dabiyog ni ngar lemnaged murung’agen Jehovah. Ere, faanra ba ga’ fan e mit ney e arche’ u wan’ Jehovah, me ere gadad e ri kab gel feni rib ga’ fadad u wan’ nge tin nib fel’ ni gadad ma lemnag! Ngad boded David ni meybil u fithik’ e pagan’ ni gaar: “Mang e gu par nib fel’ u wun’um e . . . pi n’en ni gu be lemnag. A Somol, ni gur e gu be naf nga tan paam mi gur e Tabiyul rog!”​—Psalm 19:14.

Fapi thin nni thagthagnag nga laniyan’ Malaki ni profet ni nge yoloy e ku be micheg ngodad ni ma guy Jehovah e pi n’en ni ma fal’eg i lemnag e pi tapigpig rok ni yad ba yul’yul’. I yiiynag ni gaar: “Girdi’ ni ba’ madgun Somol u wan’rad e ur welthingad rorad, mi i motoyil Somol ngorad me rung’ag e thin ni yad be yog. Bay ba ke babyor rok ni kan yoloy ngay murung’agen e piin ni bay madgun Somol u wan’rad ma yad be ta’ fan.” (Malaki 3:16) Ra ud pugeduran ngan’dad ni ma “motoyil” Jehovah u nap’an ni gad be fal’eg i lemnag e pi n’en nib m’agan’ ngay, ma rayog ni ngad adaged ni ngaud fal’eged i lemnag ban’en. Ere, manga yugu da sulod u daken fapi thin ni yog David ni faani gaar: “Bay gu lemnag murung’agen urngin e tin kam rin’; bay gu par ma gu be tafinaynag urngin e tin ni kam rin’ nrib th’abi fel’.”​—Psalm 77:12, BT.