Um Par Ni Gab T’uf Rok Got!

“Gimed e pi tafager rog, . . . nguum pired ni gimed ba t’uf rok Got, . . . ni gimed be sonnag e yafos ndariy n’umngin nap’an.”​—JUDE 20, 21.

1, 2. Uw rogon ma rayog ni nguum par ni gab t’uf rok Got?

RIB t’uf e girdi’ nu fayleng rok Jehovah, me pi’ Fak ni maagirag rok ni fan e nge yog e yafos ni dariy n’umngin nap’an ngak e piin nra mich Fak Got u wun’rad. (John 3:16) Rib fel’ ni yira pirieg e re t’ufeg nem! Faanra gur reb e tapigpig rok Jehovah ma dabi siy ni ga ba adag ni nguum felfelan’ u fithik’ e re t’ufeg nem ni manemus.

² I tamilangnag Jude ni reb i gachalpen Jesus rogon ni nguum par u fithik’ e t’ufeg rok Got. I gaar: “Machane gimed e pi tafager rog, e nguum gelniged gimed ko mich romed nib th’abi thothup. Um meybilgad ngak Got u fithik’ gelngin fare Kan ni Thothup, um pired ni gimed ba t’uf rok Got, ma gimed be sonnag e Somol rodad i Jesus Kristus ni nge pi’ e yafos ndariy n’umngin nap’an ngomed ni bochan e be runguymed.” (Jude 20, 21) Ga ra fil e Thin Rok Got ma ga machibnag fare thin nib fel’, ma ra ayuwegnem ngam gel ko fare michan’ ‘nib th’abi thothup’​—ni aram e machib ko Kristiano. Ra ngam par ni gab t’uf rok Got ma thingar mu “meybil ngak Got u fithik’ gelngin fare Kan ni Thothup.” Ma faanra nge yog e yafos ni manemus ngom ma thingari mich e biyul rok Jesus Kristus u wan’um.​—1 John 4:10.

3. Mang fan ni daki par boch e girdi’ ni ka yad e Pi Mich Rok Jehovah?

³ Bay boch e girdi’ ni immoy e michan’ rorad kafram machane dakur pared ni yad ba t’uf rok Got. Bochan e kar mel’eged ni nguur ranod u kanawoen e denen, ma gathi ka yad e Pi Mich Rok Jehovah. Ra diin me siy mu yodorom? Ngam fal’eg i lemnag e machib ni bay ko re thin ney ma ra ayuwegem nge siy mu denen nguum par ni gab t’uf rok Got.

Mu Dag Rogon e T’ufeg Rom ngak Got

4. Uw fene ga’ fan ni ngan fol rok Got?

⁴ Nguum dag ni ba t’uf Got rom ni nguum fol rok. (Matthew 22:37) I gaar apostal John: “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.” (1 John 5:3) Ga ra mecham ngay ni ngam fol rok Got, ma ra gelnigem ni ngam togopluw ko pi n’en ni ma waliyey ko denen, maku ra felan’nagem. Be gaar e en ni yoloy e psalm: “Ba felan’ e cha’ ni ma siyeg ni nge fol ko fonow rok e girdi’ nib kireb, . . . Ma ra beeg e motochiyel rok Somol ma ma yib e felfelan’ riy ngak.”​—Psalm 1:1, 2.

5. Ra ba t’uf Got rom ma ra k’aringem ngam ngongol ni uw rogon?

⁵ T’ufeg rom ngak Jehovah e ra k’aring nge dab mu denen nib gel nra kirebnag e ngochol rok Got. I meybil Agur ni gaar: “Mu tay ni gathi gub gafgow ara kari fel’ rogog. Ya nggu way ganag ni f’oth rog, ya nge dabi aw ni kari gu fas me lungug: ‘I mini’ Jehovah?’ ma aram e gu ra gafgow ma thingar gu un ko moro’ro’ me aw e kireb nga daken fithingan e Got rog.” (Proverbs 30:1, 8, 9, NW) Mu turguy u wan’um ni nge dab mu rin’ e tin nib kireb me ‘aw e kireb nga daken fithingan Got.’ Danga’, ya nguum athamgil ni ngam rin’ e tin nib fel’ min pining e sorok ngak Got riy.​—Psalm 86:12.

6. Mang e ra buch ni faan ga ra un ko denen ni lem rom?

⁶ Nguum meybil ngak e Chitamangidad nu tharmiy ya nge gelnagem ni ngam togopluw ko pi n’en ni ma waliyey ko denen. (Matthew 6:13; Roma 12:12) Ma nguum fol ko fonow rok Got ni fan e nge dabi magawon e pi meybil rom. (1 Peter 3:7) Ya faan ga ra un ko denen ni lem rom ma ga ra gafgow nga wenegan ya ma ning Jehovah e kanawo’ ngak e piin ni ma togopuluw ni gowa ke tay bangi manileng ni nge taleg e meybil rorad ni nge dabi taw ngak. (Lamentations 3:42-44) Ere nge sobut’an’um ngam meybil ni nge dab mu rin’ ban’en nib kireb ni ra magawonnag e kanawo’ rom ni ngam meybil ngak Got.​—2 Korinth 13:7.

Mu Dag e T’ufeg ni Fan ngak Fak Got

7, 8. Uw rogon ni ra ayuwegem e fol ni ga be tay ko fonow rok Jesus ni ngam togopluw nga kanawoen e denen?

⁷ Mu dag ni ba t’uf Jesus Kristus rom ni ngaum fol ko pi motochiyel rok, ya re n’ey e ra ayuwegem ni nge dab mman u kanawoen e denen. Be gaar Jesus: “Faan gimed ra fol ko tin ni kug ning chilen ngomed, ma gimed ra par ni gimed ba t’uf rog, ni bod rogon ni kug fol ko tin ni ning e Chitamag chilen ngog gu be par ni ku gub t’uf rok.” (John 15:10) Uw rogon nra ayuwegem e fol ni ga be tay ko thin rok Jesus nguum par ni gab t’uf rok Got?

⁸ Faan ga ra tiyan’um ko thin rok Jesus ma ra ayuwegem ni nguum par ni gab yul’yul’ ko tin nib yalen ban’en. Bay e Motochiyel rok Got ngak piyu Israel ni gaar: “Dab mu pirew be’ ni gathi mabgol rom.” (Exodus 20:14) Machane i tamilangnag Jesus kenggin e riyul’ ni bay ko re motochiyel nem ni faani gaar: “En nra sap ngak be’ ni ppin me finey ni manga yugu ra pirew, e ke kireb e rok, ni fan e kar pirew u fithik’ i laniyan’.” (Matthew 5:27, 28) I yog apostal Peter ni immoy boch e girdi’ u lan e bin som’on e ulung ni Kristiano ni “dariy ban’en ni yad ba adag ni ngar changargad ngay ya ke mus ni ppin nib darngal e yad ba adag ni ngar changargad ngorad,” ma ‘yad ma waliy e piin ni meewar.’ (2 Peter 2:14) Machane, rayog rom ni nge dab mu bod yad rayog ni nge siy mu un ko ngongol ni darngal ni faanra ba t’uf Got nge Kristus rom, ma ga be fol rorow ni kam turguy u wun’um ni nge par nib fel’ thilmed.

Mu Pag e Kan ni Thothup Rok Jehovah Nge Pow’iyem

9. Mang e rayog ni nge buch ko fare kan ni thothup ni faanra ka ga be denen i yan?

⁹ Mu meybil ngam ning e kan ni thothup rok Got ma ga pag ni nge gagiyegnagem. (Luke 11:13; Galatia 5:19-25) Faan ka ga ra denen i yan ma rayog ni chuweg Got e kan ni thothup nge dabki pow’iyem. Tomren ni i denen David ni yow Bath-sheba, me wenig ku Got ni gaar: “Dab mu n’igeg nggu chuw u p’eowchem; dab mu chuweg rog fare Kan ni Thothup rom.” (Psalm 51:11) Machane i chuw e kan ni thothup rok Saul ni Pilung ni bochan e de kalngan’ ko denen rok. I denen Saul ni i ognag e maligach ni kan urfiy, ma de li’ fare ran’ i saf nge kaming, nge fare ran’ i garbaw, maku de li’ e pilung rok piyu Amelek. Ere chuweg Jehovah e kan ni thothup rok ni nge dabki par rok Saul.​—1 Samuel 13:1-14; 15:1-35; 16:14-23.

10. Mang fan ni ngam chuweg u lem ni nguum denen i yan?

¹⁰ Mu chuweg e lem ni nguun denen i yan. Be gaar apostal Paul: “Ya dakuriy reb e maligach nra chuweg e denen ni faanra da lemniged ni nguud denengad i yan u tomren ni kan weliy ngodad e tin riyul’ kad nanged.” (Hebrews 10:26-31) Ba gel e gafgow riy ni faan ga ra lemnag ni nguum denen i yan!

Mu Dag e T’ufeg ni Riyul’ ngak Boch e Girdi’

11, 12. Mang boch e kanawo’ ni t’ufeg nge tay fan e ra k’aring be’ ni nge dabi un ko ngongol ko darngal?

¹¹ T’ufeg rom ngak boch e girdi’, e ra ayuwegem ni nge dab mu un ko ngongol ko darngal. (Matthew 22:39) Ya re t’ufeg nem e ra k’aring ni ngam ayuweg gum’irchaem ni nge dabi waliyem ngam adag e mabgol rok yugu be’. Faan ga ra k’aring e mabgol rok yugu be’ ni nge adagem, ma rayog ni nge waliyem ko ngongol ko darngal. (Proverbs 4:23; Jeremiah 4:14; 17:9, 10) Ngam bod Job ni be’ nib mat’aw ni de pag ir ni nge changar ngak yugu reb e ppin ni gathi ppin rok.​—Job 31:1.

¹² Ga ra tay fan e mabgol ni ban’en nib thothup ma ra ayuwegem ni nge dab mu un ko denen. Mm’agan’ Got ngay ni ngan mabgol ma nga i par fagali yabgol ya nge yoor e girdi’. (Genesis 1:26-28) Ere pi n’en u fithik’ i dow e pumoon nge ppin ni fan ko par ko pumoon nge ppin e fan ko yafos, ma yafos e ban’en nib thothup. Piin ni ma un ko ngongol ko darngal e yad ma togopluw ngak Got, ku yad be darifannag e par ko pumoon nge ppin, maku dar ted ni ba thothup e mabgol, maku yad ma denen nib togopluw ko dowef rorad. (1 Korinth 6:18) Dabi un be’ ko ngongol nib kireb ni ra mang tapgin ngan tharbog ko ulung ni Kristiano ni faanra ba t’uf Got rok maku ba t’uf yugu boch e girdi’ rok.

13. Uw rogon ni be’ ni ke un ko ngongol ko darngal e ke “kirebnag e pi n’en nib tolang puluwon”?

¹³ Thingar da chuweged u lanin’dad e pi n’en ni ra waliydad ko denen ni fan ni nge dab da gafgowniged e piin nib t’uf rodad. Be gaar e Proverbs 29:3 (NW): “En ni ra chag ngak e ppin ni ma chuway’ ngak e ra kirebnag e pi n’en nib tolang puluwon.” Be’ ni ke un ko ngongol ko darngal ni de kalngan’ riy e ra kirebnag e tha’ u thilrow Got ma ku ra kirebnag e tabinaw rok. Ma bay tapgin ni nge dareg e ppin rok e mabgol rorow. (Matthew 19:9) Yugu demtrug ko en ni leengiy ara en ni figirngiy e ba kireb e rok, ma faanra dar e mabgol ma ra gafgow e en ni ba fel’ e rok, nge bitir nge ku boch e girdi’. Da mur lemnag nfaanra tamilang u wun’um e gafgow nra yib ni bochan e ngongol ko darngal, ma ra ayuwegem nge dab mu un ko ngongol ni darngal?

14. Mang boch ban’en u murung’agen e denen ni rayog ni ngada filed ko Proverbs 6:30-35?

¹⁴ Fare n’en ni dariy kanawoen ni ngan fulweg labgen e ngongol ni darngal e ra k’aring be’ ni nge pilo’ ko re ngongol ney nib kireb. Fare thin u Proverbs 6:30-35 e ma tamilangnag ni rayog ni nge runguy e girdi’ be’ ni ke moro’ro’ ni bochan e ke yib e bilig ngak, machane yad ra fanenikay e en ni ke un ko ngongol ko darngal ya ba kireb gum’irchaen. Be “gafgownag ir [ara yafas rok].” Ma rogon e Motochiyel rok Moses e ngan thang e fan rok faanem ni ke un ko ngongol ko darngal. (Levitikus 20:10) Be’ ni ra un ko ngongol ko darngal e ke k’aring e amith ngak yugu boch e girdi’ ni bochan e pi n’en ni be yim’ ni bochan, ma en ni dabi kalngan’ ko denen rok e dabki par nib t’uf rok Got ma yira tharbog ko ulung ni Kristiano.

Ngii Par e Nangan’ Rom ni Dariy Ban’en ni Be Magawonnag

15. Uw rarogon e nangan’ ni “gowa kan urfiy nga ba wasey nib gowel”?

¹⁵ Faanra nguuda pared ni gad ba t’uf rok Got ma thingar dab da paged e nangan’ rodad ni nge mecham ko denen. Thingari dabi fel’ u wan’dad e ngongol ko fayleng, ma thingar da ayuwgad ko piin ni gad ra mel’eg ni ngada chaggad ngorad, ara pi n’en ni gad ra beeg, ara fafel ni gad ra un ngay. I ginangdad Paul ni gaar: “Boch e girdi’ e bay ra n’iged e michan’ rorad ngak Kristus ko tin tomren e rran; mi yad fol ko pi kan ni yad ma lifith l’ugunrad, ni aram e kar folgad ko machib rok e pi moonyan’. Pi machib ney e yib rok e sabanban ko girdi’ ni yad ma lifith l’ugunrad, ni lanin’rad e gowa ke yim’ ya dakir yog ngorad e kireb ni yad be rin’, ni gowa kan urfiy lanin’rad nga ba wasey nib gowel.” (1 Timothy 4:1, 2) Nangan’ ni “gowa kan urfiy nga ba wasey nib gowel” e bod e fath u bang ko dowef ni dariy e thamtham riy. Ba nangan’ ni aram rogon e dabi yog ngodad ni ngada ayuwgad ko piin ni kar thaygad ko machib yad be togopluw ngay, ara dabi ginangdad ni faan gad ra chugur ko pi n’en ni ra kirebnag e michan’ rodad.

16. Mang fan ni ba ga’ fan ni nge beech e nangan’ rodad?

¹⁶ Yafos ni manemus e ra yan u rogon e nangan’ rodad ni dariy ban’en ni be magawonnag. (1 Peter 3:21) Ke beech e nangan’ rodad ni bochan e ke mich e biyul rok Jesus u wan’dad, ya “nge yog nda pigpiggad ngak fare Got ni be par nib fos.” (Hebrews 9:13, 14) Faan gad ra denen ni pumdad, ma ra tagan e nangan’ rodad ma gathi ka gad e girdi’ nib beech ni ke bung rogodad ni ngada pigpiggad ngak Got. (Titus 1:15) Machane rayog ni nge beech e nangan’ rodad ni faanra ayuwegdad Jehovah.

Yugu Boch e Kanawo’ ni Ngada Paloggad ko Ngongol nib Kireb

17. Mang e ra yog ngom ni faan ga ra ‘fol rok Jehovah nib fel’ rogon’?

¹⁷ ‘Ngari mu fol rok Jehovah,’ ni bod rogon ni rin’ Kaleb ni be’ nu Israel kakrom. (Deuteronomy 1:34-36) Mu rin’ e pi n’en ni tay Jehovah chilen ni ngam rin’, ma dab mu un ko “abich u tebel rok e pi moonyan’.” (1 Korinth 10:21) Dab mu motoyil ngak e piin ni kar thaygad ko machib yad be togopluw ngay. Mu tay fan e ggan ni machib ni bay ko tebel rok Jehovah, ma dabiyog ni nge bannagem e pi tamachib ni yugu ban’en ara nge bannagem e pi kan nib kireb. (Efesus 6:12; Jude 3, 4) Mu tiyan’um ko tirok Got ban’en, ni bod e fol Bible, nge muulung rodad, nge machib u mit e tabinaw. Ga ra felfelan’ ni faan ga ra fol rok Jehovah ma boor ban’en ni ga be rin’ ni fan ngak Somol.​—1 Korinth 15:58.

18. Ra uw rogon e ngongol rom ni faanra bay madgun Got u wun’um?

¹⁸ Mu turguy u wun’um ni nguum “pigpig ngak Got ma ga be meybil ngak u fithik’ e ta’ fan nge mudugdag.” (Hebrews 12:28) Re mudugdag ney e aram e liyor nge siro’ ni gad ma tay ngak Jehovah, ma re liyor ara mudugdag ney e ra ayuwegdad ni ngada paloggad ko ngongol nib kireb. Ma re mudugdag ney e ra ayuwegem ni ngam ngongol nrogon e fonow rok Peter ngak e piin ni kan dugliyrad ni gaar: ‘Gimed ma pining Got ni Chitamangimed, ni ir e ma pufthinnag urngin e girdi’ nder ma laniyan’, nra be’ ma be yan u rogon e tin ni i rin’; aram fan nthingar mu pired ni n’umngin e yafos romed u roy u fayleng ni gimed be liyor ngak.’​—1 Peter 1:17.

19. Mang fan ni nguum maruweliy e pi n’en ni ga be fil ko Thin Rok Got?

¹⁹ Gubin ngiyal’ ma nguum maruweliy e pi n’en ni ga be fil ko Thin Rok Got. Re n’ey e ra ayuwegem ni ngam palog ko denen ni rib gel e kireb riy ya ga bay u fithik’ e piin ni “kar filed rogon ni ngar nanged e tin nib fel’ ko tin nib kireb.” (Hebrews 5:14) Mu ayuw ko thin ni ga ra yog ma kum ayuw ko ngongol rom ni ga be tiyan’um ni ngam ngongol nrogon e piin nib gonop ni ga be fanay e tayim rom nrogon ya tiney e rran e mmo’maw’. “Ngam guy rogon ngam nang e n’en nib m’agan’ Somol ngay ni ngam rin’,” ma aram e nguum rin’.​—Efesus 5:15-17; 2 Peter 3:17.

20. Mang fan ni nge dab da chogowgad?

²⁰ Mu chuweg e chogow u lanin’um​—ara dab mu chogownag e pi n’en ni fen yugu boch e girdi’. Be gaar reb Fa Ragag i Motochiyel: “Dab mu guy e naun rok be’ me awan’um ngak faanem ni bochan e kam chogownag e naun rok. Dab mu guy e ppin rok, ara pi sib rok, ara garbaw rok, ara donkey rok, ara ban’en ni fen faanem me awan’um ngak ni bochan e kam chogownag e tin ni ba’ rok.” (Exodus 20:17) Re motochiyel ney e ke yororiy e naun rok be’, ara ppin rok, ara pi tapigpig rok, ara pi gamanman rok. Machane bin ni ba ga’ fan riy e i yog Jesus ni chogow e ma alitnag e girdi’.​—Mark 7:20-23.

21, 22. Mang boch ban’en ni rayog ni nge rin’ be’ ni Kristiano ya nge siy i un ko denen?

²¹ Mu ayuw ya nge dabi waliyem e tin ni ga be ar’arnag ngam un ko denen. I gaar James ni gachalpen Jesus: “Machane pi n’en ni ma waliy e girdi’ nge denen e ma yib ngak e en ni pag ir ko n’en nib kireb ni be ar’arnag nge waliy faanem nge aw ko wup; ma aram me diyen e tin nib kireb ni be ar’arnag nge gargeleg e denen; ma faani ilal e denen nge mus nga rogon me gargeleg e yam’.” (James 1:14, 15) Susun, faanra bay e magawon rok be’ kakrom ni yugu ma chingnag, ma sana ra turguy e chiney ni nge dariy e alkul u tabinaw rok. Ma faanra bay be’ ni ma maruwel u taabang rok be’ ni gathi mabgol rok, ma sana ra turguy ni nge maruwel u yugu bang u taban e maruwel ya nge dabi waliy ni nge un ko denen, ara sana ra turguy ni nge thilyeg e maruwel rok.​—Proverbs 6:23-28.

²² Dab mu un nga ban’en ni ir tapgin ni ngam un ko denen. Ga ra gosgosnag be’ ni gathi mabgol rom, ara yugu ga ra lemnag e tin nib golong ban’en ma rayog ni nge waliyem ko ngongol ko darngal. Ra lifith be’ l’igin ko tin ni dariy fan ban’en ma rayog ni nge lifith l’igin ko tin ni ba ga’ fan ban’en me mecham ngay ni nge lifith l’igin. Ra iring be’ ban’en ni dariy fan, ma rayog ni nge mecham e nangan’ rok ngay me pag ni nge iring e tin ni ba ga’ ban’en. Ra tabab be’ ni nge motoyil ko thin rok e piin ni kar thaygad ko machib ma yad togopluw ngay, ma aram tabolngin ni nge un i togopluw ko machib.​—Proverbs 11:9; Revelation 21:8.

Ra Uw Rogon ni Faanra Kam Denen?

23, 24. Mang ayuw ni bay ko thin u 2 Kronicles 6:29, 30 nge Proverbs 28:13?

²³ Urngin e girdi’ e dar flontgad, ma yad tadenen. (Eklesiastes 7:20) Machane faanra kam denen nib gel, ma rayog ni nge gapas lanin’um ko meybil rok Solomon ni Pilung u nap’an ni kan yibilay e tempel rok Jehovah. I meybil Solomon ngak Got ni gaar: “Yugu de mutrug e meybil, ara yugu de mutrug e wenig ni ra tay be’ ara ra tay piyu Israel ni girdi’ rom, ya ra be’ ma manang e magawon rok ara amith ni be tay; ma nap’an ni ra meybil ni be sap ko re naun ney, ma thingar mu motoyil ko meybil rorad ni ga be par u tharmiy ni tafenam, ma thingar mu n’ag fan e denen rorad ma ga tow’athnagrad ni ra be’ ma rogon nib puluw ko urngin ni ma rin’, ya ga manang e n’en ni bay u gum’ircharad (ya ke mus ni goo gur e ga manang e n’en ni bay u gum’irchaen pi fak e girdi’).”​—2 Kronicles 6:29, 30, NW.

²⁴ Arrogon, manang Got gumir’chaen e girdi’ ma ma n’ag fan e denen. Be gaar Proverbs 28:13 (NW): “Dabi m’ag e maruwel rok e en ni be mithag e pi denen rok, machane yira runguy e en ni ra tamilangnag e pi denen rok me pag e kireb rok.” Faanra kalngan’ be’ me tamilangnag e denen rok me pag e denen rok ma aram e ra runguy Got faanem. Machane mang e ra ayuwegem ni nguum par ni gab t’uf rok Got ni faanra kari war e michan’ rom?

Uw Rogon ni Ga Ra Fulweg?

• Uw rogon nrayog ni nguuda pared ni gadad ba t’uf rok Got?

• Uw rogon ni ra ayuwegdad e t’ufeg rodad ngak Got nge Kristus ni nge siy da uned ko kanawoen e denen?

• Mang fan ni t’ufeg rodad ngak yugu boch e girdi’ e ra ayuwegdad ni nge dab da uned ko ngongol ko darngal?

• Mang boch e kanawo’ ni nge siy da uned ko denen?

[Picture on page 7]

I tamilangnag Jude rogon ni nguuda pared ni gadad ba t’uf rok Got

[Picture on page 9]

Faanra dar e mabgol mab gel e gafgow rok fa en ni mabgol ni de bucheg ban’en mab gel e amith rok e bitir

[Picture on page 10]

Bod Kaleb ni kam turguy u wun’um ni nguum fol rok Jehovah, fa?

[Picture on page 11]

Nguum meybil ni gubin ngiyal’ ya nge yog ni ngam gel ko pi n’en ni ma waliyey ko denen