Mang ni Ngan Rin’ e Tin nib Mat’aw?

BE’ NIB skul e ba’ ba ngiyal’ ni gaar: “Ya yugu ra gu be yim’ ni bochan ni nggu rin’ e tin nib fel’, ma dabiyog rog ni gu rin’. Dagur rin’ e tin nib fel’ ni ir e gub adag ni nggu rin’; machane gu be rin’ e tin nib kireb ni ir e dabug ni nggu rin’.” Mang fan nib mo’maw’ ni ngan rin’ e tin nib fel’? I weliy ni gaar: “Kug pirieg ni ba’ reb e motochiyel u fithik’ag ni be maruwel ni baaray rogon: faanra gub adag ni nggu rin’ e tin nib fel’, ma ke mus ntin nib kireb e rayog ni gu rin’. Lanin’ug e ri ba adag fare motochiyel rok Got. Machane reb e motochiyel nib thil ko biney e gu be guy ni be maruwel u fithik’ i dowag reb e motochiyel ni be togopuluw ko bin baaram e motochiyel ni ba adag lanin’ug. Ir e ke tiyeg ni gag e kalbus ko tin ni ba adag e denen ni ir e be maruwel u fithik’ i dowag.”​—Roma 7:18, 19, 21-23.

Pi thin ney ni yoloy Paul ni apostal, e gonap’an 2,000 e duw ni ke yan, ke weliy ko mang fan nib mo’maw’ ni nge rin’ e girdi’ nde flont e tin nib fel’. Rogon ni ngan fol ko kenggin e motochiyel, e ba t’uf e athamgil u nap’an nra yib e magawon. Ffel’ ni ngada fithed ko, Mang ni ba ga’ fan ni ngan rin’ e tin nib mat’aw?

Mu lemnag ko mang e be yog e Bible u murung’agen e gabul nge langlath ko girdi’ nib mat’aw. Psalm 37:37, 38, e gaar: “Mup’ owchem ngak e en nib fel’, mu um yaliy e tin ni be rin’ e en nib mat’aw; be’ ni ba adag e gapas e bay pi fak ni aram e piin ni owchen; machane piin ni tadenen e bay nthang owcherad, ma piin ni owcherad e bay ni thangrad.” Ma Proverbs 2:21, 22 (NW) e gaar: “Piin nib fel’ e ngongol rorad e yad ra par u fayleng, ma piin ni dariy e kireb ni kan pirieg rorad e yad ra par ni dariy n’umngin nap’an. Machane piin ni yad ba kireb, e ran thirifrad u but’; ma piin nib sasalap, e ran chuwegrad riy.”

Pi n’ey nge ku boch ni kan pirieg u Bible e be ayuwegdad ni ngada leked e tin nib m’agan’ Got ngay.