Ga Ma Felan’ Ko “Fare Motochiyel Rok Jehovah”?

“Ba felfelan’ e cha’ . . . [ni] ma felan’ ko fare motochiyel rok Jehovah.”​—PSALM 1:1, 2, NW.

1. Mang fan ni gad ba felfelan’ ni gadad e pi tapigpig rok Jehovah?

MA AYUWEGDAD Jehovah ma ma taw’athnagdad ni gadad e pi tapigpig rok nib yul’yul’. Riyul’, ni gad ma mada’nag boor e skeng. Machane yugu aram rogon, riyul’ ni ku ma yib e felfelan’ ngodad. Dabni gin ngay, ya gad ma pigpig ngak fare “Got ni ba felfelan’,” ma kan ni thothup rok e ma sunmiy e felfelan’ nga lan gum’irchadad. (1 Timothy 1:11, NW; Galatia 5:22) Felfelan’ e ma yib ngak be’ nbochan bay ban’en ni be sonnag ara keb ngak ban’en nib fel’. Ma Chitamangidad nu tharmiy e ba mutrug ni ma pi’ ngodad e pi taw’ath nib fel’. (James 1:17) Dabni gin ngay ni gad ba felfelan’!

2. Bin ngan e psalms e gad ra weliy murung’agen?

² Kan tamilangnag e felfelan’ u lan fare babyor ni Psalms. Ni bod e Psalms 1 nge 2, ni ereray e thin ni bay riy. Pi gachalpen Jesus kakrom e ke michan’rad ni David ni Pilung nu Israel e ir e ke yoloy e bin l’agruw e psalm. (Acts 4:25, 26) Cha’ ni yoloy e bin som’mon e psalm ni da nog fithingan e tababnag e tang rok ni kan thagthagnag ko thin ni gaar: “Ba felan’ e cha’ ni der ma fol ko fonow rok e piin nib kireb.” (Psalm 1:1) U lan e re article ney nge fare article ni migid, e ngada guyed ko uw rogon ni be pi’ e Psalms 1 nge 2 fan ni nge felan’dad.

Fare Kiy ko Felfelan’

3. Rogon ni yog ko Psalm 1:1, mang boch i fan ni en ma fol ko motochiyel rok Got e ba felfelan’?

³ Bin 1 e Psalm e be dag ko mang fan ni cha’ ni ma fol ko motochiyel rok Got e ba falfalan’. Be tang fare psalmist ni be weliy boch i fan e re felfelan’ ney ni gaar: “Ba felfelan’ e cha’ ni der ma fol ko fonow rok e girdi’ nib kireb, ma der ma sak’iy u kanawo’ rok e girdi’ ni tadenen, ma der ma par nga tagil’ e girdi’ nib tamoning.”​—Psalm 1:1, NW.

4. Mang wo’en e yafas e i fol Zekariah nge Elizabeth riy?

⁴ Rogon ni nge yib e felfelan’ ngodad nib riyul’, thingarda folgad ko motochiyel rok Jehovah nib mat’aw. Zekariah nge Elizabeth, ni kar taw’athgow kar mangew gallabthir rok John ni Tataufe, ni “ur pirew nib fel’ e ngongol rorow u p’eowchen Got, ma yow be fol ko tin ni ke yog Somol nge pi motochiyel rok.” (Luke 1:5, 6) Rayog ni ngeb e felfelan’ ngodad nfaan gad ra fol ko tin kar rin’ew ma ri dabda folgad ko ‘fonow rok e piin nib kireb’ ara ngada paged ni fonow rorad nib kireb e ra pow’iydad.

5. Mang e rayog ni nge ayuwegdad ma gad ra siyeg “fare kanawo’ ko piin tadenen”?

⁵ Faanra dabda fanayed e lem ko girdi’ nib kireb, ma dabda ‘sak’iygad ko kanawo’ rok e girdi’ ni tadenen.’ Tin riyul’ riy, e dab darod ko gin ni yad ma yan riy ni gubin ngiyal’​—ni aram e gin’en ni yima dag e ngongol ni darngal riy ara gin’en ni yimanang ni yima rin’ e tin nib kireb riy. Ma uw rogon ni faanra kan wawliydad ni ngada uned ngak e piin tadenen ko ngongol rorad nib kireb? Me ere ngada meybilgad ku Got ni nge ayuwegdad ma rayog ni ngad folgad ko thin rok Paul ni apostal ni gaar: “Dab mu guyed rogon ni ngam pachgad ngak e piin nde mich Got u wan’rad nguum maruwelgad u taabang nib taareb lanin’med, ya dabiyog. Ra diin me taareban’ e tin nib mat’aw nge tin nib kireb? Ra diin me par e tamilang nge talumor u taabang?” (2 Korinth 6:14) Faanra ngada pagedan’dad ngak Got ma “ba machalbog gum’irchadad,” ma dabda fanayed e lem nge kanawoen e yafas rok e piin ni tadenen ma nge par nib biech e lem rodad nge tin gad baadag ni ngada rin’ed, nge “michan’ nib yul’yul’.”​—Matthew 5:8; 1 Timothy 1:5.

6. Mang fan ni thingarda kol ayuwgad rok e piin tamoning?

⁶ Ra ngan felfelan’nag Jehovah, ma ‘thingar dabda pared nga tagil’ e piin tamoning.’ Boch e girdi’ e ma moningnag e ngongol nib puluw ko motochiyel rok Got, machane ngiyal’ ney ni “tin tomren e rran,” ma piin ni yad e Kristiano kafram ma kar digeyed e tin riyul’ e baga’ ni yad ma moningnagey nrib gel. I ginang Peter ni apostal e pi walag ni gaar: “Pi tafager rog, ni gimed ba t’uf rog! . . . Bin som’mon e thingar mu nanged ni tin tomuren e rran e bay yib i m’ug boch e girdi’ riy ni tin ni yad be yim’ ni bochan e ir e be gagiyegnag pangirad. Bay ur moninggad ngomed ni be lungurad, “I yog faram ni bay sul, er rogon ni yog fa danga’? Ere ba uw? Chitamangidad e kar m’ad, machane urngin ban’en ni ka be par ni ka rogon ni ka nap’an e ngiyal’ ni sum e fayleng riy ke mada’ ko chiney!’” (2 Peter 3:1-4) Faanra ri dabda ‘pared nga tagil’ e piin tamoning,’ ma rayog ni ngada siyeged fare gafgow nib gel nib mudugil ni bayi yib ngorad.​—Proverbs 1:22-27.

7. Mang fan ni thingarda motoyilgad ko thin ni bay ko Psalm 1:1?

⁷ Faanra dabda folgad ko tin som’mon e thin ko Psalm 1, ma ra mul u pa’dad e tirok Got ban’en ni kad feked u daken e fol Bible. Tin riyul riy, e rayog ni ngari kireb e yafas rodad. Ra tabab ni nge mul u pa’dad e tirok Got ban’en nfaanra ngad folgad ko fonow ko girdi’ nib kireb. Ma sana gad ra chag ngorad u gubin ngiyal’. Boch nga ram, ma rayog ni ngad manged piin tamoning ma dakuriy e michan’ rodad. Ba gagiyel, ni ngan fager ko girdi’ nib kireb e ra mon’eg e lem nib kireb u fithik’dad ma ra kirebnag e tha’ u thildad Jehovah Got. (1 Korinth 15:33; James 4:4) Yibe athapeg ni dabda paged ni nge buch ban’en ni aram rogon rodad!

8. Mang e ra ayuwegdad ma rayog ni ngad tedan’dad ko tirok Got ban’en?

⁸ Meybil e ra ayuwegdad ma rayog ni ngad tedan’dad ko tirok Got ma gad ra siyeg e chag ko girdi’ nib kireb. I yoloy Paul ni gaar, “Dariy ban’en ni nge magafan’med ngay, machane u fithik’ urngin ban’en mu daken e meybil nge ngan pining e magar ma ngam weliyed ngak Got e tin nib t’uf romed; ma gapas rok Got ni dabi taw urngin e lem ngay e ra matanagiy gum’irchamed nge gelngin e lem romed u daken Jesus Kristus.” Fare apostal e ke pi’ e athamgil nga lanin’uy ni ngan fal’eg i lemnag e tin nib riyul’, nge tin nib ga’ fan, nge tin nib mat’aw ban’en, nge tin machalbog, nge tin ka nog e fel’ ngay, nge tin nib fel’, nge ngongol nib fel’, nge tin ni yima pining e sorok ngay. (Filippi 4:6-8, NW) Manga yugu uda ngongolgad nib puluw ko fonow rok Paul ma dabda boded e n’en ni ma rin’ e girdi’ nib kireb.

9. Yugu aram rogon ni ngada siyeged e ngongol nib kireb, ma uw rogon ni ngad guyed rogon ni ngad ayuweged urngin mit e girdi’?

⁹ Yugu aram rogon ni dabkura uned i rin’ e ngongol nib kireb, ma gad ma machib ngak boch e girdi’ nib fel’ rogon, ni bod ni i weliy Paul ni apostal ngak Felix ni fare Governor nu Roma “murung’agen e tin nib mat’aw ban’en nge t’ar laniyan’ nge fare rran ko pufthin ni bay yib.” (Acts 24:24, 25; Kolose 4:6) Gad ma machibnag fare thin nib fel’ ko Gil’ilungun ngak urngin e girdi, ma gad ma gol ngorad. Ma kad pagedan’dad ngay ni piin “nib fel’ u wan’rad e yafas ni manemus” e bayi michan’rad ma ra felan’rad ko motochiyel rok Got.​—Acts 13:48, NW.

Ba Felan’ ko Motochiyel rok Jehovah

10. Mang e ra ayuweg ni nge mit e Thin rok Got nga lanin’dad nge gum’ichadad u nap’an ni gad be fil’ ban’en ni goo gadad?

¹⁰ Miki weliy fare psalmist murung’agen be’ nib felfelan’ ni gaar: “Ba fel’ fare motochiyel rok Jehovah u wan’, ma ma bieg e motochiyel rok nib achichig laman ni rran nge nep’.” (Psalm 1:2) Gadad e pi tapigpig rok Got, e nge ‘fel’ fare motochiyel rok Jehovah u wan’dad.’ Ngiyal’ ni rayog, ma nap’an ni gad be fil ban’en ni goo gadad ni gad be fal’eg i lemnag, ma rayog ni ngada bieged nib “achichig lamdad,” ni nga dogned fapi thin ni be yan lamdad. Gad ra rin’ e n’en ni aram rogon u nap’an ni gad be bieg bang ko Bible ma ra ayuweg ni nge par u lanin’dad nge gum’irchadad ni dabki chuw.

11. Mang fan ni thingarda bieged e Bible ni “rran nge nep’”?

¹¹ “Fare tapigpig nib yul’yul’ mab gonop” e ke pi’ e athamgil nga lanin’dad ni ngada bieged e Bible ni gubin e rran. (Matthew 24:45) Bochan ni ri gad baadag ni ngari tamilang u wan’dad e thin rok Jehovah ni fan ko girdi’, ma ffel ni ngada bieged e Bible ni rran nge nep’”​—arrogon, ni musko ngiyal’ ni dabiyog ni ngada molod nbochan ba’ boch e magawon. I fonownagdad Peter ni gaar: “Ni bod e bitir ni kefin ni gargeleg, ngam maruweliyed ni nge yib lamen e milik ngomed ni ba’ ko fare thin, ya u daken e re n’en ma ga ra mon’og ngam thap ngak Got.” (1 Peter 2:1, 2) Ma yib e felfelan’ ngom ni ga be bieg e Bible ni gubin e rran ma ga be fal’eg i lemnag e thin rok Got nge tin nib m’agan’ ngay ni nep’? Ireray e n’en ni thamiy fare psalmist.​—Psalm 63:6.

12. Mang e gad ra rin’ nfaan gad ra felan’ ko motochiyel rok Jehovah?

¹² Felfelan’ rodad ndariy n’umngin nap’an e be tor nga daken e felfelan’ rodad ko motochiyel rok Got. Ireray e n’en nib flont mab mat’aw, min fol riy e baga’ angin. (Psalm 19:7-11) James ni gachalpen i yoloy ni gaar: “En ni ri ma fal’eg i yaliy ir nga fithik’ fare motochiyel nrib yal’uw ni ir e ma pithig e girdi’ ko kireb, me tiyan’ ngay ma gathi ke mus ni motoyil ngay me pagtalin, ya be maruwel, ma ra felfelan’ ko re maruwel rok ney.” (James 1:25) Faanra riyul’ ni ba fel’ u wan’dad e motochiyel rok Jehovah, ma gubin e rran ni gad ra lemnag e tirok Got ban’en. Riyul’, ni yira k’aringdad ni ngad ‘fal’eged i gay e tirok Got nib toar fan’ ma ngad m’oneged e tin nib peth ko Gil’ilungun ko yafas rodad.​—1 Korinth 2:10-13; Matthew 6:33.

I Ir e Bod Ba Ke Gek’iy

13-15. Uw rogon ma gad ra bod ba ke gek’iy ni kan yung u tooben e gin boor e ran ni ma yib riy?

¹³ Miki weliy fare psalmist murung’agen be’ nib mat’aw ni gaar: “I ir e bod ba ke gek’iy ni kan yung u tooben ba lul’; gubin ngiyal’ ni ma k’uf ko ngiyal’ nra taw ngay ni nge k’uf, ma der mororoy yuwan, ma urngin e tin ni ma ngongliy e ma yan i aw nib fel’.” (Psalm 1:3) Ni bod rogon urngin e girdi’ ni de flont, ma gadad ni gad be pigpig ku Jehovah e ma yib ngodad e skeng nib mo’maw’. (Job 14:1) Rayog ni ngeb ngodad e togopuluw ni yibe gafgownagdad nge yugu boch e skeng ko michan’ rodad nib thil thil. (Matthew 5:10-12) Machane, u daken e ayuw rok Got, ma rayog ni ngad k’adedan’dad ko pi skeng ney nib fel’ rogon, ni bod ba ke gek’iy nib dammal ni rayog ni nge par u nap’an e nifeng nib gel.

¹⁴ Reb e gek’iy ni kan yung ko gin’en nib chuchugur ko gin bay e ran riy ni dabi m’ay e dabi yim’ u nap’an ni ke gel e gawel ara nap’an e yal’. Faanra gadad e girdi’ ni ba’ madgun Got u wan’dad, ma gelngidad e ke yib rok Jehovah Got​—ni en Tabolngin e ran ni dabi m’ay. I ning Paul e ayuw ngak Got ni gaar: U fithik’ urngin ban’en e bay gelngig ni bochan e en [Jehovah] ni ma pi’ gelngig.” (Filippi 4:13) Faanra kan ni thothup rok Jehovah e be pow’iydad ma be gelnagdad ko tirok Got, ma dabda m’ad, ndakuriy wom’engin nib fel’ ara kada m’ad ko tirok Got. Ma yib wom’engidad ko pigpig ku Got maku gad ma dag wom’engin e kan ni thothup.​—Jeremiah 17:7, 8; Galatia 5:22, 23.

¹⁵ Bochan be fanay fare psalmist fare thin ni Hebrew ni kan thiliyeg ni “taareb rogon,” ma aram be fanay fare psalmist e simile. Be taareb rogonnag l’agruw ban’en nib thil thil, machane bay ban’en nib taareb rogon rorow. Girdi’ e bathil ko gek’iy, machane baken e gek’iy nib dammal ni kan yung u tooben e ran e ba tamilang ni ke puguran ngak fare psalmist e piin ni kar mon’oggad ko tirok Got ya “kar felan’gad ko fare motochiyel rok Jehovah.” Faanra ba fel’ e motochiyel rok Got u wan’dad, ma ra yoor e rran rodad ni bod baken e gek’iy. Tin riyul’ riy, e rayog ni ngada pared nib fas ni manemus.​—John 17:3.

16. Mang fan nge uw rogon ni ‘urngin e tin ni gad ma ngongliy e ra yan i aw nib fel’?

¹⁶ Gad ra lek e kanawo’ nib mat’aw, ma ra ayuwegdad Jehovah ni ngad k’adedan’dad ko pi skeng nge magawon. Gad ra felfelan’ ma ma yib wom’engidad ko pigpig ku Got. (Matthew 13:23; Luke 8:15) ‘Urngin ban’en ni gad ra rin’ ma ba fel’ rogon ya bochan ni n’en ni ri gad be nameg ni ngada rin’ed e tin nib m’agan’ Jehovah ngay. Bochan e ti nib m’agan’ ngay e gubin ngiyal’ ni ba’ angin ma ba fel’ u wan’dad e motochiyel rok, ma aram e gad be mon’og ko tirok Got. (Genesis 39:23; Joshua 1:7, 8; Isaiah 55:11) Ma riyul’ ni aram rogon ni musko ngiyal’ ni keb e gafgow ngodad.​—Psalm 112:1-3; 3 John 2.

Gowa ke Mon’og e Piin nib Kireb

17, 18. (a) Ke taareb rogonnag fare psalmist e en nib kireb ko mang? (b) Faanra en nib kireb e ke yoor e chugum rok, ma mang fan ndariy e pagan’ rorad ni manemus?

¹⁷ Uw rogon ma yafas ko piin nib kireb e rib thil ko piin nib mat’aw! Piin nib kireb e sana ra yoor e chugum rorad ni ba’ n’umngin nap’an, machane dar ma mon’og ko tirok Got. Thin ko fare psalmist e ki tamilangnag e re n’ey ni be gaar: “Piin nib kireb e gathi aram rogon, ya yad bod fiteyru’ e grain ni ra aw e nifeng ngay me changegnag.” (Psalm 1:4, 5) Mu lemnag ni be gaar fare psalmist ni, “piin nib kireb e gathi aram rogon.” Fan e re ne’m ni yog e yad bathil ko girdi’ nib mat’aw, ni kan taarebnagrad ko pi gek’iy ni boor wom’engin, ma ra par nib n’uw nap’an.

¹⁸ Faanra ke yoor e chugum ko piin nib kireb, ma dariy e pagan’ rorad ni manemus. (Psalm 37:16; 73:3, 12) Yad bod fare pumoon ko fanathin rok Jesus ni be’ ni ba fel’ rogon ma de puluw rogon ni ma lemnag ban’en ni weliy Jesus e re fanathin nem u nap’an ni ka nog ngak ni ir e nge turguy ko n’en ni ke pag fare matam ngak gal fak. I yog Jesus ngak e girdi’ ni ur moyed e ngiyal’ nem ni gaar: “Mu ayuwgad mi gimed guy rogomed rok urngin mit e chogow; ya bin riyul’ e yafas ku be’ e gathi ni ngongliy ko pi ne’n ni ir e mmil suwon ngak faanem, ndemtrug rogon feni yoor ban’en rok.” I fanathinnag Jesus e re n’en ney ni yog ni fare gi binaw ku be’ nib fel’ rogon e ke yib e ggan riy ni boor ma arfan ni ke lemnag ni nge buthug e pi naun ni tafen e ggan rok ya nge toy boch e naun ni kab ga’ ko tinem ni nge chaariy urngin ban’en rok nib fel’ ngay. Me finey e re pumoon nem ni nge abich, ma be garbod, ma nge rin’ e tin baadag. Machane ke yog Got ngak ni gaar: “Ri gab balyang! Nep’ ney e ra aw e fan rom; me mini’ e bayi fek urngin e pi ne’y ni kam chaariy?” Miki gelnag Jesus fan e thin rok, me yog ni gaar: “Ereray rogon e piin ni boor ban’en ni kar kunuyed ke yoor ban’en rorad, machane de yoor ban’en rorad u p’eowchen Got.”​—Luke 12:13-21.

19, 20. (a) Mu weliy rogon ni yima l’uf fiteyru’ e grain kakrom nge rogon ni nge changeg fiteyru’. (b) Mang fan ni kan taareb rogonnag e en nib kireb ko fiteyru’ e grain?

¹⁹ En nib kireb e “de fel’ rogon u puluwon Got.” Arfan, ni dariy e pagan’ rorad ma de mudugil e par rorad ni bod fare fiteyru’ e grain nib gilgith, ni ma upunguy e grain. Kakrom, e tomren ni kan kunkunuy e grain, min fek ko gin ni yima chuweg fiteyru’ riy, ni aram e gin nib tagapas mab tolang. Mu rom e bay ban’en ni bay e malang ara wasey nib m’uth u tanggin ma ra giringiy e gamanman nge yan u daken e grain ni fan ni ngan bilbilig paangin min luf fare kernels ko fiteyru’. Ngemu’, min fanay e winnowing shovel min fek fapi grain ni ka ba’ paangin nge fiteyru’ nga nin’ nga lang nga mit e nifeng. (Isaiah 30:24) Me mul fapi kernels nga but’ biyay, me fek e nifeng fare paangin nga barba’ i charen me changegnag fiteyru’ nge yan nga bang. (Ruth 3:2) Tomren ni kan ta’ fare grain ko fare n’en ni ma kieg e malang nib achichig nge boch ban’en ni de t’uf, ma aram rayog ni ngan chaariy fa ngan bilig. (Luke 22:31) Machane dakuriy fare fiteyru’.

²⁰ Ni bod ni ra mul e pi kernels nga but’ min chaariy ma fiteyru’ e ke changegnag e nifeng nga bang, ere ku be’ nib mat’aw e ra par ma piin nib kireb e yira thang. Machane, riyul’, ni gad ba felfelan’ ni dabi n’uw nap’an ma piin ni ma rin’ e tin nib kireb e ra m’ay ni manemus. Ngiyal’ ni kan chuweg e pi cha’ nem, ma yira flaabnag nib gel e girdi’ ni ke felfelan’ ko fare motochiyel rok Jehovah. Tin riyul’ riy, e girdi’ ni ma fol e ra yog ngorad e taw’ath ni yafas ni manemus boch nga ram.​—Matthew 25:34-46; Roma 6:23.

Fare “Kanawo’ ko Piin nib Mat’aw” nib Flaab

21. Uw rogon ni ke nang Jehovah e ‘piin nib mat’aw’?

²¹ Tin tomren e thin ko bin som’mon e psalm e be gaar: “Manang Jehovah e kanawo’ rok e piin nib mat’aw, machane bayi m’ay e kanawo’ rok e piin nib kireb.” (Psalm 1:6, NW) Uw rogon ma ‘manang Got e kanawo’ rok e piin nib mat’aw’? Faanra gad be fol ko kanawo’ nib mat’aw, me mudugil lanin’dad ni ke naab e Chitamangidad u tharmiy ko u rogon ni gad be fol ko motochiyel rok ma be ta’ ni gadad e pi tapigpig rok ni ba fel’ u wan’. Ngemu’, rayog rodad ni ngada paged urngin e magafan’ rodad ngak ma thingarda yodoromgad ni ba pagan’dad ni ri ma lemnagdad.​—Ezekiel 34:11; 1 Peter 5:6, 7.

22, 23. Mang e ra buch rok e en nib kireb nge en nib mat’aw?

²² “Fare kanawo’ rok e piin nib mat’aw” e ra par ni dariy n’umngin nap’an, machane girdi’ nib kireb ni dabun ni ngan yal’uwegrad e ra m’ay ni bochan e pufthin ni bayi ta’ Jehovah. Ma “kanawo’” rorad ara kanawoen e yafas, e ra m’ay ni bod yad. Rayog ni ngad pagedan’dad nra lebug e thin rok David ni gaar: “Dabki n’uw nap’an, ma bayi chuw e piin nib kireb; ma ra ngam man ngam guy e gin ni ma par riy, ma dabkum pirieg. Machane piin ni yad mmunguy e bay ra tafanayed e fayleng, ma rib gel e felfelan’ rorad riy ya ngari aw e gapas nga dakenrad. Piin nib mat’aw e bayra tafanayed e fayleng, ma bay ra pared u daken ni dariy n’umngin nap’an.”​—Psalm 37:10, 11, 29, NW.

²³ Rib gel e felfelan’ ni ra yib ngodad ni faanra rayog ni ngada pared u paradis u fayleng ko ngiyal’ ni dakuriy e girdi’ nib kireb! Ra yib e gapas nib riyul ngak e piin nib mmunguy nge piin nib mat’aw ya bochan gubin ngiyal’ ni yad “be felan’ ko fare motochiyel rok Jehovah”. Machane u m’on riy, e “thin ni ke yog Jehovah” e thingarni rin’. (Psalm 2:7a) Bin migid e article e ra ayuwegdad ni ngad nanged ko mang e re thin nem ma mang fan e re n’em ngodad nge ngak urngin e girdi’.

Uw Rogon ni Ngam Pi’ e Fulweg?

• Mang fan ni en ma fol ko motochiyel rok Got e ba felfelan’?

• Mang e be dag ni kad felan’gad ko fare motochiyel rok Jehovah?

• Uw rogon ni girdi’ e ra bod ba ke gek’iy ni kan yung u tooben e gin ni boor e ran riy?

• Uw rogon ma kanawo’ rok e en nib mat’aw e bathil ko kanawo’ rok e en nib kireb?

[Picture on page 7]

Meybil e ra ayuwegdad ni dabkuuda chaggad ngak e piin nib kireb

[Picture on page 8]

Mang fan ni en nib mat’aw e bod ba ke gek’iy?