Piin nib Mat’aw e Yad Ra Yog e Sorok Ngak Got ni Manemus

“Be’ nib fel’ e . . . dab ni pagtalin ba ngiyal’ . . . feni gol [“mat’aw,” NW] e der ma thil.”​—PS. 112:6, 9.

1. (a) Mang e dabki n’uw nap’an me fel’ rogon e piin nib yal’uw riy? (b) Mang deer e ke sum ni bochan e re n’ey?

PIIN nib yal’uw u mit Got e dabki n’uw nap’an mi ri fel’ rogorad! Ra yoor ban’en u murung’agen e pi fel’ngin Jehovah nge tin ni ke sunmiy ni yad ra nang mi yad pining e sorok ngak riy. Machane, bay ban’en nrib t’uf ni nge rin’ e piin ni yad baadag ni nge fel’ rogorad ko pi n’ey boch nga m’on, ni aram e rogon ni yog e Psalm 112 e ngar rin’ed e tin nib “yal’uw.” Ere uw rogon ni nge yal’uw e girdi’ ni tadenen u mit Jehovah nib Got nib thothup mab yal’uw? Yugu aram rogon ni gad ma athamgil ni ngad rin’ed e tin nib yal’uw, machane ka gad ma oloboch ni yu ngiyal’ e rib gel e oloboch ni gad ma tay.​—Rom. 3:23; Jas. 3:2.

2. Mang l’agruw e maang’ang ni ngongliy Jehovah u fithik’ e t’ufeg?

² Bay ban’en ni ke rin’ Jehovah ya nge yog ni yal’uw e girdi’ u p’eowchen. Uw rogon ni ke rin’ e re n’em? Som’on e ngal’uweg e yafas rok Jesus ni Fak nrib t’uf rok nga yin be’ nib pin ndawori nang e pumoon ya nge yog ni gargeleg nib girdi’ nib flont. (Luke 1:30-35) Ma tomren ni li’ e pi toogor rok ngem’, miki ngongliy Jehovah reb e maang’ang ni aram e faseg ko yam’ ngki ngal’ ni kan bayay.​—1 Pet. 3:18.

3. Mang fan nrib m’agan’ Got ngay ni nge tow’athnag Fak ko yafas u tharmiy?

³ Ke pi’ Jehovah reb e tow’ath ngak Jesus nde pi’ ngak u nap’an ni immoy u fayleng nib girdi’. Re tow’ath nem e aram e yafas rok u tharmiy. (Heb. 7:15-17, 28) Rib m’agan’ Jehovah ngay ni nge rin’ e re n’em ni bochan e yul’yul’ ni tay Jesus u fithik’ e skeng nib gel ni yib ngak. Ma yul’yul’ ni tay Jesus e aram e fulweg nra pi’ e Chitamangin ko ban ni ke tay Satan ni ke yog ni girdi’ e yad ma pigpig ngak Got ni bochan e nge yog ban’en riy ngorad ma gathi bochan e t’ufeg rorad ngak.​—Prov. 27:11.

4. (a) Nap’an ni sul Jesus nga tharmiy ma mang e rin’? (b) Uw rogon u wan’ Jehovah e n’en ni rin’ Jesus? (c) Uw rogon u wan’um e n’en ni ke rin’ Jehovah nge Jesus ni fan ngom?

⁴ Ku bay ban’en ni rin’ Jesus u nap’an ni sul nga tharmiy. I fek “rachaen” nib tolang puluwon i “yan nga p’eowchen Got ni fan ngodad.” Me m’agan’ e Chitamangin nu tharmiy ko re maligach nem ni pi’ Jesus ni fan ko “denen rodad.” Arfan ni ke yog ni ngad “pigpiggad ngak fare Got ni be par nib fos” nib ‘beech lanin’dad.’ Ere ri bay rogon ni ngad sulod u daken fapi thin ko Psalm 112 ni be gaar: “Ke Sorok Somol”!​—Heb. 9:12-14, 24; 1 John 2:2.

5. (a) Mang e thingar da rin’ed ma gad yal’uw u mit Got? (b) Uw rogon ni kan yarmiy e thin ko Psalm 111 nge 112?

⁵ Ra ngad yal’uwgad u mit Got, ma thingari mich u wan’dad rachaen Jesus ni map’ nga but’. Gubin e rran nthingar da pininged e magar ngak Jehovah ko t’ufeg rok ngodad. (John 3:16) Ku thingar da ululgad i fil e Thin Rok Got ma ud athamgilgad ni ngad ngongolgad u rogon nib puluw ngay. Bay e fonow nrib fel’ ko Psalm 112 ni fan ngak e piin ni yad baadag ni ngar pired nib beech lanin’rad u mit Got. Re tang ney e bay rogon e thin riy ko Psalm 111. Som’on nni yoloy e gali tang ney ko thin ni Hebrew ma l’agruw ni tabab ko fapi thin ni be yog ni ngan ‘Pining e Sorok ngak Somol’ ma l’agruw ni kan yarmiy ni 22 yil’ e thin riy nra ba yil’ ma ke tabab u reb fa 22 e yol ni Hebrew.a

Fan ni Nge Felfelan’uy

6. Uw rogon ni kan tow’athnag fa “en” ni bay madgun Got u wan’ ni kan weliy murung’agen ko Psalm 112?

⁶ “Nge felan’ e en ni bay madgun Somol u wan’, ma rib felfelan’ ngay ni ma folwok ko tin ke yog ni ngan rin’. Pi fak be’ ni pumoon ni ba fel’ e yad ra gel u lan fare nam; ma ra fel’ waathan e piin owchen [“piin nib mat’aw,” NW].” (Ps. 112:1, 2, BT) Nni thagthagnag nga laniyan’ apostal Paul nge yoloy fapi thin ko Psalm 112:9 ngak e Kristiano ko bin som’on e chibog. (Mu beeg e 2 Korinth 9:8, 9.) Rib fel’ rogon ni ke fanathinnag e en ni yoloy e re tang ney rogon e felfelan’ nra tay e piin ni yad ma folwok rok Jesus u fayleng e ngiyal’ ney!

7. (a) Mang fan nib t’uf ni nge yib madgun Got nga laniyan’ e pi tapigpig rok? (b) Susun uw rogon ni nguum lemnag e pi motochiyel rok Got?

⁷ Rogon ni ka nog ko Psalm 112:1 e tiney e Kristiano nriyul’ e ba gel e felfelan’ rorad ni bochan e bay “madgun” Jehovah u wan’rad. Re madgun ney ni bay rorad e ma k’aringrad ni nge dab ra rin’ed ban’en nra dabuy Got maku ir e ma ayuwegrad ni ngar siyeged e lem ko fayleng rok Satan. Ma ‘ri yad ba felfelan’ ngay’ ni ngaur filed e Thin Rok Got ma yad be fol ko pi motochiyel rok. Reb ko pi motochiyel nem e aram fare motochiyel ni ngan machibnag fare thin nib fel’ ni murng’agen Gil’ilungun Got u ga’ngin yang e fayleng. Ere yad be athamgil ni ngar pingeged e girdi’ ko pi nam ngar manged pi gachalpen Jesus mar ginanged e piin nib kireb u murung’agen e pufthin ni bayi tay Got ngak e girdi’ ndabki n’uw nap’an.​—Ezek. 3:17, 18; Matt. 28:19, 20.

8. (a) Uw rogon ni yibe fal’eg waathan e girdi’ rok Got nib yul’yul’ ngak e ngiyal’ ney? (b) Mang e yira fal’eg waathan e piin ni yad be athapeg e par u fayleng riy?

⁸ Bochan ni be fol e pi tapigpig rok Got ko n’en ni kan tay chilen ngorad, ma chiney e ke pag medlip e milyon urngirad. Ere mini’ e rayog ni nge yog ndawori “gel” e girdi’ rok Got u ga’ngin e fayleng? (John 10:16; Rev. 7:9, 14) Nap’an nra rin’ Got e tin nib m’agan’ ngay ma ku ra ‘fal’eg waathrad’! Piin ni yad be athapeg e par u fayleng e yad ra magey nib fas u nap’an “fare gafgow ni baga’” mar manged e “bin nib beech e fayleng” ni “tin nib mat’aw e ngongol e bay i par riy.” Piin ni yad ra magey nib fas u tomren e Armageddon e ra munmun min ‘fal’eg waathrad’ ni ke mun daken. Yad ra moy ko ngiyal’ ni yira faseg e girdi’ ko yam’. Ireray reb e tow’ath nrib fel’! Ma piin ni yad ba “felfelan’ ngay” ni ngar folgad ko pi motochiyel rok Got e ku ra munmun mar flontgad “mi yad un ko flaab rok pi fak Got” ni manemus.​—2 Pet. 3:13; Rom. 8:21.

Yibe Fanay e Chugum ko Tin nib Ba’ Ga’ Fan

9, 10. (a) Uw rogon ni ke fanay e tin riyul’ r Kristiano e tamilangan’ nge gonop rok Got ni bay rorad? (b) Rogon ferad mat’aw e uw rogon nra par ndariy n’umngin nap’an?

⁹ ‘Tabinaw rok e bayi fel rogon me yoor banen riy, ma bayi flaab ni dariy numngin napan. Ke yib e tamilang nga fithik e lumor ni fan ko girdi nib fel, ni fan ko piin nib marunguy, ma ba gol, ma ba yaluw.’ (Ps. 112:3, 4, BT) Immoy boch e tapigpig rok Got kakrom ni boor ban’en rorad. Machane, faanra ngan lemnag ma piin ni yad ba fel’ u wan’ Got e ba fel’ rogorad ko tirok Got ban’en. Bin riyul’ riy e piin ni kar sobut’naged lanin’rad yad be fol rok Got e bay boch i yad nib gafgow ma yima darifannagrad ni bod ni un rin’ u nap’an Jesus. (Luke 4:18; 7:22; John 7:49) Machane, demtrug ko flaab be’ fa danga’, ma rayog ni nge fel’ rogon ko gonop nge tamilangan’ rok Got.​—Matt. 6:20; 1 Tim. 6:18, 19; mu beeg e James 2:5.

¹⁰ Piin ni kan dugliyrad nge piin ni yad ba muun ngorad e darur ted e pi n’ey rorad ya ke gal ramaen e “tamilang” rorad u lan e fayleng rok Satan ni bay u fithik’ e lumor ni “fan ko girdi’ ni ba fel.” Yad be rin’ e re n’ey u daken e ayuw ni yad be pi’ ngak e girdi’ ni nge yog e gonop nge tamilangan’ rok Got ngorad. Pi tatogopuluw e kar gayed rogon ni ngar taleged e machib ni yibe tay machane de yog rorad ya angin e re maruwel ney e ra par ‘ndariy n’umngin nap’an.’ Ra par e pi tapigpig rok Got ni yad ba yul’yul’ u fithik’ e skeng ma rayog e yafas ngorad “ni dariy n’umngin nap’an.”

11, 12. Mang boch e kanawo’ ni ma ayuweg e pi tapigpig rok Got e girdi’ riy ko tin ni bay rorad?

¹¹ Gubin e tapigpig rok Got ni girdien fachi ulung nge fare ulung nib ga’ e kar daged nriyul’ ni yad ba gol ngak e piin nib t’uf e ayuw rorad. Psalm 112:9, BT e be gaar: “Ba gol ngak e piin ke t’uf e ayuw rorad.” Tin riyul’ e Kristiano e ngiyal’ ney e yad ma ayuweg e pi walagrad ni Kristiano nge yug girdi’ ni ke t’uf e ayuw rorad. Nap’an nra yib e yoko’ fa reb e gafgow u bang maku yad ma pi’ e chugum nge ku boch ban’en ni ayuw. Re n’em e ra yibnag e felfelan’ ni bod rogon ni yog Jesus.​—Mu beeg e Acts 20:35; 2 Korinth 9:7.

¹² Reb riy e, mu lemnag urngin e salpiy ni yibe fanay yibe pilyeg e pi babyor ney nga 172 mit e thin ni yooren riy e thin u yu yang nib gafgow e girdi’ riy. Maku reb e ku yibe ngongliy boch e pi babyor ney ni fan ko biling nge malmit.

Rib Gol Mab Yal’uw

13. (a) Mini’ e ngad folwokgad rok u rogon ni ngan gol ngak e girdi’? (b) Uw rogon ni ngad folwokgad rorow?

¹³ “Ba fel’ e en nib gol mab mom ni yima ning ban’en ngak.” (Ps. 112:5, NW) Dabisiy ni ga ma guy ni boch e girdi’ ni ma pi’ e ayuw ngak boch e girdi’ e gathi riyul’ ni yad ba gol. Boch e girdi’ e ma pi’ ban’en ni bochan e ngan nang ni boor ban’en rok. Dabisiy ni dabum ni nge pi’ be’ ni aram rogon e ayuw ngom. Machane, ri ga ra felfelan’ nfaanra ayuwegem be’ nrib gol ni bod Jehovah ni ir faen ni baadag ni ma pi’ ban’en. (Jas. 1:5, 17) Re fel’ngin ney e rib fel’ rogon ni m’ug rok Jesus Kristus. (Mark 1:40-42) Ere, faanra ngad yal’uwgad u mit Got ma thingar ud pied ban’en ni gad ba felfelan’ ngay nib ga’ nnap’an ni gad be guy rogon ni ngad ayuweged e girdi’ ngar nanged Jehovah.

14. Mang boch e kanawo’ ni ‘ngad yal’uwgad riy ko tin gad ma rin’’?

¹⁴ “Ba yal’uw ko tin ma rin’.” (Ps. 112:5, NW) Rogon ni kan yiiynag e, fare tapigpig nib yul’yul’ mab gonop e ma ayuweg e pi n’en nib milfan ngak e Masta rok nrogon nib yal’uw u mit Jehovah. (Mu beeg e Luke 12:42-44.) Rib gagiyel e re n’ey ko fonow ni ma pi’ ngak e piin piilal u lan e ulung ni yu ngiyal’ e yad ma yal’uweg boch ban’en ni ke rin’ be’ nrib gel e kireb riy. Feni yal’uw rogon ni ma rin’ e re tapigpig ney ban’en e ri kub gagiyel ko fonow ni yad ma pi’ nib puluw ko thin nu Bible u rogon i yarmiy e tin ni yima rin’ ko pi ulung i yan, nge tafen e missionary, nge Bethel. Gathi kemus ni yigoo piin piilal e thingar ra ngongolgad nib yal’uw ya ku arrogon gubin e Kristiano nthingar ki yal’uw e ngongol rorad ngak e piin taareb e michan’ rorad nge piin danga’. Ki mada’ nga ngongolen e siyobay maku thingar ra rin’ed nrogon nib yal’uw.​—Mu beeg e Mikah 6:8, 11.

Tow’ath ni Fan ko Piin nib Yal’uw

15, 16. (a) Mang angin e ngongol ni kireb ni ke garer u fayleng ngak e piin nib yal’uw? (b) Mang e ke dugliy e pi tapigpig rok Got ni ngar rin’ed?

¹⁵ “Be nib fel e dariy biid nra magawon; ma dab ni pagtalin ba ngiyal. Der ma rus ni ra rungag e tin ke buch banen; ba gel e michan rok, mma pagan ngak Somol. Der ma magafan ma der ma rus; ya ri manang ni bayi guy e pi toogor rok ni kar wargad.” (Ps. 112:6-8, BT) Dariy ba ngiyal’ ni ke er feni gel e kireb ni bod e ngiyal’ ney. Gad ma rung’ag murung’agen e mahl, nge ngongol ko terrorist, nge boch e m’ar ni fini be sum nge boch ni ke kakrom ma der chuw, maku arrogon e ngongol ni kireb ni kari garer nge gafgow ni be tay e girdi’, nge fayleng ni yibe alitnag. Piin ni yad ba yal’uw u mit Got e dabiyog ndabi yib wenegan e pi n’ey ngorad, machane darur rusgad ko n’en nra buch gabul nge langlath. Kar pired ndarur ‘rusgad’ ma der ‘magafan’rad’ yab pagan’rad ngak Got ni bochan e yad manang ni ke chugur e bin nib beech e fayleng ni tin nib mat’aw e ra par riy. Faanra yib e gafgow ngorad ma rayog ni ngar k’adedan’rad u fithik’ ni bochan e yad ma taga’ nga daken e ayuw rok Jehovah. Dabi pag e girdi’ rok ngar ‘magawongad’ u ban’en, ya ma pi’ gelngirad ni ngar k’adedan’rad riy.​—Fil. 4:13.

¹⁶ Girdi’ rok Got ni yad ba yal’uw e ku thingar ra feked owcherad ko fanenikan ni ma tay e pi tatogopuluw ngorad nge ku boch e thin ni yigoo ban ni yad ma weliy u murung’arad. Machane, dariy reb e pi n’ey nra tal’eg e tin riyul’ e Kristiano ndab kur machibgnaged fare thin nib fel’ ni murung’agen Gil’ilungun Got ni bochan e darur rusgad ni ngar rin’ed e re maruwel ney ni ke pi’ Jehovah ngorad. Ere, dariy e maruwar riy ni chiney ni be chugur i yib e tomur e ra i gel i yan e togopuluw ni yira tay ngak e piin ni yad ba yal’uw. Ra yan i mus rogon e re togopuluw nem ko ngiyal’ ni ke cham Gog nu Magog, ni aram Satan ni Moonyan’, ngak e girdi’ rok Got ni gubin. Ma tomur riy e gad ra ‘guy e pi toogor rodad ni kar wargad’ ko cham ni yira tay ngorad. Ri gad ba tow’ath ni ngad guyed ni ke thothup fithingan Jehovah u ga’ngin e fayleng!​—Ezek. 38:18, 22, 23.

“Nguun Tay Fan”

17. Uw rogon ni yira “tayfan” e piin ni yad ba yal’uw?

¹⁷ Rib gel e felfelan’ riy ni ngad pininged e sorok ngak Jehovah u taabang ndariy e togopuluw rok Moonyan’ nge fayleng rok riy! Gubin e piin ni yad ra par nib yal’uw u mit Jehovah e rayog ni ngar uned i pining e sorok ngak ndariy n’umngin nap’an. Dab ra wargad ya ke micheg Jehovah nri yira “tayfan” e girdi’ rok ni yad ba yal’uw. (Ps. 112:9) Ri yad ra og nga lang ko felfelan’ u nap’an ni yad ra guy ni ke thang Jehovah gubin e piin ni yad ma togopuluw nga mat’awun e gagiyeg rok.

18. Uw rogon nra lebug e tin tomur e thin ko Psalm 112?

¹⁸ “Piin kireb e ra guy ni aray rogon mi yad damumuw; yad ra gat’fiy owcherad u fithik e fanenikan mi yad chuw; tin ur athapeged e ke ma’ nga bang ni manemus.” (Ps. 112:10, BT) Gubin e piin ni ka yad be ulul i togopuluw ko girdi’ rok Got e dabki n’uw nap’an “mi yad chuw” me un e awan nge fanenikan rorad ngorad. N’en ni ur athapeged ni aram e ngar taleged e maruwel rodad e ra m’ay nga bang u nap’an fare “gafgow” nib ga’.​—Matt. 24:21.

19. Mang e rayog ni nge pagan’dad ngay?

¹⁹ Ga ra moy u fithik’ e piin ni yad ra magey nib fas ko ngiyal’ nem, fa? Ma faanra ka mum’ ni bochan e kam m’ar ara kam pilibthir, ma gur, ga ra moy u fithik’ e “piin nib fel’” ni yira fasegrad ko yam’? (Acts 24:15) Faanra um par nib mich u wan’um fare maligach ni biyul ni pi’ Jesus mag folwok rok Jehovah, ni bod ni rin’ faen ni kan weliy murung’agen u Psalm 112, ma rayog ni mog e arrogon ko gali deer ney. (Mu beeg e Efesus 5:1, 2.) Dabi ‘pag Jehovah talin’ e pi girdi’ ney nge tin nib fel’ ni ur rin’ed ya ra par u laniyan’ ndariy n’umngin nap’an.​—Ps. 112:3, 6, 9.

[Footnote]

Deer ni Ngan Fal’eg i Lemnag

• Mang boch i fan ni ngad tolulnaged e “Alleluya”?

• Mang boch ban’en ni be buch e ngiyal’ ney ni be felfelan’ e tin riyul’ e Kristiano ngay?

• Uw rogon ni yira pi’ ban’en me felfelan’ Jehovah ngay?

[Picture on page 27]

Ra ngad yal’uwgad u mit Got, ma thingari mich u wan’dad rachaen Jesus ni map’ nga but’

[Pictures on page 28]

Ayuw ni yima pi’ e rayog ni nguun pi’ ni ayuw ko piin kar gafgowgad nge babyor ni bay e thin nu Bible riy ni yibe ngongliy