Mu Fl’eg Rogon E Yafos Rom Me Fel’ Rogon!

“Ba felan’ e cha’ ni ma siyeg ni nge fol ko fonow rok e girdi’ nib kireb . . . Urngin e tin ni ma ngongliy e ma yan ni aw nib fel’.”​—PSALM 1:1, 3.

1. (a) Uw rogon e fel’ rogon u wan’ e piin fel’ yangaren u fayleng? (b) Mang e be yog e Bible u murung’agen be’ nib fel’ rogon?

FEL’ rogon​—mang fan e re thin nem ngom? Be gaar reb e pagal: “N’en nth’abi ga’ fan ni gu be nameg e gu ra un ko business ma ra fel’ rogon.” Ma reb e rugod e ke gaar: “N’en nth’abi ga’ fan u wan’ug e nge yog reb e tabinaw ngog mu gu pared u fithik’ e falfalan’.” Ma yugu reb e rugod e ke gaar: “Gu ba adag ni nggu par u reb e naun ni condominium, ma nge yog reb e karro nib fel’ ngog . . . Gu be lemnageg ko som’on.” Machane salpiy nge tabinaw, nge maruwel nib fel’ e gathi aram e bin riyul’ e fel rogon. Psalm 1:1-3 e be gaar: “Ba felan’ e cha’ ni ma siyeg ni nge fol ko fonow rok e girdi nib kireb . . . Ma ra beeg e motochiyel rok [Jehovah] ma ma yib e felfelan’ riy ngak . . . Urngin e tin ni ma ngongliy e ma yan i aw nib fel’.”

2. U uw e bay e bin riyul’ e fel’ rogon riy, ma kari mus ni uw rogon nrayog ngodad?

² Be micheg e Bible ban’en ndabiyog ko girdi’ ni ngar pied​—aram e bin riyul’ e fel’ rogon! Machane gathi be weliy u murung’agen e fel’ rogon ko salpiy. Ya be ginangdad e Bible ni gaar: “Ya chogowen e salpiy e ir lik’ngin urngin mit e kireb.” (1 Timothy 6:10) Rayog e bin riyul’ e fel’ rogon ni ngan felan’nag Got​—ma ba muun ngay ni ngan fol ko motochiyel rok Jehovah. Kari mus aram e n’en nrayog ni nge yibnag e bin riyul’ e falfalan’ ma ra fl’eg lanin’uy! Sana dabi adag e girdi’ ni ngar pared u tan e motochiyel rok Jehovah min nog ngorad e n’en ni ngar rin’ed. Machane yog Jesus ni gaar: “Nge felan’ e piin ni kar pirieged u lanin’rad ni ba t’uf rorad e tirok Got ban’en.” (Matthew 5:3, NW) Demtrug ko ga manang fa danga’, ma kan sunumiyem ni ba t’uf rom e tirok Got ban’en​—nib muun ngay ni ngam nang ko mini’ Got ma ngam nang fan e tin nib m’agan’ ngay. Ere kari mus rogon nrayog ni ngam nang e bin riyul’ e falfalan’ e thingar mu nang e pi n’en nib t’uf rom ma ga fol ko “motochiyel rok Jehovah.”

Fan nib T’uf Rodad e Pi Motochiyel rok Got

3. Mang fan nsusun ni ngad falfalan’gad ni ngad paged Jehovah nge ‘gagiyegnag e yan rodad’?

³ I yoloy Jeremiah ni profet ni gaar: “Gu manang, O Jehovah, ni dariy rogon ngak e girdi’ ni nge turguy e yan rok. De mil fan ngak e girdi’ ni be yan ni nge gagiyegnag e yan rok.” (Jeremiah 10:23, NW) Aram rogon urngin e girdi’ ni piin fel’ yangaren nge piin nib ilal. Ya dariy e gonop nge tamilangan’ rodad ni ngad gagiyegnaged e yan rodad; maku dariy mat’awdad ni ngad rin’ed. Be weliy ko Revelation 4:11 ni gaar: “[Jehovah ni Got romad], ba’ rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom. Yi gur e mu sunumiy urngin ban’en, yi gur e mu lemnag mi yad sum ni yad ba fos.” Jehovah e ir e Ani Sunumiydad me ir “tapgin e yafos.” (Psalm 36:9, NW) Ma aram fan ni manang ko susun uw rogon ni ngad fanayed e yafos rodad. Ere ke fl’eg boch e motochiyel ni gathi bochan e dabda pared nib falfalan’, ya nge ayuwegdad ni fan ni nge fel’ rogodad riy. (Isaiah 48:17) Ra mu n’ag e motochiyel rok Got, mab mutrug ni ke buch waatham ma dabi fel’ rogom.

4. Mang fan ni boor e piin fel’ yangaren e kar kirebnaged e yafos rorad?

⁴ Susun, kaamu lemnag ko mang fan ni boor e piin fel’ yangaren e be kireb e yafos rorad ni bochan e e drug nge ngongol ndarngal, nge yugu boch ban’en nib kireb? Psalm 36:1, 2 e be weliy ni gaar: “Ngongol nib kireb e sum u gum’erchaen be’ nib kireb; ma dariy madgun Got u wan’. Ma be lemnag ni be rin’ e tin nib fel’ ma aram e dabiyog ni nge pirieg ni ke oloboch me fanenikay.” Boor e piin ni fel’ yangaren e dariy “madgun Got” u wan’rad, ma aram e kar bannaged yad mi yad lemnag ni dabi yib wenegan nib kireb ngorad ko ngongol rorad nib kireb. Machane thingara dum’gad ko re motchiyel ney ni der ma thil ni be gaar: “Ra be’ ma mit i n’en ni yung e ir e ra t’ar wom’engin. Faanra yung be’ ban’en nga daken e milay’ ni aram e tin nib kireb ni be ar’arnag, ma wom’engin nra yib riy ngak e yam’; ma faanra yung be’ ban’en ni fan ngak fare kan ni thothup, ma wom’engin ni ra yib riy ngak ni kan ni thothup e ke yib rok e yafos ndariy n’umngin nap’an.”​—Galatia 6:7, 8.

‘Ngan Theeg e Pi Rran’

5, 6. (a) Mang fan ni susun ni nge ‘theeg e pi fel’ yangaren e pi rran rorad,’ ma mang fan e re thin nem? (b) Uw rogon ni ngan ‘lemnag e en ni tasunumiy ko ngiyal’ ni ka yab pagel’?

⁵ Uw rogon nrayog ni nge fel’ rogon e yafos rom ma nge yog e “yafos ndariy n’umngin nap’an” ngom? I yoloy Moses ni gaar: “Ke mus ni medlip i ragag e duw n’umngin nap’an, ma be mada’ ko meruk i ragag ni faanra ba gel fithik’ e downgin bagamad . . . Der ma n’uw nap’an me chuw e biney e tamilang u owchemad, ni aram e da kug moyed.” (Psalm 90:10) Sana gathi ri ga ma lemnag u murung’agen e yam’. Ma riyul’ ni boor e piin fel’ yangaren e ma ngongol ni gowa dabiyog ni ngar m’ad. Machane i weliy Moses ni ba ngoch n’umngin nap’an e yafos. Ma gathi dariy e maruwar riy ni gad ra taw ko 70 ara 80 e duw. “Ngiyal’ nge pi n’en ni yugu ma buch” e rayog ni nge taleg e piin nib fel’ yangaren nib fel’ fithik’ i dowrad. (Eklesiastes 9:11) Ere uw rogon ni ga ra fanay e yafos rom e chiney? I meybil Moses ni gaar: “Mu ayuwegmad nggu nanged rogon ni nggu theeged e pi rran romad, nge yog ni yib e gonop ngomad.”​—Psalm 90:12, NW.

⁶ Uw rogon ni ngam theeg e pi rran rom? Gathi susun ni ngam par ni goo ga be lemnag ko uw n’umngin nap’an ni ga ra par nib fos. Ya i yibilay Moses ku Jehovah ni nge fil ngak e girdi’ Rok ko uw rogon ni ngar fanayed e tin ni ka bay e rran rorad u rogon nran n’uf Got. Ga be theeg e pi rran ko yafos rom​—ma ga be lemnag nra reb e rran ma baga’ fan ya ngam fanay ni ngam n’uf Got? Be pi’ e Bible e athamgil nga laniyan’ e piin fel’ yangaren ni gaar: “Dabi magafan’um nga ban’en, ma ga chuweg e kireb ndabi yib ngom; ya ngiyal’ ni ke fel’ yangaren be’ nge ngiyal’ ni kab fel’ fithik’ i dow e mm’ay fan. Ere mu lemnag e en ni sunumiyem ko ngiyal’ ni ka gab pagel.” (Eklesiastes 11:10–12:1) Rogon ni ngam lemnag e Ani Sunumiydad e gathi ke mus ni dab mu pag talin ni ba’ Got. Nap’an ni ke wenig be’ nib kireb ku Jesus ni gaar: “Ri ga ra lemnigeg ko ngiyal’ ni ga ra yib ni gur e kam mang pilung,” ma gathi ke mus ni ba adag ni nge dabi pag Jesus talin fithingan. Ya ba adag ni nge rin’ Jesus ban’en, me faseg ko yam’! (Luke 23:42; mu taarebnag ko Genesis 40:14, 23; Job 14:13.) Ere rogon ni ngan lemnag Jehovah e ngan rin’ ban’en, ngan rin’ e tin nra felan’nag. Rayog ni ngan nog ni ga be lemnag Jehovah?

Dabi Awan’um ko Piin nib Kireb

7. Mang fan ni ke turguy boch e piin fel’ yangaren ni dabkura lemnaged e En ni sunumiyrad? Mu weliy.

⁷ Boor e piin fel’ yangaren e kar turguyed ni ngar paged talin Jehovah ya yad be lemnag ni kaygi pag rogon e pi motochiyel ko Pi Mich. Bay reb e walag u Spain ni ka manang e ngiyal’ ni kab fel’ yangaren ni gaar: “Kug adag e fayleng ya kug lemnag ni kaygi gel e motochiyel ko thin riyul’ mab mo’maw. Ya thingarni par nga but’, min fil e babyor, ma ngan un ko pi muulung, ma ngan m’ag e tie nga kangay, ma gathi aram e pi n’en ni gu ba adag ni nggu rin’.” Yu ngiyal’ ma ga be lemnag ni boor ban’en ni dabiyog ni ngam un ngay ni bochan e ga be pigpig ku Got? Sana ga ra gin ngay ni be’ ni ke yoloy boch e thin ko Bible e ku aram rogon e lem rok. Amu pithig e Bible rom ma ga poy e thin ko Psalm 73.

8. Mang fan ni ke awan’ Asaf “ngak e piin ni yad ba uf”?

⁸ Ngada lemnaged e pi thin ko re psalm ney. Ps 73 Verses 2 nge 3 e be gaar: “Machane i chugur ni nguu dol’; rifrif rog e chugur ni nge sirigig, ni bochan e awan’ug ngak e piin ni yad ba uf, ya gguy ni piin nib kireb e boor ban’en rorad.” Rogon ni yog e superscription, ma re thin nem ko psalm e ke yoloy Asaph. Ir e girdi’ nu Levi ma ma chubeg e musik ma immoy u nap’an David ni Pilung. (1 Kronikles 25:1, 2; 2 Kronikles 29:30) Ke taw’ath ya ke pigpig u lan e tempel rok Got, machane “ke awan’ ” ngak e piin ni ba uf ko tin nib kireb ni yad be rin’. Be m’ug riy ni be yib angin ngorad e tin ni yad be rin’; ma be m’ug riy ni yad be par nib pagan’rad u fithik’ e gapas. Machane rriyul’ ni ‘lem rorad e ke suguy e tin nib kireb ni ke m’ay i t’ar liyben rorad.’ (Ps 73 Verses 5, 7) Yad ra weliy u murung’agen e pi n’en ni kar rin’ed ma ‘yad ba uf.’ (Ps 73 Verse 8) ‘Yad be yog murung’agen Got nu tharmiy nga dalib, ma yad be yog u fithik’ e ufanthin e tin ni nge rin’ e girdi’ nu fayleng,’ ur dariy fannaged urngin ban’en​—u tharmiy nge fayleng.​—Ps 73 Verse 9.

9. Uw rogon nrayog ni nge yan i aw ni boch e pi fel’ yangaren ni Kristiano ko ngiyal’ ney e taareb rogon e lem rorad ku Asaf?

⁹ Sana ku aram e n’en nrayog ni ngan nog u murung’agen e piin ni gimed ma skul. Sana ga ra rung’ag ni yad ba uf ni bochan e kar uned ko ngongol ndarngal, fa mur nib wagey, nge rogon fene elmirin ni kar unumed e alkul mar fanayed e drug. Ngam taarebnag e yafos rorad ni yad be fafel nib elmirin ko yafos rom ko Kristiano nge rogon ni thingar mu par ko kanawo’ nib wen’in, ma sana ga ra “awan’ ngak e piin ni ba uf.” (Matthew 7:13, 14) Bay biyay ni ke weliy Asaf ni gaar: “Gur mm’ay fan ni kug tiyeg ni gub machalbog, ma gu be ayuw gu be par ndagur ngongliy e denen? Got, kam tiyeg gu be gafgow ni kakadabul nge mada’ ko nep’; gubin e kadbul ni ga be gechignigeg.” (Ps 73 Verses 13, 14) Arrogon, ke tabab ni nge maruwaran’ ko bay angin ni ngan pigpig ku Got min par nib mat’aw fa danga’.

10, 11. (a) Mang e ke n’igin nge thiliyeg Asaf e lem rok? (b) Uw rogon ma piin nib kireb e yad bay ko “yungi n’en nib tamasirgig”? Mu weliy.

¹⁰ Ma ke manigil ya de par Asaf ni ke m’ingan’ nib n’uw nap’an. Ya de n’uw nap’an me tamilangan’ ni yugu aram rogon ni be m’ug riy ni be par e piin nib kireb u fithik’ e gapas machane de riyul’​—ma ra m’ay! Ke gaar: “Rib mudugil ni kan ta’rad ko yungi n’en nib tamasirgig, ma bay mu gagiyegnagrad ngar mulgad nga fithik’ e riya’! Nthang owcherad u lan taab talab; wenegan ni yib ngorad ko tomur e gafgow nib gel!” (Ps 73 Verses 18, 19) Boor e piin ni gimed taab yangar e ku yad bay ko “yungi n’en nib tamasirgig.” Ma dabi n’uw nap’an ma ra yib wenegan ngorad e ngongol rorad nib kireb, ma sana yad ra diyen ndan lemnag, fa ra af ba m’ar ngorad ni bochan e ngongol ndarngal, fa yira yin’rad nga kalbus, fa yad ra yim’! Ma n’en ni kab kireb ko re n’em e yad ra gafgow ya yad ra par nib orel rok Got.​—James 4:4.

¹¹ Bay reb e rugod nu Spain ni ir e Mich ma ke tamilangan’ ko thin riyul’. Nap’an ni kab fel’ yangaren, ma ke par ni l’agruw mit e par rok, ya ke chag ko pi fel’ yangaren nib balyang. De n’uw nap’an me ri adag bagayad​—ma ir be’ ni ma fanay e drug nib elmirin. Ma de fanay e re rugod nem e drug machane ke chuw’iy e drug ni fan ko re pagal nem. Ma ke gaar: “Kug ayuweg e cha’ nem nggu kuruf pa’ ni fan ko drug.” Machane munmun ma ke manigil e lem rok e re rugod nem ma ke sul nga rogon ko tirok Got ban’en. Ma ke gin ngay u nap’an ni ke rung’ag ni ke yim’ fare pagal ni bochan e AIDS. Arrogon, bod rogon ni yog fa en ni yoloy e Psalm, ma girdi’ e yad ba’ ko “yungi n’en nib tamasirgig.” Boch e girdi’ e ra yim’ nib tomgin ni bochan rarogon e par rorad ni de fel’. Ma tin ni ke magay e girdi’ e thingara thiliyeged e kanawo’ rorad ya ra danga’ ma “ra m’ug Somol Jesus u lan e lang ni ke yib u tharmiy ni yad e pi engel rok nib yargel, nge nifiy ni be daramram, ni nge gechignag e piin nde t’uf rorad ni ngar nanged murung’agen Got nge piin ndarir folgad ko thin nib fel’ ni yib rok Got u murung’agen e Somol rodad i Jesus.”​—2 Thessalonika 1:7, 8.

12. Uw rogon ma reb e fel’ yangaren u Sapan e ke tamilangan’ ko uw fene balyang ni nge awan’uy ngak e piin nib kireb?

¹² Ere rib kireb ni nge awan’uy ngak e “piin nde t’uf rorad ni ngar nanged murung’agen Got”! Rriyul’ ya piin ni manang Jehovah ma ke l’agan’rad ni ngar pared ndariy n’umngin nap’an e aram e piin nib puluw ni nge awan’uy ngorad. Bay reb e walag nib pagal u Sapan ni ke nang e re n’em. Nap’an ni kab fel’ yangaren, ma “ba adag ni nge par nib puf rogon.” Ke weliy ni gaar: “Kug lemnag ni bay boch ban’en nib fel’ ni de yog ni nggu un ngay. Ma aram me tamilangan’ug ko ra uw rogon e yafos rog nfaan mang e da gu nang e thin riyul’. Kug guy u lanin’ug ni gu be par ni ke mada’ ko 70 ara 80 e duw rog mfin gum’. Machane ke pi’ Jehovah e athap ni ngan par ndariy n’umngin nap’an! Aram e n’en ni ke ayuwegneg nggu ta’ fan e n’en ni ba’ rog.” Machane mo’maw ni ngan par nib yul’yul’ u fithik’ e piin ndarir folgad rok Got. Mang boch ban’en nra ayuwegem ngam gel ko pi n’en ni be magawonnagem?

Mu Ayuw ko Mini’ e Ga ma Chag ngak!

13, 14. Mang fan ni baga’ fan ni ngan gonopiy ko mini’ e ga ra chag ngorad?

¹³ Ngad bieged murung’agen rarogon be’ nib fel’ rogon, ni bay ko Psalm 1:1-3 ni gaar: “Ba felan’ e cha’ ni ma siyeg ni nge fol ko fonow rok e girdi nib kireb, ma der folwok ko tin ni be ngongliy e piin ni tadenen, ara chag ngak e piin ni yad ma moningnag Got. Ma ra beeg e motochiyel rok [Jehovah] ma ma yib e felfelan’ riy ngak, ma ku aram rogon ni ra beeg ni rran nge nep’ ni bochan e nge nang fan. I ir e bod ba ke gek’iy ni ke tugul u tooben ba lul’; gubin ngiyal’ ni ma k’uf ko ngiyal’ nra taw ngay ni nge k’uf, ma der mororoy yuwan. Urngin e tin ni ma ngongliy e ma yan i aw nib fel’.”

¹⁴ Mu tiyan’um ngay ni piin ni gimed ma chag e baga’ fan. Proverbs 13:20 e be gaar: “Mpachegem ngak e piin ni yad ba gonop me yog e gonop ngom. Mm’agem ngak e girdi’ ni balyang ma ga kireb.” Gathi be yog ni dabkun non ngak e piin fel’ yangaren ni gathi yad e Pi Mich Rok Jehovah. Ya be yog e Bible ni ngad t’ufeged e piin buguli yoror rodad ma ngad “pired ni ba aw e gapas u thildad nge urngin e girdi’.” (Roma 12:18; Matthew 22:39) Machane faanra ga ra chag ngorad u gubin ngiyal’ ma rayog ni ngam pirieg ni ga be ‘fol ko fonow’ rok e piin ni der ma fol ko Bible.

Ngan Bieg e Bible ma Ra Yib Angin

15. Uw rogon nrayog ni nge felan’ e piin fel’ yangaren ko pow Bible?

¹⁵ Fa en ni ke yoloy e thin ko Psalm e ke yog ni en ni ke fel’ rogon e ma felan’ ni nge poy e motochiyel rok Got ni “rran nge nep’.” (Psalm 1:1, 2) Rriyul’, gathi ba mom ni ngan poy e Bible, ya “ba’ boch ban’en nib mo’maw ni ngan nang fan riy.” (2 Peter 3:16) Machane gathi dariy e falfalan’ riy ni ngan poy e Bible. Ya rayog ni nge aw ni “be yib lamen e milik” ko Thin Rok Got ngodad. (1 Peter 2:2) Ngam athamgil ni ngam poy boch e thin ko Bible u gubin e rran. Faanra bay boch ban’en ndamu nang fan, ma ga fl’eg i gayiy. Nge mu’ ma ngam fl’eg i lemnag ko mang e kam poy. (Psalm 77:11, 12) Faanra mmo’maw rom ni ngam tiyan’um ngay, ma ga poy nga but’ nib “achig lamam.” Munmun, ma ra gel iyan rogon ni ga ba adag ni ngam poy e Bible. Reb e rugod nu Brazil ni ir e walag e ke gaar: “U wan’ug ma be par Jehovah ni rib mal’af rog. Machane in e pul e chiney ni kug athamgil ni nggu fol babyor mu gu poy e Bible. Ma chiney e ke gel thilmow Jehovah. Ya ke rriyul’ u wan’ug ni bod be’ ngog.”

16. Uw rogon nrayog ni nge yib angin ngodad ko pi muulung ko ulung?

¹⁶ Ku baga’ fan ni ngam un ko pi muulung ko ulung ma ga ra mon’og ko tirok Got ban’en. Faanra ga ra “tiyan’um nga rogon e motoyil ni ga be tay,” ma ran pi’ e athamgil nga lanin’um. (Luke 8:18) Yu ngiyal’ ma ga ma chalban ko pi muulung? Ere mu fithem, ‘Mang e gu ra rin’ nggu adag boch e pi muulung? Gu ma tiyan’ ngay fa? Gu ma fl’eg rogog u m’on fa? Gu ma pi’ e fulweg?’ Ya be yog e Bible ni “nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak, . . . ma nge bagadad me pi’ e athamgil nga laniyan’ bagadad.” (Hebrews 10:24, 25) Ra ngam rin’ e re n’ey ma thingar mu un ko pi n’en ni yibe rin’! Ma ra mu yodorom ma thingar mu fl’eg rogom u m’on riy. Reb e walag nib ppin e ke gaar: “Rriyul’ nib mom boch ni ngan pi’ e fulweg u nap’an e muulung nfaanra kam fl’eg rogom u m’on riy.”

Ga Ra Lek Kanawoen Got ma ra Fel’ Rogom

17. Uw rogon ma be’ ni ta ma poy e Bible e “bod ba ke gek’iy ni ke tugul u tooben e pi lul’”?

¹⁷ Fa en ni ke yoloy e thin ko Psalm e ke weliy u murung’agen be’ nib fel’ rogon ni ir “bod ba ke gek’iy ni ke tugul u tooben e pi lul’.” Fapi lul e ma sor fan ko pi wol’eran’ ni kan fl’eg u lan e milay’ ni orchard me pi’ e ran ko gek’iy. (Isaiah 44:4) Ngan poy e Bible u gubin e rran e bod rogon ni kan l’ag nga ban’en ni aram rogon ni gubin ngiyal’ ma be pi’ gelngin nge toffan ngom. (Jeremiah 17:8) Gubin e rran ma ra pi gelngim ni ngam athamgil u fithik’ e magawon nge gafgow. Ma bochan ni kam fil ko uw rogon boch ban’en u wan’ Jehovah ma aram e bay e gonop rom nrayog ni ngam turguy boch ban’en u fithik’ e gonop.

18. Mang e rayog ni nge n’igin nge dugil ni ra fel’ rogon be’ nib fel’ yangaren ko pigpig ku Jehovah?

¹⁸ Yu ngiyal’ ma be m’ug riy nib mo’maw ni ngan pigpig ku Jehovah. Machane dabmu lemnag ni kayigi mo’maw ma dabiyog rom. (Deuteronomy 30:11) Be micheg e Bible ngom ni ‘urngin e tin ni ga ra ngongliy e ra yan i aw nib fel’’ ni faanra ga ra nameg ni ngam felan’nag gum’erchaen Jehovah! (Proverbs 27:11) Ma dabmu pag talin ni gathi ga be rin’ ni goo gur. Ya Jehovah nge Jesus Kristus e yow be ayuwegem. (Matthew 28:20; Hebrews 13:5) Yow manang e pi n’en ni be magawonnagem, ma dabra pagew gur. (Psalm 55:22) Maku bay “urngin e piin ni yad walag” nge gallabthir rom ni faanra yow ma fol rok Got. (1 Peter 2:17) Ere bay e pi girdi’ nem ni ra ayuwegem ma faanra ke mudugilan’um ma ga ra athamgiliy, ma aram e ra fel’ rogon e yafos rom e chiney iyan ngaram ndariy n’umngin nap’an!

Boch e Deer ni Ngan Sul nga Daken

◻ Mang e bin riyul’ e fel’ rogon?

◻ Mang fan nib t’uf ni nge gagiyegnag Jehovah e yan rodad?

◻ Uw rogon nrayog ko piin fel’ yangaren ni ngar ‘theeged e pi rran rorad’?

◻ Mang fan nib balyang ni nge awan’uy ngak e piin nib kireb?

◻ Uw rogon nra fel’ rogon e yafos ko piin fel’ yangaren ni ngar poyed e Bible u gubin e rran mar uned ko muulung u gubin ngiyal’?

[Picture on page 28]

Boor e piin fel’ yangaren e yad ma rin’ boch ban’en ni ma kirebnagrad ya “dariy madgun Got u wan’rad.”

[Picture on page 30]

Boor yay ma ma pag talin e piin fel’ yangaren ni bay wenegan e ngongol rorad