Uw Rogon Ni Ngan Gel Ko Lem Ni De Mudugil

● I gun’gun’ Asaph ni gaar: “Gur riyul’ ni mm’ay fan ni kug biechnag gum’ercha’eg, ma kug luknag paag gu be par ndagur ngongliy e denen. Min gechignigeg u lan reb e rran ni polo’, ma yima llowan’igeg ni gubin e kakadbul.”​—Psalm 73:13, 14, NW.

● I gel’gel’ Baruch ko amith me gaar: “Chiney e kug gafgow, ya ke puthuy Jehovah e amith ko kireban’ rog! Kug gafgow nbochan e re kireban’ ney, ma dariy bayang nrayog ni nggu toffan riy.”​—Jeremiah 45:3, NW.

● I yor Naomi me gaar: “Yi Got ni Gubin ma Rayog Rok e ba gel e gafgow ni ke pi’ ngog. Faan gu chuw u roy ma boor ban’en rog, machane ke fulwegeg Jehovah ngaray ni mus nga taa ban’en ma dariy rog. Ere mang ni ngam pininged ngachaleg ni Faanem nib Falan’? Yi Jehovah ni Gubin ma Rayog Rok e ke gagiyegnag ke m’ug ni ke gechignigeg kug gafgow.”​—Ruth 1:20, 21, NW.

U Bible e bay boor e girdi’ riy ni ur yul’yul’gad ko pigpig ku Jehovah ma immoy yu ngiyal ni ke tomal lanin’rad ko pi n’en ni ma warnagan’rad. Bin riyul’ riy e bochan e gad e girdi’ ni gathi gad ba flont ma aram fan ni gad gubin ni ma buch ban’en rodad ni aram rogon u reb e tayim nge reb. Boch i gad e sana rib mom rogon ni nge mulan’ ko tin ma warnagan’uy​—ni sana bay boch ni ke gel e kireban’ rok ngak—​ni kab gel boch ngak yugu boch e girdi’ ya bochan ni ke buch ban’en rok ni kari kireban’ ngay.

Pi n’ey e faanra dabni tiyan’uy ngay, ma pi lem ney e rayog ni nge kirebnag thilmed boch e girdi’ nge thilmew Jehovah Got. Reb e Kristiano nib ppin ni ke mul ni bochan e kireban’ rok ngak e yog ir ni gaar: “Kugu talegneg ndab ku gu un ko boch e girdi’ ni kar pininged gag ya kugu lemnag rog ni dariy fag ni nggu un ko piin ni bay u lan e ulung.” Uw fene gel e kireb nra tay e lem ni aram rogon ko yafas ku be’! Mang e rayog ni ngam rin’ ma aram e rayog ni ngam gel ko re n’ey?

Mu Chugur Ngak Jehovah

U Psalm 73, me yoloy Asaph nrogon nib tamilang u morngaagen e pi n’en ni ke balyangan’ riy. Nap’an ni ke taareb rogon nag e pi n’en ni be buch rok ko falfalan’ ko piin ni kireb, ma ke awan’ ngorad. Ke guy ni pi girdi’ ney ni dariy Got u wan’rad ma yad ba tolangan’ ma yad ba yargel, ma ke guy ni bod ni ke yog rorad ni ngar milgad ma dan gechignagrad. Ma aram ke weliy Asaph ni ke maruwaran’ nga feni ga’fan ni nge fol ko reb e kanawoen e yafos nib mat’aw.​—Psalm 73:3-9, 13, 14.

Kam bod Asaph, ni ke guy, ni keb angin ngak e piin nib kireb ma yad ma uf ko tin nib kireb ni kara rin’ed? Uw rogon ni gel Asaph ko lem rok ni de mudugil? Ke ulul ngay ni gaar: “Ere kar gu athamgiliy ni nggu nang fan e re n’ey, ni yugu aram rogon feni mo’maw’ ni nguug par ni gu be lemnag ni nggu nang e re ne’y; ma aram e ba riya u p’eowcheg, nge mada ko ngiyal’ ni kugu wan nga lan e gin th’abi thothup u tagil’ Got. Ku gu adag ni nggu nang ko mang e bayi buch ko piin ba kireb.” (Psalm 73:16, 17) I lek Asaph e bin nib mat’aw e kanawo’ ni aram e ke chel ngak Jehovah u daken e meybil. Taab rogon ko fapi thin ni ki fanay Paul ni apostal boch nga tomren, ni n’ag Asaph e “lem rok ni fan ko chugum” me gelnag e “lem nib puluw ko tirok Got” ni bay u fithik’. Ma faani beechnag e sap rok ko tirok Got ban’en, ma aram me tamilang u wan’ ni Jehovah e dabun e pi n’en nib kireb ma bay ba ngiyal’ nra taw ngay ma piin nib kireb e ra ni gechignagrad.​—1 Korinth 2:14, 15.

Rib ga’ fan ni ngam pag e Bible ni nge ayuwegnem ni ngam tiyan’um ko tin riyul’ ni fan ko yafos! I Jehovah e ma puguran ngodad ni de malmit ko kireb ni be rin’ e girdi’. Be fil e Bible ngodad ni gaar: “Dab mu banniged gimed, ya dariy be’ nrayog ni nge bannag Got. Ya demtrug e tin ra yung be’ ma ir e ra t’ar woomngin . . . Ere dabi chalbadad i ngongliy e ngongol nib fel’. (Galatia 6:7-9) Bayi tay Jehovah e piin nib kireb “ko yungi n’en nib tamasirgig”; ma ra “gagiyegnag ni ngara dol’gad ngar m’ad’.” (Psalm 73:18, NW) Gagiyeg rok Got nib yal’uw e ma gel ko tomur.

Ra mu un ko abich u daken e tebel rok Jehovah ni gubin ngiyal’ mu um chag ko girdi’ rok Got ma ra ayuwegnem ni nge gel e michan’ rom ma ram gel ko pi n’en ni ma marwarnagan’um fa yugu boch e lem ni de mudugil. (Hebrews 10:25) Bod Asaph, ga ra par nib chugur ku Got, ma rayog ni ngam thamiy e ayuw ni ma pi u fithik’ e t’ufeg. I ulul Asaph ngay ni gaar: “Machane gubin ngiyal’ ni gu ba’ rom, ni ga be kol paag. Ga be pow’iyeg ko fonow ni ga be tay ngog, ma tomur e bay mu fekeg nga fithik’ e flaab ni aram e kam ta’ fag.” (Psalm 73:23, 24) Reb e Kristiano ni kan gafgownag u nap’an ni kab bitir e fil e llowan’ rok ko pi thin ney. Ke gaar, “Kug guy rogon ni nggu par ni nggu chag ko ulung,” Me ulul ngay ni gaar, “kan dag ngog yugu reb e felngin e yafos. Ku guy nrib fel’ rogon ni piin piilal u lan e ulung e rib gel e t’ufeg ni yad ma pi’, ni gathi yad bod e polis ya yad e pi tachugol saf.” Arrogon, pi Kristiano ni piin ni piilal ni ta runguyey e yad be un ko maruwel nib ga’ fan ni yad ma chuweg e lem ni ma kirebnigey.​—Isaiah 32:1, 2; 1 Thessalonika 2:7, 8.

Ngan Fanay e Fonow Rok Jehovah

Baruch, ni ir e ta yol rok Jeremiah ni profet, e i kireban’ ya bochan e ke tomal laniyan’ ko maruwel ni kan pi’ ngak. Machane, i ayuweg Jehovah u fithik’ e gol ni nge tiyan’ ko tin ni ba riyul’. Me non Jehovah ni gaar: “ ‘Yi gur, e ga be par ni ga be gaweg e tin ni baga’ ban’en ni fan ngom. Dab kun gaweg. Ya gu baaray, ni nggu gagiyegnag ni ngeb e gafgow ngak urngin e girdi’,’ me ulul ngay ni gaar, ‘Ma bay gu pi’ ngom e yaal rom ni bod e tin ni kan fek rom u fithik’ e yargel u gubin yang ni gara yan ngay.’ ”​—Jeremiah 45:2-5.

I weliy Jehovah nrib puluw rogon e lem rok Baruch nib siin ko pi n’en ni baadag ni i nameg ni aram e pi n’en ni be k’aring e taganan’ ngak. Baruch e dabi pirieg e falfalan’ ko maruwel rok ni ke pi’ Got nfaanra ku be gaweg boch ban’en nib ga’ fan ni fan ngak. Ku aram rogon gur ni faanra gara pirieg ni ngam dugliy e lem rom ko bin nib mat’aw e kanawo’ ni ngam gel ko pi n’en ni be warnigem ma ngam palog ko pi n’en ni ra chefegem nga bang muum par ni bay e gapas u lanin’um nbochan ni gab falfalan’ ko tin ni bay rogon Got ngay.​—Filippi 4:6, 7.

Naomi ni ke yim’ figirngin e de pag e kireban’ nge warnag u nap’an ni imoy u Moab ni ke yim’ figirngin nge fagali pumoon ni fak. Machane, ba’ ban’en ni be dag feni kari kireban’ ya be lemnag e par rok nge fagali ppin ni leengin fagali pumoon ni fak. U nap’an fa ngiyal’ ni ben’en ni nge digeyrow, me yog ni gaar: “Kari kireban’ug ngomew, ya ke gafgownageg Jehovah.” Maku aram rogon, nap’an ni taw nga Bethlehem, ma ke yog ni gaar: “Dab mu pininged ngachaleg ni Naomi [“Gu Ma Falfalan ngay”]. Mu pinginged ngachaleg ni Mara [“Kireban’ ”], ya en ni th’abi tolang e ir e ke gagiyegnag ni ngari kireban’ug.”​—Ruth 1:13, 20.

Machane, yugu aram rogon me Naomi, e de palognag ir nga orel nge par u lan e pi tento ko kireban’ ni fan ko yam’​—nib palog ku Jehovah nge girdi’ rok. U Moab e i rungaag riy ni “ke ayuweg Jehovah girdien ke pi’ e ggan ngorad.” (Ruth 1:6) Ke nang fan ni gin th’abi fel’ ni nge par riy e gin bay e girdi’ rok Jehovah riy. Me sul Naomi nga Juda me un Ruth ngak ni i leengiy reb e pagel ni fak, ma aram i skulnag Ruth u fithik’ e gonop nrogon ni nge chuchugur ngak e girdi’ rok i Boaz, ni aram e cha’ nra chuwiy.

Ku taareb rogon ko ngiyal’ ney, piin ni yad ba yul’yul’ ni ke yim’ e piin mabgol rorad e kar gelgad nib fel’ rogon ko kireban’ rorad ni yad be par ni boor ban’en ni yad be rin’ u lan e ulung ko Kristiano. Bod Naomi, kar yoornaged e maruwel rorad ni fan ko tirok Got ban’en, ni gubin ngiyal’ ni yad be bieg e Thin Rok Got.

Angin ni Yib nbochan e Fol ko Tamilangan’ Rok Got

Pi n’ey ni ke buch min chaariy nga lan e Bible e ma pi’ e gonop nib gel ma aram e rayog ku be’ ni nge gel ko pi lem ni ma kirebnagey. I ning Asaph e ayuw u lan tagil’ Jehovah me sonnag Jehovah u fithik’ e sobut’an. I fol Baruch ko fonow me siyeg i lemnag e chugum ni ra kirebnagey. I Naomi e par nib pasig u fithik’ e girdi’ rok Jehovah, me ayuweg fare rugod i Ruth ko maruwel rok ko pigpig ko fa bin riyul’ e Got.​—1 Korinth 4:7; Galatia 5:26; 6:4.

Gur e ku rayog ni ngam gel ko pi n’en ni ma war nigem nge yugu boch e lem ni de mudugil ni faanra ga ra par ni ga be lemnag e pi ayuw ni ke pi’ Got ngak e girdi’ rok ni be’ nge be’ nge ngak e girdi’ ni yoor. Bochan e re n’em, ma rayog ni mu par ni ga be lemnag gelngin e t’ufeg rok Jehovah ni aram e ke pi fare biyul ni fan ngom. Mu falfalan’ ko t’ufeg ni bay u fithik’ e pi walag ni Kristiano. Ma ga yiluy e sap rom nga m’on ko yafos ko bin nib biech e fayleng rok Got ni bay yib boch nga m’on. Ma rayog ni ngam fulweg ni bod Asaph ni gaar: “Machane gag e kari falan’ug, ya gu be par u tooben Got! U fithik’ Jehovah ni Got e kug be par riy ndabi buch ban’en rog, ma bay ug weliy urngin e tin ni ke rin’ ngan nang.”​—Psalm 73:28.