Rayog ni Ngam Par ni Kargom u Fithik’ e Magawon nib Gel
NGIYAL’ ney ni ke mo’maw’ e par, e boor e girdi’ ni be yib magawon ngorad nib gel. Machane, piin ni Kristiano e ke mich u wan’rad ni t’ufeg ku Got nge yul’yul’ ko kenggin e motochiyel rok e ra ayuwegrad riy. Uw rogon? Fulweg riy e rayog ni ngan pirieg u ba fanathin ni weliy Jesus Kristus. I taareb rogonnag pi gachalpen ngak “be’ nib gonop ni toy e naun rok nga daken e war.” Yog Jesus ni gaar: “Me aw e n’uw nge sugubur e lul’ nge yib nga daken e binaw, me yib e nifeng nib gel i aw ko fare naun. Ma de puth, ya kan toy nga daken e war.”—Matthew 7:24, 25.
Rayog ni ngam guy ni yugu aram rogon nib gonop fare pumoon u lan fare fanathin, machane ki mada’nag e magawon nib gel ya ke aw e n’uw nib ga’, ke sugubur, meb e nifeng nib gel. Ere, de yog Jesus ni pi gachalpen e ra siyeged urngin e magawon mi yad par u fithik’ e gapas u gubin ngiyal’. (Psalm 34:19; James 4:13-15) Machane ki yog ni pi tapigpig rok Got nib yul’yul’ e rayog ni ngar fal’eged rogorad ma rayog ni ngar pared ni ka rogorad u fithik’ e pi magawon nem nib gel.
I tababnag Jesus fare fanathin ni gaar: “Gubin e girdi’ ni rung’ag e pi thin rog ney mi yad fol riy e yad bod be’ nib gonop ni toy e naun rok nga daken e war.” Riyul’, ni i weliy Jesus rogon ni ngan gelnag e michan’ ko Kristiano ma de weliy murung’agen e dimow naun. Piin ni yad ma fol ko thin rok Kristus e yad ma fanay e tamilangan’ rorad ma yad ma par nib thabthabel lanin’rad. Yad ma gelnag e michan’ rorad u daken fare war nib gel ni aram e machib rok Kristus ya yad ma fol ko pi n’en ni kan fil ngorad. Re war ney nib fanathin e bay u fithik’ e but’. Fare pumoon u lan fare fanathin e thingari fuog e “but’ nib toar”. (Luke 6:48, NW) Maku, aram rogon pi gachalpen Jesus ni nguur maruwelgad nib gel nge yog ngorad e pi fel’ngin nib fel’ ma rayog ni ngar chuchugurgad ngak Got.—Matthew 5:5-7; 6:33.
Mang e ra buch u nap’an ni ra yib e magawon nib gel me skengnag feni gel e def ko michan’ rok pi gachalpen Jesus? Bochan ni ke m’agan’rad ni ngar folgad ko machib rok Kristus nge pi fel’ngirad ni yad e Kristiano e be micheg ni ireray e n’en ni ra yib gelngirad riy u nap’an ni ra yib e magawon ngorad ni aram rogon, ni ba ga’ ni, nap’an ni ra yib fare Armageddon. (Matthew 5:10-12; Revelation 16:15, 16) Arrogon, ra ngan fol ko machib rok Kristus, ma boor e girdi’ ni yad be par ni ka rogorad u fithik’ e magawon nib gel. Maku rayog ni ngam rin’ ni aram rogon.—1 Peter 2:21-23.