Be’ ni Dag nib Yul’yul’

NELMA ni be’ nu Cruzeiro do Sul, Brazil, ni ma fal’eg piyan lolugey, e dawori n’uw nap’an ni keb e skeng ngak ko michan’ rok. Nap’an ni ke tharey e ran e gin ni ma par riy me pi’ bagayad e piin ni ma fal’eg piyan lolugrad boch mad ni ayuw ngak. Nap’an ni be yarmiy e pi mad nem, me pirieg e salpiy riy ni ra taareb oren nga $1,000 (Salpiy nu Meriken) u lan e paketo u boch e ay e mad.

Fare salpiy ni ke pirieg Nelma e gonap’an puluwon ko maruwel u medlip e pul, ma rib t’uf rok. Naun rok e ke kirebnag e ran, ma chitamangin nge pi walagen e ke chuchugur i urngin e chugum rorad ma ke un ko fare ran. Fare salpiy ni ke pirieg, e rayog ni nge fanay ni ngan fal’eg e naun rok maku rayog ni nge pi boch ko girdi’ rok. Machane, nangan’ rok Nelma ni ke skulnag e Bible e dabun ni nge fanay fare salpiy.​—Hebrews 13:18.

Bin migid e rran ni kakadbul, me yan ko maruwel rok u m’on ndawori tabab e maruwel nge gay fare pin ni ta fol chuway’ ni ke pi’ boch e mad ngak ni ayuw. I pining Nelma e magar ko pi mad ni ke pi’ ngak machane ki yog ni dabiyog ni nge fanay e tin ni ke pirieg riy. Me fek fare pin fare salpiy nrib felfelan’. Ke tay e re salpiy nem ni fan ni nge pi’ puluwon e girdi’ ko maruwel rok. Me gaar fare pin, “Ke mo’maw’ ni ngan pirieg e girdi’ nib yul’yul’.”

Riyul’, ni boch e girdi’ e be lemnag ni ngan par nib yul’yul’ e gathi rib ga’ fan. Machane, yul’yul’ e ba fel’ngin nib ga’ fan u wan’ e piin ni yad be athamgil ni ngar felfelan’naged e bin riyul’ e Got, i Jehovah. (Efesus 4:25, 28) Me gaar Nelma, “Dabiyog ni nggu mol ni nep’ nfaanra kug rin’ e tin nib kireb.”