Tin nib Kireb​—Dabiyog i Taleg?

Reb e pagel e fek ban’en u but’​—re n’em e ba donmach—​me pil ke malmit ma ki mugutgut ni polo’ e yafos rok. Reb e matin e digey fak ni ka fini gargeleg ni mithag nga fithik’ e dow u tooben e kanawo’. Reb e pumoon ni kan taleg ko maruwel e sul nga tabon e maruwel rok nge boyochnag urngin e girdi’ ni ke guy u rom, ngemu’ me li’ ir ngem’. Be’ ni yima tay fan e ke fal’eg e ngongol ni darngal ko bitir u fithik’ e towasar.

BA KIREBAN’, ya gad ma rung’ag bogi ban’en ni aram rogon e ngiyal’ ney. Ma ka bay ban’en ni kab gel e kireban’ riy, ni aram e yibe li’ ngem’ urngin e girdi’ u reb e ganong, nge terrorism. Reb e editorial ni kan wereg ko duw ni 1995 e ke yog ni gaar, “Ireray e birok Satan e chibog. Kari dag e girdi’ ni kar adaged ni ngar lied e girdi’ nbochan raen dowrad, nge teliw, ara thal e girdi’ ni yad bay riy.”

Maku, girdi’ e ma alitnag e nifeng, nge fayleng, ma kar kirebniged boch ban’en ni bay riy, ma yad be thang mit e woldug nge gamanman. Gur rayog rok e girdi’ ni ngar taleged e kireb me fel’ boch e fayleng, nge mang bangi n’en ni bay e pagan’ riy? Ara yira guy rogon ni ngan rin’ ni aram rogon ma bod ni yibe wolguy e yilu’ nga ba wolguw ni nge sul? Yog reb e professor ni boor ban’en ni ke yoloy u murung’agen e tin nib kireb ni gaar: “Ri gu ba adag ni thilyeg rarogon e fayleng, nge fel’ boch. Machane fayleng e der m’ug ni be mon’og.” Sana aram rogon ni ga be lemnag.

Rayog ni ngan taareb rogonnag e fayleng ko barkow ni be tareg i yan ko yungi day ra reb e rran ma be gel i yan e nifeng riy ni bay e riya’ riy.Yugu aram rogon ndariy be’ ni baadag ni nge yan ngaram, ma urngin ban’en ni kan rin’ ni ngan thilyeg kanawoey e de yog. Fare barkow e be yan nder tal ma dabiyog i taleg ko gin’en ni rib gel e nifeng riy.

Pi magawon ney ni be gel i yan e rayog ni nga nog ni be buch nbochan e de flont e girdi’. (Roma 3:23) Machane, rogon feni yoor e kireb, ma dabi tal e be m’ug riy ni gathi ke mus ni girdi’ e k’aring. Gur rayog ni bay be’ ndabiyog ni ngan guy nga owchey machane ba gel gelngin ni ir e be gagiyegnag e girdi’? Faanra aram rogon, ma mini’ e cha’ n’ey, ma uw rogon ni ngad ayuweged gadad rok? Bin migid e article e ra weliy e pi deer ney.

[Picture Credit Line on page 3]

© Heldur Netocny/​Panos Pictures