Yibe Gay e Fulweg

“Kan pirieg e fulweg ko fare deer u ‘rogon’ ni nge ayuweg be’ e tabinaw rok, ya ke liyegey e tin ra fel’ rogoy riy nda immoy kafram​—ni bod rogon e aircon, nge boch e talin e musik ni yima fanay e CD ngay nrayog i rung’ag e musik riy, nge wom’engin e gek’iy ni yibe kay u polo’ reb e duw—​machane ka gad be lemnag ‘fan’ ni gad be par. Mang fan ni ngan un ko re sagreng ko yafas ney? Mang fan ere n’ey?”​—David G. Myers, professor ko psychology u Hope College, Holland, Michigan, U.S.A.

UW ROGON ni ga ra fulweg e re deer ney ni fith e re sensey ney? Boch e girdi’ e sana yad ra lemnag ko bay rogon ni ngan gayiy e fulweg riy fa. Machane, ga ra fek owchem ko pi deer ney ma taareb rogon ko ngam fek owchem ko malang ni bay u lan e sus rom​—ya gara ulul ko yan, machane dabi felfelan’um ko milekag ni gara tay.

Faanra ka am lemnag ko ka bay ban’en nrogon e yafas, maku arrogon boch e girdi’. Rogon ni yog fare World Values Survey, ni ur fal’eged i yaliy e tin nib ga’ fan u wan’ e girdi’, e boor e pi nam ni be yoor i yan e girdi’ riy ni be lemnag murung’agen “fan e yafas.”

Ra nge yib e gapas nib riyul’ nga lanin’um, mab t’uf ni ngam nang e fulweg u l’agruw e deer nib ga’ fan.

Mang fan e yafas?

Mang e bay ni fan ko yafas gabul nge langlath?

Uw e rayog ni mu pirieg e fulweg ko pi deer ney riy nib ga’ fan? Tin migid e page e ra pi’ e fulweg ko pi deer ney nib puluw ko Bible, ma gathi rogon ni ma lemnag e girdi’. Gamad be piningem ni ngam guy e Bible rom ngam nang e n’en ni be yog.