Mang Fan e Yafas?

MANG NIB GA’ FAN E FULWEG RIY? U fithik’ e pi n’en nima magafan’ e girdi’ ngay e ngan lemnag ndariy fan e yafas. Machane, be’ nib tamilang u wan’ fan e yafas rok e ba mom ni nge athamgil u fithik’ e magawon. Viktor E. Frankl, nreb e togta ko nguchey nge man’ey miki magey nib fos ko fare Magothgoth nib Ga’ e yoloy ni gaar: “Gube lemnag ndariy ban’en u fayleng, nrayog ni nge ayuweg be’ nge par nib fos, ya kemus ni ngan nang nra be’ ma bay fan e yafas rok.”

Machane, boor rogon ni yima lemnag ere n’ey. Boor e girdi’ e yad ma lemnag nra be’ ma ke milfan ngak ni nge dugliy fan e yafas rok. Ba thil, ya piin nib mich u wan’rad e evolution e yad ma machibnag ndariy fan e yafas.

Machane, riyul’ riy e, rogon min nang e bin nriyul’ i fan e yafas e ngan fil rok e en ni ke Pi’ e Yafas, ni aram Jehovah Got. Am lemnag e n’en ni be yog e Thin rok u murung’agen ere n’ey.

N’en Be Yog e Bible

Be fil e Bible ni bay e tin ni lemnag Jehovah Got ni fan ngak e pumoon nge ppin u nap’an ni sunmiyrow. I pi’ Jehovah e pi motochiyel ni baaray ko gal nsom’on e gallabthir rodad.

Genesis 1:28. “Mu diyengow nge yoor pi fakmew, nge wer e piin ni owchemew nga gubin yang u fayleng ngar pired riy mi yad suwey. Nggu ta’mew ni gimew e ngam suweyew e nig, nge arche’, nge urngin e gamanman ni maloboch, ni tin ni ba ga’ nge tin ni ba achig.”

Ba m’agan’ Got ngay ko som’on ni nge ngongliy Adam nge Efa nge pi fakrow ga’ngin ere fayleng ney nge mang ba paradis. De lemnag ni nge pilibthir e girdi’ ngar m’ad; ara nge kirebnag e girdi’ ere fayleng ney. Machane, bochan nde fel’ e n’en ni mel’eg e gal nsom’on e gallabthir rodad, ma arfan nike af e denen nge yam’ ngodad. (Genesis 3:2-6; Roma 5:12) Yugu aram rogon, ma dawori thil e n’en nib m’agan’ Jehovah ngay. Dabki n’uw nap’an ma re fayleng ney e ra mang paradis.​—Isaiah 55:10, 11.

I sunmiydad Jehovah me tay ni bay gelngidad nge lem rodad ni ngad lebguyed e n’en nib m’agan’ ngay. De sunmiydad ni ngad pired rodad ndab da taga’gad ngak. Am guy rogon ni kan weliy e n’en nib m’agan’ Got ngay ko pi thin nu Bible ni baaray.

Eklesiastes 12:13. “Tungun e re babyor ney e be fonownag e girdi’ ni be gaar: “Nguum par ni ba’ madgun Got u wan’um ma ga be fol ko thin rok, ya kari mus fan ni sunmiy Got e girdi’.”

Mikah 6:8. “Tin ni ke yog ngomed ni ngam rin’ed e baaray ni ke gaar: mu rin’ed e tin nib yal’uw, um pired nib t’uf Got romed nge girdi’, mu um folgad rok Got u fithik’ e sobut’an’.”

Matthew 22:37-39. “‘Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom. Ereray e bin th’abi ga’ nge bin th’abi ga’ fan e motochiyel. Ma bin migid ngay e motochiyel ni ku ba ga’ fan e bod e biney ni gaar, Gin’en ni ga ba’ riy e thingari t’uf rom e en ni ir e mmigid ngom ni gowe gur.’”

Rogon ni Ma Yibnag e Fulweg ko Bible e Bin Riyul’ e Gapas nga Lanin’uy

Faanra nge maruwel bangi masin nib fel’ rogon, ma thingar ni fanay ko re miti maruwel nni ngongliy ni fan ngay. Taareb rogon, ya faanra ngad pired ndab da kirebniged gadad​—ndemtrug ko tirok Got, lem rodad, lanin’dad, ara dowdad—​mab t’uf ni ngad fanayed e yafas rodad nib puluw nga rogon e lem rok e En ni Sunmiydad. Mu lemnag rogon nra yib e gapas nga lanin’dad nfaanra kad nanged e n’en nib m’agan’ Got ngay ko tin gad ra weliy u murung’agen e yafas.

Ra ngan dugliy e tin nib ga’ fan u wan’uy, ma boor e girdi’ e ngiyal’ ney ni yad ma fanay e yafas rorad ko tin nra fel’ rogorad riy. Machane, be ginangey e Bible ni “piin ni yad ba adag ni nge yoor e salpiy rorad e yad ma pagrad ngak e pi n’en ni ma pingeg e girdi’ nge denen.”​—1 Timothy 6:9, 10.

Machane, piin nib t’uf Got rorad e ba fel’ u wan’rad e chuuw ni bay rorad ban’en. (1 Timothy 6:7, 8) Yad manang nib ga’ fan ni ngan maruwel nib gel maku yad manang nib milfan ngorad ni ngar yognaged e tin nib t’uf nga dowrad. (Efesus 4:28) Machane ku yad ma fol ko fapi thin ni yog Jesus ni gaar: “Dariy be’ nrayog ni nge mang sib rok l’agruw i masta: ya ra fanenikay bagayow me t’uf bagayow rok; ya ra yul’yul’ ngak bagayow me darifannag bagayow. Dabiyog ni ngam manged tapigpig rok Got ma ki gimed e tapigpig rok e salpiy.”​—Matthew 6:24.

Piin nib t’uf Got rorad e kar ted nib m’on u wan’rad e tin nib m’agan’ Got ngay ma gathi maruwel rorad ara ngan yognag boor e salpiy. Yad manang ni faan yad ra mon’eg e tin nib m’agan’ Got ngay, ma ra ayuwegrad Jehovah Got. Bin nriyul’ riy e, manang Jehovah nib milfan ngak ni nge rin’ ere n’ey.​—Matthew 6:25-33.

Rogon e ngongol ngak e girdi’, e boor e girdi’ ni yad ma ted yad nga m’on rok boch e girdi’. Ngiyal’ ney, e dakuriy e gapas u fayleng, ni bochan e boor e girdi’ ni “ke mus ni yad e yad be lemnagrad, . . . ma bay dab kur golgad.” (2 Timothy 3:2, 3) Nap’an nra kirebnag be’ lanin’rad ara dag nde fel’ u wan’ e n’en ni yad be lemnag, mar ‘tolulgad ngak u fithik’ e damumuw ara u rogned e thin nib kireb ngak facha’.’ (Efesus 4:31) Mit ney e ngongol ndariy e t’ar laniyan’ riy e ma “sunmiy e tugthin”, ma gathi gapas laniyan’.​—Proverbs 15:18.

Ba thil, ya piin ni yad ma fol ko motochiyel rok Got ni nge t’uf rorad e piin nib migid ngorad e yad ma ‘gol ngorad, ma ra bagayad ma ma munguy ngak bagayad, ma yad ma n’ag fan u wan’rad e tin nib kireb ni ke rin’ bagayad ngak bagayad.’ (Efesus 4:32; Kolose 3:13) Mus ni faanra danir dag e gol ngorad, ma yad ma athamgil ni ngar folwokgad rok Jesus, ni “de ta’ puluwon e thin nib kireb” ni unog ngak. (1 Peter 2:23) Taareb rogorad ku Jesus, ni yad manang nra fel’ lanin’uy ni faanra ni pigpig ngak boch e girdi’, ni mus ngak e piin nde fel’ u wan’rad e n’en ni yibe rin’ ni fan ngorad. (Matthew 20:25-28; John 13:14, 15; Acts 20:35) Jehovah Got e ma pi’ e kan ni thothup rok ngak e piin ni yad ma folwok rok Fak, ma kan ni thothup rok e ma yibnag e bin riyul’ e gapas nga lan e yafas rorad.​—Galatia 5:22.

Ere, uw rogon, ma n’en ni gabe lemnag nra buch ko gabul nge langlath e ra rin’ ban’en ko gapas u lanin’um?

[Blurb on page 4]

Ba t’uf rok be’ ni nge tamilang fan e yafas rok u wan’

[Picture on page 5]

Be fil Jesus ngodad rogon ni ngeb e gapas nga lanin’dad