Ngan Nameg e Yafas ni Bay Fan

“Gimed urngin e pi n’en nib fos e ngam pininged e sorok ngak Somol.”​—PSALM 150:6.

1. Mu weliy rogon ni gayiy reb e pagal ban’en nra yibnag fan e yafas rok.

BE’ NI ka nog Seung Jin ngak, ni ilal u Koreaa e gaar, “Gu wan ko skul ko togta ni bochan e gu baadag ni nggu fanay e yafas rog nggu ayuweg e girdi’. Gu lemnag ni faanra gu mang reb e togta ma rayog ni yibnag e felfelan’ ngog ya ra gilbuguwag maku ra yoor e salpiy rog. Ma faan gub gu nang feni achig e ayuw nrayog ni pi’ reb e togta ko piin nib t’uf e ayuw rorad, mug dabuy. Ma aram mug fil e art ara rogon i yoloy yaan ban’en, machane ku gathi rib ga’ angin ni yib ko girdi’, ma kug thamiy rog ni gub laniyan’ ya gube rin’ ban’en ni kemus ni yigoo gag e gube felfelan’ riy. Ma aram mug mang reb e sensey ma de n’uw nap’an mug pirieg ni kemus ni yigoo tin nriyul’ e rayog ni gu fil ko girdi’ machane dabiyog ni nggu dag e kanawo’ ngorad nra fek i yib ngorad e bin nriyul’ e felfelan’.” Seung Jin e be nameg e yafas ni bay fan ni bod e n’en ni be rin’ boor e girdi’.

2. (a) Mang e be yip’ fan ni nge yib fan e yafas rodad? (b) Uw rogon ni kad nanged ni bay fan ni ke taydad e En Tasunmiy ngaray nga fayleng?

² Ra nge yib fan e yafas rodad ma be yip’ fan ni nge yib fan ni gad be par, nge n’en ni gad be nameg, nge n’en nri gad be gay rogon ni ngad rin’ed. Rayog ni nge nameg e girdi’ ban’en ni aram rogon, fa? Arrogon! Bochan ni kan sunmiydad ni bay e llowan’, nge nangan’, nge lem rodad ma be dag ni En ni Sunmiydad e bay fan ni ke taydad ngaray nga fayleng. Ere, ba tamilang nrayog ni ngad gayed ma gad lebguy e n’en ni fan ni gad bay ni faanra da pared nib puluw ko n’en nib m’agan’ e En ni Sunmiydad ngay.

3. Mang e ba muun ko n’en nib m’agan’ Got ngay ni fan ko girdi’?

³ Be dag e Bible ni n’en nib m’agan’ Got ngay ni fan ngodad e ba muun ngay boor ban’en. Bod ni feni fel’ rogon ni kan sunmiydad e be dag e t’ufeg rok Got ngodad nde laniyan’. (Psalm 40:5; 139:14) Ere, ngan par u rogon nib puluw ko n’en nib m’agan’ Got ngay e be yip’ fan ni nge t’uf boch e girdi’ rodad u rogon ni yad ba t’uf rok Got. (1 John 4:7-11) Ku be yip’ fan ni ngad folgad ko n’en ni ke tay Got chilen, ni ir e ra ayuwegdad ni ngad pared u rogon nib m’ag ko n’en nib m’agan’ ngay.​—Eklesiastes 12:13; 1 John 5:3.

4. (a) Mang e ba t’uf ni faanra nge yib fan e yafas? (b) Mang e re n’en nth’abi fel’ nrayog ni nameg be’?

⁴ Ki m’agan’ Got ngay ni nge par e girdi’ u taabang nge tin ni ka bay ko tin ni ke sunmiy u fithik’ e felfelan’ nge gapas. (Genesis 1:26; 2:15) Ere, mang e ba t’uf ni ngad rin’ed nge yog ni yib e felfelan’, nge pagan’, nge gapas laniyan’ ngodad? Ba t’uf ni nge fel’ e tha’ u thildad e Chitamangidad nu tharmiy nge yog nda nanged e bin nriyul’ i fan e yafas, ntaareb rogon ko bitir nib t’uf ni nga i guy e gallabthir rok ya nge par nib felfelan’ mab pagan’. (Hebrews 12:9) Ke dag Got nrayog ni nge sum e mit ney e tha’ u thildad nge ir ni aram e ke pagdad ni ngad chugurgad ngak maku ma rung’ag e meybil rodad. (James 4:8; 1 John 5:14, 15) Faan gadra ‘yan Got u taabang’ u daken e michan’ ma gad mang fager rok, ma rayog ni ngad felfelan’niged ma gad pining e sorok ku Jehovah. (Genesis 6:9; Proverbs 23:15, 16; James 2:23) Ireray e n’en nth’abi fel’ nrayog ni nameg be’. I yoloy fare psalmist ni gaar: “Gimed urngin e pi n’en nib fos​—e ngam pininged e sorok ngak Somol.”​—Psalm 150:6.

Mang Fan e Yafas Rom?

5. Mang fan nde gonop ni nge m’on e chugum u wan’dad?

⁵ Bang ko n’en nib m’agan’ Got ngay e ngad ayuweged gadad nge tabinaw rodad. Re n’ey e ba muun ngay e tin nib t’uf u dowdad nge tirok Got ban’en. Machane, ba t’uf ni ngan thabthabel i rin’ e pi n’ey, ya nge dabi upunguy e tin ni gad be rin’ ni fan ko par rodad nge tin ni gad baadag e n’en ni kab ga’ fan ni aram e tirok Got. (Matthew 4:4; 6:33) Ba kireban’, ya boor e girdi’ ni kar pared ni chugum e ir e ba ga’ fan u lan e yafas rorad. Machane, de gonop ni ngad gayed rogon i yognag urngin ban’en nib t’uf rodad u daken e chugum. Reb e survey ko piin ni boor e salpiy rorad ntay u Asia e ke dag ni boor i yad e “dariy e pagan’ rorad ma kar magawongad, ni yugu aram rogon ni be felfelan’rad nga rogorad u fithik’ e girdi’ nge lem nima yib ngorad ni bochan e fel’ rogon rorad.”​—Eklesiastes 5:11, New World Translation.

6. Mang fonow e pi’ Jesus ngak e piin ni yad be nameg e flaab?

⁶ I weliy Jesus murung’agen “chogowen e fel’ rogon.” (Mark 4:19) Uw rogon nrayog ni bannagey e fel’ rogon? Sana ra lemnag e girdi’ nra felfelan’rad ni bochan e fel’ rogon, machane danga’. Ya yog Solomon ni Pilung ni gaar: “En nib t’uf rok e salpiy e dabi gaman ko tin ni bay rok ban’en.” (Eklesiastes 5:10, The New English Bible) Machane, rayog ni ngan nameg e flaab mu kun pigpig ku Got, fa? Danga’, dabiyog. I weliy Jesus ni gaar: “Dariy be’ nrayog ni nge mang sib rok l’agruw i masta: ya ra fanenikay bagayow me t’uf bagayow rok; ya ra yul’yul’ ngak bagayow me darifannag bagayow. Dabiyog ni ngam manged tapigpig rok Got ma ki gimed e tapigpig rok e salpiy.” I ginang Jesus pi gachalpen ndab ra ulunguyed e flaab u roy u fayleng, ya ngar ulunguyed e ‘flaab u tharmiy,’ ni aram e, ngar fel’gad u mit Got, ni ir e “manang e n’en nthingari yog ngomed u m’on ndawor mu ninged ngak.”​—Matthew 6:8, 19-25.

7. Uw rogon ni nge ‘yog ngodad e yafos ni ir e bin riyul’ e yafos’?

⁷ I pi’ apostal Paul boch e fonow nib gel u nap’an ni be yol ngak Timothy, ni ur maruwelgow u taabang. I gaar ku Timothy: “Mog ngak e piin ni boor ban’en rorad . . . nge l’agan’rad ngak Got ni ir e ba gol ni be pi’ urngin ban’en ngodad ni be fel’ rogodad riy . . . , ma ngar golgad ni nge m’agan’rad ngay ni ngar pied boch e tin nib ba’ rorad ban’en ngak boch e girdi’. Ereray kanawoen mi yad kunuy e flaab ni fan ngorad ni ir e bay mang def ngorad nib gel ni fan ngorad e chiney i yan ngaram. Ma aram e ra yog ngorad e yafos ni ir e bin riyul’ e yafos.”​—1 Timothy 6:17-19.

Mang e “Bin Riyul’ e Yafos”?

8. (a) Mang fan ni boor e girdi’ nima nameg e flaab nge gilbuguwan? (b) Mang e dar yog ni nang e pi girdi’ ney?

⁸ Boor e girdi’ nima lemnag ni faanra nog fare bugithin ni “bin riyul’ e yafos” ma be yip’ fan e flaab nge felfelan’. Reb e magazine u Asia e yog ni gaar: “Piin ni yad ma yaliy e kachido ara TV e kar filed rogon ni ngar ar’arnaged e tin ni yad be guy, mar athapeged e n’en ni nge yog ngorad.” Boor e girdi’ ni yad ma tay ni flaab nge gilbuguwan e ir e ba ga’ fan ko yafas rorad. Boor e girdi’ nima pag fan e fel’ yangaren rok, rarogon downgin, yafas ko tabinaw rok, nge tin nib ga’ fan ko tirok Got ban’en ni bochan e nge yognag e pi n’ey. Ma buchuuw e girdi’ e ma lemnag ni pi n’ey e kemus nrogon e “lem nu roy u fayleng” aram rogon e lem ni ke suwey yooren e girdi’ ma ke k’aringrad ni ngar ngongolgad nib togopuluw ko n’en nib m’agan’ Got ngay. (1 Korinth 2:12; Efesus 2:2) Arfan ni boor e girdi’ nde felfelan’rad e ngiyal’ ney!​—Proverbs 18:11; 23:4, 5.

9. Mang e n’en ndabiyog ni nge rin’ e girdi’, ma mang fan?

⁹ Ere uw rogon e piin ni yad be maruwel ni fan ngak boch e girdi’, ma yad be gayiy rogon ni ngar chuweged e bilig, nge m’ar nge ngongol nde mat’aw? Athamgil ni yad ma tay u fithik’ e pagfay e ma yib angin ngak boor e girdi’. Machane, yugu aram rogon nri yad be athamgiliy i ngongliy e pi n’ey, ma dabiyog ni ngar thilyeged rarogon ere m’ag ney nge ni par nib mat’aw mab manigil. Mang fan? Bochan ni bin nriyul’ riy e “tin ni ka ba’ e girdi’ nu fayleng e ke suweyrad Faanem nib Kireb”​—ni aram Satan—​ma dabun ni nge thil.​—1 John 5:19.

10. Wuin e ra yog e “bin riyul’ e yafos” ko piin nib yul’yul’?

¹⁰ Rib gel e kireban’ riy ni faanra bay be’ ndariy e athap rok ya kemus ni yafas u lan e re fayleng ney! “Faanra l’agan’ rodad ngak Kristus e ke mus ni fan ko biney e tamilang, me ere susun e gadad e piin ni ngari kireban’uy ngodad u roy u fayleng,” aray rogon ni yoloy Paul. “Mmarod nguud abichgad ma gadad be garbod, ya bayi gabul ma kad m’ad” e ngongol ko piin nib mich u wan’rad ndakuriy rogon e yafas nga bang. (1 Korinth 15:19, 32) Machane bay ban’en boch nga m’on, ni aram e “bin nib beech e lan e lang nge bin nib beech e fayleng, ni aram e tin nib mat’aw e ngongol e bay i par riy, ni ereray e pi n’en ni gadad be sonnag.” (2 Peter 3:13) Ngiyal’ nem e, ra felfelan’ e pi Kristiano ko “bin riyul’ e yafos,” ni aram e, “yafos ndariy n’umngin nap’an” ni kan par ni yib flont, u tharmiy ara tan e gagiyeg ko Gil’ilungun Got!​—1 Timothy 6:12.

11. Mang ni bay fan ni ngan maruwel ni fan ko Gil’ilungun Got?

¹¹ Kemus ni yigoo Gil’ilungun Got e rayog ni chuweg e magawon ko girdi’. Ngan athamgil i rin’ e tin nib m’agan’ Got ngay u daken e maruwel ni ngan ayuweg fare Gil’ilungun e aram e n’en nri bay fan nrayog ni nameg be’. (John 4:34) Nap’an ni gad be un ko re maruwel nem, ma rayog ni nge fel’ e tha’ u thildad e Chitamangidad ni bay u tharmiy. Maku ra yib e felfelan’ ngodad ni ngad pigpiggad bokum milyon e walag ni pumoon nge ppin u taabang, ni ku yad be nameg taab n’en.

Ngan Pagfay ko Tin nib Fel’ Ban’en

12. Mu taarebnag e yafos ko re m’ag ney ko “bin riyul’ e yafos.”

¹² Ke yog e Bible nre fayleng ney “nge urngin ban’en ni ba’ riy ni be yim’ e girdi’ ni bochan e bayi m’ay.” Dariy bang ko fayleng rok Satan, nib muun ngay e gilbuguwan nge flaab riy, ni yira digey ndabin thang, “machane en nra rin’ e tin nib m’agan’ Got ngay e ra par nib fos ndariy n’umngin nap’an.” (1 John 2:15-17) Ba thil ko flaab, nge gilbuguwan, nge felfelan’ ko re fayleng ney, ya “bin riyul’ e yafos”​—ni aram e yafos ndariy n’umngin nap’an u tan Gil’ilungun Got—​e ra par ni manemus ma bay fan ni ngad paged fadad ngay, ni faanra da paged fadad ko tin nib fel’ ban’en.

13. Uw rogon ni pag ba wu’ e mabgol farow ni fan ko tin nib fel’ ban’en?

¹³ Mu lemnag Henry nge Suzanne. Rib michan’row ko tin ke micheg Got ni piin ni yad ra tay fare Gil’ilungun nib m’on ko yafos rorad e ra yib e ayuw rok Got ngorad. (Matthew 6:33) Ere, kar dugliyew ni ngar pirew u reb e naun nde tolang puluwon ya nge yog nra ted fakrow boor e tayim i machibnag murung’agen Gil’ilungun Got nge ku boch ban’en nib fel’ u wan’ Got, ko bin ni ngar unew ko maruwel ni yow l’agruw. (Hebrews 13:15, 16) Be’ ni fager rorow e de nang fan e n’en ni kar mel’egew. I gaar ku Suzanne: “Suzanne, faanra ga baadag ni ngam par u reb e naun ni kab fel’ boch ko biney, ma thingar mu pagfan ban’en.” Manang Henry nge Suzanne, ni ngan tay Jehovah nib m’on u wan’uy e “ba ga’ fan ko biney e tamilang nge binem e tamilang.” (1 Timothy 4:8; Titus 2:12) Ilal fagali rugod ni fakrow ni yow l’agruw e tamachib u polo’ e tayim nib pasig. Dariy ban’en ni ke yan nde yog ngorad; ya, n’en nike buch e keb angin e “bin riyul’ e yafos” ngorad ni bochan e aram e n’en ni yad be nameg.​—Filippi 3:8; 1 Timothy 6:6-8.

Dab Mu ‘Fanay e Re Fayleng Ney nib Mus Rogon’

14. Mang e ra buch nib gel e kireban’ riy ni faanra da paged talin fan ni gad bay?

¹⁴ Bay e riya’ riy ni faanra da paged talin e n’en fan ni gad ba’ me mul u pa’dad e “bin riyul’ e yafos.” Gad bay u thatharen e riya’ ni “bochan e magafan’, nge fel’ rogon nge felfelan’ nu fayleng.” (Luke 8:14) Faanra dab da kol ayuwgad ko ar’ar ko fel’ rogon nge “magafan’ rodad ko maruwel rodad” ma rayog ni ngad uned ko tin ni yibe rin’ ko re m’ag ney nge pag rogon. (Luke 21:34, footnote) Ba kireban’, ya boch e girdi’ e kar uned ko re lem ney ni nge fel’ rogoy ma ke “m’ingan’rad ke yib e kireban’ ni pire’ ngorad,” ni ki mus ko tha’ u thilrad Jehovah ma ke kireb. Rib kireban’ ni faanra dabi ‘yog ngodad e yafos ndariy n’umngin nap’an’!​—1 Timothy 6:9, 10, 12; Proverbs 28:20.

15. Uw rogon nib angin ngak reb e tabinaw ni bochan e dar ‘fanayed ere fayleng ney nib mus rogon’?

¹⁵ I fonownigey Paul ni “piin ni yad be ngongliy e tin nu fayleng ban’en e [ngar pired] ndabi mang ir e nge m’on u wun’rad.” (1 Korinth 7:31) I fol Kieth nge Bonnie ko re fonow ney. I yog Kieth ni gaar: “Gub gu mang reb e Pi Mich Rok Jehovah u nap’an ni ke chugur ni nggu mu’ ko skul u rogon i tafalaynag e nguwal. Bay ban’en nrayog ni nggu mel’eg. Boor e m’ar nrayog ni gu tafalaynag nggu yognag boor e salpiy, machane faanra nggu rin’ ni aram rogon ma ra magawonnag e pigpig romow ku Got. Ere gu dugliy ni nggu buchuuwnag e m’ar ni gu be tafalaynag nge yog ni yoor e tayim rog ni fan ko tin nib t’uf ko tabinaw rog ko tirok Got ban’en nge lanin’rad, nib muun ngay fa lal i rugod ni fakag. Yugu aram rogon nib ga’ ndariy e salpiy romad ni ke aw, ma kug filed rogon ni nggu kol ayuwgad ko salpiy, ma gubin ngiyal’ ni bay e tin nib t’uf romad. Ba fel’, mab chugur e tha’ u thilmad e tabinaw rog, mab gel e felfelan’ romad. Ma nap’an ni ke yib e tayim riy, ma gamad gubin ni kug uned ko machib u polo’ e tayim romad. Chiney e fapi rugod ni fakmow e kar uned ko mabgol, ndalip i yad e bay e bitir rorad. Maku ba felfelan’ e tabinaw rorad ni bochan e kar ululgad i tay e tin nib m’agan’ Jehovah ngay nib m’on ko yafas rorad.”

Mu Tay e Tin nib M’agan’ Got Ngay nib M’on u Lan e Yafas Rom

16, 17. Mini’ boch e girdi’ ni bay e salap rorad ni be weliy e Bible murung’agen, ma uw rogon ni yima lemnagrad?

¹⁶ Bible e be weliy murung’agen e piin ni ur pired nrogon nib m’agan’ Got ngay nge piin danga’. N’en ni kan fil u murung’agen e pi cha’ney e fan ngak gubin e girdi’. (Roma 15:4; 1 Korinth 10:6, 11) I toy Nimrod bogi mach nib ga’, machane i rin’ ni be togopuluw ngak Jehovah. (Genesis 10:8, 9) Machane, boor e girdi’ ni ur rin’ed e tin nib fel’ nrayog ni ngad folwokgad riy. Bod Moses, ni gathi rogon e par rok u Egypt ni ir be’ nima tay e girdi’ fan e aram e n’en nib m’on u wan’. Ya, i tay e maruwel ni ke pi’ Got ngak ni “ka ba ga’ fan nga urngin e machaf nu Egypt.” (Hebrews 11:26) Luke ni ir reb e togta e i ayuweg Paul nge boch e girdi’ ko m’ar rorad. Machane i rin’ Luke e tin nth’abi fel’ ni fan ngak boch e girdi’ ni ir reb e tamachib nge ta yol Bible. Me Paul, e gathi yimanang ni ir be’ nib chag i weliy murung’agen e motochiyel, ya yimanang ni ir reb e missionary, “ba apostal ngak e piin ni gathi yad piyu Israel.”​—Roma 11:13.

¹⁷ Kun lemnag David ni gathi ir e ba ga’ ko salthaw ara be’ nib ta chubeg talin e musik ara be’ nima yoloy e tang, ya ir “be’ ni ba adag [Got].” (1 Samuel 13:14) Gad manang Daniel, ni gathi bochan e i maruwel ko am nu Babylon, ya bochan e pigpig ni i tay ni ir reb e profet rok Jehovah nib yul’yul’; ma taareb rogon ku Esther, ni gathi ir leengin e Pilung nu Persia, ya ir be’ nrayog ni ngan fol rok ni bochan e der rus mab gel e michan’ rok; ma Peter, Andrew, James, nge John e gathi ta fita’, ya apostal rok Jesus. Ma, Jesus e gad manang ni gathi ir “fare daiksang,” ya ir “fare Messiah.” (Mark 6:3; Matthew 16:16) Gubin e pi cha’ney ni yad manang ndemtrug ere miti salap, chugum, ara liw ni bay rorad, ma n’en nthingari ga’ fan ko yafas rorad e aram e pigpig rorad ku Jehovah gathi maruwel rorad. Yad manang nre n’en nth’abi ga’ fan ma bay puluwon nra yog riy ngorad e ngar manged pumoon ara ppin ni bay madgun Got u wan’rad.

18. Uw rogon ni ke dugliy reb e Kristiano nib fel’ yangaren ni nge fanay e yafas rok, ma mang e n’en ni ke nang riy?

¹⁸ Seung Jin, ni kan weliy murung’agen faram, e yibi nang ere n’ey. I gaar: “Kug dugliy u wan’ug ni nggu fanay ga’ngin e yafas rog nib puluw ko n’en ni kug ognag ku Got ko bin ni nggu tay gelngig i skulnag rogon e tafalay, ara rogon i yoloy yaan ban’en, ara sensey. Chiney e gube pigpig ko gin nib t’uf e sensey ko thin nu Bible riy, ma gu be ayuweg e girdi’ ni nga ranod ko kanawo’ ni yan ko yafas ni manemus. Ug lemnag nde mo’maw’ ni nggu mang reb e tamachib ni polo’ e tayim. Chiney e kari thil rogon e yafas rog, ya gube gayiy rogon ni nggu mon’ognag e ngongol rog nge maruwel rog ni nggu machibnag e girdi’ nib thilthil yalrad. Kug guy nra nge m’agan’uy ko tin nib m’agan’ Jehovah ngay ma ra yib fan e yafas rodad.”

19. Uw rogon ni ngad pirieged e bin nriyul’ i fan e yafas?

¹⁹ Gad e Kristiano e, kan tow’athnagdad ko fare tamilangan’ nra pi’ e yafas nge fare athap nra yognag e yafas ngodad. (John 17:3) Ere, ‘ke yog ngodad e tow’ath ni pi’ Got, ere thingar dab da paged nge maadab.’ (2 Korinth 6:1) Ya, ngad fanayed e yafas rodad ni ngad pininged e sorok ngak Jehovah. Ngad wereged fare tamilangan’ nra yibnag e bin nriyul’ e felfelan’ e chiney me fekey i yan ko yafas ndariy n’umngin nap’an. Faan gad ra rin’ ni aray rogon, ma gad ra guy nriyul’ fapi thin ni yog Jesus ni gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Ma gadra pirieg e bin nriyul’ fan e yafas.

[Footnote]

Rayog ni Ngam Weliy?

• Mang e re n’en nth’abi ga’ fan nrayog ni ngad nameged u lan e yafas rodad?

• Mang fan nde gonop ni ngad pired ni fan ko chugum?

• Mang e “bin riyul’ e yafos” ni ke micheg Got?

• Uw rogon ni ngad fanayed e yafas rodad ni fan ko tin nib m’agan’ Got ngay?