Ngan Nameg e N’en nib M’agan’ Got Ngay e Chiney
“I yim’ [Kristus] ni fan ngak e girdi’ ni urngin ni bochan e piin ni yad ba fos e nge dab ku ur ngongolgad ni yad be yan nga tabon lanin’rad.”—2 KORINTH 5:15.
1. Mu weliy ban’en ni buch rok reb e missionary ko gin ni kan pi’ ngak ni nga i machib riy.
REB E missionary ni Aaron fithingan e gaar: “Karrow romad e aram e bin nsom’on e karrow ko piin ni gathi salthaw ni yan nga lan reb e binaw u Africa u tomren nike m’ay e mahl u thilin boch e girdi’ ko gin’em. Dabkiyog ni nggu nonad ngak e tin nu rom e ulung, ere thingar gu warod gu nanged salaprad. N’en ni kub muun ko tin ni gu feked ni bod e ggan, mad, nge babyor ni bay e thin ko Bible riy e, aram fare video ni Jehovah’s Witnesses—The Organization Behind the Name.a Boor e girdi’ nra bad ni ngar guyed boch fare video ko ‘gin ni yima yaliy e kachido riy’—u lan fare binaw u bochi koyeng ni kan ngongliy ko pan ni bay ba VCR nge TV riy—ma aram mu gu paged ni l’agruw yay ngan guy. Gubin yay nni pag fare kachido ma bay e girdi’ ni m’agan’rad ngay ni ngar uned ko fol Bible. Rib tamilang ni yib angin e athamgil ni gu tayed.”
2. (a) Mang fan ni ma dugliy e pi Kristiano ni ngar fanayed e yafas rorad ko pigpig ngak Got? (b) Mang boch e deer ni ngad weliyed e chiney?
2 Mang fan ni rin’ Aaron nge fapi girdi’ ni be un ngak ban’en nrib mo’maw’ ni aray rogon? Bochan e, yad be pining e magar ko fare maligach ni biyul ni ke pi’ Jesus Kristus, ma kar ognaged e yafas rorad ngak Got ma yad baadag ni ngar fanayed u rogon nib puluw ko n’en nib m’agan’ Got ngay. Gubin e Kristiano ni kar ognaged yad e kar dugliyed ni nge “dab ku ur ngongolgad ni yad be yan nga tabon lanin’rad,” machane ngar rin’ed e tin nrayog rorad ni “fan ko Thin Nib Fel’ ni yib rok Got.” (2 Korinth 5:15; 1 Korinth 9:23) Yad manang nnap’an nra mus ere m’ag ni kireb ney, ma gubin e salpiy nge gilbuguwan ko re fayleng ney e ra m’ay fan. Ere bochan ni bay e yafas rorad mab fel’ fithik’ i dowrad, ma arfan ni yad baadag ni ngar fanayed e pi n’ey u rogon nib puluw ko tin nib m’agan’ Got ngay. (Eklesiastes 12:1) Uw rogon nrayog nda rin’ed ere n’ey? Uw e rayog ni yib gelngidad riy ni ngad rin’ed ere n’ey? Ma mang boch i kanawoen e pigpig ni ke mab ngodad?
Ngan Mon’og ko Tirok Got
3. Mang boch ban’en nib muun ko ngan rin’ e n’en nib m’agan’ Got ngay?
3 Tin nriyul’ e Kristiano, e maruwel rorad u n’umngin nap’an e yafas rorad e ngar rin’ed e tin nib m’agan’ Got ngay. Ba ga’ nima tabab ko ngan un ko fare Theocratic Ministry Skul, min beeg e Bible u gubin e rran, min un ko machib, min mon’og i yan ko taufe. Ma nap’an ni gad be mon’og i yan, ma thingar dab da paged talin fapi thin rok apostal Paul ni gaar: “Um rin’ e pi n’ey ma ga tiyan’um ngay, nge yog ni guy e girdi’ ni gubin ni ga be mon’og i yan.” (1 Timothy 4:15) Pi n’ey ni yibe mon’og riy e gathi bochan e ngan pining e sorok ngak be’ riy ya bochan e be dag ni ke mudugil u wan’dad ni ngad rin’ed e tin nib m’agan’ Got ngay ndariy e lem ni fel’ ngak riy. Gad ra yan ko re kanawo’ ney ma be dag ni kad paged ni nge pow’iy Got kanawoen gubin ban’en u lan e yafas rodad, ma ra rin’ ni kab fel’ rogon nga rogon nrayog rodad.—Psalm 32:8.
4. Uw rogon nrayog ni ngad ted e marus rodad nga tomur?
4 Machane, faan gadra magawon i dugliy ban’en ara kaygi pag rogon ni ngad lemnaged gadad, ma rayog ni mo’maw’nag ngodad ni ngad mon’oggad ko pigpig ku Got. (Eklesiastes 11:4) Ere, u m’on nrayog ni ngad pirieged e bin nriyul’ e felfelan’ ko pigpig ngak Got nge boch e girdi’, ma som’on e sana ba t’uf ni ngad gelgad ko marus rodad. Bod ni be’ ni Erik fithingan, e be lemnag ni nge pigpig u reb e ulung nib thil e thin rorad. Machane ke magafan’, me gaar u wan’: ‘Mog gu ra fel’ u wan’rad? Gu ra adag daken e walag ko re ulung nem, fa? Yad ra adag dakenag, fa?’ I gaar: “Gub gu nang nib t’uf ni nggu lemnag e pi walag ma gathi gag. Kug dugliy ndab ki magafan’ug nggu tiyan’ug ko n’en nrayog ni gu ayuweg boch e girdi’ riy. Gu meybil nggu ning e ayuw ma aram mug wan. Chiney e gu be felfelan’ ko pigpig ni gu be tay u rom.” (Roma 4:20) Arrogon, gadra pigpig ngak Got nge boch e girdi’ ndariy e lem ni fel’ ngak riy, ma gadra pirieg e felfelan’ ma ra fel’ u wan’dad e chuuw ni bay rodad ban’en.
5. Mang fan nib t’uf ni ngad lemnaged boch ban’en nib fel’ rogon ko tin ni gad be nameg ni fan ko n’en nib m’agan’ Got ngay? Mu weliy rogon.
5 Ra ngad nameged e tin nib m’agan’ Got ngay maku ba t’uf ni ngad lemnaged u m’on riy e n’en ni ngad rin’ed. Thingar da gonopiyed ngad siyeged i tay e malfith nrayog ni taydad ni gad e sib ko re m’ag ney me achignag e puf rogon rodad ni ngad rin’ed e maruwel rok Got. Be puguran e Bible ngodad ni gaar: “En ni bay e malfith rok e ir e tapigpig rok fa en ni ke pi’ e salpiy rok ngak.” (Proverbs 22:7, NW) Ra pagan’dad ngak Jehovah ma gad tay e pigpig rodad ngak nib m’on u wan’dad ma ra ayuwegdad ni ngad tedan’dad ko tirok ban’en. Bod ni, Guoming nge l’agruw i ppin ni walagen e yad ma par ko chitiningrad u bang nib tolang puluwon e naun riy ma kub mo’maw’ ni ngan pirieg e maruwel nrayog ni ngan par riy nib n’uw nap’an. Bochan ni ur fanayed e salpiy rorad nib fel’ rogon mu ur kieged e malfith u puluwrad nib fel’ rogon ma aram mi i par nib fel’ thilrad ni mus ko ngiyal’ ni gathi yad gubin ni yad be un ko maruwel. I yog Guoming ni gaar, “Yu ngiyal’, e dariy e salpiy romad. Machane, ka gamad be ulul ko machib u polo’ e tayim maku gamad be ayuweg e chitiningmad nib fel’ rogon. Gamad ba felfelan’ ngay ndabun e chitiningmad ni nggu paged fan e tin ni gamad be nameg ko tirok Got ni fan e nggu yognaged e tin ni yima flaab riy ko re yafas ney ni fan ngak.”—2 Korinth 12:14; Hebrews 13:5.
6. Mang ban’en ni ke buch ni be dag rogon nrayog nda puluwniged e yafas rodad ko n’en nib m’agan’ Got ngay?
6 Faanra ga be un i nameg e tin ni fan ngom ban’en—ndemtrug ko salpiy ara yugu ban’en—ma boor ban’en nib t’uf ni ngam thilyeg u rarogom ni faanra ngam tay e tin nib m’agan’ Got ngay nib m’on u wan’um. Tiney e ban’en e dabiyog ni ngan thilyeg u taa bochi ngiyal’, ma faanra kam oloboch ko yay nsom’on ma gathi aram e be yip’ fan ndabkiyog ni ngam rin’ bayay. Mu lemnag Koichi, ni bay e magawon rok ni bochan e kay gi pag urngin e tayim nibe tay ni fan ko fafel. Ke fil Koichi e Bible u nap’an nib fel’ yangaren, machane bokum e duw ni ke suwey e video games e yafas rok. Faani reb e rran me gaar u wan’: ‘Mang e gu be rin’? Ke pag 30 e duw rog, ma dariy ban’en ni gu be rin’ nib ga’ fan u lan e yafas rog!’ Ere un Koichi bayay ko fol Bible me fel’ u wan’ e ayuw ko ulung. Yugu aram rogon nib sagaal ni thil, ma de mulan’. Bochan e meybil nib gel ni tay nge athamgil u fithik’ e t’ufeg ni pi’ boch e girdi’ ngak, me yog ni gel ko magawon rok. (Luke 11:9) Chiney e ba felfelan’ Koichi ni be pigpig ni ir reb e ministerial servant.
Mu Fil Rogon ni Nge Thabthabel e Lem Rom
7. Mang fan nib t’uf ni ngad thabthabelgad i rin’ e maruwel rok Got?
7 Ra ngad nameged e n’en nib m’agan’ Got ngay mab t’uf ni ngad rin’ed e tin nrayog rodad. Thingar dab da malmalgad i rin’ ere n’ey. (Hebrews 6:11, 12) Machane ku dabun Jehovah ni ngad fanayed gubin i gelngidad nge m’ay—dowdad, nge lem rodad, nge lanin’dad. Gadra dag u fithik’ e sobut’an’ ndabiyog ni ngad rin’ed e maruwel rok Got u chi gelngidad ma be tolangnag maku be dag ni gad ba thabthabel. (1 Peter 4:11) Ke micheg Jehovah nra pi’ gelngidad ni ngad rin’ed e n’en nib m’agan’ ngay, machane thingar dab darod nge pag rogon, ni gad be gay rogon ni ngad rin’ed e tin nder lemnag ni ngad rin’ed. (2 Korinth 4:7) Ra ngad ululgad ko pigpig ngak Got ndabi m’ay gelngidad, mab t’uf ni ngad fanayed gelngidad nib fel’ rogon.
8. Mang e buch u nap’an ni gay rogon reb e Kristiano nib fel’ yangaren ni nge pi’ e tin nth’abi fel’ rok ko fayleng nge Jehovah, ma mang boch ban’en ni ke thilyeg u rarogon?
8 Bod nu, lan l’agruw e duw ma Ji Hye, ni ma par u Ngek u Asia, e i maruwel u reb e maruwel ni ma fek boor e tayim rok maku be pioneer. I gaar, “Kug gay rogon ni nggu pi’ e tin nth’abi fel’ rog ni fan ngak Jehovah nge maruwel rog, machane kemus ni lal e awa ni gu ma mol riy u gubin e nep’. Munmun, ma dakuriy gelngin lanin’ug ni fan ko tin nriyul’, ma aram me buchuuw e felfelan’ rog ko pigpig ni gu be tay ngak Jehovah.” I gayiy Ji Hye reb e maruwel nra fek buchuuw ko tayim rok ni bochan e nge yog ni pigpig ku Jehovah u ‘polo’ i gum’irchaen, nge laniyan’, nge lem rok, nge gelngin. (Mark 12:30) I gaar, “Yugu aram rogon gelngin e towasar nibe tay e tabinaw rog ngog ni nggu yognag boor salpiy, ma kug athamgil ni nggu tay e n’en nib m’agan’ Got ngay nib m’on u wan’ug. Ku be yog e salpiy ngog ni fan e nggu chuw’iy buchuuw ban’en ngay, ni bod rogon e mad nib fel’ u p’eowchen e girdi’. Ma kug felfelan’ ya ke yog ni fel’ boch e mol rog! Gu be felfelan’ ko machib ni gu be tay, ma ki gel e tha’ u thilmow Jehovah. Re n’em e bochan ni ke buchuuw e tayim ni gu be guy e tin ni yi baadag nge tin ni ma mitan’uy riy ko re fayleng ney.”—Eklesiastes 4:6; Matthew 6:24, 28-30.
9. Uw rogon nra rin’ e athamgil ni gad be tay ban’en ngak e girdi’ ni gad be machibnag?
9 Gathi gubin e girdi’ nrayog ni pigpig ngak Got nreb e tamachib u polo’ e tayim. Faanra ga be magawon ni bochan e kam pilibthir, ara gab m’ar, ara ku boch e magawon, ma dab mu pagtalin nib ga’ fan u wan’ Jehovah e yul’yul’ nge re miti pigpig ni gabe tay u polo’ i gum’irchaem ngak. (Luke 21:2, 3) Ere, dariy bagadad, ni nge darifannag angin e pigpig rodad ku Got ngak boch e girdi’, ni mus ni faanra buchuuw. Bod ni, sana ka darod nga in e naun ma dariy be’ ni baadag ni nge motoyil ko machib rodad. Tomren ni kad chuwgad, ma sana fapi girdi’ e yad ra weliy murung’agdad ni bokum e awa ara rran, ni mus ko pi naun ndariy be’ ni bing e mab riy ngodad! Darur da lemnaged ni gubin e girdi’ nra rung’ag fare thin nib fel’ e ra motoyil ngay me adag, machane bay boch e girdi’ nra adag. (Matthew 13:19-23) Boch e girdi’ e sana ra adag u nap’an ni ke thil boch ban’en u fayleng ara lan e yafas rorad. Demtrug rogon, ma faanra da rin’ed e tin nrayog rodad ko machib ni gad be tay, ma aram e gad be rin’ e maruwel rok Got. Gad be “maruwel rok Got u taabang.”—1 Korinth 3:9.
10. Mang maruwel e ba mab ngak e girdi’ u lan e ulung?
10 Tin kub muun ngay e, gad gubin nrayog ni ngad ayuweged e tabinaw rodad nge walagdad u lan e ulung ni pumoon nge ppin. (Galatia 6:10) Angin e ngongol rodad nib fel’ nra yib ngak boch e girdi’ e rayog ni par nib n’uw nap’an. (Eklesiastes 11:1, 6) Nap’an nra rin’ e piin piilal nge ministerial servants e maruwel rorad nib fel’ rogon, ma aram e yad be ayuweg e girdi’ u lan e ulung ni nge fel’ me gel e tha’ u thilrad Jehovah. Ba mudugil u wan’dad ni gad ra ‘maruweliy e maruwel rodad ni fan ngak Somol,’ ma “gathi ra yan i aw nib m’ay fan.”—1 Korinth 15:58.
Ngan Nameg e N’en nib M’agan’ Got Ngay Nge Mang Maruwel Rodad
11. Mang boch e maruwel nra mab kanawoen ngodad ni ngad rin’ed, ni gathi maruwel u lan e ulung rodad?
11 Gad e Kristiano e, ba t’uf rodad e yafas, ma gad be athapeg ni ngad pininged e sorok ngak Got u gubin ban’en ni gad ma rin’. (1 Korinth 10:31) Gadra machibnag fare thin nib fel’ ni murung’agen Gil’ilungun Got u fithik’ e yul’yul’ mad filed ngak boch e girdi’ ni ngar folgad ko tin ke motochiyelnag Jesus, ma gad ra pirieg boor kanawoen e pigpig ni gad ra tay ngak Got nra felfelan’nagdad. (Matthew 24:14; 28:19, 20) Rayog ni nge mab e kanawo’ ngodad ko pigpig ko gin nib t’uf e ayuw riy, ndemtrug ko yugu reb e territory, ara thin, ara nam, ni gathi ulung rodad. Piin piilal nge ministerial servants ni ke bung rogorad e sana rayog ni ngar uned ko fare Ministerial Training School, ma tomur riy e rayog ni ngar pigpiggad u boch e ulung nib t’uf e ayuw riy, ndemtrug ko nam rorad ara boch e nam. Piin mabgol ni yad be un ko machib u polo’ e tayim e rayog ni ngar uned ko skul ko missionary u Gilead mar pigpiggad u boch e nam ni kan pi’rad ngay. Ma kub t’uf boch e girdi’ ni ngar ognaged yad i rin’ boch e maruwel u Bethel nge ngan toy boch e naun ntafen e muulung nge boch e branch ofis.
12, 13. (a) Uw rogon ni ngam dugliy ere miti pigpig ni ngan nameg? (b) Mu weliy rogon nrayog ni ngan fanay e salap ni ke yog u reb e maruwel nga boch e maruwel.
12 Ba miti mang pigpig e gara nameg? Bochan ni gur reb e tapigpig rok Jehovah ni kam ognagem ngak, ma gubin ngiyal’ ni ngam sap ngak nge ulung rok ni nge pow’iyem. Ma “gol” nra dag ngom e ra ayuwegem ni ngam mel’eg e n’en nib fel’. (Nehemiah 9:20) Reb e maruwel e ra bing e kanawo’ nga reb e maruwel, ma re miti salap nrayog ngodad u reb e maruwel e sana ra yib angin nga reb e maruwel.
13 Bod ni Dennis nge ppin rok, ni Jenny fithingan, e gubin ngiyal’ ni yow ma ayuweg e maruwel ni yima tay ko pi Kingdom Hall. Tomren ni aw e Yoko’ ni Katrina nga yimuch u Meriken, mar ognagew yow ni ngar piew e ayuw ko piin nib t’uf e ayuw rorad. I gaar Dennis: “Salap ni yog ngomow ko pi Kingdom Hall ni yima toy ni gu fanayew ni nggu ayuwegew e pi walagdad ngay e ke yibnag e felfelan’ nib gel ngomow. Felfelan’ ni ke dag e piin ni kug piew e ayuw ngorad e kari bit nga gum’irchamow. Boch e ulung ko girdi’ e gathi rib gel e ayuw nra pied ko naun nni toy. Pi Mich Rok Jehovah e ke gaman 5,300 e tabinaw ni kar ngongliyed bayay nge boor e Kingdom Hall. Ke guy e girdi’ ere n’ey ma chiney e ke yoor i yad ni ke adag e machib.”
14. Mang e rayog ni mu rin’ ni faanra ga baadag ni ngam nameg e pigpig u polo’ e tayim?
14 Rayog ni ngam nameg e n’en nib m’agan’ Got ngay ni aram e ngam mel’eg e machib u polo’ e tayim ni nge mang maruwel rom, fa? Faanra rayog, ma ra yib boor e tow’ath riy ngom. Faanra dabiyog ni bochan rarogom e chiney, ma sana rayog ni ngam thilyeg boch ban’en u rarogom. Mu meybil ni bod Nehemiah u nap’an ni baadag ni nge rin’ reb e maruwel ni kan pi’ ngak, me gaar: “Ah, Jehovah, wenig ngom, . . . mu ayuwegeg e daba’ nge fel’ e pi n’en ni be maruweliy e tapigpig rom.” (Nehemiah 1:11, NW) Ma, pagan’ rom ngak e “En Nima Motoyil ko meybil,” e thingar ki chag e ngongol ngay. (Psalm 65:2, NW) Faanra nge tow’athnagem Jehovah nge yog ni yoor boch e tayim ni ngam pigpig ngak, ma som’on e ngam athamgiliy e pi n’ey. Nap’an ni kam dugliy ni ngam un ko machib u polo’ e tayim rom, ma thingar mu fol ko n’en ni kam dugliy ni ngam rin’. Nap’an nra yan boch e tayim, ma ra yoor ban’en ni kam nang, maku ra gel e felfelan’ rom.
Reb e Yafas ni Rib Ga’ Fan
15. (a) Uw rogon ni ma yib angin ngodad ni faan gadra non ara da beeged murung’agen boch e tapigpig rok Got ni kar pigpiggad ni ke n’uw nap’an? (b) Mu weliy ban’en ni kam beeg u murung’agen be’ ni ke pi’ e athamgil nga lanin’um.
15 Mang angin e ga be lemnag nra yib riy nfaanra mu nameg e n’en nib m’agan’ Got ngay? Mu non ngak boch e tapigpig rok Jehovah, nib ga’ ni piin ni ke yoor e duw ni kar uned ko pigpig u polo’ e tayim rorad. Rib flaab, ma bay fan e yafas rorad! (Proverbs 10:22) Yad ra yog ngom ndariy ba ngiyal’ nde yog ni ayuwegrad Jehovah ko tin nib t’uf rorad ni mus ko ngiyal’ ni kari mo’maw’ e yafas rorad. (Filippi 4:11-13) Nap’an e 1955 nge ni mada’ ko 1961, ma Fare Wulyang Ntagil’ e Damit e kan tay ngay murung’agen e piin nib yul’yul’ nga tan fare thin ni “Nggu Nameg e Yafas ni Bay Fan Ngog.” Ka nap’an ere ngiyal’ i n’em, ma bokum miriay e girdi’ ni kan yoloy murung’agrad. Ra reb i murung’agen e pi girdi’ ney ma be dag e pasig nge felfelan’ ni be puguran ngodad e n’en ni gad ma beeg murung’agen u lan fare babyor ko Bible ni Acts. Gara beeg e pi n’ey ma ra k’aringem ni ngam gaar, ‘Ireram ere miti yafas ni gu baadag ni nge yog ngog!’
16. Mang e n’en nima yibnag fan me felfelan’nag e yafas rok reb e Kristiano?
16 Aaron, ni kan weliy murung’agen ko som’on, e keb ngan’ me gaar: “U Africa e, ba ga’ ni gu ma pirieg boor e fel’ yangaren riy ni yad be yan u baley e nam nga baley ni yad be gay ban’en nra yibnag fan e yafas rorad. Yooren i yad e dar ma pirieg. Machane gadad, e gad be nameg e n’en nib m’agan’ Got ngay ni aram e gad be mon’ognag fare machib ko Gil’ilungun, ma kub felfelan’dad ko yafas ni bay fan. Kad guyed nib gel e felfelan’ ko pi’ ban’en ngak be’ ko bin be’ e nge pi’ ban’en ngom.”—Acts 20:35.
17. Mang fan ni ngad nameged e n’en nib m’agan’ Got ngay e chiney?
17 Ere uw rogom? Mang e n’en ni ga be nameg ni bay fan? Faanra dariy ban’en ni ga be nameg, mab papey nra fek boch ban’en e tayim rom nge gelngim. Mang ni ngam adbey e yafas rom ni fan ko tin ni be ognag ere m’ag ku Satan ney? Dabki n’uw nap’an ko ngiyal’ nra yib fare ‘gafgow ni ba ga’’, ma ra m’ay angin e flaab ko chugum nge liw nu fayleng. N’en nra yib fan e ngiyal’ nem e tha’ u thildad Jehovah. Ri gad ra felfelan’ ni kad pigpiggad ngak Got nge boch e girdi’ ma kad nameged e n’en nib m’agan’ Got ngay u lan e yafas rodad!—Matthew 24:21; Revelation 7:14, 15.
[Footnote]
a Ke ngongliy e Pi Mich Rok Jehovah.
Rayog ni Ngam Weliy?
• Uw rogon u wan’ Jehovah e pigpig rodad ngak?
• Uw rogon ma ngan par ni yib thabthabel e ra ayuwegdad ni ngad pigpiggad ngak Got nge boch e girdi’?
• Mang boch kanawoen e pigpig ni ke mab ngodad?
• Uw rogon ni ngad pired ni bay fan e yafas rodad e chiney?
[Pictures on page 11]
Ba t’uf ni ngad thabthabelgad nfaanra ngada ululgad ko pigpig ngak Jehovah u polo’ e yafas rodad
[Pictures on page 12]
Boor mit e pigpig ku Got