Piin Fel’ Yangaren​—Mang e Ngam Rin’ed ko Yafas Romed?

I YOG reb e rugod ni gaar: “Gu baadag ni nggu rin’ ban’en nib fel’ ko yafas rog.” Ma dabisiy ni ku arrogom. Machane, uw rogon ni ngam rin’ e n’en nib “fel’” ko yafas rom? Pi taab yangar rom, nge sensey rom, nge ku boch e girdi’ e sana yad ra yog ngom nra fel’ rogom ni faanra nge yog reb e maruwel ngom ni boor e salpiy nra yog riy!

Machane, be fonownag e Bible e piin fel’ yangaren ni faan yad ra nameg e fel’ rogon ma bod ni yad be “l’ol’og e nifeng.” (Eklesiastes 4:4, BT) Re n’ey e bochan nri in i yad e ma yog ni nge fel’ rogon ko tomur. Machane, pi arorad ni ma fel’ rogon e ma pirieg ni rogon e yafas rok e gathi aram rogon ni lemnag ko som’on. I yog reb e fel’ yangaren u Great Britian nib fel’ e maruwel rok ni gaar: “Bod ba kahol ni ga ra changar nga langgin ma dariy ban’en riy.” Riyul’ ni ga ra un ko maruwel ma rayog ni nge yoor e salpiy rom me nangem e girdi’. Machane, dabi ayuwegem ko tirok Got ban’en. (Matthew 5:3) Maku reb e be yog e 1 John 2:17 ni “re fayleng ney . . . e bayi m’ay.” Ere yugu ra ke yog boor ban’en ko re fayleng ney ngom, machane ri dabi n’uw nap’an me m’ay.

Eklesiastes 12:1 e be yog ngak e piin fel’ yangaren ni gaar: “Mu lemnag e en ni sunumiyem ko ngiyal’ ni ka gab pagel.” Arrogon, n’en nth’abi fel’ ni ngam rin’ ko yafas rom e ngam pigpig ngak Jehovah Got. Machane som’on e bay boch ban’en nthingar mu rin’ ya nge bung rogom ni ngam pigpig ngak Got. Uw rogon ni ngam rin’? Ma mang e ba muun ko pigpig ngak Got?

Nge Bung Rogom ni Ngam Mang Reb e Mich Rok Jehovah

Som’on e thingar mu adag ni ngam pigpig ngak Got. Machane, re n’ey ni ngam adag e yugu dabi yib nib tomgin ni mus ni faanra gallabthir rom e yow e Kristiano. Ya thingar mu maruweliy ni nge fel’ e tha’ u thilmew Jehovah. I yog reb e rugod ni gaar: “Meybil e ra ayuwegem nge fel’ e tha’ u thilmew Jehovah.”​—Psalm 62:8; James 4:8.

Roma 12:2 e ku be yog ban’en nthingar mu rin’. Be gaar: “Ngam nanged e tin nib m’agan’ Got ngay ni tin nib fel’, nib fel’ u wan’ Got ma rib yal’uw.” Be maruwar u wan’um e n’en ni kan fil ngom, fa? Faanra arrogon, mag fol ko fonow nu Bible ni be yog ni ngam ‘nang’ ni pi n’ey e ba riyul’! Mu fal’eg i gay ngam nang. Mag beeg e Bible nge boch e babyor nib puluw e thin riy ko Bible. Ra ngam fil murung’agen Got ma gathi kemus ni ngam lemnag e tin ni ga manang nib riyul’, ya ku thingar mu tay ba ngiyal’ ni ngam fal’eg i lemnag e n’en ni kam beeg, ya nge yog ni nge taw nga gum’irchaem me k’aringem ni ngari t’uf Got rom.​—Psalm 1:2, 3.

Bin migid e ngam weliy e n’en ni kam fil ngak e piin ni gimed nga skul u fithik’ e sabethin. Ngemu’, ma aram e rayog ni ngam un ko machib u mit e tabinaw. Ga ra mada’nag be’ ni gimew nga skul u nap’an e machib, ma dabisiy ni ga ra magawon ngak. Machane, be yog e Bible ndab da ‘tamra’gad ko re thin ney nib fel’.’ (Roma 1:16) Ya ga be fek i yan e thin nra yognag e yafas nge athap! Ere mang ni ngam tamra’ ngay?

Faanra gallabthir rom e Kristiano, ma dabisiy ni ga ma un ngorow ko machib. Machane ku rayog ni ngam rin’ boch ban’en ko bin ni kemus ni nga yugu mu sak’iy ndab mu non fa kemus ni ngam pi’ e babyor u nap’an ni kan yan nga reb e tabinaw, fa? Rayog ni gur rom e ngam non mag beeg reb e thin nu Bible, fa? Faanra dabiyog rom, ma ga ning e ayuw ko gallabthir rom ara be’ u lan e ulung ni ke ilal ko tirok Got ban’en. Mu nameg ni ngam mang reb e publisher, mag un i machibnag fare thin nib fel’!

Dabi n’uw nap’an ma ga ra adag ni ngam ognagem ngak Got ni ngam pigpig ngak. (Roma 12:1) Machane, re n’ey e ku thingari nang e girdi’ ni yoor. Baadag Got ni gubin e piin ni ke michan’rad ngak e thingar ‘rogned nga dap’il’ugunrad ma aram e kar thapgad.’ (Roma 10:10) U m’on ni ngan taufenagem, ma ga ra yog e n’en ni ke michan’um ngay, ngemu’ mfin ni taufenagem. (Matthew 28:19, 20) Taufe e gathi yugu dariy fan. Machane, dab mu par ndab mu un ko taufe ni bochan e ga be lemnag nri chey ma ga mul. Ya faan ga ra pagan’um nga gelngin Got, ma ra pi’ ngom fare gelngin “ni ir e ba th’abi gel” ni nge ayuwegem ni ngam par ni gab mudugil.​—2 Korinth 4:7; 1 Peter 5:10.

Ga ra un ko taufe ma kam mang reb e Mich Rok Jehovah. (Isaiah 43:10) Re n’ey e ra thilyeg e yafas rom. Ngam ognagem ngak Got e ba muun ngay ni ngam ‘pag talim.’ (Matthew 16:24) Sana immoy boch ban’en ni um nameg nthingar mu digey ya nge yog ni ngam ‘m’oneg u wan’um e gagiyeg rok Got.’ (Matthew 6:33) Ga ra ognagem ngak Got ngam un ko taufe ma aram e ke mab e kanawo’ ngom ni ngam un nga boch e maruwel ni fan ngak Got. Baaray boch e pi maruwel nem.

Boch e Maruwel Nrayog ni Ngam Rin’ ni Fan ngak Got u Polo’ e Tayim Rom

● Pioneer e aram reb e maruwel. Pioneer e aram reb e Kristiano ni ke un ko taufe ni ma machib ni 70 e awa u reb e pul. Ga ra un ko machib ni aray rogon ma ra ayuwegem ni ngam salap ko machib nge rogon ni ga be fil ban’en ngak e girdi’. Boor e pioneer ni kar felfelan’gad ni kar ayuweged e piin ni yad ma fil e Bible ngorad kar uned ko taufe. Mang maruwel nu fayleng e ra yibnag e biney e felfelan’ ngom?

Yooren e pioneer e kar uned nga reb e maruwel nra ayuwegrad ni nge yog e tin nib t’uf ko par rorad, ma dabi magawonnag e tayim rorad ko machib. Boor e piin ni kar filed boch e maruwel u skul ya ngar mu’naged e skul ma rayog ni ngar rin’ed reb e pi maruwel nem. Faanra gimed be lemnag e gallabthir rom ni ngkum fil boch e maruwel u tomuren ni kam mu’nag e skul, ma gathi bochan e nge yoor e salpiy, ya bochan e ngam yognag e tin nib t’uf ko par rom u nap’an ni ga be machib u polo’ e tayim.

Machane, piin pioneer e thingari dabi m’on e maruwel u wan’rad, ya n’en ni nge m’on u wan’rad e machib ni ngar ayuweged e girdi’ nge yog e yafas ni manemus ngorad! Ere mang ndab mu nameg ni ngam un ko pioneer? Ga ra mang pioneer ma aram e ke mab e kanawo’ ngom ni ngkum rin’ boch e maruwel. Bod ni, boch e pioneer e ka ranod nga yu yang u fayleng ni ngar pied e ayuw ko machib. Ma boch i yad e ke fil e thin u yugu reb e nam ma be ayuweg e girdi’ u reb e ulung ko gin ni ma par riy nib thil e thin rorad. Maku boch i yad e ke yan nga reb e nam be pi’ e ayuw ko machib. Ere pioneer e reb e tow’ath!

● Skul ni Fan ko Piin Mabgol ni Kristiano e aram reb e ban’en nra bing e kanawo’ nga boch e maruwel nib fel’. Re skul ney e ma ayuweg e piin mabgol ya nge yog ni ngar rin’ed boch e maruwel ni fan ngak Jehovah nge ulung rok. Boor e piin mabgol ni kar mu’naged e re skul ney ni kan pi’rad nga boch e binaw ko nam rorad nib t’uf e ayuw riy ko machib. Maku boch i yad e kan pi’rad nga boch e nam ni ngar pied e ayuw ko machib ni faanra kan guy nrayog rorad. Piin ni kar uned ko re skul ney e ku rayog ni ngar manged boch e special pioneer, min pi’rad nga boch e binaw ndariy e ulung rodad riy.

● Skul ni Fan ko Pi Walag ni Pumoon ni Yad Ba Muchugbil e ku reb e skul ni fan ko piin piilal nge ministerial servant ndawor ra uned ko mabgol. Re skul ney e yima tay u lan meruk e wik. Ma yima fil riy murung’agen e maruwel nib milfan ko piin piilal nge ministerial servant, nge rogon ni ma maruwel e ulung rodad, nge rogon ni ngan non u fithik’ e yoor. Boch e pi walag ney e yima pi’ e maruwel ngorad ko nam rorad. Ma boch i yad e yima pi’rad nga boch e nam.

● Maruwel u Bethel e aram e maruwel ni yima tay ko pi branch ko Pi Mich Rok Jehovah ni yima ognagey ngay. Boch e walag u Bethel e yad ma fal’eg e pi babyor ni gad ma fil. Ma boch i yad e ma rin’ boch e maruwel ni ku bay rogon ko pi babyor ni yima fal’eg, ni bod ni ngan fal’eg e yungi n’en ni ke kireb ko naun nge boch e masin ni yima fal’eg boch e babyor riy. Ma boch i yad e ma fal’eg boch e maruwel ni fan ngak e piin ni yad ma maruwel u Bethel. Gubin e pi maruwel ney e yigoo fan ko pigpig ngak Jehovah. Piin ni yad ma maruwel u Bethel e yad ba felfelan’, ya yad manang ni n’en ni yad be rin’ e fan ngak pi walagrad u ga’ngin yang e fayleng.

Yu ngiyal’ e yima fek boch e walag ni bay ban’en ni yad ba salap riy ni ngar pigpiggad u Bethel. Machane, yooren i yad e fin yima skulnag u nap’an ni yad bay u rom. Piin ni yad ma maruwel u Bethel e gathi yad ma maruwel ni bochan e nge yoor ban’en rorad, ya ba fel’ u wan’rad e tin ni bay rorad ni bod e ggan, nge gin ni ngar pared riy, nge chuuw i salpiy ni yibe pi’ ngorad ni fan ko tin nib t’uf rorad. Baaray rogon ni weliy reb e walag nib fel’ yangaren murung’agen e pigpig u Bethel: “Rib manigil! Maruwel e de mom, machane boor e tow’ath ni ke yog ngog ko pigpig ni gu be tay u roy.”

● Ku reb e maruwel ni ka nog e international service ngay e aram e yima toy e branch ofis nge Kingdom Hall u fayleng i yan. Pi walag ni yad ma rin’ e re maruwel ney e ka nog e international servant ngorad, ma yad ma milekag nga boch e nam ni ngar uned ko pi maruwel nem. Ku reb e maruwel eray ni bay rogon ko pigpig ni gad be tay ngak Got, ni bod e maruwel ni un tay ko tempel rok Solomon. (1 Kings 8:13-18) Pi walag ney e yima ayuwegrad ko tin nib t’uf rorad ni bod e piin ni yad ma maruwel u Bethel. Rib tow’ath e pi walag ni yad ma rin’ e pi maruwel ney ni ngan pining e sorok ngak Jehovah riy!

Mu Pigpig ngak Jehovah u Polo’ i Gum’irchaem

Pigpig ngak Jehovah e aram e n’en nth’abi fel’ ni ngam rin’. Ere mang ndab mu nameg ni ngam un ko pigpig ngak Jehovah u polo’ e tayim rom? Mu weliy e pi n’ey ngak e gallabthir rom, nge piin piilal, nge en ni ma lekag e ulung. Faanra ga baadag ni ngam un ko maruwel u Bethel, fa ngam man nga Gilead, ara ngam un ko Skul ni Fan ko Pi Walag ni Pumoon ni Yad Ba Muchugil, ma rayog ni ngam un ko muulung ni yima tay u nap’an e circuit assembly nge district convention ni fan ko pi n’ey.

Machane, gathi gubin e girdi’ u lan e ulung nrayog ni ngar pigpiggad u polo’ e tayim. Boch e girdi’ e dabiyog ni ngar uned ko tiney e maruwel ni bochan e m’ar, nge magawon ko salpiy, nge boch e maruwel u tabinaw. Yugu aram rogon, ma gubin e Kristiano nthingar ra folgad ko n’en ni ke tay e Bible chilen ni gaar: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.” (Matthew 22:37) Baadag Jehovah ni ngam rin’ e tin rayog rom. Ere demtrug rarogom, ma ngam mon’eg u wan’um e pigpig ngak Jehovah. Mu nameg boch ban’en ni fan ko pigpig rom ngak Jehovah. Arrogon, “mu lemnag e en ni sunumiyem ko ngiyal’ ni ka gab pagel,” ma aram e ra tow’athnagem ndariy n’umngin nap’an!

Faanra da nog ko ken ngan e Bible e kan fanay e thin riy, ma aram e kan fek ko Bin Som’on e M’ag Rok Got e Bible nni yoloy ni thin nu Waab. Ma faanra bang ni bay e BT riy ma aram e ni fek ko Bible ni Thothup nni yoloy ko 2007. Rayog ni ke thil e letra riy ni bochan e nge taareb rogon ko ken som’on e Bible ni thin nu Waab.