“Mang e Yigi . . . Tay Gubin e Tin Kam Tanomnag Nga Tagil’”

1. Mang e thingari dugliy e piin fel’ yangaren ni bay rogon ko par rorad boch nga m’on? Mang e ra ayuwegrad ni nge dabi magafan’rad nib pag rogon? (Mu guy e sasing ni bay u tabolngin e re article ney.)

GIMED e piin fel’ yangaren e dabisiy ni gimed manang ni faanra nge milekag be’, ma som’on e ba fel’ ni nge lemnag ko uw e nge milekag ngay. Rarogon e par rodad e bod rogon e milekag ni gad be tay nga bang, ma nap’an ni kab fel’ yangarem e aram e ngiyal’ nsusun e ngam lemnag e gin ni ngam sor ngay. Riyul’ nib mo’maw’ e re n’ey, ya yog reb e rugod ni ka nog Heather ngak ni gaar: “Gu be rus ni nggu dugliy e n’en ni nggu rin’. Ya thingar mu turguy e n’en ni ngam rin’ u n’umngin nap’an e yafos rom.” Machane, dab mu rus. Ya ke gaar Jehovah ko girdi’ rok: “Dab mu rus nga ban’en. Bay gu gelnigem mu gu ayuwegem.”​—Isa. 41:10.

2. Uw rogon ni kam nang ni baadag Jehovah ni ngam lemnag boch ban’en ni ngam rin’ boch nga m’on nra yibnag e felfelan’ ngom?

² Be pi’ Jehovah e athamgil nga lanin’um ni ngam fal’eg i lemnag mag dugliy e n’en ni ngam rin’ boch nga m’on. (Ekl. 12:1; Matt. 6:20) Baadag ni ngam felfelan’. Pi n’en ni ke sunmiy nrayog ni ngam guy, mag rung’ag, mag ri’ lamen e be micheg nriyul’ e re n’ey. Kum lemnag rogon ni ma ayuwegdad Jehovah nge rogon ni ma fil ngodad murung’agen e bin th’abi fel’ kanawoen e yafos. Machane, baaray e n’en ni ke yog ngak e piin ndab ra folgad ko fonow rok. Be gaar: “Kam turguyed ni dab mu folgad rog ma ngam rin’ed e kireb. . . . Ere nggog ngomed ni piin ma meybil ngog ma ma fol rog e . . . bay ur felfelan’gad, machane gimed e bayi m’ay famed. Bay ur tangniged e felfelan’.” (Isa. 65:12-14, BT) Ere, nap’an ni gad ra dugliy boch ban’en u fithik’ e gonop, ma aram e gad be pining e sorok ngak Jehovah.​—Prov. 27:11.

PI N’EN NI GA RA NAMEG NRA YIBNAG E FELFELAN’ NGOM

3. Mang e baadag Jehovah ni ngam nameg ni ngam rin’ boch nga m’on?

³ Mang e baadag Jehovah ni ngam nameg ni ngam rin’ boch nga m’on? I sunmiy e girdi’ ni ngar filed murung’agen mar pigpiggad ngak ya nge yag nra pirieged e bin riyul’ e felfelan’. (Ps. 128:1; Matt. 5:3) Gad ba thil ko gamanman, ya gamanman e kemus ni yad ma abich, mar garbodgad, mar diyengad. Machane, baadag Jehovah ni ngam felfelan’ ni aram e ngam rin’ boch ban’en ni kab fel’ ko pi n’en nrayog ni nge rin’ e gamanman. En ni Ke Sunmiyem e ir fare Got ni “gadad ba t’uf rok,” mab “felfelan’,” ma ke sunmiy e girdi’ ni “bod yaan.” (2 Kor. 13:11; 1 Tim. 1:11, NW; Gen. 1:27) Ere, rayog ni ngam pirieg e felfelan’ ni faan ga ra folwok rok e Got rodad ni ma t’ufegey. Be gaar e Bible: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Kam guy e re thin ney ni ke riyul’, fa? Rib riyul’ e re thin ney. Ere, aram fan ni baadag Jehovah ni ngam nameg boch ban’en ni ngam rin’ boch nga m’on nrayog ni nge m’ug riy nib t’uf Got nge girdi’ rom.​—Mu beeg e Matthew 22:36-39.

4, 5. Mang fan ni i par Jesus nib felfelan’?

⁴ Gimed e piin fel’ yangaren e ke dag Jesus Kristus e kanawo’ nib fel’ ni ngam folwokgad riy. Nap’an ni kab bitir, ma dariy e maruwar riy ni ma un ko fafel maku ma rin’ boch ban’en ni nge felfelan’ ngay. Be yog e Thin rok Got ni bay “ngal’an ni nge felan’uy . . . nge ngal’an e churu’.” (Ekl. 3:4) Ki guy Jesus rogon ni nge chugur e tha’ u thilrow Jehovah ni aram e ma fil e thin ni bay u lan e Babyor nib Thothup. Nap’an ni ke gaman 12 e duw rok, mi ri gin e pi tamachib u tempel “nga feni llowan’ ko thin ni ur fithed ngak ngi i fulweg” u murung’agen e tirok Got ban’en.​—Luke 2:42, 46, 47.

⁵ Nap’an ni ilal Jesus ma ir be’ ni ma par nib felfelan’. Mang fan? Ya manang ni boor ban’en ni baadag Got ni nge rin’, ma reb riy e baadag ni nge ‘machibnag e Thin Nib Fel’ ngak e piin ni gafgow . . . me yog ngak e piin ni malmit ni bay ra guyed ban’en.’ (Luke 4:18) Bochan ni i rin’ Jesus e pi n’en ni i yog Got ngak ni nge rin’, ma aram e n’en ni k’aring e felfelan’ ngak. Be weliy e Psalm 40:8 rogon e lem rok ni gaar: “Got rog, ri gub adag ni nggu rin’ e tin nib m’agan’um ngay!” Ri ma felfelan’ Jesus ngay ni nge weliy murung’agen e Chitamangin ko girdi’. (Mu beeg e Luke 10:21.) Immoy bayay u tomuren ni ke weliy ngak be’ nib pin murung’agen e bin riyul’ e liyor, ma aram me gaar ngak pi gachalpen: “Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog ni nggu muruwliy.” (John 4:31-34) I par Jesus nib felfelan’ ni bochan e i t’ufeg Got nge girdi’. Ku arrogom nrayog ni ngam felfelan’ ni faan ga ra folwok rok Jesus.

6. Mang fan nib fel’ ni ngam weliy ngak boch e Kristiano ni kar ilalgad ko tirok Got ban’en e n’en ni ga be lemnag ni ngam rin’ boch nga m’on?

⁶ Boor e Kristiano ni ur pared ni yad ba felfelan’ u nap’an ni kab fel’ yangarrad ni bochan e ur uned ko pioneer. Ere, mang ndab mu weliy ngak boch i yad e n’en ni ga be lemnag ni ngam rin’? “Mu fek gubin e fonow nra yag ngom, ma rayog e tin ga be lemnag; ma ra dariy ma dabi fel’ rogom.” (Prov. 15:22, BT) Dabisiy nra yog e pi walag ney ngom ni kar ilalgad ko tirok Got ban’en ni faan ga ra un ko machib u polo’ e tayim rom, ma aram e ra skulnagem Got u boch ban’en nra yib angin ngom u n’umngin nap’an e yafos rom. Boor ban’en ni fil Jesus rok e Chitamangin u nap’an ni immoy u tharmiy, maku boor ban’en ni i fil u nap’an e machib ni i tay u fayleng. Bod nib gel e felfelan’ ni tay u nap’an ni weliy fare thin nib fel’ ngak yugu boch e girdi’ me par nib yul’yul’ u fithik’ e pi skeng ni i mada’nag. (Mu beeg e Isaiah 50:4; Heb. 5:8; 12:2) Ere, chiney e ngad weliyed boch e kanawo’ nrayog ni ngam pigpig riy ngak Got u polo’ e tayim rom nra k’aring e felfelan’ ngom.

FAN NI NGAN AYUWEG E GIRDI’ NGAR MANGED PI GACHALPEN JESUS E ARAM E BIN TH’ABI FEL’ E MARUWEL

7. Mang fan ni boor e piin fel’ yangaren ni yad baadag ni ngar ayuweged yugu boch e girdi’ ni ngar manged pi gachalpen Jesus?

⁷ I gaar Jesus: “Mmarod ngak girdien e pi nam . . . ngam pingeged yad ngar manged pi gachalpeg . . . mi gimed fil ngorad rogon ni nguur folgad u gubin e tin ni ku gog.” (Matt. 28:19, 20) Ere, faan ga ra nameg ni ngam un ko biney e maruwel, ma aram e kam mel’eg reb e maruwel nra yibnag e felfelan’ ngom me pining e sorok ngak Got. Machane, re maruwel ney e taareb rogon ko yug maruwel nib t’uf e tayim ya nge yag nim salap riy. Reb e walag ni pumoon ni ka nog Timothy ngak ni tabab ko pioneer u nap’an ni kab fel’ yangaren e yog ni gaar: “Gu baadag ni gu be pigpig ngak Jehovah u polo’ e tayim rog ni bochan e aram rogon nrayog ni nggu dag ngak nib t’uf rog. Som’on e da ug pirieg e girdi’ nrayog ni nggu fil e Bible ngorad. Machane boch nga tomuren u nap’an nug chuw nggu wan nga reb e ulung ni bay u yugu reb e binaw, ma de gaman reb e pul nga tomuren, ma aram me yag ni nggu tabab i fil e Bible ngak in e girdi’. Bay bagayad e pi girdi’ nem ni ug fil e Bible ngorad ni tabab ni nga i yib ko muulung. Tomuren nug un ko fare skul ni ka nog e Bible School for Single Brothers (Skul ni Fan ko Pi Walag ni Pumoon ni Yad Ba Muchugbil)a ngay, ma aram min pieg nga yugu bang ni nggu machib, ma aram mug tabab i fil e Bible ngak aningeg e girdi’. Rug baadag ni gu ma fil ban’en ko girdi’ mug guy rogon ni be ayuwegrad gelngin Got nib thothup ni ngar thilgad.”​—1 Thess. 2:19.

8. Mang e ke rin’ boch e fel’ yangaren ya nge yag ni yoor e girdi’ nra machibnaged?

⁸ Bay boch e fel’ yangaren ni Kristiano ni kar filed yugu reb e thin. Jacob ni ma par u Meriken e yoloy ni gaar: “Nap’an ni gaman medlip e duw rog, ma boor e bitir nu Vietnam ni gamad nga class. Gu baadag ni nggu fil murung’agen Jehovah ngorad. Ere, boch nga tomuren ma aram mug lemnag ni nggu fil e thin rorad. Ba ga’ nrogon ni ug fil e re thin nem e aram e gu ma papulweg e thin ni bay u lan e ken ni Meriken e Wulyang ko Damit ko ken ni kan pilyeg ko thin nu Vietnam. Kug guy rogon ni nggu m’ag fager ngak boch e walag ni yad ma un nga reb e ulung ni yima non riy ni thin nu Vietnam nib chugur ko gin ni gu ma par riy. Ma nap’an ni gaman 18 e duw rog, ma aram mug tabab ko pioneer. Boch nga tomuren, ma aram mug un ko fare skul ni ka nog e Bible School for Single Brothers ngay. Re skul ney e be ayuwegeg ko pioneer ni gu be tay, ya chiney e gu ma pigpig u reb e ulung ni kan ngongliy rogon ni fan ngak e piin ni yad ma non ni thin nu Vietnam, ma kemus ni yigoo gag e piilal ni gu bay ko re ulung nem. Boor e girdi’ nu Vietnam ni gu ma mada’nagrad ni yad ma gin ngay ni gu manang e thin rorad. Ere, nap’an ni gu ra yan nga taferad ma yad ma piningeg nga naun, mab ga’ nib mom ni nggu tabab i fil e Bible ngorad. Bay boch i yad ni ke mon’og ke yag ni nge un ko taufe.”​—Mu taareb rogonnag ko Acts 2:7, 8. 

9. Mang boch ban’en nrayog ni ngam fil ko fare maruwel ni ngan ayuweg e girdi’ ngar manged boch i gachalpen Jesus?

⁹ Re maruwel ney ni ngan ayuweg e girdi’ ngar manged boch i gachalpen Jesus e ba maruwel nrayog ni ngam fil boor ban’en riy. Bod nrayog ni ngam nang riy rogon ni ngam rin’ e maruwel rom nib fel’ rogon, nge rogon ni ngaum non ko girdi’, nge rogon ni nge pagan’um, mag nang rogon ni ngaum ngongol u fithik’ e gonop. (Prov. 21:5; 2 Tim. 2:24) Machane, rib gel e felfelan’ ni ga ra tay ko re maruwel ney ni bochan e ra ayuwegem ni ngam nang rogon ni ngam micheg e pi n’en ni kam fil u Bible ke mich u wan’um. Ku ra ayuwegem ni ngam nang rogon ni ngam maruwelgow Jehovah u taabang.​—1 Kor. 3:9.

10. Uw rogon nrayog ni ngam felfelan’ ko fare maruwel ni ngan ayuweg e girdi’ ngar manged boch i gachalpen Jesus ni yugu aram rogon ni gathi ri boor e girdi’ ni ga be pirieg ni yad baadag ni ngar filed e Bible?

¹⁰ Ku rayog ni ngam felfelan’ ni ga be rin’ e re maruwel ney ni yugu aram rogon nri in e girdi’ ko gin ni ga ma machib riy e yad baadag ni ngar filed e Bible. Re maruwel ney e ba maruwel ni be rin’ boor e girdi’ u taabang, ya gubin e girdi’ u lan e ulung ni yad be gay e piin ni yad baadag ni ngar nanged e tin riyul’. Ere, yugu aram rogon ni kemus ni taareb e walag e ke pirieg be’ ni baadag e tin riyul’ me munmun me mang facha’ reb i gachalpen Jesus, machane gubin e girdi’ u lan e ulung ni yad ra felfelan’ ko re n’em ni bochan e yad gubin ni yad be un i gay e piin ni yad baadag ni ngar nanged e tin riyul’. Brandon e mereb e duw ni i pioneer u reb e binaw ni gathi ri boor e girdi’ riy ni baadag e machib. I yog ni gaar: “Gu baadag ni gu be machibnag fare thin nib fel’ ni bochan e aram e n’en ni ke yog Jehovah ngodad ni ngad rin’ed. Nap’an ni yug gu chuw u skul, ma aram mug un ko pioneer. Ma gu baadag ni gu ma pi’ e athamgil nga laniyan’ e pi walag ni ka yad ba pagel u lan e ulung mug guy rogon ni yad be mon’og ko tirok Got ban’en. Tomuren nug un ko fare skul ni ka nog e Bible School for Single Brothers ngay, ma aram min pieg nga yugu reb e binaw ni nggu pioneer u rom. Riyul’ ndawor gu pirieg be’ ko re binaw ney ni ke yag ni nggu fil e Bible ngak ma ke un ko taufe. Machane, bay boch e walag ni kar pirieged boch e girdi’ ni aram rogon. Ere, gu be felfelan’ ni kug nameg ni nggu un i rin’ fare maruwel ni ngan ayuweg e girdi’ ngar manged boch i gachalpen Jesus u polo’ e tayim rog.”​—Ekl. 11:6.

BOCH E MARUWEL NRAYOG NI NGAM UN I RIN’ NI BOCHAN E PI N’EN NI KAM NAMEG

11. Mang reb e maruwel ni yima rin’ ni fan ngak Jehovah ni ke un boch e fel’ yangaren ngay ma kar pirieged e felfelan’ riy?

¹¹ Boor e kanawo’ nrayog ni ngad pigpiggad riy ngak Jehovah. Bod ni, boor e fel’ yangaren e kar ognaged yad ni ngar uned i toy boch e naun rodad. Bokum miriay e Tagil’ e Liyor nib t’uf ni ngan toy. Pi naun ney e ma pining e sorok ngak Jehovah. Ere, faan ga ra un i toy ma aram e rayog ni ngam felfelan’. Kub gel e felfelan’ ni ga ra tay ni faanra um chag ko piin ni gimed be rin’ e pi maruwel ney u taabang, ni bod rogon yugu boch e maruwel ni gad ma rin’ u taabang. Pi dimow naun ney ni ga ra un ngay e rayog ni ngam fil boor ban’en riy, ni bod rogon ni ngan rin’ e maruwel nib fel’ rogon ndab ni maad’ad, nge rogon ni ngaun fol ko pi n’en ni be yog e pi walag ni pumoon ni yad be yarmiy e maruwel.

12. Faanra un be’ ko pioneer, ma uw rogon nrayog ni nge mab e kanawo’ ngak ni nge un i rin’ yugu boch e maruwel?

¹² I yog reb e walag ni ka nog Kevin ngak ni gaar: “Ka nap’an ni ku gub bitir, ma gu ma athapeg ni nge taw nga ba ngiyal’ ma rayog ni nggu pigpig ngak Jehovah u polo’ e tayim rog. Ere, nap’an ni gaman 19 e duw rog, ma aram mug un ko pioneer. Nap’an ni gu be pioneer, ma aram mu ug maruwel rok reb e walag ni pumoon ni ma toy e naun ni gathi ba polo’ e tayim rog ya nge yag ni nggu yognag e tin nib t’uf ko par rog. Nap’an nug un ko re maruwel nem, ma aram mug fil rogon i ngongliy e chig ko naun, nge winda, nge mab. Boch nga tomuren, ma l’agruw e duw nug maruwelgad boch e walag u taabang ni gamad be pi’ e ayuw ngak yugu boch e walag ni kar gafgowgad u tan e yoko’. Ug ngongliyed boch e Tagil’ e Liyor nge naun ko pi walag ni ke kireb u tan e yoko’. Nap’an nug rung’ag nib t’uf ni ngan toy boch e Tagil’ e Liyor u South Africa, ma aram mug ngongliy bang e babyor ngog ni ma ngongliy e piin ni yad baadag ni ngar pied e ayuw, ma aram me taw e thin ngog nrayog ni nggu wan ko maruwel e ngaram. Chiney nug bay u Africa e gu ma yan u reb e binaw nga reb ni nggu pi’ e ayuw ko pi Tagil’ e Liyor ni yibe toy u lan in e wik. Pi walag ni gamad ma maruwel u taabang e yad bod girdien e tabinaw rog. Gamad ma par u taabang, ma gamad ma fil e Bible u taabang, maku gamad ma maruwel u taabang. Kug baadag ni gu ma un ngak e pi walag u lan e ulung ko machib u gubin e wik. Pi n’en nug nameg ni nggu rin’ u nap’an ni ku gub bitir e ke k’aring e felfelan’ ngog u boch e kanawo’ nda ug lemnag ni gu ra felfelan’ riy.”

13. Mang fan ni boor e fel’ yangaren ni yad ma felfelan’ ko pigpig ni yad ma tay ngak Jehovah u Bethel?

¹³ Bay boch e walag ni kar uned ko pioneer ni yad be pigpig u Bethel e chiney. Ba gel e felfelan’ nrayog ni ngam tay ko pigpig u Bethel ni bochan e gubin ban’en ni ga ra rin’ u rom e fan ngak Jehovah. Pi walag ni yad ma maruwel u Bethel e yad ma ngongliy e Bible nge yu ken e babyor nrayog ni nge ayuweg e girdi’ ni ngar nanged e tin riyul’. Bay reb e walag ni ma maruwel u Bethel ni ka nog Dustin ngak ni yog ni gaar: “Nap’an ni ka fini gaman mereb e duw rog, ma aram mug nameg ni nggu pigpig ngak Got u polo’ e tayim rog. Ere, nap’an nug chuw u skul, ma aram mug tabab ko pioneer. Reb e duw nge baley nga tomuren, ma aram me taw e thin ngog ni nggu un ko maruwel u Bethel. Nap’an nu gub ko maruwel e ngaray ma aram mug fil rogon e maruwel nga reb masin ni yima printnag e babyor riy, ma boch nga tomuren ma aram mug un i rin’ boch e maruwel ko computer. Chiney ni gu bay u Bethel e gu ma felfelan’ ni gu ma rung’ag rogon e mon’og ni be tay fare maruwel ni machib ni yibe rin’ u ga’ngin e fayleng. Gu baadag ni gu be un ko maruwel u roy ni bochan e pi maruwel ni yima rin’ u roy e ma ayuweg e girdi’ ni ngar chugurgad ngak Jehovah.”

MANG BOCH BAN’EN NRAYOG NI NGAM NAMEG NRA AYUWEGEM BOCH NGA M’ON?

14. Mang e rayog ni ngam rin’ e chiney ni ngam fal’eg rogom ni ngam un ko machib u polo’ e tayim rom boch nga m’on?

¹⁴ Uw rogon ni ngam fal’eg rogom ni ngam un ko machib u polo’ e tayim rom? Pi fel’ngin Got ni ma yag ngodad e aram e n’en nth’abi fel’ nra ayuwegem ni ngam pigpig ngak Jehovah nib fel’ rogon. Kub t’uf ni ngaum fil e Thin rok Got ni gubin e rran, mag fal’eg i lemnag fan, mag guy rogon ni ngam weliy murung’agen e michan’ rom u nap’an e pi muulung ni gad ma tay. Ra ka ga be un nga skul, ma rayog ni ngam guy rogon ni ngam fil boch ban’en me yag boch e salap ngom nra ayuwegem u nap’an e machib. Mu fil rogon ni ngam adag ni ngaum motoyil ko girdi’ ni aram e ngaum fith lanin’rad u fithik’ e gonop mag motoyil ko n’en ni nga rogned. Maku reb e, rayog ni ngam ognagem ni ngam rin’ boch e maruwel u Tagil’ e Liyor rodad ni bod rogon e klin nge ngan ngongliy e yungi n’en ni ke kireb ko naun. Ba m’agan’ Jehovah ngay ni nge fanay e piin nib sobut’an’rad mab m’agan’rad ni ngar pied e ayuw ni ngar rin’ed e pi maruwel ney. (Mu beeg e Psalm 110:3; Acts 6:1-3) I pining apostal Paul Timothy ni nge un ngak ko milekag nga boch e binaw ni yow be machib ni bochan e ‘urngin e walag ni girdien Kristus e ra weliyed murung’agen Timothy ni be’ nib fel’.’​—Acts 16:1-5.

15. Mang e rayog ni ngam rin’ ya nge yag nim pirieg e maruwel?

¹⁵ Piin ni yad ma machib u polo’ e tayim rorad e ba ga’ nib t’uf ni ngar uned ko maruwel. (Acts 18:2, 3) Ere, sana rayog ni ngam fek in e class ndabi n’uw nap’an nra ayuwegem ni nge yag nim pirieg reb e maruwel ni bay ko gin ni ga ma par riy ni gathi ba polo’ e tayim. Mu weliy ngak e en ni ma lekag e ulung nge yugu boch e pioneer murung’agen e n’en ni ga be lemnag ni ngam rin’. Mu fith ngorad murung’agen e re miti maruwel nib fel’ ni nge un e piin pioneer ngay. Ya be yog e Bible ni faan ga ra “tay nga pa’ [Jehovah] nge fal’eg waathan urngin e tin ka mu finey ni ngam rin’, ma ra yal’uw rogon ni ngam maruweliy.”​—Prov. 16:3, BT; 20:18.

16. Faan ga ra pigpig ngak Jehovah u polo’ e tayim rom u nap’an ni kab fel’ yangarem, ma uw rogon nra ayuwegem u nap’an nra milfan boch e maruwel ngom boch nga m’on?

¹⁶ Rayog ni nge pagan’um ni baadag Jehovah ni nge “yog” e felfelan’ ngom boch nga m’on me fel’ e par rom. (Mu beeg e 1 Timothy 6:18, 19.) Ga ra un ko pigpig u polo’ e tayim rom, ma ra ayuwegem ni ngam maruwelgad boch e tapigpig rok Got ni yad ma pigpig u polo’ e tayim rorad mu kum ilal ko tirok Got ban’en. Ku boor e walag ni kar pirieged ni bochan ni kar pigpiggad ngak Jehovah u polo’ e tayim rorad u nap’an ni kab fel’ yangarrad, ma aram reb e ban’en ni ke ayuwegrad u nap’an ni kar uned ko mabgol. Ba ga’ ni piin ni yad ma pioneer u m’on ni ngar uned ko mabgol e ma yag ni ngar ululgad e en mabgol rorad ko pioneer u tomuren ni kar mabgolgad.​—Rom. 16:3, 4.

17, 18. Faanra ngam nameg boch ban’en ni ngam rin’ boch nga m’on, ma uw rogon ni kub muun lanin’um ngay?

¹⁷ Ra ngam nameg boch ban’en ni ngam rin’ boch nga m’on, ma kub muun lanin’um ngay. Be weliy e Psalm 20:4 (BT) murung’agen Jehovah ni be gaar: “Mang e yigi pi’ ngom e n’en ni fiti lanin’um me tay gubin e tin kam tanomnag nga tagil’.” Ere, mu lemnag e n’en ni ga baadag ni ngam rin’ ko yafos rom. Mu lemnag e n’en ni be rin’ Jehovah e ngiyal’ ney nge rogon nrayog ni ngam pi’ e ayuw ko maruwel rok. Ngemu’, mag nameg ni ngam rin’ e pi n’en nib m’agan’ ngay.

¹⁸ Ga ra pigpig ngak Jehovah u polo’ e tayim rom, ma rib gel e felfelan’ nra yib ngom ni bochan e aram kanawoen nrayog ni ngam pining e sorok riy ngak. Arrogon, “ngar mu adag Somol me fel’ u wun’um, me pi’ ngom e tin ni ir e kari t’uf rom.”​—Ps. 37:4.