“Ga Ra Mang Reb e Pioneer nib Fel’!”
1. Uw rogon u wan’ reb e walag nib pin e maruwel ko pioneer ni ke un ngay?
1 “Dariy reb e maruwel ni kab fel’ ko biney maku be gelnageg ko tirok Got ban’en.” Aram e n’en ni yog Kathe B. Palm. Boor e duw ni ke machib u Chile, ni bay u South America ni ir reb e pioneer. Sana ke lemnag be’ ko uw fene fel’ e yafos ko piin ni kar uned ko pioneer me gaar ngom: “Ga ra mang reb e pioneer nib fel!”
2. Mu weliy ko mang fan nra fel’ lanin’uy ni ngan rin’ e tirok Got ban’en.
2 Kanawoen e Yafos ni Ma Fl’eg Lanin’uy: Gad ma folwok rok Jesus ma ke pirieg e toffan ni nge rin’ e tin nib m’agan’ e Chitamangin ngay. (John 4:34) Ere i yul’yul’ Jesus u nap’an ni ke fil ngak pi gachalpen nra fel’ lanin’rad ni ngar rin’ed e pi n’en nib l’ag ko liyor ku Jehovah. Ma gapas lanin’dad u nap’an ni gad be rin’ e tin ni be fel’an’nag Jehovah. Maku, ra gel i yan e falfalan’ rodad u nap’an ni be yoor iyan e tin ni gad be pi’ nib muun ngay e tayim rodad nge gelngidad.—Acts 20:31, 35.
3. Mang angin nra yib ngodad ni faanra yoor e tayim ni gad ra un ko machib?
3 Ra yoor e tayim ni gad ra tay ni fan ko machib ma ra mab e kanawo’ ni ngad tababnaged i fil e Bible ngak e girdi’. Yugu aram rogon ni boor e girdi’ ndubrad e machib, machane gad ra pirieg nra yib angin u lan e binaw ya gad ra salap ko machib. Piin ni ke gaman reb e duw ni kar uned ko pioneer e rayog ni ngar uned ko fare Pioneer Service Skul ma aram e rayog ni ngar folgad ko pi n’en ni kar filed ko machib. (2 Tim. 2:15) Nguud athamgilgad ma gad be yung awochngin e thin nriyul’ nra yib wom’engin gabul nge langleth.—Ekl. 11:6.
4. Mang e susun ni nge lemnag e pi fel’ yangaren e ni ke chugur mathilyeg skul rorad?
4 Pi Fel’ Yangaren: Nap’an ni ga be un ko skul, ma kam fal’eg i lemnag ko mang e ga ra rin’ nga m’on? Ke mada’ ko chiney ma ka ga be rin’ e tin ni thingar mu rin’ ko skul. Mang e ngam rin’ u tomren ni kam chuw u skul? Mang ni dab mu meybil ma ga nameg ni ngam un ko regular pioneer ma gathi ngam un ko skul nib tolang? Pi n’en ni ga ra fil—ni ngam machibnag urngin mit e girdi’, ma ngam gel ko pi magawon nra yib ngom, ma ngam k’adan’ ma ngam salap ko machib—e ra yib angin ngom u n’umngin nap’an e yafos rom.
5. Uw rogon nrayog ko pi gallabthir nge girdien e ulung ni ngar k’aringed e pi fel’ yangaren ni ngar uned ko pioneer?
5 Pi gallabthir, gimed be pow’iy e bitir romed ni ngar nameged ni ngar uned ko regular pioneer? Thin romed nge kanawo’ ni gimed be dag e ra ayuwegrad ni ngar mon’eged Gil’ilungun Got. (Matt. 6:33) Ray ni un ko pioneer u tomren ni ke mu’ ko high skul e gaar: “Ke lemnag e chitinag ni n’en th’abi fel’ ni ngan rin’ e ngan un ko pioneer.” Urngin e girdi’ ko ulung e rayog ni ngar pied e athamgil nga laniyan’ e girdi’ ngar uned ko pioneer ko thin ni yad ma yog nge ayuw rorad. Jose ni be’ nu Spain e gaar: “Girdien e ulung rog e kar lemnaged ni bin th’abi fel’ e maruwel ko piin fel’ yangaren e aram e ngar uned ko pioneer. Kar pied e athamgil nga lanin’ug ma kar ayuweged gag ma aram me mom ni nggu un ko pioneer.”
6. Mang e rayog ni ngad rin’ed ni faanra gathi ri gad ba adag ni ngad uned ko pioneer?
6 Ngan Gel ko Pi Magawon: Machane sana ga ra gaar, ‘Dabug ni nggu un ko pioneer.’ Faanra aram rogom ma ngam meybil ku Jehovah u murung’agen e re n’em ni ngam gaar ngak, ‘Da gu nang ko rayog ni nggu un ko pioneer fa danga’, machane gu ba adag ni nggu felfelan’nagem.’ (Ps. 62:8; Prov. 23:26) Mu bieg e Thin Rok mag sap ko ulung rok ni nge pow’iyem. Boor e regular pioneer e kar uned ko pioneer ni ayuw ma kar falfalan’gad ngay ma aram e kar adaged ni ngar uned ko regular pioneer.—Ps. 34:8.
7. Mang e ngad rin’ed ni faanra ke maruwaran’dad ko rayog ni ngad thognaged 70 e awa u gubin e pul fa dabiyog?
7 Faanra de mudugil u wan’um ko rayog ni ngam thognag 70 e awa u gubin e pul, ma mang e ngam rin’? Mu non ko pi pioneer ni taareb rogon e magawon romed. (Prov. 15:22) Mag yoloy nga but’ boch e schedule nrayog ni ngam fol riy. Sana ga ra pirieg nra mom ni ngam rin’ e re n’ey ni faan ga ra digey boch ban’en nde ga’ fan.—Efe. 5:15, 16.
8. Mang fan nib fel’ ni ngad lemnaged rarogodad yu ngiyal?
8 Ngam Lemnag Biyay: Ma thil rarogon e girdi’. Ba fel’ ni ngam lemnag salpem yu ngiyal’. Ke chugur ni ngam retire ko maruwel rom? Randy nib pay ni ke retire ko maruwel e gaar: “Bochan ni kug turguy ni nggu retire ma ke yog ni nggu un ko regular pioneer ni gamow e ppin rog, ma kan pi’mow nga bayang nib t’uf e ayuw riy. Boor ban’en ni kan tow’athnageg riy ni bochan e re n’ey, ma bin th’abi fel’ e tow’ath e aram e ke fel’ lanin’ug.”
9. Mang e ba fel’ ni nge lemnag e piin mabgol?
9 Bay boch e mabgol ni kar pirieged nde t’uf ni ngar uned ko maruwel ni polo’ e tayim. Rriyul’, ya dabisiy nra t’uf ni nge pag e tabinaw boch ban’en, machane yad ra falfalan’ ko tomur. Leengin John e ke tal ko maruwel rok ni polo’ e tayim ni bochan e nge un ko pioneer, ere ke yog ni gaar: “Gub falfalan’ ya gu manang ni ppin rog e be un ko tirok Got ban’en ni gubin e rran.”
10. Mang e ma k’aring e pi Kristiano ni ngar lemnaged ni ngar uned ko pioneer?
10 Rogon ni Ngan Dag e T’ufeg nge Michan’: I tay Jehovah ni bin th’abi ga’ fan e maruwel ni ngad rin’ed e aram e machib. Dabki n’uw nap’an ma ra m’ay e re m’ag nib kireb ney, ma kemus ni piin ni ma pining fithingan Jehovah e ra magey nib fos. (Rom. 10:13) Faanra ba t’uf Jehovah rodad ma gad ma tayfan e n’en ni rin’ ni fan ngodad ma ra k’aringdad ni ngad folgad ko motochiyel rok Fak ni ngan machib ni yib pasig. (Matt. 28:19, 20; 1 John 5:3) Maku faanra ke mich u wan’dad ni gad be par ko tin tomren e rran ma ra k’aringdad ni ngad rin’ed urngin ban’en nrayog rodad ko machib ko chi ngiyal’ ney ni ke lich e tayim ni ka bay, ma gathi ngad uned ko tin nu fayleng ban’en nge mus rogodad riy.—1 Kor. 7:29-31.
11. Susun ni uw rogon u wan’dad ni faanra yog be’ ngodad ni gad ra mang pioneer nib fel’?
11 Ngan un ko regular pioneer ni gathi ke mus ni bochan e aram e yaram ko ulung ya bochan nib t’uf Got rodad. Ere faanra yog be’ ngom ni ga ra mang reb e pioneer nib fel’ ma ngam lemnag ni aram ban’en nib manigil. Ma ga lemnag u fithik’ e meybil ni ngam un ko piin ni be un ko re maruwel ney.
[Caption on page 4]
Piin gallabthir, gimed be pi’ e athamgil nga laniyan’ e bitir romed ni ngar uned ko machib ni polo’ e tayim?
[Caption on page 5]
I tay Jehovah ni fare maruwel ko machib e aram e bin th’abi ga’ fan e maruwel ni ngad rin’ed.