Reb e Yafas ni Bay Fan e Chiney i Yan e Ngaram

MUS ko chiney ma rayog ni nge yib fan e yafas rom. Ni uw rogon? Aram e ngaum fol ko pi kenggin e motochiyel nu Bible. Ngad weliyed boch riy.

KENGGIN E MOTOCHIYEL NU BIBLE: I yoloy Solomon ni Pilung ni gaar, “Bin th’abi fel’ ngak be’ ni nge rin’ e nge abich me garbod me felfelan’ ko tin ke thognag.”​—EKLESIASTES 2:24, BT.

Kan sunmiydad ni nga i fel’ u wan’dad e maruwel ni gad ma rin’. Mus ni faanra boor e magawon rom ma rayog ni ngam felfelan’ ko yafas e chiney ni faanra um maruwel nib gel ma ga be yul’yul’ ko maruwel.

KENGGIN E MOTOCHIYEL NU BIBLE: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.”​—ACTS 20:35.

Boor e girdi’ ni kar pirieged ni faanra ur rin’ed boch ban’en ni fan ngak boch e girdi’ ni bod ni ngar ayuweged yad u nap’an ni ke yib e magawon ngorad ma ma yib angin ngorad nib fel’, ma ke yibnag fan e yafas rorad u wan’rad. I yoloy Solomon ni gaar: “Demtrug e ngiyal’ nrayog rom, ma ga pi’ e ayuw ko piin ke t’uf e ayuw rorad.”​—Proverbs 3:27, BT.

Am lemnag e n’en ni buch rok Ralph. Tomuren ni retire ko maruwel me un ko ppin rok ngaur machibgow u polo’ e tayim. Boor e awa ni yow ma thognag u gubin e pul, ni yow be fil e Bible ngak e girdi’. I yog Ralph ni gaar: “Nap’an ni gamow ra sul nga tabinaw ma ke aw parowmow ni gathi kemus ni bochan e kug pilibthirgow, ya ku bochan e maruwel ni ku ug rin’ew ni fan ngak e Chitamangidad nu tharmiy. Kab gel e felfelan’ riy ni nge aw parowom u ban’en ni ga be rin’ nib fel’.” Ri yow ba felfelan’ e ppin rok ni bochan ni n’en ni yow be rin’ e yow be pi’ ban’en ngak e girdi’.

KENGGIN E MOTOCHIYEL NU BIBLE: “Pi tafager e gubin ngiyal’ ni yad ma dag e t’ufeg rorad. Mang gam’ingin e walag ni faanra dab ra puruy’naged e gafgow rorad.”​—PROVERBS 17:17, BT.

Yira weliy e magawon u taabang ma ra mom ni ngan k’adan’uy riy. Be’ nu England ni ka nog Francis Bacon ngak e yog ni fayleng u wan’ e piin “ni dariy be’ nriyul’ ni fager rorad e bod bangi garger ni kan malog u fithik’.” Ra fel’ boch rogon e par rom ni faan ga ra pirieg e tin riyul’ e fager mu kum mang fager nib fel’.

KENGGIN E MOTOCHIYEL NU BIBLE: “Ri kab felan’ e piin ni kar rung’aged e thin rok Got ma kar pired ni yad be fol riy!”​—LUKE 11:28.

I yog Jesus ni bay ban’en nib t’uf ni ngam rin’ ni faanra ga baadag ni ngam guy ni ke lebug e tin ni ke micheg Got, ni aram e ngam rung’ag e thin rok Got mu um par ni ga be fol riy. Ma ayuwegdad Jehovah Got ni ngad nanged fan e yafas rodad u daken e Thin rok ni aram e Bible. Ma re n’ey e ma yibnag e felfelan’ ngodad. Kad filed ko fa binem e article ni ke tamilangnag Got u Bible e tin nib m’agan’ ngay ni fan ko fayleng. Be weliy ngodad fan ni kan sunmiydad, nge fan ni ke yoor e gafgow, nge n’en ni baadag Got ni ngad rin’ed. Rib ga’ fan ni nge tamilang u wan’dad e pi n’ey, ya ra ayuwegdad ni ngaud pared ni gad ba felfelan’. Piin ni yad ma tay ba ngiyal’ ni fan ko fol Bible ma yad ma fol ko pi n’en ni yad ma fil e yad ba felfelan’. Mang fan? Bochan ni kari fel’ e tha’ u thilrad e En Tasunmiy, ni aram Jehovah ni ir fare Got nib felfelan’.​—1 Timothy 1:11.

KENGGIN E MOTOCHIYEL NU BIBLE: “Mu lemnag e en ni sunumiyem . . . u m’on ndawor mu taw ko pi rran nge duw ni ka bay nga m’on ni bay mu taw ngay ma kam pilibthir, me lungum, ‘Ke chuwan’ug ko biney e tamilang.’”​—EKLESIASTES 12:1.

Fonow ni pi’ Solomon ni Pilung ngak e piin fel’ yangaren ndawor ra nanged e gafgow ni bay yib ngorad ko ngiyal’ ni kar pilibthirgad e kub ga’ fan ngodad. Mu lemnag e En ke Sunumiyem, ya kemus rogon me yib fan e yafas rom. Dab mu fol ko n’en ni ma yog e girdi’ ni ma lungurad: “Mmarod nguud abichgad ma gadad be garbod, ya bayi gabul ma kad m’ad.” (1 Korinth 15:32) Be yog e Eklesiastes 8:12, BT ni faan ga ra m’oneg Got u wan’um “ma urngin ban’en ma ra par nib fel’ rogon” u puluwom.

Ke pirieg Wendi nriyul’ e re n’em. Nap’an ni kab fel’ yangaren mar filew reb e ppin ni walagen e thin ni Spanish, ya nge yog ni ranow ra pirew nga Dominican Republic ni ngar piew e ayuw ko machib. I gaar: “Kug pagew fan boor ban’en ya nge yog ni gu pigpiggow ko gin nib t’uf e ayuw riy, ma rib gel e felfelan’ ni kug tew. Dariy ban’en ni kab fel’ ko n’en ni kug rin’ew u lan e re nel’ i pul nem! Pi n’en ni ug pagew famow riy e dabiyog i taarebrogonnag ko tow’ath ni ke yog ngomow.”

Yul’yul’ ngak Got e Ra Yibnag Fan e Yafas

Ga ra fal’eg e tha’ u thilmew Jehovah, ma rayog ni nge yib fan e yafas rom u yugu reb e kanawo’ nib thil. Ni uw rogon? Gathi kemus ni waliy Satan Adam nge Efa ngar togopuluwgow nga mat’awun e gagiyeg rok Got, ya ki yog ni dariy be’ nrayog ni nge par nib yul’yul’ ngak Got u fithik’ e skeng. (Job 1:9-11; 2:4) Machane rayog ni ngam un i micheg nib malulfith l’igin Satan! Ni uw rogon? Faanra um par ni gab yul’yul’ ngak Got, ma ga be fol ko pi kenggin e motochiyel rok, ma be m’ug ko ngongol rom ni ga be tayfan mat’awun Jehovah ni nge dugliy ko mang e ba fel’ nge mang e ba kireb ndab da rin’ed.​—Revelation 4:11.

Faanra gad baadag ni ngad rin’ed e tin nib fel’, mab t’uf ni ngaud k’adedan’dad u fithik’ e magawon. Ra m’aynag e pi magawon nem fan e yafas rodad, fa? Mu susunnag ni bay reb e toogor rom ni ke t’ar e thin nga daken reb e fager rom ara reb i chon e tabinaw rom. Faanra kam mada’nag boch e magawon ni bochan e ga be guy rogon ni nge dabi kireb thin e fager rom ara reb i chon e tabinaw rom, ma aram e dakuriy fam, fa? Ba mutrug ni danga’, ya ga ra athamgil u fithik’ e pi magawon nem ya nge dabi kireb thin e fager rom ara reb i chon e tabinaw rom. Re n’ey e taareb rogon ko yul’yul’ rodad ngak Got. Faanra ud pared ni gad ba yul’yul’ u fithik’ gubin mit e magawon ma ra felfelan’ Got ngodad.​—Proverbs 27:11.

Dariy Ba Ngiyal’ Nra M’ay Fan e Yafas

Mu athamgil ngam fil urngin ban’en nrayog ni ngam fil u murung’agen Got nge tin nib m’agan’ ngay. I yog Jesus Kristus ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Nap’an nra lebguy Got e tin nib m’agan’ ngay ni fan ko fayleng, ma piin ni yad ba yul’yul’ e ra fel’ rogorad ko n’en ni lemnag Got ni fan ngorad aram ko tabolngin, ni aram e “yafos ndariy n’umngin nap’an” u paradis u fayleng. Yafas ko ngiyal’ nem e dab ki m’ay fan ma rib gel e felfelan’ riy.​—Psalm 145:16.

Uw e ra yog e re tamilangan’ ney riy ngom ni ke weliy Jesus murung’agen? Ra yog ngom u lan e Bible. Faanra ba t’uf e ayuw rom ko re n’ey, ma dab mu magawon ni ngam yol ngak e piin ni kar ngongliyed e re ke babyor ney, ya yad ra felfelan’ ni nge yib bagayad i ayuwegem ngam nang e n’en nri be fil e Bible.