Mang e Bay ni Fan ko Gabul nge Langlath?

MANG NIB GA’ FAN E FULWEG RIY? Rogon e lem ku be’ u murung’agen e gabul nge langlath e ra rin’ ban’en nga rogon e ngongol nra dag e chiney. Bod ni, piin ni buchuuw e athap rorad ni fan ko gabul nge langlath e sana bay fare lem rorad ni: “Mmarod nguud abichgad ma gadad be garbod, ya bayi gabul ma kad m’ad.” (1 Korinth 15:32) Mit ney e ngongol e ba ga’ nima fekey i yan ko abich nib pag rogon, muun rrum nib pag rogon nge mochuch​—ma gathi bin nriyul’ e gapas u lanin’uy.

Machane, faanra girdi’ e ngar gagiyegniged e n’en ni fan ngodad ko gabul nge langlath, ma ra yan i aw ndariy e athap rodad. Nifeng nge ran nge binaw e yibe alitnag ni kaygi pag rogon. Be gel i yan e riya’ ko mahl ko nuclear nge cham ko terrorist. Machane, bay fan ni nge yog e athap ngodad.

Bochan ndabiyog ko girdi’ ni nga rogned e n’en ni bayi buch ko gabul nge langlath, ma Jehovah Got e weliy murung’agen ni ir e ma ‘yog ko tabolngin e tin ni bay ko tungun; kab kakrom me yog e tin nib bay yib.’ (Isaiah 46:10) Mang e be yog Jehovah u murung’agen e n’en ni bay yib ko gabul nge langlath?

N’en ni Be Yog e Bible

Dabi pag Jehovah ni ngan kirebnag e fayleng ni polo’. Riyul’ riy e, be micheg e Bible ni Got e bayi “kirebnag e piin ni kar kirebniged e fayleng.” (Revelation 11:18) Ra beechnag Jehovah ere fayleng ni kireb ney me sulweg nga rogon nib m’agan’ ngay ko som’on u daken Gil’ilungun ara am rok nu tharmiy. (Genesis 1:26-31; 2:8, 9; Matthew 6:9, 10) Pi thin nu Bible ni baaray e be dag ngodad e n’en ni bay ni fan ko gabul nge langlath, ma be dag e pi n’en nra buch ndabki n’uw nap’an nra rin’ ban’en ko girdi’ nu fayleng.

Isaiah 35:5, 6. “Pi malmit e bay ra guyed ban’en ma piin ni biling e bay rrung’aged ban’en. Piin ni mugutgut e bay ra oggad nga lang nguur churu’gad, ma piin ndabiyog ni ngar nonod e bay ur tolulniged e felfelan’. Ma bay yan e yu pa’ i lul’ u daken yungi ted nder tugul ban’en riy.”

Daniel 2:44. “Ngiyal’ ni bay i gagiyeg e pi pilung nem, e aram e bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.”

John 5:28, 29. “Dab mu gingad ko re bugithin ney; ya ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag laman, [Jesus] mi yad yib u lan e low rorad nga wuru’.”

Revelation 21:3, 4. “Mi Got bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”

Rogon ni Ma Yibnag e Fulweg ko Bible e Bin ni Riyul’ e Gapas nga Lanin’uy

Som’on, e sana ba mo’maw’ ni nge mich u wan’uy e pi thin ni baaray nga lang. Machane, pi n’ey e Got e ke micheg, gathi girdi’. Ma Jehovah Got e ‘der ma ban.’​—Titus 1:2.

Ram fil rogon ni nge pagan’um ko pi n’en ni ke micheg Got ma ga par nrogon nib puluw ko motochiyel rok, ma rayog ni par nib gapas lanin’um ni mus ko ngiyal’ nib mo’maw’. Dariy ban’en nra chuweg e gapas rom ni polo’ ndemtrug ko mahl, gafgow, m’ar, magawon ko pilibthir ara yam’. Mang fan? Ni bochan e ke mich u wan’um ni Gil’ilungun Got e ra chuweg gubin e pi gafgow ney.

Uw rogon me yog ngom e mit ney e athap ko gabul nge langlath? Thingar mu ‘piliyeged lanin’med ni polo’’ mi gimed micheg ngomed e “tin nib m’agan’ Got ngay ni tin nib fel’, nib fel’ u wan’ Got ma rib yal’uw.” (Roma 12:2) Dabisiy ni kub t’uf rom boch ban’en nra micheg nrayog i pagan’uy ko n’en nike micheg e Bible. Bay angin e athamgil ni yira tay ni ngan gay murung’agen e pi n’ey. Buchuuw ban’en ni ga ra rin’ u lan e yafas rom nra yibnag e gapas nga lanin’um.