Kan Fulweg Aningeg e Deer u Murung’agen e Tomur

I YIIYNAG Jesus Kristus nra boch ngaram ma ra yib ‘tomuren e fayleng.’ Baaray rogon ni weliy murung’agen e re ngiyal’ n’em: “Gafgow ko re ngiyal’ nem e ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran, fa ki yib reb e gafgow ntaareb rogon ngay.”​—Matthew 24:14, 21.

N’en ni yog Jesus u murung’agen e tomur nge n’en ni be yog boch e thin nu Bible u murung’agen e re n’ey e ke sum boch e deer riy. Ere mang ndab mu guy e Bible nge yog nim nang e fulweg ko pi deer ney?

1 Mang e Ra Chuw?

Der yog e Bible ni yira gothey e re fayleng ney ni gad be par riy. I gaar fare psalmist: “Fayleng e kam tay nga daken e def riy nri be par nib mudugil, ndabiyog ni ngan mithmitheg.” (Psalm 104:5) Maku der yog e Bible nra m’ay e yafas u fayleng. (Isaiah 45:18) I yog Jesus ni bay boch e girdi’ ni yad ra magey ko tomur. (Matthew 24:21, 22) Ere mang e be yog e Bible nra chuw?

Ra chuw e am ko girdi’. I thagthagnag Got nga laniyan’ Daniel ni profet nge yoloy ni gaar: “Bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.”​—Daniel 2:44.

Ra chuw e mahl ma dab kun kirebnag e fayleng. Be yog e Psalm 46:9 e n’en nra rin’ Got ni gaar: “Be taleg e pi mahl ni yibe tay u fayleng i yan; be t’ar e gat’ing, ma be kirebnag e sarey, ma be urfiy e pi talin e cham.” Ku be yog e Bible nra “kirebnag [Got] e piin ni kar kirebniged e fayleng.”​—Revelation 11:18.

Ra taleg e togopuluw ko motochiyel nge ngongol nde mat’aw. Ke micheg e thin rok Got ni gaar: “Girdi’ nib mat’aw ni girdi’ ni dariy thibngin e yad ra par u lan e re nam rodad ney. Machane Got e bayi buk’liy e piin kireb ko fare nam me pug e pi tadenen nge chuweg riy ni bod e pan ni kan pug u but’.”​—Proverbs 2:21, 22, BT.

2 Wuin e Ra Yib e Tomur?

Ke dugliy Jehovah Got e “ngiyal’” nra chuweg e kireb u fayleng me gagiyeg Gil’ilungun. (Mark 13:33) Machane, be tamilangnag e Bible ndabiyog ni nga dogned e rofen nra yib e tomur, ya gaar Jesus: “Re rran nem nge re awa nem e dariy be’ ni manang e ngiyal’ nra taw riy ni mus ko pi engel ni yad bay u tharmiy, ara en ni Fak Got; ya ke mus ni en ni Chitamangiy e manang.” (Matthew 24:36) Machane ke yiiynag Jesus nge pi gachalpen ni bay boch ban’en nra buch u m’on nra yib e tomur. Nap’an ni gad ra guy e pi n’em ni be buch u fayleng u taabangiyal’ ma aram e kad nanged ni ke chugur e tomur.

Pi am, nge tin nu toobey ban’en, nge rarogon e girdi’ e be gel e kireb riy i yan. Baaray e thin ni yog Jesus ni fulweg ko deer ni fith pi gachalpen u murung’agen e tomur: “Bay reb e nam me cham ngak reb e nam, ma gin nsuwon reb e pilung e bay mahl ko gin nsuwon reb e pilung. Ma boor yang ni bay i yib e durru’ riy, ma boor e nam ni bay yib e uyungol riy. Pi n’ey e bod e bin som’on e amith ni ma yib ngak be’ ni nge gargel.” (Mark 13:8) I yoloy apostal Paul ni gaar: “Tin tomren e rran e ri bay mo’maw’ ni ngan par nrogon e tin riyul’ ni girdien Kristus. Ya bayi par e girdi’ ni ke mus ni yad e yad be lemnagrad, ma kari gel e chogow rorad, ma kar ufanthingad, ma ke tolangan’rad ni yad be lemnag nri ba ga’ farad; ma bay urogned e thin nib kireb ngak e girdi’, ma bay dab kur folgad rok e gallibthir rorad, ma bay dab kur pininged e magar ngak be’ u lanin’rad, ma bay dab kur liyorgad ngak Got; ma bay dab kur golgad, ma bay dab kur runguyed e girdi’, ma bay ur t’ared e thin nga daken e girdi’, ma dariy fan ban’en u wan’rad, ma yad ba damumuw; ma bay ra dabuyed e tin nib fel’; ma dabiyog ni nge pagan’uy ngorad, ma dariy fan e girdi’ u wan’rad, ma yad ba uf; ma bayi t’uf e fafel rorad me tomur Got u wan’rad.”​—2 Timothy 3:1-5.

Yibe machib u ga’ngin yang e fayleng ni boor mit e thin. I gaar Jesus: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.”​—Matthew 24:14.

3 Mang e Ra Buch u Tomuren ni Ke Yib e Tomur?

Der yog e Bible ni piin ni yad ba fel’ e yira fekrad nga tharmiy ngar pared u rom ni manemus. Ya be gaar: “Piin yad mat’aw e bay ra pired u daken fare but’, me par ni taferad ni dariy n’umngin nap’an.” (Psalm 37:29; Matthew 6:9, 10) Piin ni kar m’ad ndawori yib e tomur e be yog e Bible ni bay e athap rorad ko fas ko yam’. (Job 14:14, 15; John 5:28, 29) Mang e ra buch u tomuren ni ke yib e tomur?

Ra gagiyeg Jesus u tharmiy ni ir e Pilung u Gil’ilungun Got. I yoloy Daniel ni profet ni gaar: “Nap’an ni gu be guy e pi n’ey u malik’ay rog ni nep’, mu gguy be’ ni bod yaan ba girdi’ [Jesus ni ke fas ko yam’], ni ke yib e manileng i ing, ma be chugur i yib min fek i yan ngak faanem ni kab kakrom [Jehovah Got] i yib ni immoy. Min pi’ mat’awun [Jesus] ko gagiyeg ni nge tay ma ngan tay fan, ma nge par ni ir e pilung, ya girdi’ u urngin e pi nam, nge pi racha’, nge pi thin e nguur folgad rok. Ma mat’awun ko gagiyeg ni nge tay e bay i par ndariy n’umngin nap’an, ma gagiyeg rok e dabi mus.”​—Daniel 7:13, 14; Luke 1:31, 32; John 3:13-16.

Piin ni yad ra par u tan Gil’ilungun Got e ra fel’ fithik’ i dowrad, mar pared nib pagan’rad ni manemus. I yoloy Isaiah ni profet ni gaar: “Girdi’ e bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed.” (Isaiah 65:21-23) I weliy apostal John murung’agen e re ngiyal’ nem ni gaar: “Chiney e keb i par tafen Got nga fithik’ e girdi’! Bayi par rorad, ma bay ra manged girdien. Mi Got e bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”​—Revelation 21:3, 4.

4 Mang e Thingar Mu Rin’ ni Faanra Ngam Magey ni Gab Fas u Nap’an nra Yib e Tomur?

I yog apostal Peter ni bay boch e girdi’ u nap’an e tin tomuren e rran ndabi mich u wan’rad nra ba ngiyal’ ma ra chuweg Got e kireb u fayleng. (2 Peter 3:3, 4) Machane baaray boch ban’en ni ke tay Peter chilen ni ngad rin’ed.

Ngan fil ban’en ko tin ni buch kakrom. I yog Peter nde pag Got “e piin ni kakrom nde gechignagrad, yi pag e ran nge tharey e nam ni tafen e girdi’ nib kireb; ma ke mus ni piin ni ayuwegrad ndar uned ko yam’ e Noah, ni i machibnag e tin nib mat’aw, nge ku medlip i girdi’.” (2 Peter 2:5) I weliy Peter murung’agen e piin ni yad ma moning ni gaar: “Daburad ni ngar tafinayniged e re bugithin ni baaray nib riyul’: kakrom e non Got me sum e pi tharmiy nge fayleng. Me yib e but’ u fithik’ e ran nga lang ni ran e yodoromnag, ma ku ran ni fare ran ni yib nge tharey e nam e ir e kirebnag e bin kakrom e fayleng. Machane lan e lang nge re faylenga ney ni ba’ e chiney e ka re bugithin nem rok Got e ir e ke tay ndabi kireb nge yan i mada’ ko ngiyal’ ni nge yib e nifiy i kirebnag. Ke tay Got ndabi kireb ni fan ko chirofen ni bay ni pufthinnag e girdi’ nib kireb nge mu’ min kirebnagrad.”​—2 Peter 3:5-7.

Nge puluw e ngongol rom ko pi motochiyel rok Got. I yog Peter ni piin ni yad baadag ni ngar mageygad ko tomur ni yad ba fas e ‘pangirad e nge par nib thothup ma kar pied yad nga pa’ Got.’ (2 Peter 3:11) Mu tay fanam i yan riy ni tamilangnag Peter ni ‘pangidad e nge par nib thothup ma kad pied gadad nga pa’ Got.’ Ere gathi kemus ni nga dogned ni bay e michan’ rodad ara nga fini chugur e tomur ma gad rin’ ban’en ni nge dab da m’ad, ya ku bay ban’en ni thingar da rin’ed.

Ba miti mang ngongol e ba m’agan’ Got ngay? Mang ndab mu taarebnag e tin ni ga manang ko n’en ni be yog e Bible u murung’agen e re n’ey? Pi Mich Rok Jehovah e yad ra felfelan’ ni ngar ayuweged gur. Mog ngorad ngar daged ngom u Bible rom e gin ni bay e fulweg riy. Faan ga ra rin’ ni aray rogon ma ra ayuwegem ni ngam par nib pagan’um ni yugu aram rogon ni boor ban’en ni be buch u toobdad ni yibe rus ngay.

[Footnote]

[Picture on page 7]

Fayleng e dabi kireb, kemus ni piin ni yad be kirebnag e yira thangrad