Wuin e Ra Yib Tomuren e Fayleng? N’en ni Yog Jesus

AM LEMNAG L’AGRUW BAN’EN NI YOG JESUS U MURUNG’AGEN E TOMUR:

“Ere mfal’eged rogomed ngam pired, ya da mu nanged e re rran fa re awa.”​—MATTHEW 25:13.

“Mu ayuwgad mi gimed tiyan’med, ya da mu nanged e ngiyal’ nra taw ko re ngiyal’ nem.”​—MARK 13:33.

Ere dariy be’ nri manang e ngiyal’ nra mus e re m’ag ney riy. Machane ke dugliy Got e “ngiyal’” ara ‘re rran nge re awa’ nra yib e tomur. (Matthew 24:36) Ere gur, re n’ey e be yip’ fan ndabiyog ni ngad nanged e ngiyal’ ni ke chugur e tomur? Danga’. I yog Jesus ngak pi gachalpen ni ngar tedan’rad nga boch ban’en nra buch ni be dag ni ke chugur e tomur.

POW RIY

Pi n’en nra buch e aram e pow riy ni gad bay ko ngiyal’ ni ke chugur “tomren e fayleng” ara tungun e re m’ag ney. I gaar Jesus: “Bay reb e nam me cham ngak reb e nam, ma gin nsuwon reb e pilung e bayi mahl ko gin nsuwon reb e pilung. Ma bay i yib e uyongol nge durru’ u gubin yang.” (Matthew 24:3, 7) Ki yog nra yib e “liliy nib machreg ni ma af ko girdi’ i yan.” (Luke 21:11) Ga be guy ni be buch e pi n’ey ni yiiynag Jesus, fa?

Ngiyal’ ney e be gafgow e girdi’ ni bochan e mahl, nge bilig, nge durru’, nge m’ar nra m’ay reb nge keb reb. Bod nnap’an e duw ni 2004, me sum ba durru’ u lan e Indian Ocean me yib e day riy nge tharey e binaw me li’ sogonap’an 225,000 e girdi’. U lan dalip e duw, ma sogonap’an 6.9 milyon e girdi’ u ga’ngin yang e fayleng ni ke yim’ ko fare m’ar ni COVID-19. I yog Jesus ni pi n’ey ni be buch e be dag ni ke chugur ni nge mus e re m’ag ney.

“TIN TOMREN E RRAN”

Be yog e Bible e “tin tomur e rran” ko ngiyal’ ni baaram u m’on nra yib e tomur. (2 Peter 3:3, 4) Be yog e 2 Timothy 3:1-5 nra taw ko tin tomuren e rran, ma ra gel e kireb ko ngongol ko girdi’. (Mu guy fare kahol ni “U M’on ni Ngan Thang e Re Fayleng Ney.”) Ga be guy e girdi’ e ngiyal’ ney ni yigoo yad e yad be lemnaged yad, ma yad ba chogow, ma yad ba ta cham, ma darur t’ufeged yad, fa? Ku ireray e mich riy ni gad be par ko ngiyal’ ni ke chugur ni nge mus e re fayleng ney riy.

Uw n’umngin nap’an e tin tomuren e rran? Be yog e Bible ‘nde n’uw nap’an.’ Ngemu’ ma bayi thang Got e “piin ni kar kirebniged e fayleng!”​—Revelation 11:15-18; 12:12.

KE CHUGUR NI NGE PARADIS E FAYLENG!

Ke dugliy Got e re rran nge re awa ni nge thang e re m’ag nib kireb ney. (Matthew 24:36) Yugu aram rogon, ma ka bay ban’en nra yibnag e felfelan’ ngodad ni aram e dabun Got “ni nge n’ag be’.” (2 Peter 3:9) Ere ke bing e kanawo’ ngodad ni ngad filed murung’agen e n’en nib m’agan’ ngay ma gad fol rok. Mang fan? Bochan ni baadag ni ngad mageygad ni gad ba fos u nap’an yira thang e re fayleng ney, ma gad un ko par u lan e bin nib beech e fayleng rok ni ke paradis.

Be guy Got rogon ni nge gubin e girdi’ mar filed rogon ni ngar manged bang ko bin nib beech e fayleng rok u tan Gil’ilungun. I yog Jesus ni yira machibnag fare thin nib fel’ ni murung’agen Gil’ilungun Got u “gubin yang u fayleng.” (Matthew 24:14) Bokum bilyon e awa ni ma machib e Pi Mich Rok Jehovah riy u ga’ngin yang e fayleng, ma yad be fil ko girdi’ e n’en be yog e Bible nra pi’ e athap ngorad. I yog Jesus nre maruwel ni machib ney e yira rin’ u ga’ngin yang e fayleng u m’on ni nge yib e tomur.

Ke chugur ni nge mus e gagiyeg ko girdi’. Machane rayog ni ngam magey ni gab fos u nap’an yira thang e re fayleng ney, mag un ko par u Paradis u fayleng ni ke micheg Got. Bin migid e article e be weliy rogon nrayog ni ngam un ko par u lan e bin nib beech e fayleng.