Rogon Nrayog ni Ngam Un ko Par u Lan e Bin nib Beech e Fayleng

Kad weliyed ko fapi article ni ke yan ndab ki n’uw nap’an ma bayi thang Got e re m’ag nib kireb ney nge urngin e magawon ni bay riy. Rayog ni nge pagan’dad nra buch e re n’ey. Mang fan? Ya baaray e n’en ke micheg e Bible ni aram e Thin rok Got:

“Re fayleng ney nge urngin ban’en ni ba’ riy . . . e bayi m’ay.”—1 JOHN 2:17.

Rayog ni nge pagan’dad ni bay e girdi’ nra magey nib fos ni bochan e ki micheg e re thin nu Bible ney ni:

“En nra rin’ e tin nib m’agan’ Got ngay e ra par nib fos ndariy n’umngin nap’an.”

Ere faanra gad baadag ni ngad mageygad ni gad ba fos, mab t’uf ni ngad rin’ed e n’en nib m’agan’ Got ngay. Ra ngad nanged e n’en nib m’agan’ ngay, ma som’on e thingar da nanged rarogon.

MU GUY ROGON NI NGAM ‘NANG’ GOT YA NGE YAG NIM MAGEY NI GAB FOS

Bogi sasing ni bay u taabang: 1. Ba kangof ni bay u aspital ni ke par nga but’ ni kari aw parawon. 2. Nap’an ni yan ko gin yima abich riy me guy be’ ni yow nga maruwel ni be beeg ba magazine nib felfelan’. 3. Faen yow nga maruwel e ke beeg ba thin nu Bible ngak me pi’ bang e jw.org contact card ngak.

I gaar Jesus: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got.” (John 17:3) Ra ngad mageygad ni gad ba fos ma gad par ndariy n’umngin nap’an, mab t’uf ni ngad ‘nanged’ Got. Re n’ey e gathi kemus ni be yip’ fan ni nge mich Got u wan’dad ara ngad nanged in ban’en u murung’agen. Ya ba t’uf ni ngad manged fager rok. Faanra gad baadag ni nge chugur e tha’ u thildad reb e fager rodad, mab t’uf ni ngaud rin’ed boch ban’en u taabang. Ere ku arrogon e tha’ u thildad Got. Am lemnag boch ban’en nib riyul’ nrayog ni ngad filed u Bible nra ayuwegdad ni nge chugur e tha’ u thildad Got.

Boch Ban’en nib Riyul’ Nrayog ni Ngad Filed u Bible

Baadag Got ni ngad pared u Paradis.

I sunmiy e gal nsom’on e girdi’ ni aram Adam nge Efa, me tayrow nga bangi ban’en nrib fel’ yaan ni ka nog fare milay’ nu Eden ngay. Yow ba flont, miki pi’ Got urngin ban’en nib t’uf rorow ya nge yag nra parew ni yow ba felfelan’, mu kur parew ndariy n’umngin nap’an. Faan yow ra par nib fel’ e tha’ u thilrad Got, ma aram e dab ra m’ow. Machane ra dugliyew ndab ra folgow u reb e motochiyel ni pi’ Got ngorow nde mo’maw’.

Fan ni gad be gafgow.

Bochan nde fol Adam ni ir e bin som’on e pumoon rok Got, ma aram me mul e athap ko yafos ni manemus u pa’ nge tin ka bay e girdi’. Be gaar e Bible: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’.” (Roma 5:12) Urngin pi fak Adam ni af e denen rok ngorad ni bod rogon be’ ni ke af e m’ar rok e gallabthir rok ngak. Bochan e re n’ey, ma aram fan ni gad be pilibthir ngaud m’ad.

N’en ke rin’ Got ni nge ayuwegdad.

Be gaar e Bible: “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) I pi’ Got Jesus ni nge yib nga fayleng ni nge pi’ e yafos rok ni fan ngodad. Prabhakar nreb e pumoon nu India ni 86 e duw rok e weliy murung’agen e re t’ufeg ney ni gaar: “Be dag gelngin nri gub t’uf rok Jehovah.a T’ufeg rok e ke pi’ e athap ko yafos ni manemus ngog.”

Rogon nrayog ni ngad daged nib ga’ fan u wan’dad e n’en ke rin’ Got ni fan ngodad.

Be yog e Bible nrogon nrayog ni ngad rin’ed e re n’ey e aram e ngad ‘folgad ko tin ni ke yog Got ngodad ni ngad rin’ed.’ (1 John 2:3) Bochan ni gad ba t’uf rok Jehovah Got, ma ke dag ngodad rogon ni ngad felfelan’gad ko par rodad e chiney. (Isaiah 48:17, 18) Dabun Got ni ngaud gafgowgad. Ke micheg ni faan gad ra fol ko thin rok ma gathi kemus ni gad ra felfelan’ ko par rodad e chiney, ya ku ra yag e athap ko yafos ni manemus ngodad.

NGAUD BEEGED E BIBLE NI ARAM E THIN ROK GOT NI GUBIN E RRAN

Be sap fare kangof nga lan e lang u tomuren ni ke beeg e Bible rok u nap’an ni bay u wen ni be abich ko misiw’. — Faan ga ra meybil ngak Got ni nge ayuwegem mag rin’ e n’en nib m’agan’ ngay, ma aram e rayog ni ngam magey ni gab fos u nap’an yira thang e re fayleng ney

Gad ma abich ni gubin e rran ya ngad pared ni gad ba fos. Machane i gaar Jesus: “Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos ndabi yim’.”—Matthew 4:4.

Ngiyal’ ney e rayog ni ngad pirieged e thin rok Jehovah u lan e Bible. Nap’an ni ga ra fil e re ke babyor ney ma ga ra nang e n’en ni rin’ Got kakrom, nge n’en be rin’ e chiney, nge n’en nra rin’ boch nga m’on.

MMEYBIL NGAK GOT NI NGE AYUWEGEM

Mang e rayog ni ngam rin’ ni faanra ga baadag ni ngam fol rok Got, machane ba mo’maw’ ngom ni ngam tal i rin’ boch ban’en ndabun? N’en nra ayuwegem e aram e ngam nang Got nib fel’ rogon.

Am lemnag e n’en ni buch rok be’ nib pin ni ka nog Sakura ngak ni ma un nga boch e ngongol nde yalen. Nap’an ni tabab ko fol Bible, me fil murung’agen e motochiyel rok Got ni be yog ‘ndab da ngongliyed e ngongol ko darngal.’ (1 Korinth 6:18) I meybil Sakura ngak Got ni nge pi’ gelngin, ma aram me yag ni nge tal i rin’ e biney e ngongol nib kireb. Machane thingar ki guy rogon ni nge gel ko pi lumel ni ma yib ngak. I gaar: “Nap’an nug ra tabab ni nggu lemnag boch e ngongol nib puwlag, ma gu ma meybil ngak Jehovah nggu weliy urngin ban’en ni bay u lanin’ug, ya gu manang ndabiyog ni nggu gel ko re n’ey u gelngig. Meybil e ke ayuwegeg ni nggu chugur ngak Jehovah.” Bokum milyon e girdi’ ni be yag ni ngar nanged Got ni bod Sakura. Be pi’ gelngirad ya nge yag ni ngar thilyeged e ngongol rorad mar rin’ed e n’en nib m’agan’ ngay.—2 Korinth 4:7.

Ga ra nang Got nib fel’ rogon, ma aram e ra ‘nangem’ mu kum mang fager rok. (Galatia 4:9; Psalm 25:14) Ga ra rin’ e re n’ey, ma aram e rayog ni ngam un ko par u lan e bin nib beech e fayleng rok Got. Machane uw rogon e binem e fayleng? Gad ra weliy e re n’ey ko bin migid e article.

a Jehovah e aram fithingan Got nrogon ni bay u Bible.