Yira Kirebnag e Re Fayleng Ney, Fa?

Mang e Dabi Chuw?

GIRDI’

N’en be yog e Bible: Got e “de ngongliy [e fayleng] nge tay ni bangi ted ndariy ban’en riy ma der tugul ban’en riy, yi tay ni ngi i par e girdi’ riy.”​—ISAIAH 45:18.

FAYLENG

N’en be yog e Bible: “Be yib boch e mfen ma be thumur boch, ma fayleng e ka be par ni ka rogon.”​—EKLESIASTES 1:4, BT.

N’EN BE YIP FAN: Rogon ni be yog e Bible e dabi kireb e re fayleng ney, ma gubin ngiyal’ nra i par e girdi’ u daken. Ere nap’an ni yira weliy murung’agen tomuren e fayleng, ma mang e be yip’ fan?

AM LEMNAG E RE N’EY: Be taarebrogonnag e Bible tomuren e re fayleng ney ko n’en ni buch u nap’an Noah. Ngiyal’ nem e ‘ke sug e fayleng ko ngongol nib kireb.’ (Genesis 6:13) Machane Noah e ir be’ nib mat’aw. Ere ayuweg Got e yafos rorad chon e tabinaw rok, machane me pag e ran nge yib i tharey e fayleng nge thang e piin nib kireb. Be weliy e Bible murung’agen e ngiyal’ nem ni gaar: “Fare ran ni yib nge tharey e nam e ir e kirebnag e bin kakrom e fayleng.” (2 Peter 3:6) Aram e ngiyal’ ni mus e fayleng ni immoy e ngiyal’ nem. Machane mang e ni kirebnag? Dan kirebnag e fayleng, ya girdi’ ni kireb e ni thangrad. Ere nap’an nra weliy e Bible murung’agen tomuren e fayleng, ma der yip’ fan ni ngan kirebnag e re fayleng ney. Ya be yip’ fan e ngiyal’ ni yira thang e girdi’ nib kireb u fayleng nge pi n’en kar ngongliyed.

Mang e Ra Chuw?

MAGAWON NGE KIREB

N’en be yog e Bible: “Dab ki n’uw nap’an me yan e piin nib kireb nga bayang; ra mu gayiyrad, ma dab mu piriegrad; machane piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.”​—PSALM 37:10, 11.

N’EN BE YIP FAN: Fare Ran ni Tharey e Fayleng u nap’an Noah e de chuweg e kireb ndariy n’umngin nap’an. Ya tomuren e re n’ey, miki gafgownag e girdi’ nib kireb e girdi’. Machane dabki n’uw nap’an ma ra chuweg Got e kireb. I yog e en ni yoloy e Psalm ni gaar: “[Ra] yan e piin nib kireb nga bayang.” Ra fanay Got Gil’ilungun ni nge chuweg e kireb. Re n’ey e ba am nra par u tharmiy nge gagiyegnag e girdi’ u fayleng ni yad be fol rok Got.

AM LEMNAG E RE N’EY: Gur, ra adag e piin yad be gagiyeg u fayleng ni ngar folgad u Gil’ilungun Got, fa? Be yog e Bible ni danga’ ya yad ra togopuluw nga Gil’ilungun Got. (Psalm 2:2) Ere mang e ra buch? Ra yan Gil’ilungun Got nga lon e pi am ko girdi’ me “par ndariy n’umngin nap’an.” (Daniel 2:44) Machane mang fan nib t’uf ni ngan thang e gagiyeg ko girdi’?

N’EN NIB T’UF NGE FAN​—Nge Mus e Gagiyeg ko Girdi’

N’en be yog e Bible: “Dariy bagamad ni ir e ga’ ko gin nge sor e yafos rok ngay.”​—JEREMIAH 10:23, BT.

N’EN BE YIP FAN: Dan sunmiy e girdi’ ni ngaur gagiyegnaged yad. Aram fan nder yag ni ngar gagiyegnaged yugu boch e girdi’ mar pithiged e magawon rorad.

AM LEMNAG E RE N’EY: I yog ba ken e babyor ni pi am ni be gagiyegnag reb e nam nge reb e bod nder yag rorad ni “ngar pithiged boch e magawon ni bod rogon e gafgow ko par, nge girdi’ ni be yim’ ko bilig, nge m’ar, nge yoko’, nge durru’, nge mahl, ara cham ni yibe tay.” Ki ulul ngay ni gaar: ‘Be lemnag boch e girdi’ ni faanra kemus ni taareb e am ni be gagiyegnag e fayleng ni ga’ngin, ma aram e rayog ni nge pithig urngin e pi magawon ney.’ Machane mus ni faanra taareban’ urngin e am ko girdi’, ma ka ra yan i aw ni girdi’ nde flont e ir e yad be gagiyegnag e fayleng. Ere dabiyog ni ngar pithiged fapi magawon ni kad weliyed murung’agen. Gil’ilungun Got e kemus e taare am ni bay gelngin ni nge pithig urngin e magawon u fayleng ndariy n’umngin nap’an.

Ere rogon ni be yog e Bible e tomuren e fayleng ara ngiyal’ nra mus e re m’ag nib kireb ney e ban’en nsusun e dabi k’aring e marus ko girdi’ nib manigil. Bin riyul’ riy e, ireray ban’en nrayog ni ngad athapeged ya ra yan e bin nib beech e fayleng rok Got nga lon e re fayleng ney ni ke gel e kireb riy!

Wuin e ra buch e pi n’ey? Bin migid e article e be weliy e fulweg riy u Bible.