Yafas U Fithik’ E Gapas U Lan Reb E M’ag Nib Biech
Mang e ga ra lemnag u nap’an ni ga ra sap ko fare sasing ko gi babyor ney? Fare sasing e ra k’aring gumerchaem ni ngam adag e gapas, nge falfalan’ nge fel’ rogon ni bay riy, fa? Dabi siy ni aram rogon. Machane ke mus ni ba lik’ay ni ngan lemnag ni ra aram rogon e fayleng biid, fa?
Boor e girdi’ e ma lemnag ni aram rogon. Ya ngiyal’ ney e bay e mahl, nge bugel nge uyungol nge liliy ma be pillibthir e girdi’ iyan—aray boch e gafgow u fayleng e chiney. Machane bay fan ni ngada athapeged ban’en nib fel’. I weliy e Bible e n’en ni bay nga m’on rodad me weliy u morngaagen e “bin nib biech e lan e lang nge bin nib biech e fayleng, ni aram e tin nib mat’aw ngongol e bay i par riy, ni ereray e pi n’en ni gadad be sonnag.”—2 Peter 3:13; Isaiah 65:17.
Fare “lan e lang nib biech” nge fare “fayleng nib biech” e gathi boch ban’en u lan e lang ni ra biech ara reb e but’ nib biech. Ya but’ rodad nge lan e lang e ba flont, ma be yog e Bible ni ra par ni manemus. (Psalm 89:36, 37; 104:5) “Bin nib biech e fayleng” e be yip’ fan ba ulung e girdi’ nib mat’aw ni ra par u fayleng, ma “bin nib beech e lan e lang” e be yip’ fan gil’ilungun e tharmiy ara am nu tharmiy ni ra gagiyegnag fare ulung i girdi’ ni yad ra par u fayleng. Ere bpuluw ni ngan lemnag ni rayog e re “fayleng nib biech” ney nge re “lang e lang nib biech” ney, fa?
Amu lemnag, ya aram e n’en nib m’agan’ Got ngay ni fan ko fayleng ko somm’on. I tay e gal nsomm’on e girdi’ nga fayleng u Paradis u Eden me pi’ reb e maruwel nrib fel’ ni gaar: “Mu diyengow ngam yoorgad ngam suguyed e fayleng, mi gimed gafaliy.” (Genesis 1:28) Arrogon, mm’agan’ Got ngay ni ngar diyengow ma nge garer fare Paradis nga ga’ngin e fayleng. Yugu aram rogon ni de fol e gal nsomm’on e girdi’ rok Got ma de yog rorow ni ngar parew ni manemus, de thil e n’en nib m’agan’ Got ngay ko somm’on. Thingari lebug u lan reb e m’ag nib biech!—Isaiah 55:11.
Nap’an ni ga ra fek fare meybil ni Chitamangimad ara fare Meybil Rok Somol, ma ga be yibilay ni nge yib Gil’ilungun Got, n’en ni ga be rin’ e ga be yibilay e am nu tharmiy ni nge chuweg e kireb u fayleng ma nge suwey fare m’ag nib biech. (Matthew 6:9) Ma rayog ni nge mich u wan’dad ni ra fulweg Got taban e re meybil nem ya ke micheg e Thin Rok ni gaar: “Piin ni yad mmat’aw e bay ra pired u daken e fayleng u fithik’ e gapas, me par ni taferad ni dariy n’umngin nap’an.”—Psalm 37:29.
Rogon E Yafas U Lan E M’ag Rok Got Nib Biech
Gil’ilungun Got e ra yibnag nga fayleng reb e flaab ni dariy ban’en ni taareb rogon ngay u fayleng e chiney, ma ra lebug urngin ban’en ni i m’agan’ Got ngay ko somm’on ni fan ko girdi’ rok u fayleng. Ra m’ay e fanenikay nge awan’, ma ra munmun ma urngin e girdi’ nu fayleng e ra fel’ e thin rorad. I micheg Got u lan e Bible ni ra ‘taleg e mahl u ga’ngin yang e fayleng.’ “Pi nam e dab kur mahlgad bayay, ma dab kur fal’eged rogorad bayay ni fan ko mahl.”—Psalm 46:9; Isaiah 2:4.
Munmun ma ga’ngin e fayleng e ra paradis. I micheg e Bible ni gaar: “Bay i felfelan’ e yungi ted nder tugul ban’en riy, ma floras e bay i puf ko yungi binaw ni i par ni kan n’ag. . . . Ma bay yan e yu pa’ i lul’ u daken yungi ted nder tugul ban’en riy; ma yan’ riy nib gowel e bayi ngal’ ni lipath, ma yungi ted ndariy e ran riy e bayi sug ko alublub.”—Isaiah 35:1, 6, 7.
Bay fan ni nge falfalan’ e girdi’ u lan e Paradis u fayleng. Dakuriy biyay nra yim’ e girdi’ ko bilig ni bochan e dariy e ggan. Begaar e Bible: “Binaw e ke yib e ggan riy.” (Psalm 67:6; 72:16) Urngin e girdi’ e ra falfalan’ nga angin e maruwel rorad, ni bod rogon ni micheg e Ani Tasunmiydad ni gaar: “Girdi’ e bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed.”—Isaiah 65:21, 22.
U lan e m’ag rok Got nib biech e dabi apinpin e par ko girdi u lan e naun, ara yad ba gafgow ko gini yad ra par riy, ya ke micheg Got ni gaar: “Girdi’ e bay ra toyed e naun mi yad par riy, ma gathi yugu be’ e bay yib i par ngay.” Ki micheg e Bible ni gaar: “Pi n’en ni kar muruwliyed e ri bayi fel’ rogorad riy.” (Isaiah 65:21-23) Ere ra moy e maruwel ni bay angin ni yira falfalan’ ngay. Dabi chalban e girdi’.
Munmun ma Gil’ilungun Got e ra sulweg e gapas nga rogon e gapas ni immoy u Eden u thilin e gamanman nge thilin e gamanman nge girdi’. Begaar e Bible: “Pi gamanman ni wolf nge saf e bay ur pired nib fel’ thilrad, ma gamanman ni leopard e bay ra paged yad nga but’ u fithik’ pi fak e kaming. Pi fak e garbaw nge pi fak e layon e bay ur abichgad u taabang, ma bbitir ni kab achig e bay i pow’iyrad.”—Isaiah 11:6-9; Hosea 2:18.
Amu lemnag, u lan e Paradis u fayleng ma ra gol e girdi’ ko urngin mit e m’ar nge liliy! I micheg e Thin Rok Got ni gaar: “Dariy be’ ni be par u lan e nam rodad ni bay ki yog nib m’ar.” (Isaiah 33:24) “Ma bayi n’ag [Got] urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab kun un amith. Ya tin kakrom ban’en e ke chuw.”—Revelation 21:4.
Rogon Nrayog Ni Nge Yog Ngom
Dabi siy ni pi n’en ney ni ke micheg Got u morngaagen e yafas u lan e m’ag rok nib biech mab mat’aw e ke mithmitheg gumerchaem. Boch e girdi’ e ra lemnag ni kaygi fel’ e pi flaab ney ma dabiyog ni nge riyul’, machane gathi ban’en ni kaygi mo’maw’ rok e Ani Tasunmiy ni nge pi’ e pi flaab ney.—Psalm 145:16; Micah 4:4.
Ma bay boch ban’en ni thingar da rin’ed ni faan gad ra par ni manemus u Paradis u fayleng. I weliy Jesus ban’en ni thingar ni rin’ u nap’an ni i meybil ngak Got ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.”—John 17:3.
Ere faanra gad ba adag ni ngada pared u lan e m’ag rok Got nib biech, ma thingar da filed ko mang e mm’agan’ Got ngay ma ngada rin’ed e tin nib m’agan’ Got ngay. Ya ba riyul’ e re thin ni baaray: “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an ma ra falfalan’ ni bochan e be par u fithik’ e flaab ni ra yib rok e Ani Tasunmiy ni ir e ma t’ufegdad.—1 John 2:17.
Urngin e thin ko Bible ko gi babyor ney e yib ko New World Translation of the Holy Scriptures.