Rayog ni ngam fal’eg rogom e chiney ni ngam un ko par u lan e bin nib beech e fayleng ni bay yib

Bin nib Beech e Fayleng ni Ke Chugur!

I sunmiy Got e fayleng ya nge yag ni par e girdi’ nib mat’aw riy ndariy n’umngin nap’an. (Psalm 37:29) I tay e gal nsom’on e girdi’ nga lan fare milay’ nu Eden ni aram Adam nge Efa, me tay chilen ngorow ni kub muun pi fakrow ngay ni ngar ayuweged e fayleng.—Genesis 1:28; 2:15.

Fayleng e chiney e daki bod fare Paradis ni lemnag Got. Machane dawori thilyeg Got e lem rok. Uw rogon nra lebguy e n’en nib m’agan’ ngay aram ko som’on? Kad filed ko fapi article ni ke yan ndabi kirebnag Got e fayleng. Ya ra pag e girdi’ nib yul’yul’ ni ngar pared u daken. Ere ra uw rogon e par u fayleng u nap’an nra lebguy Got e tin ke micheg?

Taareb e am nra gagiyegnag e fayleng ni ga’ngin

Nap’an nra tabab e am rok Got u tharmiy ni nge gagiyegnag e girdi’, ma aram e gubin e girdi’ u fayleng ni yad ra par ni yad ba felfelan’, ma ke taareban’rad ni yad be rin’ e maruwel nib manigil ma ra yibnag e felfelan’ ngorad. Ke mel’eg Got Jesus Kristus ni ir e nge gagiyegnag e fayleng. Ngiyal’ ney e boor e girdi’ ni yad ma gagiyeg ndariy fan e girdi’ u wan’rad, machane Jesus e ba thil ni bochan e gubin ngiyal’ nra i rin’ e tin nra yib angin ko girdi’. Ra gagiyeg u fithik’ e t’ufeg, mab gol, ma ma runguyey, ma ir reb e Pilung nib mat’aw.—Isaiah 11:4.

Ra taareban’ e girdi’ u fayleng

Ba ulung i fager ni yad bay u Paradis ni yad be abich u taabang u fithik’ e felfelan’.

Dabki yurba’ e girdi’ ni bochan e nam ni kar bad riy. Ya yad ra par ni kar taarebgad. (Revelation 7:9, 10) Gubin e girdi’ u fayleng ni yad ra t’ufeg Got nge girdi’ u toobrad, mar maruwelgad u taabang u fithik’ e gapas ni ngar lebguyed e n’en nib m’agan’ Got ngay ko som’on ni aram e ngar ayuweged e fayleng ni taferad.—Psalm 115:16.

Ra gapas thilin e girdi’ nge gamanman mu kur ayuweged e pi n’en bay u toobrad

Nap’an nra gagiyegnag Gil’ilungun Got e fayleng, ma aram e ra gagiyegnag Got e yafang ni nga i par nib fel’ rogon. (Psalm 24:1, 2) Nap’an ni taleg Jesus bangi yoko’, me dag e n’en nrayog ni nge rin’ u daken gelngin Got. (Mark 4:39, 41) Nap’an nra gagiyeg Kristus ma dakuriy rogon ni ngad rusgad ko yoko’, nge durru’, ara boch ban’en ni ma yib ni yima gafgow riy. Ra gapas thilin e girdi’ nge gamanman mu kur ayuweged e pi n’en bay u toobrad.—Hosea 2:18.

Ra fel’ fithik’ i dowey me yoor e ggan

Gubin e girdi’ nra fel’ fithik’ i dowrad. Dab kun m’ar, ma dab kun pilibthir, ma dab ku nim’. (Isaiah 35:5, 6) Ra felfelan’ e girdi’ ko pi n’en nib liyegrad nib fel’ yaan mab beech ni bod rogon e gal nsom’on e girdi’ ni ur felfelan’gow u lan fare milay’ nu Eden. Ra yoor e ggan ma urngin e girdi’ nib gaman e ggan ni ngar ked ni bod fare milay’ nu Eden. (Genesis 2:9) ‘Urngin e tin baadag e girdi’ ni ngar ked ma bay’ ni bod rogon piyu Israel kakrom.—Levitikus 26:4, 5.

Wom’engin e gek’iy, nge yasay, nge flowa.

Ra gapas me pagan’uy

Gubin e girdi’ ni yad ra par u tan e am rok Got ni yad ra par u fithik’ e gapas ma ra ur golgad ngorad mab mat’aw rogon e ngongol nra ur rin’ed ngorad. Dab kun mahl ma gubin e girdi’ ni yad ra maruwel nga mat’awrad nib fel’ rogon, mab gaman e tin nib t’uf ko girdi’. Be micheg e Bible ni gaar: “Gubin e girdi’ ni bayi be’ me par u fithik’ e gapas u tooben e woldug rok ni grapes nge woldug ni yu ke gek’iy ni fig, ma be par ndakuriy be’ nra k’aring e marus ngak.”—Mikah 4:3, 4.

Gubin e girdi’ ni bay e naun rorad nge maruwel ni yad ra felfelan’ ngay

Gubin e tabinaw ni bay e naun ni ngar pared riy ma dab rrusgad nri chey me buch ban’en riy, ma gubin e maruwel ni yad ra rin’ nra yib angin. Be yog e Bible ni piin yad ra par u lan e bin nib beech e fayleng rok Got e “maruwel ni bay ur ngongliyed e bay yan i aw nib fel’.”—Isaiah 65:21-23.

Rib fel’ rogon e skul ni yira tay ngorad

Be micheg e Bible ni gaar: “Girdi’ ko nam e ri bayi tamilangan’rad u murung’agen Somol.” (Isaiah 11:9) Piin yad ra par u tan Gil’ilungun Got e yad ra nang feni ga’ e gonop rok Jehovah ni ir e En Ke Sunmiyrad, mu kur filed murung’agen e tin ke sunmiy nrib fel’ yaan. Dab ra fanayed e tamilangan’ rorad ni ngar ngongliyed talin e cham, ara ra gafgownaged yugu boch e girdi’. (Isaiah 2:4) Ya yad ra fil rogon ni ngar pared u taabang u fithik’ e gapas nge rogon ni ngar ayuweged e fayleng.—Psalm 37:11.

Yafos ni manemus

Ke ngongliy Got e fayleng nib fel’ rogon ya nge yag nda felfelan’gad ko par rodad u reb e rran ngu reb. Ke sunmiy e girdi’ ni ngar pared u fayleng ndariy n’umngin nap’an. (Psalm 37:29; Isaiah 45:18) Ere “bayi kirebnag gelngin e yam’ ni manemus” ya nge yag ni lebug e n’en nib m’agan’ ngay aram ko som’on. (Isaiah 25:8, BT) Ke micheg e Bible nra boch nga m’on ma “dab ku unim’, ma dab ki i kireban’uy, ma dab ku un yor, ma dab ku un amith.” (Revelation 21:4) Ra bing Got e kanawo’ ngak e piin yad ra magey ni yad ba fos u nap’an yira thang e re fayleng nib kireb ney, nge piin yira fasegrad ko yam’ u lan e bin nib beech e fayleng ni ngar pared ndariy n’umngin nap’an.—John 5:28, 29; Acts 24:15.

Yaan e girdi’ ni yad be gumuchmuch ko pi fager rorad nge girdien e tabinaw rorad ni kan fasegrad ko yam’.

Bokum milyon e girdi’ e yad be fal’eg rogorad e chiney ni ngar uned ko par u tan Gil’ilungun Got ni ke chugur ni nge yib. Yugu aram rogon ndawor ra flontgad, machane yad be guy rogon ni ngar manged e re miti girdi’ ni baadag Got ni nge un ko par u lan e bin nib beech e fayleng rok. Ni uw rogon? Yad be fil murung’agen Jehovah Got, nge Jesus Kristus ni ir e ke l’og ke yib.—John 17:3.

Mu fil rogon nrayog ni ngam magey ni gab fos u nap’an ni yira thang e re fayleng ney, nge rogon nrayog ni ngam un ko par u lan e bin nib beech e fayleng ni bay yib. Rayog ni ngam filew reb e Pi Mich Rok Jehovah e Bible ndariy puluwon ni gimew be fanay fare ke babyor ni Mu Par Ndariy N’umngin Nap’an ni Gab Felfelan’!