Yiiy ko N’en Ndabki N’uw Nap’an Me Buch

NAP’AN ni be weliy Peter murung’agen e gabul nge langlath u puluwon e girdi’ nge re fayleng ney, me yoloy ni gaar: “Ke yog Got ni bay sum e bin nib beech e lan e lang nge bin nib beech e fayleng, ni aram e tin nib mat’aw e ngongol e bay i par riy, ni ereray e pi n’en ni gadad be sonnag.” (2 Peter 3:13) Kan micheg e “bin nib beech e lan e lang nge bin nib beech e fayleng” u daken Isaiah ni profet. (Isaiah 65:17; 66:22) Re yiiy ney ni yog Peter e be dag ndawori lebug ko ngiyal’ ni immoy riy.

Boch nga tomur riy ko duw ni 96 C.E., ma fapi thin nni pi’ u daken John e ni chagiy e “bin nib beech e fayleng” ko pi tow’ath u tan Gil’ilungun Got. (Revelation 21:1-4) Yiiy ko Bible u murung’agen e tin ni be buch u fayleng u m’on nra yib Gil’ilungun Got e be lebug e chiney. Ere, rayog ni ngad lemnaged ndabki n’uw nap’an me yibnag e re Gil’ilungun nem e bin nib beech e fayleng. Uw rogon e re fayleng nib beech nem? Fare babyor ku Isaiah u Bible e ra yog ngodad.

Tow’ath u Lan e Bin nib Beech e Fayleng

Bay e Gapas nge Taareban’ ko Liyor. “Bay ra pirdiiyed e pi sayden rorad ngar ngongliyed talin e maruwel riy ni ma gi’ e but’, mi yad yodoromnag e pi sarey rorad nge mang yar ni yima th’ab papa’ngin e woldug ngay. Pi nam e dab kur mahlgad bayay, ma dab kur fal’eged rogorad bayay ni fan ko mahl.”​—Isaiah 2:2-4.

Gapas u Thilin e Girdi’ nge Gamanman. “Pi gamanman ni wolf nge saf e bay ur pired nib fel’ thilrad, ma gamanman ni leopard e bay ra paged yad nga but’ u fithik’ pifak e kaming. Pifak e garbaw nge pifak e layon e bay ur abichgad u taabang, ma bbitir ni kab achig e bay i pow’iyrad. Garbaw nge gamanman ni bear e bay ur abichgad u taabang, ma pi fakrad e bay ur pired u taabang nib fel’ thilrad. Pi layon e bay ur kayed kenggin e grain ni bod e garbaw. Zion nib thothup ni aram fare burey rok Got e ra par ndariy e kireb riy ara ban’en nra maad’ad ngak be’. Ma girdi’ ko nam e ri bayi tamilangan’rad u murung’agen Somol ni bod rogon lan e yungi day nib sug ko day.”​—Isaiah 11:6-9.

Bay e Ggan ni Boor ni Ngan Kay. “Mmutrug nra fal’eg Jehovah reb e mur ni fan ngak urngin e girdi’ ni ggan nge wain nth’abi fel’ e yira pi’ riy.”​—Isaiah 25:6, New World Translation.

Ra M’ay e Yam’. “Somol ni Th’abi Tolang e bayi kirebnag gelngin e yam’ ni manemus! Bayi fal’ey e lu’ u owchen e gubin e girdi’, me girdi’ rok ni yad ba yath u wan’ e fayleng ni ga’ngin ni ur gafgowgad riy e bayi museg. I Somol, e ir e be yog e pi thin ney.”​—Isaiah 25:8.

Ran Faseg e Yam’. “Girdi’ ni kar m’ad e yad ra fos bayay! Piin ni yad ba mol u fithik’ e but’ e bay ra odgad mi yad tolulnag e felfelan’ . . . Ra fas e yam’ bayay u roy u fayleng.”​—Isaiah 26:19, The New English Bible.

Fare Messiah e Ba Tapufthin nib Mat’aw. “Dabiyog ni turguy e n’en ni ngan rin’ ngak be’ ni bochan usun faanem ara tin ni ke rung’ag ni murung’agen; ra pithig e oloboch rok e piin ni gafgow nrogon, me ayuweg mat’awun e piin nib sobut’an’rad.”​—Isaiah 11:3, 4.

Ran Golnag e Malmit nge Biling. “Pi malmit e bay ra guyed ban’en ma piin ni biling e bay rrung’aged ban’en.”​—Isaiah 35:5.

Yungi N’en ni Ke Kireb e But’ Riy e Ra Yong’ol. “Ra felan’ e yungi n’en ni kan n’ag ma ke milik, ma yungi n’en nder tugul ban’en riy e ra felan’, ma ra puf ni bod e floras ni saffron. Ri dariy e maruwar riy nra puf ni floras ma rra felfelan’ nib gel ma ra felfelan’ nga i tolul nga lang.”​—Isaiah 35:1, 2, NW.

Ba Fayleng nib Beech. “Bay gu sunumiy reb e lan e lang nib beech [reb e am nib beech u tharmiy] nge reb e fayleng nib beech [reb e ulung nib beech nib mat’aw]. Ma tin kakrom e ri bay ni pag talin. Ngari mfelfelan’gad ndariy n’umngin nap’an ko pi n’en ni gag e bay gu sunumiy. . . . Girdi’ [ni yad ra par u lan e bin nib beech e fayleng rok Got ni ke micheg] e bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed. Girdi’ rog e bayi n’uw nap’rad ni bod e gek’iy. Pi n’en ni kar muruwliyed e ri bayi fel’ rogorad riy. Ma maruwel ni bay ur ngongliyed e bay yan i aw nib fel’, ma fakrad e dab ki yib e riya’ ngorad nib tomgin. Ya yad pi fak e piin ni ke fal’eg Somol waathrad, ni yad nge pi fakrad. Ra dawor ra meybilgad ngog, mu gu fulweg tabab e meybil rorad.” ‘Nri bod e bin nib beech e fayleng nge bin beech e tharmiy nra par nib mudugil ni bochan gelngig, ere piin owchemed nge fithingmed e yad ra par nib mudugil.’​—Isaiah 65:17-25; 66:22.

Ka Nog u M’on e N’en Nra Buch ko Gabul Nge Langlath

Fare babyor ni Isaiah e gathi kemus e re ke babyor u Bible ni be yiiynag e pi flaab nra yib boch nga m’on. Boor e yiiy u Bible ni be weliy e n’en nra rin’ Got u daken Gil’ilungun u tan pa’ Kristus.a Ga baadag ni ngam par u reb e par ni aram rogon, fa? Rayog! Mu gay e n’en ni be fil e Bible u murung’agen e n’en nib m’agan’ Got ngay ni fan ko fayleng gabul nge langlath, mag fil rogon me yog nim un ngay. Rra felfelan’ e Pi Mich Rok Jehovah ni ngar ayuweged gur.

[Footnote]

[Picture on page 4]

Ra par e girdi’ nge gamanman u fithik’ e gapas

[Picture on page 5]

Piin kar m’ad e yad ra fas bayay

[Picture on page 6]

Ra paradis e fayleng ni ga’ngin