Bayni Biechnag Urngin Ban’en​—Ni Rogon Ni Kan Yiiynag

“Ma faanem ni ke par nga tagil’ e gaar, ‘Chiney e nggu thiliyeg urngin ban’en nge biech.’ Mi ki gaar ngog, . . . ‘Ya pi thin ney e ba riyul’ ma rayog ni ngan pagan’uy ngay.’ ”—REVELATION 21:5.

1, 2. Mangfan ni boor e girdi’ ni bay farad ni nge maruwaran’rad ni nga rogned e tin ni bay nga m’on?

KAAM mog ara kaam lemnag ban’en ko, ‘Mini’ e manang e tin ni bay nga m’on?’ Ga manang ko mangfan ni be maruwaran’ e girdi’ ni nge sananag e n’en ni ra buch nga m’on ara nge pagan’ ku be’ ni nge yog nib pay ni manang e tin ni bay nga’ m’on. Girdi’ e dariy rogorad ni nga rogned e tin ni ra buch nga tomren in e pul ara pi duw nga m’on nrib puluw.

² Fare magazine ni Forbes ASAP e be weliy murung’agen e tayim ni polo’. Reb e TV documentary host ni Robert Cringely e ke yoloy nga lan fare babyor ni gaar: “Bay ba ngiyal’ ni fare tayim e ra tamra’nagdad ni gad gubin, machane kab gel e tamra’ ni nge yib ngak e piin ni ma yog boch ban’en ni nge buch nga’ m’on. Ra ngan guy rogon ni ngan nog boch ban’en ni ra buch nga m’on e bod ba gosgos ni baga’ ni dabda gelgad riy. . . . Machane, piin ni yima yog e cheg ngorad e yad be ulul i yan ni nga rogned boch ban’en nra buch nga m’on.”

3, 4. (a) Mang e ma lemnag boch i yad nib fel’ nib l’ag ko fare millennium nib biech? (b) Mang e n’en nib fel’ ni be lemnag boch e girdi’ u murung’agen gabul nge langleth?

³ Bochan ni kari tiyan’ e girdi’ ko fare millennium nib biech ma sana kam guy ni gowa boor e girdi’ ni yad ma lemnag e tin ni bay ko gabul nge langleth. Ngiyal’ ni kafini tabab fare duw ni ke yan, ma fare magazine ni Maclean’s e ke gaar: “Baga’ ni girdi’ nu Canada e sana yad be lemnag ni fare duw ni 2000 e yugu reb e duw u lan e calendar, machane rayog ni nge buch boch ban’en riy ni ra dag ni riyul’ ni kan tababnag boch ban’en.” Professor Chris Dewdney u York University e ke yog boch e thin ni be micheg ni ke mich e re n’ey u wan’, me gaar: “Fan fare millennium e aram e rayog ni ngad lukniged pa’dad ko fare chibog ni ri ma k’aring e marus—.”

⁴ Aram e n’en ni goo yibe finey ma de riyul’, fa? U Canada ke mus ni 22 percent ko girdi’ ni kan fithrad e “ke michan’rad ni duw ni 2000 e ra bing e kanawo’ ni ngan tababnag reb e tabolngin nib biech ko fayleng.” Riyul’ ni ke chuchugur ko baley ko pi girdi’ nem e “yad be lemnag ni ra yib yugu reb e mahl nga fayleng”​—ni ga’ngin—​u lan 50 e duw. Ba tamilang, ni baga’ ni girdi’ e ke michan’rad ni fare millennium nib biech e dabiyog ni nge pithig e pi magawon rodad, nge biech urngin ban’en. I Sir Michael Atiyah, ni ir fare president ko Britain’s Royal Society kafram e ke yoloy ni gaar: “Ngan thiliyeg ban’en nib kaygi papey . . . e bsor fan ko fa bin reliw nge taareb e chibog e ra skengnag nib gel e tamilangan’ rodad ko par rodad ni polo’. Fapi magawon ni yib ni bochan ni ke yoor e girdi’, ma ke buchuw e tin ni yima fanay, ma kan alitnag e fayleng, ma kada guyed e chiney ni ke yoor e girdi’ nib gafgow ma thingarda pithiged e pi magawon ney nib papey.”

5. U uw e rayog ni ngad taga’gad nga daken u murung’agen e tin ni bay nga m’on?

⁵ Sana ga ra yog ni ngam gaar, ‘Bochan ni dabiyog ko girdi’ ni nge yog e tin ni bay nga m’on, gathi ba fel’ ni dabda lemnaged e gabul nge langleth?’ Fulweg riy e danga’! Faan manga dariy be’ ni rayog ni nge weliy nrib tamilang u murung’agen e tin ni bay nga m’on, machane dabda lemnaged ni dariy reb ni rayog rok. Ere, mini’ e rayog, ma mang fan ni thingarda lemnaged ni bay ban’en nib fel’ nga m’on? Rayog ni ngam pirieg e fulweg ko re deer ney nib fel’ ko fa aningeg e yiiy. Kan yoloy e pi n’en ney nga lan fare babyor ni kan wereg ngak e girdi’ nib yoor mar bieged, maku aram e babyor ni ba yoor e girdi’ ni dar nanged fan min dariy fannag​—ma ireram fare Bible. Demtrug ko uwrogon fare Bible uwan’um, nge feni yoor e thin riy ni ga manang, ma ra fel’ rogom ni faanra ngam mu lemnag fa aningeg i kenggin e thin ni bay riy. Pi n’en ney e be weliy murung’agen e tin ni bay yib nrib tamilang. Maku, pi yiiy ney ni aningeg, e be weliy e n’en ni bay yib ngom nge ngak e piin nib t’uf rom nga m’on.

6, 7. Wuin e ke yiiynag Isaiah boch e thin, ma uwrogon ni fare yiiy ni ta’ e kari lebug?

⁶ Bin som’on e bay ko Isaiah guruy ni 65. U m’on ni ngan bieg e re n’ey, ma ngam ta’ nga lanin’um gin ni ke buch e re n’ey riy​—nge wuin e kan yoloy nge mang e magawon ni ke yib. Isaiah ni ir reb e profet rok Got, ma ir e ke yoloy e pi thin ney, e immoy ko ngiyal’ ni ke pag taareb e chibog u m’on ni kan thang fare am nu Judah. Kan thangrad ko ngiyal’ ni daki ayuweg Jehovah e piyu Jew ya dar pired nib yul’yul’ ngak, me pag piyu Babylon ni ngar thanged Jerusalem ma ngar feked e girdi’ ni kalbus. Ke buch e re n’ey ko ngiyal’ ni ke pag taareb miriay e duw u tomren ni ke yiiynag Isaiah e re n’ey.​—2 Chronicles 36:15-21.

⁷ Nganni weliy rogon ni ke lebug fare yiiy, ma som’on ngam lemnag ni daken e ayuw rok Got e yog Isaiah fithingan be’ nu Persia ni daworni gargelnag, ni Cyrus, ni munmun ma ir e ke thang fare Babylon. (Isaiah 45:1) I Cyrus e i fal’eg rogon e kanawo’ ko piyu Jew ni ngar sulod ko binaw rorad ko duw ni 537 B.C.E. Re n’ey e ma gin e girdi’ ngay, ya ke yog Isaiah u m’on rogon ni ngan sulwegrad nga rogon, ma aram e n’en ni rayog ni ngad bieged ko guruy ni 65. I weliy murung’agen rogon ni nge yib e falfalan’ ngak piyu Israel ko chirofen ni ngar sulod ko binaw rorad.

8. Mang e n’en ni bay nga m’on ni ma k’aring e falfalan’ ni ke weliy Isaiah, ma mang e pi n’en ni yi baadag?

⁸ Pi thin ney e rayog ni ngada bieged u Isaiah 65:17-19 ma be gaar: “Bay gu sunmiy reb e fayleng nib biech nge reb e lan e lang nib biech. Ma tin kakrom e ri bay ni pagtalin. Ngari mfalfalan’gad ndariy n’umngin nap’an ko pi n’en ni gag e bay gu sunmiy ni bay i par nib sug ko falfalan’, ma girdi’ riy e bay ur pired ni yad ba falfalan’. Me gag e ri bay gu falfalan’ ni bochan yu Jerusalem nge girdi’ rok. Bayi par ndakuriy e meyor u rom, ma dab kun ning e ayuw.” Ba mutrug, ni i weliy Isaiah murung’agen e par ko piyu Jew ni ri kab fel’ ko ngiyal’ ni ur moyed u Babylon. I weliy e falfalan’ ni nge yib ngorad. Chiney am guy fare bugithin ni “bin nib biech lan e lang nge bin nib biech e fayleng.” Aram fa bin som’on ko fa aningeg i n’en ni kan yoloy ko re bugithin ney u lan fare Bible, ma pi thin nu Bible ney ni aningeg e ba m’ag ko par rodad ni kan weliy murung’agen u m’on riy.

9. Ngiyal’ ni ke lebug e yiiy ko Isaiah 65:17-19 kakrom ma uwrogon nib l’ag piyu Jew ngay?

⁹ Yay ni som’on ni ke lebug e thin ni bay ko Isaiah 65:17-19 e ba l’ag ko piyu Jew kakrom, rogon ni yog Isaiah e rib puluw, ni yad ra sul nga binaw rorad, ya yad ra maruweliy ni ngara sulweged e liyor rorad nib machalbog nga rogon. (Ezra 1:1-4; 3:1-4) Mmutrug ni ga manang ni kar sulod ko binaw rorad ni ka fare planet ni da gathi yugu bang u palpalthib. Ma re n’ey e ra ayuwegdad ni ngada nanged ko mang fan e n’en ni ke yog Isaiah ni bin nib biech lan e lang nge bin nib biech e fayleng. Dabda sananaged ban’en, ni taabrogon ko n’en ni ma rin’ boch e girdi’, u murung’agen e pi yiiy rok Nostradamus ni de tamilang ara yugu boch e profet ni googsur. Fare Bible e be tamilangnag ko mang fan e n’en ni ke yog Isaiah.

10. Uwrogon uwan’dad fare “fayleng” nib biech ni ke weliy Isaiah?

¹⁰ U lan fare Bible, ma “fayleng” e gathi gubin ni be sor fan ko re but’ rodad n’ey ni polo’. Bod rogon u Psalm 96:1 (New World Translation) e ba tamilang ni be gaar: ‘Fayleng ni polo’’ mu tang ni fan ku Jehovah.’ Gad manang ni planet rodad​—fare terra firma nge fare day ni baga’—​e dabiyog ni nge tang. Girdi’ e ma tang. Arrogon, Psalm 96:1 e be weliy murung’agen e girdi’ nu fayleng.a Machane ku be weliy e Isaiah 65:17 murung’agen e “bin nib biech lan e lang.” Faanra fare “fayleng” e be yip fan e ulung ko girdi’ nib biech ni ma par ko binaw rok piyu Jew, ma mang e “bin nib biech lan e lang”?

11. Fare bugithin ni “bin nib biech e fayleng” e ba sor fan ko mang?

¹¹ Fare Cyclopædia of Biblical, Theological, and Ecclesiastical Literature, ko M’Clintock nge Strong, e be gaar: “Ran weliy fare scene ara bang ko fare changar rok e profet, ma tharmiy e be yip’ fan . . . e ulung ni polo’ ni bay gelngirad ko gagiyeg . . . ni yad ba tolang ma yad be gagiyeg, ni taabrogon ko fare tharmiy nib riyul’ ni be par u daken e fayleng ni be gagiyegnag.” Ma fare bugithin ni “tharmiy nge fayleng,” e ke weliy fare Cyclopædia ni ‘u lan fapi thin ni kan yiiynag ma re bugithin ney e be yip’ fan girdien e am nge rarogorad mab thilthil e liw rorad. Fare tharmiy e ir e gagiyeg ni th’abi tolang; ma fayleng e be par ni bay e am riy ni be gagiyeg, girdi’ ni be par ni bay e piin nib tolang e liw rorad ni be gagiyegnagrad.’

12. Uwrogon ni ke yog ngak piyu Jew kakrom fa “bin nib biech lan e lang nge bin nib biech e fayleng”?

¹² Nap’an ni ke sul piyu Jew ko binaw rorad, ma ke yog ngorad e n’en ni rayog ni nganog e m’ag nib biech ngay. Ma bay e piin ni be gagiyegnagrad nib biech ko ngiyal’ nem. Zerubbabel, ni ir be’ ni owchen David ni Pilung, e ir e governor, me Joshua e ir e prist nib tolang. (Haggai 1:1, 12; 2:21; Zechariah 6:11) Yow l’agruw e ir fa “bin nib biech e lan e lang.” Yad be par u daken e mang? Fa “bin nib biech e lan e lang” e be par u daken e “bin nib biech e fayleng,” ni yad fare ulung i girdi’ ni kan biechnagrad ni kar sulod ko binaw rorad ni fan ni ngar toyed e Jerusalem biyay nge tempel ni ngar pigpiggad riy ku Jehovah. Arfan, ni be dag uroy ni bay fa bin nib biech lan e lang nge bin nib biech e fayleng ya ke lebug e re n’em ko piyu Jews ko ngiyal’ nem.

13, 14. (a) Mang yugu boch e thin nu Bible ni ba’ fare bugithin ni “bin nib biech e lan e lang nge bin nib biech e fayleng” ni gad ra weliy? (b) Mangfan ni pi thin ni ke yiiynag Peter e ba fel’ ni ngan tiyan’uy ngay ko ngiyal’ ney?

¹³ Mu tiyan’um ni ngam nang fan e re n’ey. Gathi ke mus ni gad be guy rogon ni ngada weliyed e thin nu Bible ara kemus ni gad be weliy boch e n’en ni ke buch kakrom. Rayog ni ngam nang fan e re n’ey ni faanra nga darod ngad guyed yugu reb e thin nu Bible ni ba’ fare bugithin riy ni “bin nib biech e lan e lang nge bin nib biech e fayleng.” U 2 Peter chapter 3, ma rayog ni ngam pirieg e re n’ey ma ga ra guy ni par rodad nga m’on e ba l’ag ngay.

¹⁴ Ke yoloy Peter ni apostal e babyor rok ni ke pag 500 e duw u tomren ni ke sul piyu Jew ko binaw rorad. Bochan ni Peter e ir e apostal rok Jesus, ma aram me yol ngak e pi gachalpen Kristus, ni “fare Somol” rogon ni yog ko 2 Peter 3:2, NW. U verse 4, me weliy Peter murung’agen me “micheg ni bay,” Jesus ma ir tapgin ni ri baga’ fan e re thin ko profet ney ko ngiyal’ ney. Ke gaman e mich riy ni ka nap’an e bin I e Mahl ko Fayleng, ma ba’ Jesus rodad ya bochan ni kan pi’ ngak mat’awon ko Gagiyeg ko Gil’ilungun Got u tharmiy. (Revelation 6:1-8; 11:15, 18) Ma re n’ey e bay yugu reb i fan nib thil ya bay boch ban’en ni ke weliy Peter ko re guruy ney.

15. Uwrogon ni ra lebug e thin rok Peter u murung’agen e “bin nib biech lan e lang”?

¹⁵ Bin 2 Peter 3:13 e be gaar: “Machane ke yog Got ni bayi sum e bin nib biech lan e lang nge bin nib biech e fayleng, ni aram e tin nib mat’aw e ngongol e bay i par riy, ni ereray e pi n’en ni gadad be sonnag.” Sana kam nang ni Jesus nu tharmiy e ir e Pilung ni th’abi ga’ ko “bin nib biech e tharmiy.” (Luke 1:32, 33) Machane, yugu boch e thin nu Bible e be dag ni gathi goo ir e ra gagiyeg. I micheg Jesus ni pi apostal rok nge boch e girdi’ ni bod yad e bay bang ni tagil’rad u tharmiy. U lan fare babyor ni Hebrews, e weliy Paul ni apostal murung’agrad ni “kan piningrad nga tharmiy.” Me gaar Jesus ni piin ni yad bang ko re ulung ney e yad ra un ngak ma yad ra par nga tagil’rad u tharmiy. (Hebrews 3:1; Matthew 19:28; Luke 22:28-30; John 14:2, 3) Be dag e re n’ey ni boch e girdi’ e yad ra un ko gagiyeg ni ngar manged bang ko fa bin nib biech e fayleng. Ere mang fan fare bugithin ni yog Peter ni “bin nib BIECH e fayleng”?

16. Mang e “bin nib biech e fayleng” ni ke sum?

¹⁶ Taabrogon ko kakrom​—i sul piyu Jew ko binaw rorad—​ma chiney e be lebug fa bin 2 Peter 3:13 ma ba l’ag e girdi’ ni yad be par u tan e gagiyeg ni be tay fa bin nib biech lan e lang. Rayog ni ngam guy e chiney ni bokum milyon e girdi’ ni yad be par u tan e re gagiyeg ney u fithik’ e falfalan’. Ma ke fel’ rogorad ko yaram ni kan tay ni fan ni nge skulnagrad ma yad be athamgil ni ngar folgad ko pi motochiyel ni bay u lan fare Bible. (Isaiah 54:13) Ma kar fal’eged e def ko “bin nib biech e fayleng” ni bochan ni kar fal’eged reb e ulung u fayleng ni ga’ngin ko urngin e pi nam, nge thin, nge ramaen e girdi’, ma yad be maruwel u taabang ma yad be par u tan fare pilung ni Jesus Kristus ni ir e be gagiyegnagrad. Ma n’en ni baga’ fan u roy e aram e rayog ni ngam mang bang riy!​—Micah 4:1-4.

17, 18. Mangfan ni pi thin ko 2 Peter 3:13 e ra k’aringdad ni ngad sapgad nga m’on?

¹⁷ Dabmu lemnag ni aram e tomur ko re n’ey, ma dabiyog ni ngad nanged fan nib tamilang e tin ni bay nga m’on. Riyul’, ni faanra ngada yaliyed boch e thin nib chuchugur ko bin 2 Peter guruy ni 3, ma rayog ni ngan guy reb e pow ni yira thiliyeg ban’en nga m’on nib gel. U verse 5 nge 6, me yoloy Peter u murung’agen fare ran ni ke tharey e fayleng u nap’an Noah, ni aram fare Ran ni ke thang fare fayleng nkakrom nib kireb. U verse 7, me yog Peter ni “fare tharmiy nge fare fayleng ni bay e chiney,” ni aram e pi am nge girdi’ ni boor, e kan tayrad ni ngar uned ko “fare rran ko pufthin nge magothgoth ni fan ko girdi’ nib kireb.” Biney e be dag ni fare bugithin ni “fare tharmiy nge fare fayleng ni bay e chiney” e gathi e ir fare palpalthib ya aram e girdi’ nge pi am rorad.

¹⁸ Tomur riy me weliy Peter ni nap’an ni ra yib e rran rok Jehovah ma yira yarmiy e klin nib elmirin, ni fan ni ngan fal’eg e kanawo’ ni ngeb fa bin nib biech e lan e lang nge bin nib biech e fayleng nrogon ni yog ko verse 13. Am sap ko tomur ko re verse ney ni be gaar​—“ni aram e tin nib mat’aw e ngongol e bay i par riy.” Gathi be dag e re n’ey ni yira biechnag ban’en nib gel ni nge fel’ e par ko girdi’? Gathi ereray tapgin ni nge m’ug e tin nrib biech, ma aram e tayim ni nge yib e falfalan’ ko girdi’ ni kab gel ko falfalan’ ni ma yib ngorad e chiney? Faanra kam guy e re n’ey, me ere ke yog ngom e tamilangan’ ko n’en ni be yog e Bible, ni aram e tamilangan’ ni kemus ni buchuw e girdi’ e manang.

19. Mang ngiyal’ ni be weliy e babyor ni Revelation murung’agen ni fan ko “bin nib biech e lan e lang nge bin nib biech e fayleng” ni ba yib?

¹⁹ Machane ngku darod ko gin nib palog boch. Kada yaliyed fare bugithin ni “bin nib biech e lan e lang nge bin nib biech e fayleng” ni bay ko Isaiah guruy ni 65 ma yugu reb e bay ko bin 2 Peter guruy ni 3. Chiney ngam pithig e Bible rom ko Revelation guruy ni 21, ni bay e thin riy ni taabrogon ko fare bugithin u lan fare Bible nra ayuwegey. Biyay, ba fel’ ni ngan nang u m’on ko uw rogon. L’agruw e guruy nib m’on, u Revelation guruy ni 19, e be weliy murung’agen e mahl ni be yip’ fan ban’en mab tamilang​—machane gathi mahl u thilin e pi nam ni yad ba toogor. Ya baraba’ e ba’ “Fare Thin rok Got” riy. Sana ga manang e re n’ey ni ereray e ngochol rok Jesus Kristus. (John 1:1, 14) Bay u tharmiy, ma pi thin n’ey e be weliy murung’agen nge pi salthaw nu tharmiy nib chag ngak. Yad be cham ngak mini’? Fare guruy e be weliy murung’agen e “pi pilung,” nge “piin th’abi tolang ko salthaw,” nge piin nib thil thil e liw rorad, nge piin nib “tolang nge piin nib sobut’.” Re mahl ney e ba l’ag ko fare rran rok Jehovah ni bay yib, ni nge thang e tin kireb. (2 Thessalonians 1:6-10) Ngan weliy boch, ma Revelation guruy ni 20 e kan tababnag ko boch e thin ni be weliy murung’agen rogon ni ngan thang “fare porchoyog ni ke kakrom, ni aram fare Moonyan’ nge Satan.” Re n’ey e be fal’eg rogon e kanawo’ ni ngan weliy e Revelation guruy ni 21.

20. Revelation 21:1 e be weliy ni ri yira thiliyeg e mang nga m’on?

²⁰ Ke tabab John ni apostal nga boch e thin ni ma k’aring e marus ni gaar: “Ma aram mu gguy reb e tharmiy nge reb e fayleng nib biech. Fa bin som’on e tharmiy nge bin som’on e fayleng e yan nga bang, ma ku errogon e day ni chuw.” Ngan taarebnag ko n’en ni kad filed ko Isaiah guruy ni 65 nge 2 Peter guruy ni 3, ma ra mudugil lanin’dad ni de weliy e re n’ey ni ngan thiliyeg fare tharmiy nib riyul’ nge fare fayleng ni gad ma par riy nib muun ngay e ran nib toar. Rogon ni ke dag e pi chapters ni ke yan, ni girdi’ nib kireb nge pi am rorad, ni Satan ni ir e pilung ni dabni guy e ba muun ngay. Arrogon, ban’en ni kan micheg uroy e aram e m’ag nib biech ni girdi’ nu fayleng e ba l’ag ngay.

21, 22. Mang e pi taw’ath ni ke micheg John ngodad, ma mang e be yip’ fan ni ngan n’ag e lu’ u owchey?

²¹ Kan micheg ngodad ni riyul’ e re n’ey ni faanra ngada weliyed boch e pi thin ney ni rib fel’. Tomur ko verse 3 e be weliy ni bay ba ngiyal’ ni ra yibi par Got ngak e girdi’, ni aram nge tiyan’ nga girdien ni yad be rin’ e tin nib m’agan’ ngay. (Ezekiel 43:7) Me ulul John ngay ko verse 4, 5 ni gaar: “Ma bayi n’ag [Jehovah] urngin e lu’ u owcherad. Ma aram e dab ku unim’, ma dabki i kireban’uy, ma dabku un yor, ma dab ku un amith. Ya tin kakrom ban’en e ke chuw. Ma faanem ni ke par nga tagil’ e gaar, ‘Chiney e nggu thiliyeg urngin ban’en nge biech.’ Mi ki gaar ngog: ‘Mu yoloy e re n’ey, ya pi thin ney e ba riyul’ ma rayog ni ngan pagan’uy ngay.’ ” Uw feni fel’ e pi thin nem ni nge pasigan’dad!

²² Mu tal buchuw ngam ri’ lamen ma ga nangfan e n’en ni be weliy fare Bible. ‘Ra n’ag Got urngin e lu’ u owcherad.’ Gathi aram fare lu’ ni ma luknag e owchedad nib riyul’, ku gathi aram e lu’ ko falfalan’. Danga’, ya fare lu’ ni ra n’ag Got e aram fare lu’ ni ma yib ni bochan e gafgow, nge kireban’, nge mulan’, nge amith, nge gelgel. Uw rogon ni nge mudugilan’dad? Re n’ey ni micheg Got e ba peth ko ngan n’ag e lu’ u owchey nge dabku unim’, nge dabki i kireban’uy, ma dab ku un yor, nge dab ku un amith.’​—John 11:35.

23. Mang tomren e magawon ni ra m’ay nrogon ni yog John ko yiiy ni i tay?

²³ Gathi be micheg e re n’ey ni m’ar ni cancer, nge stroke ara m’ar ko racha’, nge m’ar ko gum’ercha’ey, ni mus ko yam’ e ngan thang? Mini’ e arodad ni dawori yim’ be’ nib t’uf rok ko m’ar, nge maadad, ni bochan e gafgow? Ke micheg Got uroy ni dab ku unim’, ma re n’ey e be dag ni pi bitir ni yira gargelnagrad e dakuriy e magawon ni ngar ilalgad mar pillibthirgad​—ma tomur riy e yam’. Ku pi thin ney e be dag ni dakuriy be’ nra marongon ara m’ar ni Alzheimer, nge osteoporosis, nge fibroid tumors, nge glaucoma, nge mus ko m’ar ko lan owchey ni cataract​—ni aram e pi m’ar ni baga’ ni ma yib ko piin pillibthir.

24. Uw rogon ni fa ‘bin nib biech lan e lang nge bin nib biech e fayleng’ e ba taw’ath, ma mang e n’en ni gad ra weliy?

²⁴ Dariy e maruwar riy nib puluw uwan’um ni faanra kan thang e yam’, nge pillibthir, nge m’ar ma ra buchuw e kireban’ nge mayor. Ma uwrogon fapi magawon nib gel ko girdi’ nib gafgow, nge ngan gafgownag e bitir, nge fare magawon ni dabiyog ni nge taareban’ e girdi’ ya ba thil thil ramaerad? Ma faanra pi n’en ney​—ni ke yoor ko ngiyal’ ney—​e ra ulul iyan, ma dabi m’ay e kireban’ nge mayor. Ere, yafas u tan fa “bin nib biech lan e lang nge bin nib biech e fayleng” e dabkun kirebnag ko pi n’en ney ni ba’ e chiney ni ir e ma k’aring e kireban’. Rib thil! Machane, ke mus ni dalip ko fa aningeg yang u Bible ni bay fare bugithin riy ni “bin nib biech lan e lang nge bin nib biech e fayleng.” Ka bay reb nib l’ag ko n’en ni kad yaliyed ma re n’ey e be dag ko mang fan ni bay fan ni ngad songad ko wuin nge uwrogon ni nge lebuguy Got e tin ni ke micheg ni nge ‘thiliyeg urngin ban’en nge biech.’ Yira weliy e re thin ney ko bin migid e article nge n’en nra yib fan ko falfalan’ rodad.

[Footnote]

Mang e Ke Yib nga Lanin’um?

• Mang e dalip yay ni be weliy fare Bible e “bin nib biech lan e lang nge bin nib biech e fayleng”?

• Uw rogon nib l’ag piyu Jew kakrom ko ngiyal’ ni ke lebug e “bin nib biech e fayleng”?

• Mang e kan nang nra lebug ni yog Peter ni fan ko “bin nib biech lan e lang nge bin ni biech e fayleng”?

• Uwrogon ni Revelation guruy ni 21 e be pow’iy e athap rodad nga m’on nib tamilang?

[Picture on page 10]

Rogon ni yog Jehovah, i fal’eg Cyrus rogon ni nge sul piyu Jew ko binaw rorad ko duw ni 537 B.C.E.