Fare Fayleng Ni Biech​—Ga Ra Moy?

“Ere kug nang ni n’en ni nge rin’ be’ e nge par nib felan’ me tiyan’ ko tin ni be rin’ u nap’an e ngiyal’ ni be par nib fas ko biney e tamilang. Gadad gubin ndabi siy ni ngad abichgad ma gadad garbod nge felan’dad ko tin ni kad maruweliyed; ya pi n’ey ni gubin e tow’ath rok Got ngodad.”​—ECCLESIASTES 3:12, 13.

1. Mangfan ni rayog ni ngada lemnaged ni bay ban’en nib fel’ nga m’on?

BOOR e girdi’ ni be lemnag ni Got ni Gubin ma Rayog Rok e be par ni kaygi gel e thin rok ma kub kireb daken. Machane, fapi thin ni bay u lang e ba riyul’ ni rayog ni ngam pirieg ko Thin rok ni kan thagthagnag. Mab puluw e re n’ey ko ngongol rok ni ir “fare Got nib Falfalan’” ma ke tay e gallabthir rodad ni som’on nga paradis u fayleng. (1 Timothy 1:11; Genesis 2:7-9) Ran gay e tamilangan’ ko tin ni ka bay nga m’on ni ke micheg Got ngak girdien, ma thingar dabda gingad ko ngiyal’ ni kad nanged murung’agen e par ni ra pi’ ngodad e falfalan’ ni manemus.

2. Mang boch ban’en ni ga be sap ngay nga m’on?

² Fare article ni ke yan, e kada fal’eged i yaliy dalip ko aningeg rogon ni ke weliy e Bible e “bin nib biech lan e lang nge bin nib biech e fayleng.” (Isaiah 65:17) Taareb ko pi yiiy nem nrayog ni ngan tor ngay e kan yoloy ko Revelation 21:1. Fapi verse ni migid e be weliy murung’agen ba ngiyal’ ni Got ni Gubin ma Rayog Rok e ra thiliyeg nge fel’ rarogon e fayleng. Ra n’ag e lu’ ko kireban’ u owchey. Dakuriy be’ ni ra yim’ ni bochan ke pillibthir, nge bochan e m’ar, ara ke maadad ke yim’. Kireban’, nge mayor, nge amith e dakuriy. Aram e athap rok e girdi’ ni ri ma k’aring e falfalan’! Machane rayog ni nge mudugilanin’dad ni ra yib e pi n’ey, ma susun uwrarogodad e chiney ni bochan e re athap rodad ney?

Tapgin ni Nge Pagan’uy

3. Mangfan ni nge michan’dad ko tin ni ke micheg fare Bible u murung’agan e n’en ni bay nga m’on?

³ Mu guy ko uwrogon ni be ulul e Revelation 21:5 ngay. Re n’ey e be weliy, ni Got e ke par nga tagil’ u tharmiy, ni gaar: “Chiney e nggu thiliyeg urngin ban’en nge biech.” Re n’ey ni ke micheg Got e kab fel’ ko puf rogoy ni ke micheg e pi nam, nge urngin e motochiyel ko mat’awuy, ara urngin ban’en ni be tafinaynag be’ ni nge yog ngak nga m’on. Aram e thin rok fa En ni ke yog e Bible ni “der ma ban” ma ri rayog ni ngan pagan’uy ngak (Titus 1:2) Ba tamilang, ni rayog ni ngam lemnag ni rayog ni ngad talgad u roy ko falfalan’ ni bochan e re athap rodad ney ma ngad pagedan’dad ku Got. De t’uf ni ngad talgad. Ya bay boor ban’en nga m’on ni ngad filed.

4, 5. Mang thin nu Bible ni kan weliy ni ra gelnag e pagan’ rodad ko tin ni ka bay nga m’on?

⁴ Ngam lemnag ko mang e ke weliy fare article ni ke yan nib m’ag ko tin ni ke micheg fare Bible ko fa bin nib biech lan e lang nge bin nib biech e fayleng. I weliy Isaiah murung’agen e m’ag nib biech, ma ke lebug e yiiy rok ko ngiyal’ ni ke sul piyu Jew ko binaw rorad ma kar gelnaged e liyor nib riyul’ biyay. (Ezra 1:1-3; 2:1, 2; 3:12, 13) Machane, ke mus ni aray rogon e thin ni bay ko yiiy ni i ta’ Isaiah, fa? Ri danga’! Pi n’en ni ke yog e ra lebug nib mudugil nga m’on ni kab palog. Mangfan ni rayog ni nga dogned ni aray rogon? Bochan e tin ni kad beeged ko bin 2 Peter 3:13 nge Revelation 21:1-5. Pi thin nem e be weliy murung’agen e bin nib biech lan e lang nge bin nib biech e fayleng ni piin Kristiano u ga’ngin e fayleng e ra fel’ rogorad riy.

⁵ Rogon e tin ni ke weliy, fare Bible e be fanay fare bugithin ni “bin nib biech e lan e lang nge bin ni biech e fayleng” ni aningeg yay. Ma dalip e kada weliyed ma kada filed ban’en ni ma k’aring e falfalan’. Ba tamilang, ni fare Bible e be weliy ni ra chuweg Got e tin kireb nge boch ban’en ni ma k’aring e gafgow ma ra taw’athnag e girdi’ u lan fare m’ag nib biech ni ke micheg.

6. Mang e be weliy ko fa bin aningeg e yiiy ni bay fare bugithin riy ni “bin nib biech lan e lang nge bin nib biech e fayleng”?

⁶ Chiney e ngada yaliyed e gin tomur ni rayog ni ngan gu’ fare bugithin riy ni “bin nib biech e lan e lang nge bin biech e fayleng,” ni bay ko Isaiah 66:22-24, (New World Translation) ni gaar: “ ‘Fa bin nib biech e lan e lang nge bin nib biech e fayleng ni kug ngongliy e yow ba sak’iy u p’eowcheg,’ ni ir e thin ni ke yog Jehovah, me ulul ngay ni gaar, ‘ere piin ni owchemed nge fare ngochol romed e ra par nib sakiy. Ma tin ke mudugil e ra tabab ko m’ug e pul nge ni mada’ ko m’ug e pul nge ka nap’an e sabbath nge ni mada’ ko sabbath ma urngin e girdi’ e yad ra siro’ ngog. ‘Ma yad ra yib ngar guyed dowgin e piin ni kar denengad nib togopluw ngog ma kar m’ad; ma fak l’ud rorad e dabi yim’ ma nifiy rorad e dabi math, ma urngin e girdi’ e yad ra palog rorad.’ ”

7. Mangfan ni ngadogned ni thin ni bay ko Isaiah 66:22-24 e ra lebug ko pi rran ni bay yib?

⁷ Re yiiy ney e ke lebug ngak piyu Jew ni kar sulod mi yad par ko binaw rorad, machane ku yira lebuguy e re n’ey biyay. Ke yan nap’an ni kan yoloy e babyor rok Peter nge fare babyor ni Revelation, ma susun ni nge yan boor e tayim nga tomren, ma be sorfan e re n’ey nga murung’agen e ‘bin nib biech e lan e lang nge bin nib biech e fayleng.’ Bay tapgin ni nge michan’dad ngay ni ra lebug e re n’ey u lan fare m’ag nib biech ni polo’. Ngam gu’ boch ban’en ni rayog ni ngada sapgad ngay nga m’on ni gad ra falan’ ngay.

8, 9. (a) Uwrogon ni girdien Got e “yad ra par nib sak’iy”? (b) Mang fan fare yiiy ni pi tapigpig rok Jehovah e yad ra pigpig ngak ni “ka nap’an e m’ug e pul nge mada’ ko m’ug e pul nge nap’an e sabbath nge mada’ ko sabath”?

⁸ Revelation 21:4 e be dag ni yira chuweg e yam’. Ba puluw e thin ni bay ko Isaiah guruy ni 66 ko re thin nem. Rayog ni ngad nanged ko verse 22 ni manang Jehovah ni fa bin nib biech lan e lang nge bin nib biech e fayleng e aram e n’en ni dagathi de mudugil, ni ke mus ni ra par nib ngoch nap’an. Maku, girdi’ rok e yad ra par; “nib sak’iy” u p’eowchen. N’en ni ke rin’ Got ngak e piin ni ke mel’eg e be micheg ni bay tapgin ni ngada pagedan’dad ngay. Tin riyul’ e Kristiano e kara mada’naged e togopuluw nrib gel, ma yibe athamgil ni ngan thang owcherad ni dariy fan. (John 16:2; Acts 8:1) Machane, fapi toogor rok girdien Got, ni bod Emperor Nero nu Roma nge Adolf Hitler, e der yog ni ngar thanged e piin nib yul’yul’ ku Got ni yad urngin, ni kan piningrad nga fithingan. Ke ayuweg Jehovah fare ulung ko girdi’ rok, ma gad ba mudugil ni rayog ni nge ayuwegdad ni manemus.

⁹ Taabrogon, piin ni ba yul’yul’ ku Got ni yad bang ko fa bin nib biech e fayleng, ni aram e ulung ko pi tapigpig nib riyul’ ni ma liyor ku Got u lan fare fayleng nib biech, e yad ra par nib sak’iy ni yugu yad ba reb ma yad ra pigpig nib machalbog ngak e En ni Sunmiy urngin ban’en. Gathi aram e pigpig ni ngan ta’ ko ngiyal’ nib puluw​—ara yu ngiyal’. Motochiyel rok Got, ni kan pi’ ngak piyu Israel u daken Moses, e ba t’uf ni ngan rin’ boch ban’en ni fan ko pigpig ku Got u gubin e pul, ni nap’an e m’ug e pul e aram e pow riy, nge gubin e wik, ni Sabbath e ir e pow riy. (Leviticus 24:5-9; Numbers 10:10; 28:9, 10; 2 Chronicles 2:4) Ere Isaiah 66:23 e be weliy e meybil ni gubin ngiyal’, nge meybil ku Got ni be ulul iyan, ni gubin e wik nge gubin e pul. Atheism nge ngan dariyfannag e teliw e ra m’ay. “Urngin e girdi’ e yad ra yib ra siro’gad u p’eowchen” Jehovah.

10. Mangfan ni ke mudugilanin’um ni gathi gubin ngiyal’ ni piin nib kireb e ra kirebnag fare fayleng nib biech?

¹⁰ Isaiah 66:24 e be micheg ngodad ni gapas nge tin mmat’aw ko bin biech e fayleng e dakuriy e riya’ riy. Girdi’ nib kireb e dabkuura kirebnaged. Dab mu pagtalin ni 2 Peter 3:7 ni bay nga m’on rodad “ko chirofen ni bay ni pufthinnag e girdi’ nib kireb nge mu’ min kirebnag.” Piin ni de mich Got uwan’rad e yira thang. Dariy e tin kireb ni ra yib ngak e piin ni dariy e kireb rorad, ma de taabrogon ko n’en ni ma buch u nap’an e mahl ko girdi’, ni kab boor e girdi’ ni gathi salthaw ni ma yim’ ko piin ni salthaw. Fare Tapuf Oloboch ni Baga’ e ke micheg ngodad ni nap’an e rran rok ma ni kemus ni piin ni de mich Got uwan’rad e yira thang owcherad.

11. Rogon ni dag Isaiah ma mang e ra buch ngak e piin ni ra togopuluw ku Got nge liyor rok?

¹¹ Piin nib mat’aw ni ra magay nib fas e yad ra guy ni ba riyul’ e Thin rok Got ni fapi profet e yiiynag. Verse 24 e ke weliy ni “fapi dogur ko piin ni kar m’ad ni kar denengad” nib togopuluw ngak Jehovah e ra micheg ko pufthin ni ra tay. Fapi thin ni ke fanay Isaiah nrib tamilang e gowa be k’aring e marus. Machane, ba puluw e re n’ey ko tin ni ke buch kakrom. U wuru’ e yoror u Jerusalem kakrom e rayog ni ngan guy tafen e dow riy, ni kanin’, downgin e piin ni kar thanged e fan ngay, kan duguliy ni dabni k’eyagrad.a Fapi fakl’ud nge nifiy ni be daramram e ra urfeg e dow nge downgin e girdi’ ni kar m’ad. Ba tamilang, ni ke weliy Isaiah ni aram rogon ni nge dag ni ra pufthinnag Jehovah e piin ni ma th’ab e motochiyel.

Mang e Ke Micheg

12. Mang boch e pow ni ke pi’ Isaiah u murung’agen e yafas u lan fare fayleng nib biech?

¹² Revelation 21:4 e be weliy ngodad boch ban’en ni dakuriy u nap’an fare m’ag nib biech. Machane, mang e n’en ni ra par? Uwrarogon e yafas u rom? Rayog ni nga nog ngodad boch e pow? Arrogon. Isaiah guruy ni 65 e be dag boch ban’en ni nge yog ngodad ni faanra ffel’ uwan’ Jehovah ni ngad uned ko flaab ko ngiyal’ ni nge sunmiy e bin nib biech lan e lang nge bin nib biech e fayleng. Piin ni kan taw’athnagrad ni ra yog ni ngar pared u fayleng nib biech e dabkura pillibthirgad ma dabki yog nra m’ad. Isaiah 65:20 e ke yog ngodad ni gaar: “Bitir ni kabran e dabkur m’ad, ma urngin e girdi’ ni bay ra pared ko biney e tamilang ni n’umngin nap’an ni ngar pired. Piin ni yad ra par nge gaman e 100 e duw rorad e bay nlemnag ni ka yad ba pagal. Ma ra yim’ be’ u m’on riy ma ba pow ni gag e kug gechignag.”

13. Uwrogon ni Isaiah 65:20 e ke micheg ngodad ni dariy be’ ni ra magawonnag girdien Got?

¹³ Nap’an ni ke lebug e re n’ey ngak girdien Isaiah, ma fan e re n’ey e aram pi bitir ko fare binaw e yad be par nib fel’ rarogorad. Dariy e toogor rorad ni ma yib, ni bod e n’en ni ke rin’ piyu Babylon, ni kar feked e pi bitir ni ka yad ba madway ma kar lied kem’ e piin ni pumoon ni ke taw nga yangarrad. (2 Chronicles 36:17, 20) U lan fare fayleng nib biech, e ra par e girdi’ nib fel’ rogon mab pagan’rad, ba gapas, ma yad ra falfalan’ ko yafas rorad. Faan ra togopuluw be’ ku Got ni lem rok, ma dabni pag ni nge par nib fas. Ra thang Got owchen. Ma uwrogon ni faanra ke gaman raay e duw ko cha’ nem ni ke togopuluw? Ma ra yim’ ni bod “bochi pagal” ngan taarebnag ko yafas ni dariy n’umngin nap’an.​—1 Timothy 1:19, 20; 2 Timothy 2:16-19.

14, 15. Rogon ni yog ko Isaiah 65:21, 22, ma mang e pi maruwel ni bay angin ni rayog ni ngad sapgad ngay nga m’on?

¹⁴ De tiyan’ Isaiah ko uwrogon ni ngan thang e piin ma denen ni lem rorad, machane ke weliy ko uwrarogon e par u lan fare fayleng nib biech. Mu lemnag ni gowa ga bay u lan fare sasing. Sana boch ban’en ni tin som’on ni ra yib nga lanin’um e pi n’en nib chugur nga tabinaw. Ke weliy Isaiah e re n’ey ko verses 21 nge 22 ni gaar: “Girdi’ e bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed. Girdi’ rog e bayi n’uw nap’rad ni bod e gek’iy. Pi n’en ni kar maruweliyed e ri bayi fel’ rogorad riy.”

¹⁵ Faanra dawor mu un i toy e naun ara dawor mu fal’eg e milay’, ma thin rok Isaiah e be dag ni yira skulnagem. Machane, ga baadag ni nge skulnagem e en nib cheg ko re maruwel ney, ni sana be’ ni buguli yoror rom nib gol ma ba baadag ni nge ayuwegem? De weliy Isaiah ni naun rom e sana ra moy e winda riy ni baga’ ni dan tay e melor ngay ma bay e upungen ma aram rogon e rayog ni nge yib e nifeng ngom, ara fapi winda ni bay upungen ni kan ngongliy ko melor ma aram rogon ni rayog ni ngam guy u rogon ni be thil thil e yafang. Ga ra fal’eg e naun ni chig riy e kan tay nib ngalol nga but’ ni rayog ni nge yan e n’uw nge snow riy nga but’? Ara bat’uf rom fare chig nib pach ya aram e n’en nib m’ag ko binaw rom​—ni taabrgon ko pi naun u Middle East—​ni aram e chig ni rayog ni ngam pared chon e tabinaw rom riy nguum abichgad u taabang nge ngam sabethingad u fithik’ e falfalan’?​—Deuteronomy 22:8; Nehemiah 8:16.

16. Mangfan ni nge michan’dad ni fare fayleng nib biech e aram e ra par nib fel’?

¹⁶ N’en ni ka baga’ fan ko ngam nang e pi n’en ney e aram rayog ni nge yog ngom e birom e naun. Riyul’ ni naun rom aram​—de taabrogon ko tin chiney ni sana kam maruwel nib elmirin ni ngam toy reb machane yugu boch e girdi’ e ra fel’ rogorad riy. Maku Isaiah 65:21 e be weliy ni ga ra yung e woldug ma ga t’ar wom’engin. Ba tamilang, ni be weliy e re n’ey rarogon urngin ban’en. Ra yib angin ngom ko maruwel ni kam ta’, ni aram e wom’engin e tin kam rin’. Rayog ni ngam rin’ e re n’ey ya yafas rom e ba n’uw nap’an​—“ni bod rogon e pi rran ko gek’iy.” Ma ke yan i puluw e re n’ey ko fare bugithin ni “ke biech urngin ban’en”!​—Psalm 92:12-14.

17. Mang e be micheg ni ke pi’ e athamgil nga laniyan’ e gallabthir?

¹⁷ Faanra gur reb e gallabthir, ma pi thin ney ni baaray e ra taw nga gum’ircha’em ni be gaar: “Ma maruwel ni bay ur ngongliyed e bay yan i aw nib fel’, ma pi fakrad e dab ki yib e riya’ ngorad nib tomgin. Ya yad pi fak e piin ni ke fal’eg Somol waathrad, ni yad nge pi fakrad. Ra dawor ra meybilgad ngog, mu gu fulweg taban e meybil rorad.” (Isaiah 65:23, 24) Kag manang e magawon ni yima yog fare gafgow ni ma yib ko ‘gargel nge kireban’ riy? Dabku da yoloyed nga but’ e pi magawon ko pi bitir ni ma k’aring e kireban’ ko gallabthir nge yugu boch e girdi’. Maku, kada guyed e gallabthir ni kaygi yoor pa’ u puluwrad ko maruwel rorad, nge yugu boch ban’en ni yad ma ngongliy, ara yad ma mit ko fafel arfan ni ke buchuw e tayim rorad ni fan ko bitir rorad. Machane, Jehovah e bathil ya ke micheg ni ra motoyil ma ra pi’ ngodad e tin nib t’uf rodad, ma ri ma lemnag e magawon ni ma yib ngodad.

18. Mangfan ni nge michan’um ni ga ra falfalan’ ko fapi gamanman u lan fare fayleng nib biech?

¹⁸ Faan manga ga ra fal’eg i lemnag e n’en ni nge yog ngom u lan fare fayleng nib biech, ma ngam lemnag boch ban’en ni bay u rom nrogon ni weliy e thin rok Got ni gaar: “ ‘Gamanman ni wolf nge pi fak e saf e bay ur abichgad u taabang, ma pi gamanman ni layon e bay ur kayed kenggin e grain ni bod e garbaw. Pi porchoyog e dabkur maadadgad ngak e girdi’. Zion ni fare burey rog nib thothup e bayi dakuriy e kireb riy ma dariy ban’en riy nra fek e gafgow i yib ngak be’.” (Isaiah 65:25) Piin ni ma yoloy yaan ban’en e kar guyed rogon ni ngar fal’eged yaan e pi n’en ni yibe weliy u lang, machane gathi aram e sasing ni goo yibe finey yaan ni ke fal’eg be ni aram rogon e maruwel rok. Ya riyul’ e re sasing ney. Ra yib e gapas nga fithik’ e girdi’ maku arrogon e pi gamanman. Boor e piin ni biologist nge piin ni rib t’uf e gamanman rorad e kar fanayed e yafas rorad ni ba yoor e duw ni ngar filed murung’agen e pi gamanman nib thil thil ara taab mit. N’en ni ba thil riy, e ngam lemnag ni rayog ni ngam fil e ngiyal’ nem ni fapi gamanman e dabkura rusgad ko girdi’. Ma rayog ni ngam chuchugur ko pi arche’ nge boch e gamanman nib achichig ni ma par u mapan ara magerger​—arrogon, mu guyrad, mag fil ban’en u murung’agrad, ma ga ra falfalan’ ngorad. (Job 12:7-9) Rayog ni ngam rin’ e re n’ey ni dakriy e riya’ nra yib riy ngom, ko girdi’ ara gamanman. Be gaar Jehovah: “Dabra kirebnaged ara ngar gatheyed e burey rog nib thothup ni polo’.” Rib thil e re n’ey ko tin ni gad be guy nge tin ni be buch rodad ko ngiyal’ ney!

19, 20. Mangfan ni girdien Got e bathil ngak boch e girdi’ e chiney?

¹⁹ Kan weliy kafram boch, ni girdi’ e dabiyog ni ngar nanged e tin ni bay nga m’on nrib puluw, ni yugu aram rogon ni ke yoor e girdi’ ni ke magafan’rad ko tin ni ra buch ko fare millennium nib biech. Ma boor e girdi’ ni ke kankan’an’rad, ma ke balyangan’rad, ara gowa ke m’ay e athap rorad ni bochan. Peter Emberley, ni ir reb e director ko Canadian university, e ke yoloy ni gaar: “Boor e [piin ni kar ilalgad] e kar mada’naged boch e deer u murung’agen e yafas ni baga’ fan. Gag mini’? Gu be maruwel nib gel ni fan ko mang? Mang e n’en ni nggu ta’ ni fan ngak e girdi’ ko bin migid e mfen? Nap’an ni kar ilalgad ma ri yad be athamgil ni nge yog ngorad e gapas nge fan e yafas rorad.”

²⁰ Rayog nim nang ko mang fan ni boor e girdi’ ni aram rogorad. Yad ma un nga boch ban’en ni yad ma gay e falfalan’ ko yafas ma boch e ma k’aring e marus. Ya, dawor ra nanged e pow ko tin ni ka bay nga m’on, ere gowa dariy fan e yafas rorad, ma de yaram, ara gathi rib ga’ fan. Mu taarebnag e chiney e re n’ey ko tin ni ga be lemnag u murung’agen e yafas, ma ga pethuy ko n’en ni kad weliyed. Ga manang u lan fapi n’en ni ke micheg Jehovah ni aram e bin nib biech lan e lang nge bin nib biech e fayleng, ma rayog ni ngad sapgad u toobdad iyan ma nge lungudad u gum’ercha’dad, ‘Riyul’, ni ke thiliyeg Got urngin ban’en ke biech!’ Ri gad ra falfalan’ ngay!

21. Mang e n’en ni taabrogon ko pi thin ni bay ko Isaiah 65:25 nge Isaiah 11:9?

²¹ De pag rogon ni kemus ni ngan lemnag yaan e par u fayleng rok Got nib biech. Ke piningdad, me pi’ athamgil nga lanin’dad, ni ngad liyorgad ngak e chiney u fithik’ e tin riyul’ ma ra yog ngodad e yafas ko ngiyal’ u ‘Zion ni fare burey rok nib thothup e bayi par ndakuriy e riya’ riy ma dariy ban’en riy nra fek e gafgow i yib ngak be’.’ (Isaiah 65:25) Machane, kam gu’ kafram boch ni ke yog Isaiah boch e thin me uneg ngay e n’en ni rib ga’ fan ngodad ma aram rogon ni gad ra falfalan’ u lan fare fayleng nib biech? Isaiah 11:9 e be gaar: “Zion nib thothup ni aram fare burey rok Got e ra par ndariy e kireb riy ara ban’en nra maad’ad ngak be’. Ma girdi’ ko nam e ri bayi tamilangan’rad u murung’agen Somol ni bod rogon lan e yungi day nib sug ko day.”

22. Bochan ni kad weliyed fa aningeg i yiiy u Bible ma pi n’ey era gelnagdad ni ngad rin’ed e mang?

²² “Bayi tamilangan’rad u murung’agen Somol.” Nap’an nra thiliyeg Got urngin ban’en nge biech, ma girdi’ nu fayleng e ra yog ngorad e tamilangan’ rok nrib puluw nge tin nib m’agan’ ngay. Gathi goo ngan fil murung’agen e gamanman ya boor ban’en nib l’ag ngay. Thin rok nib thothup e ba muun ngay. Ere, ngam lemnag feni yoor e pi n’en ni kad nanged fan ko ngiyal’ ni kad yaliyed fa aningeg e thin ni be weliy u murung’agen e “bin nib biech e lan e lang nge bin nib biech e fayleng.” (Isaiah 65:17; 66:22; 2 Peter 3:13; Revelation 21:1) Bay tapgin nib fel’ ko mangfan ni ffel’ ni ngam bieg fare Bible u gubin e rran. Bang e re n’ey ko yaram rom, fa? Faanra danga’, mang e rayog ni ngam rin’ ma aram rogon nrayog ni ngam bieg boch ban’en ni be yog Got u gubin e rran? Ma ga ra guy ni gathi ke mus ni ga be sap nga m’on ko ngiyal’ ni ngeb fare fayleng nib biech, ya ku rayog ngom e falfalan’ nib gel e chiney ni taabrogon ko fare psalmist.​—Psalm 1:1, 2.

[Footnote]

Uwrogon ni Ngam Pi’ e Fulweg?

• Mangfan ni rayog ni ngadogned ni Isaiah 66:22-24 e be weliy ban’en nra buch nga m’on?

• Mang e ri ga be sonnag ko fapi thin ni kan yiiynag ni bay ko Isaiah 66:22-24 nge Isaiah 65:20-25?

• Mang boch ban’en ni ke k’aringem ni ngari mudugilan’um ko yafas rom nga m’on?

[Pictures on page 15]

Isaiah, Peter, nge John e karogned boch e thin nib m’ag ko fa “bin biech lan e lang nge bin biech e fayleng”