N’en Ma Fith e Piin Ma Beeg
Riyul’ Ni Tharey E Ran E Fayleng Ni Ga’ngin U Nap’an Noah?
Ke yan 4,000 e duw nap’an fare Ran ni tharey e fayleng. Ere dakuriy be’ nib fas ni guy ere n’em nrayog ni nge weliy murung’agen. Machane, bay ba babyor ni be weliy murung’agen ere riya’ nib gel nem, ni be yog riy ni tharey e ran e bin th’abi tolang e burey ko ngiyal’ nem.
Re babyor nem e be gaar: “Fare ran ni ke tharey e fayleng e aningeg i ragag e rran . . . Me ga’ i yan nge tharey urngin e pi burey nib th’abi tolang, ma aram me ki mun ngay ragag nge lal e cubit [sogonap’an 22 e fit] tolngin u daken p’ebugul fapi burey.”—Genesis 7:17-20.
Boch e girdi’ e yad be lemnag ni sana de riyul’ fare chep u murung’agen fare ran ni tharey e fayleng ara ka yugu ni ga’nag i weliy. Gathi aram rogon! Tin riyul’ riy, e baga’ yang ko fayleng ni kab mathrow ko ran. Sogonap’an 71 e pasent ko fayleng e day. Ere ka boor e ran ni bay u roy u fayleng. Faanra ran ran fa yungi ayis ni gagang’ ni ba’, ma ra ga’ e yilu’ i yan nge tharey boch e mach ni bod yu New York nge Tokyo.
Piin ma fil murung’agen ban’en u fayleng e yad be gay murung’agen bangi ban’en u lel’uch ni ngal u Meriken ma ke mich u wan’rad ni ke gaman e 100 yay ni ke tharey e ran ere gin’em. Bayay e yib e ran nib tomgin ni 2,000 e fit tolngin, ma 65 e mile payngin u reb e awa ma 500 e cubic mile ni yan riy, nib tomal nga l’agruw e trillion e ton. Boch ban’en ni ku aram rogon e ke k’aring boch e scientist ni nge mich u wan’rad nriyul’ ni tharey e ran e fayleng ni ga’ngin.
Machane, piin ni ke michan’rad ni Bible e Thin rok Got e gathi kemus ni yad be susunnag ni ke buch ere n’em. Ya riyul’ u wan’rad. Yog Jesus ngak Got ni gaar: “Thin rom e ba riyul’.” (John 17:17) I yoloy apostal Paul ni Got e baadag ni nge ‘urngin e girdi’ mar thapgad ngak mar nanged e tin nib riyul’.’ (1 Timothy 2:3, 4) Uw rogon ni nge fil Paul ngak pi gachalpen Jesus e tin riyul’ u murung’agen Got nge tin nib m’agan’ ngay nfaanra Thin rok Got e de riyul’?
Ba mich u wan’ Jesus ni tharey e ran e fayleng ni ga’ngin. U lan e yiiy rok ni murung’agen ngal’an ni bay nge tomur ko re m’ag ney, e taareb rogonnag e pi n’ey ko ngiyal’ ni immoy Noah riy. (Matthew 24:37-39) Ki yoloy apostal Peter murung’agen fare ran u nap’an Noah ni gaar: “Ma ku ran ni fare ran ni yib nge tharey e nam e ir e kirebnag e bin kakrom e fayleng.”—2 Peter 3:6.
Faanra gathi riyul’ ni imoy Noah ma ku gathi riyul’ ni tharey e ran e fayleng ni ga’ngin, ma fapi ginang rok Peter nge Jesus ni fan ngak e piin ni yad bay ko tin tomren e rran era yan i aw nib m’ay fan. Pi thin nem era magawonnag laniyan’ be’ nge athap rok ni nge magey nib fas u nap’an nra yib fare gafgow ni kab ga’ ko gafgow ni tay e girdi’ ko ngiyal’ ni tharey e ran e fayleng u nap’an Noah.—2 Peter 3:1-7.
I weliy Got murung’agen e runguy rok ngak e girdi’ ndabi m’ay ni gaar: “Nap’an Noah mu gu micheg ndab kugu tharey e fayleng ko ran. Ma chiney e kug micheg ngom bayay; dab kug puwan’ ara gu gechignigem.” Riyul’ ni ke tharey e ran e fayleng u nap’an Noah, ere ku riyul’ nra dag Got e t’ufeg rok nib yul’yul’ ngak e piin ni be pagan’rad ngak.—Isaiah 54:9.