Lu’ u Lan Tafen e Ran ni Keru’ e Gamanman

RE PAGEL nem e be mith be yanyan. Kaygi gel e kireban’ ni keb ngak, keb e lu’ u owchen, me pining Jehovah ni Got rok nib gol mab tarunguyey, me wenig ngak ni gaar: “Mu chaariy e lu’ rog nga tafen e ran rom ni keru’ e gamanman.” (Psalm 56:8) David fithingan e cha’nem, nra taaboch riy me mang pilung nu Israel. Machane mang fare tafen e ran ni keru’ e gamanman, ma uw rogon ni nge tay Got e lu’ rodad nga lan?

Manang David e tafen e ran ni keru’ e gamanman. Yima tay e ran nge gapgep nge wain fa pada ngay. Girdi’ ni ma yanyan u Sahara, ni bod e Taureg e ka yad ma fanay tafen e ran ni keru’ e gamanman, ni keru’ e kaming ara saf. Boor e ran nrayog ni ngan tay ko pi tafen e ran nem ni be yan u ga’ngin e tafen e ran. Yimanang ni pi tafen e ran nem e rayog ni nge ayuweg e ran nga i par nib garbeb nib n’uw nap’an, ki mada’ ko ngiyal’ ni yira fek ko yal’ nib gel u daken e ted. Kakrom e yima fanay e donkey ara kamel ni ngaur feked e pi tafen e ran nem. Ngiyal’ ney e ku rayog ni ngan guy reb ni kan ta’ nga m’on ko karrow ni yima fanay ko kanawo’ ni daworni pichnag ara karrow ni fan ko kanawo’ ni kan pichnag!

Thin rok David u murung’agen e tafen e ran ni keru’ e gamanman e ku bay fan ngodad. Uw rogon? Bible e be weliy ni Satan e be gagiyegnag e re fayleng ney ma chiney e “kari damumuw”. Bochan e re n’ey ma kari gafgow e fayleng. (Revelation 12:12) Arfan ni boor e girdi’ nib ga’ ni girdi’ ni yad be athamgil ni ngar felfelan’naged Got e be yib e gafgow ngorad ni bod David. Aram rogon a magawon rom, fa? Darur rusgad ki mada’ nra yad be “yor” ma pi cha’ ney nib yul’yul’ e darur talgad ko ngongol u fithik’ e yul’yul’. (Psalm 126:6) Rayog ni nge l’agan’rad ngay ni Chitamangirad u tharmiy e gathi kemus ni be guy e skeng ni be yib ngorad ya kub muun ngay e gafgow ni keb ngorad nbochan e pi skeng nem. Ri manang e kireban’ ni ma yib ngak e pi tapigpig rok, ma ri ma yib ngan’ e meyor nge gafgow ni yad ma tay, ni bod ni be chaariy e pi n’em u lan tafen e ran rok ni keru’ e gamanman.