Jesus—Mang e Ma Yog e Girdi’ u Murung’agen
“Chepin e girdi’ e be micheg ndariy e maruwar riy ni Jesus nu Nazareth e th’abi gilbuguwan.”—H. G. Wells, be’ nu England nri manang chepin e girdi’.
“Kristus e th’abi gilbuguwan u fithik’ urngin e girdi’.”—Philip Schaff, be’ nu Switzerland nri manang murung’agen e teliw nge chep ko girdi’.
MINI’ e rayog ni nga nog ni th’abi gilbuguwan ni immoy u fayleng? Uw rogon min nang feni gilbuguwan be’? Bochan e n’en ni ke rin’ nib fel’ u nap’an e mahl? Ara be’ nib gel gelngin? Fa bochan e llowan’ rok? Fa bochan boor e girdi’ ni kar folgad ko thin rok nge tin ni i rin’ mar thilyeged e ngongol rorad. Ara bochan e ngongol rok nib fel’ ni dag ngorad?
Mu guy ko mang e be yog e piin ni ma yoloy chepin e girdi’, nge scientist, nge girdi’ nib llowan’, nge pi tayol babyor, nge pi tayugang’ ko am, nge kub boch e girdi’ u murung’agen Jesus Kristus nu Nazareth:
“Ra nga nog ni gathi riyul’ ni Jesus nu Nazareth e th’abi gilbuguwan ko urngin e chep ko girdi’ ma ba t’uf ni ngan thilyeg e mich riy.”—Reynolds Price, be’ nu Meriken ni tayol babyor ma ri manang murung’agen e Bible.
“Fare moon nri dariy ban’en ni ke bucheg e ke pi’ e yafas rok ni maligach ni nge fel’ rogon boch e girdi’ riy, nib muun ngay e pi toogor rok me mang maligach ni fan ko girdi’ nu fayleng. Rib fel’ e re n’em ni ke rin’.”—Mohandas K. Gandhi, en ba ga’ ko am nge teliw nu India.
“Kan fil ngog boch ban’en u Bible nge pi babyor ko pi motochiyel rok piyu Jew kakrom u nap’an ni ku gub bitir. Gag be’ ni Jew, machane kug felfelan’ ko thin ni be yog ni Jesus nu Nazareth e ba gilbuguwan.”—Albert Einstein, be’ nu Chiyamen ni scientist.
“U wan’ug, e Jesus Kristus e be’ nth’abi fel’ e ngongol rok ni gubin ngiyal’, ni ir Fak Got nge Fak e Girdi’. Urngin ban’en ni ke yog ara n’en ni ke rin’ e ba ga’ fan ngodad, ma dariy be’ ni ke yim’ ara kab fos ni aram rogon.”—Sholem Asch, be’ nu Poland ni tayol babyor nrogon ni yog fare babyor ni Christian Herald.
“U lan 35 e duw ma dariy ban’en ni ke mich u wan’ug. Lal e duw ni ke yan ma kafini mich Jesus u wan’ug. Ke mich u wan’ug e machib ni tay Jesus ma kari thil e yafas rog.”—Count Leo Tolstoy, be’ nu Russia ni ma yoloy e yat mab llowan’.
“Dariy be’ ni ke thilyeg e yafas rok boor e girdi’ ni bod ni rin’ Jesus ma ka be ulul i yib ke mada’ ko chiney.”—Kenneth Scott Latourette, be’ nu Meriken nri manang murung’agen chepin e girdi’ ma ma yoloy e babyor.
“Gur fare chep u murung’agen e yafas rok Jesus e de riyul’? Fager rog, re n’ey e ba riyul’. Fare chep u murung’agen Socrates e boor e girdi’ ni ke mich u wan’rad. Machane dariy e mich riy nib gel ni bod rogon e chep u murung’agen Jesus Kristus.”—Jean-Jacques Rousseau, be’ nu France nib llowan’.
Ba tamilang, faen nrib fel’ ni ngad folwokgad rok e Jesus Kristus. Paul, nib tolang e skul rok ni Jesus e ke mel’eg ni nge mang Gachalpen ma nge weliy murung’agen ngak e girdi’ ko pi nam. Miki fonownagdad Paul ni ngad “l’eged owchedad” ngak Jesus. (Hebrews 12:2; Acts 9:3) Mang e gad ra fil u murung’agen e ngongol rok Jesus? Uw rogon nra fel’ rogom ko yafas rok?