Bay Fithingan Got fa, Dariy?

Ba ga’ ni ma yog e girdi’ ni:

▪ “Got e ngochol rok.”

▪ “Dariy e ngochol rok.”

Mang e yog Jesus?

▪ “Baara’ rogon ni ngam meybilgad ni nge lungumed: ‘Chitamangimad ni ga bay u tharmiy: Ngan tay fan fithingam nib thothup.’” (Matthew 6:9) Ba mich u wan’ Jesus ni bay fithingan Got.

▪ “Kug weliy murung’agem ngorad kar nanged gur, ma bay kug rin’ i yan ni ara’ rogon, ni bochan e rogon ni gub t’uf rom e ngki yog ngorad, me yog ni gu par u fithik’rad.” (John 17:26) I machibnag Jesus fithingan Got ko girdi’.

▪ “Bay dab kum guyeg nge yan i mada’ ko ngiyal’ ni bay mog ni lungum, ‘I Got [“Jehovah,” NW] e nge ayuweg e en ni ke yib ni owchen.’” (Luke 13:35; Psalm 118:26) I yog Jesus fithingan Got.

KE YOG Got fithingan ngodad. Kan tay e thin rok nga Bible ni gaar: “Kemus ni gag e Somol ni Got rom.”a (Isaiah 42:8) Yugu aram rogon ni Jehovah e fithingan Got ni yima yog ni thin ni Meriken ni kan piliyeg u fithingan Got nu Hebrew nib ga’ ni boor e Bible ni bay riy, ma fare ngochol ni Yahweh e ku yima fanay yu ngiyal’. Dabisiy ni ga ra gin ngay ni bokum e biyu’ yay ni ke m’ug e re ngochol nem ni Hebrew u lan e Bible ni un yoloy kakrom. Ma dariy ba ngochol u lan e Bible ni kan yoloy ni aram urngin yay.

Sana boor e girdi’ ni ga ra fith ngorad ko, “Mini’ fithingan Got?” mi yad gaar ngom, “Got.” Taareb rogon ni ga ra gaar ngak be’, “Mini’ e ke gel ko towal?,” me gaar ngom, “En ni kan towaliy.” Dariy reb e gal fulweg ney ni ba tamilang ya “Got” nge “En ni kan towaliy” e gathi l’agruw i ngochol.

Mang fan ni ke yog Got fithingan ngodad? Bochan e baadag ni ngad nanged ko ir mini’. Baaray rogon ni ngan susunnag. Rayog ni ngan pining e Togta fa Papa’ ara Tutuw ngak be’ ni be yan u rogon e liw rok. Pi liw ney e be yog boch ban’en u murung’agen facha’. Machane, ga ra rung’ag fithingan meb ngan’um gubin ban’en ni ga manang u murung’agen facha’. Ere ku arrogon fapi liw ni Got, Gubin Ma Rayog rok, Chitamangiy, nge En Tasunmiy. Gad ra rung’ag me yib ngan’dad rarogon Got nib thilthil. Machane kemus ni yigoo fithingan ni Jehovah e gad ra rung’ag me yib ngan’dad gubin ban’en ni gad manang u murung’agen. Dabiyog ni ngam nang Got ni faanra dam nang fithingan.

Ri ba ga’ fan ni ngad nanged e re ngochol nem mu u dogned. Mang fan? Ya be yog e Bible ni: “En nra pining fithingan Somol [“Jehovah,” NW] ni nge ayuweg e ra fos ni ke thap ngak Got.”​—Roma 10:13; Joel 2:32.

[Footnote]

[Blurb on page 6]

Rayog ni ngan pining e Togta fa Papa’ ara Tutuw ngak be’ ni be yan u rogon e liw rok. Machane, ga ra rung’ag fithingan meb ngan’um gubin ban’en ni ga manang u murung’agen facha’