Thin rok Jehovah e Ba Fas

Tin Ba Ga’ Fan ko fare Babyor ni Revelation​—II

MANG e bay nga m’on ko piin ni ma liyor ngak Jehovah Got nge piin ni dar ma liyor ngak? Mang e bayi buch rok Satan nge pi moonyan’ rok? Mang e pi tow’ath nra yib ngak e piin nib yul’yul’ u nap’an fare Biyu’ e Duw ko gagiyeg rok Kristus? Fulweg ko pi deer ney nib ga’ fan e bay u Revelation 13:1–22:21.a Pi guruy ney e bay riy fa 9 ni tomur e n’en ni guy John u tungun fa bin som’on e chibog.

Be gaar John: “Nge felan’ e en nra beeg e re ke babyor ney, ma nge felan’ e piin ni yad ra motoyil ko pi thin ney ni yib rok Got ni be weliy e tin ni bayi m’ug mi yad fol ko pi n’en ni kan yoloy nga lan e re ke babyor ney.” (Rev. 1:3; 22:7) Pi n’en ni gad ra beeg ko Revelation ma gad fol riy e rayog ni nge ayuweg gum’irchadad me gelnag e michan’ rodad ngak Got nge Jesus, me tamilangnag e pi n’en ni gad be athapeg boch nga m’on.b​—Heb. 4:12.

KAN PUOG FA MEDLIP I PLET KO DAMUMUW ROK GOT

(Rev. 13:1–16:21)

Be gaar Revelation 11:18: ‘Pi nam e kari gel e damumuw rorad, ya ke taw nga nap’an ni nge taw e damumuw rom . . . Ke taw nga nap’an ni ngan kirebnag e piin ni kar kirebniged e fayleng.’ Ra ngan tamilangnag ko mang fan nra yib e damumuw rok Got, ma bin meruk e n’en ni guy John e be dag e n’en ni ma rin’ ba “gamanman ni ke yib u fithik’ e day nga lang, ni ragag e gagey rok ma medlip lolugen.”​—Rev. 13:1.

Bin mereb e n’en ni guy John, e “fare Fak e Saf nib sak’iy nga daken e burey ni Zion; ni yad raay nge aningeg i ragag nge aningeg i biyu’ e girdi’,” ni “kan biyuliyrad u fithik’ e tin ni ka ba’ e girdi’ nu fayleng.” (Rev. 14:1, 4) Baaray e thin ni yog e engel. Bin migid, me guy John “medlip i engel ni ba’ medlip i gafgow rorad.” Jehovah e ke pi’ mat’awun e pi engel ney ni ngar “puoged fa medlip raba’ i plet ni ba’ e damumuw rok Got riy” nga daken boch ban’en ni ma ngongliy e girdi’ rok Satan u fayleng. Fapi plet e bay e thin riy ni be weliy ma be ginang e girdi’ ko pufthin nra tay Got. (Rev. 15:1; 16:1) Gali ney ni guy e be tamilangnag boch rogon e pufthin ko Gil’ilungun ma ku ba peth ko fa bin dalip e gafgow nge fa bin medlip e rappa ni thoy.​—Rev. 11:14, 15.

Fulweg u Boch e Deer ko Bible:

13:8​—Mang ‘fare babyoren e yafas ko fare Fak e Saf’? Re babyor ney e be yip’ fan e piin ni bay fithingrad ni yad ra un ngak Jesus ko gagiyeg u Gil’ilungun u tharmiy. Ba muun fithingan e piin ni Kristiano ni kan dugliyrad ni ka yad bay u fayleng ma yad be athapeg e yafas u tharmiy.

13:11-13​—Uw rogon fare gamanman ni l’agruw e gagey rok ni be non ni bod ba dragon ma be ngongliy e nifiy ngeb u tharmiy nga but’? Fare gamanman ni l’agruw e gagey rok ni aram e Am nu England nge Meriken ni yow e th’abi gel u fayleng, e yow be non ni bod ba dragon, ya aram e yow be towasariyey ma ra dab ni fol ma yow ra fanay gelngirow ni ngar cham ngay. Yow be ngongliy e nifiy ngeb u tharmiy nga but’ ni bod e profet, e be yip’ fan ni kar lemnagew ni kar gel ko pi toogor rorow u nap’an e bin taareb nge bin l’agruw e mahl u fayleng ma aram e yow be yog ni kar gel ko kireb.

16:17​—Mang fan fare “nifeng” ni kan puog fa bin medlip e plet nga fithik’? Fare “nifeng” e be yip’ fan e kireb ni ma rin’ Satan, ni “fare kan ni ir e chiney e be gagiyegnag e piin ndarir folgad rok Got.” Kari gel e kireb ko re fayleng rok Satan ney.​—Efe. 2:2.

Tin Gad Ra Fil Riy:

13:1-4, 18. Fare “gamanman” e be yip’ fan e am ko girdi’ ni ke “yib u fithik’ e day nga lang,” ni aram e fithik’ e girdi’ u fayleng ni de gapas. (Isa. 17:12, 13; Dan. 7:2-8, 17) Satan e ke sunmiy ma be pi’ gelngin e re gamanman ney, ni bay fare matheeg ni 666, ni be micheg nrib kireb e maruwel rok. Faan gad ra nang ko mang e be yip’ fan fare gamanman ma rayog ni nge ayuwegdad nge dab da folgad ma dabda liyorgad ngak ni bod ni ma rin’ e girdi’ nu fayleng.​—John 12:31; 15:19.

13:16, 17. Yugu aram ni bay a magawon ni gad be mada’nag ko maruwel rodad ni gubin e rran, ni bod ni gad be ‘chuw’iy ban’en fa pi’ ban’en nchuway’, thingar dab da paged fare gamanman ni nge magawonnag fa gagiyegnag e yafas rodad. Dabda paged ni nge pow’iy e lem rodad fa n’en ni ngad rin’ed ni bod ni nge tay e ‘pow’ nga daken e rifrif u pa’dad fa daken peri’dad.

14:6, 7. Ere be yog fare engel ni thingar da gurgad ngad weliyed fare thin nib fel’ ni ke tabab Gil’ilungun Got. Ngad ayuweged e girdi’ ni gad be fil e Bible ngorad ngeb madgun Got u wan’rad mar pininged e sorok ngak Jehovah.

14:14-20. Nap’an ni yira “t’ar wom’engin e woldug nu fayleng” ni aram e ke m’ay i kunuy e girdi’ ni rayog e yafas ngorad ma fare engel e ra yon’ nga lan “fare n’en ni ma uduy e grapes, ni aram e damumuw rok Got nib gel” ni aram ngan kunuy e “grapes nu fayleng.” Yira thang e piin be yip’ fan e grapes ni aram e am rok Satan ni be gagiyegnag e girdi’ ma be yib wom’engirad nib kireb. Ere thingar dugliyed ni nge dabi kirebnagdad e am rok Satan nge pi n’en nib kireb ni be rin’ girdi’ rok.

16:13-16, NW. “Fapi thin ni de beech ni ka nog” e be yip’ fan e thin ko moonyan’ ni be yog ngak e pi pilung nu fayleng ni dabi buch ban’en rorad u nap’an ni yira puog fa medlip i plet ko damumuw rok Got ma be pow’iyrad ni ngar togopuluwgad ngak Jehovah.​—Matt. 24:42, 44.

16:21. Be chugur nga tomren e re fayleng ney, ma be elmerin e pufthin ni be tay Jehovah ngak e girdi’ rok Satan, ni bod e ayis ni be mul ni bod e n’uw. Machane, ku boor e girdi’ ni be ulul i darifannag e thin rok Got.

BE GAGIYEG FARE PILUNG

(Rev. 17:1–22:21)

Fare Babylon nib Gilbuguwan ni aram e pi yurba’ i teliw ni googsur, e bang ko re fayleng rok Satan ney nib kireb. Fa bin 11 e n’en ni m’ug e be dag yaan be’ ni ppin ni “be chuway’ ngak” ni ke “par nga daken ba gamanman nib row.” Ma “fa ragag i gagey” ko fare gamanman e bayi thang fare pin. (Rev. 17:1, 3, 5, 16) Kan taarebrogonnag fare pin ni ma chuway’ ngak ko “fare binaw” nib ga’, ni aram e be m’ug ni bay ni kirebnag ere thingari ‘chuw’ e girdi’ rok Got u rom. Bay ni felfelan’ u tharmiy ni bochan e bayi “mabgol fare Fak e Saf.” (Rev. 18:4, 9, 10, 15-19; 19:7) U lan e bin 13 e n’en ni m’ug, e be yan be’ u daken “ba os nib wech wech” ni nge mahl ngak e pi nam. Ma bayi thang e girdi’ rok Satan.​—Rev. 19:11-16.

Ere uw rogon “fare porchoyog ni ke kakrom, ni aram fare Moonyan’, ara Satan”? Wuin e yira yon’ nga lan “fare lipath i nifiy”? Ireray e n’en ni bay u lan fa bin 14 e n’en ni m’ug. (Rev. 20:2, 10) Ma gal ni tomur e n’en ni m’ug e bay rogon ko yafas u lan fare Biyu’ e duw. Ke chugur nga tungun e thin ko “revelation”, ma aram me guy John ‘fare lul’ ko ran ko yafas ni be yan u lulukngun e kanawo’’ ma aram e yibe pining e piin “ke yib e belel” ngorad.​—Rev. 1:1; 22:1, 2, 17.

Fulweg u Boch e Deer ko Bible:

17:16; 18:9, 10​—Mang fan ni ke kireban’ e “pi pilung nu fayleng” u tomren ni kar thanged e pi teliw ni googsur? Bochan ni yad be lemnag e ayuw ni i pi’ fare Babylon nib gilbuguwan, ma aram fan ni ke kireban’ e pi pilung nu fayleng Pi yurba’ i teliw ni googsur e yad ma ayuweg e am ni ngar ayuweged e piin fel’ yangaren ni ngar uned ko mahl. Maku reb riy, e yad ma guy rogon ni nge par e girdi’ ni yad fol rorad.

19:12​—Uw rogon ni ke mus ni goo Jesus e manang fare ngachal ni da nang fan? Re ngachal ney e fan ko liw nge maruwel, ni bod e thin ni bay u Isaiah 9:6, ni yira pi’ ngak Jesus u nap’an fare rran rok Somol. Dariy be’ ni manang fan fare ngachal ya kemus ni Jesus e manang, ya re maruwel rok ney e ba thil ma rib ga’ fan e liw rok. Ma ki pi’ boch e maruwel rok ngak e piin nra un ngak ko maruwel ni aram e ‘ke yoloy fithingan nib beech nga dakenrad.’​—Rev. 3:12.

19:14​—Mini’ e ra un ngak Jesus Kristus ko mahl u nap’an Armageddon? Ra un e pi engel nge piin kan dugliyrad u fayleng ni yad bay u tharmiy ngak Jesus ko fare mahl rok Got, ni aram e yad e pi ‘salthaw nu tharmiy.’​—Matt. 25:31, 32; Rev. 2:26, 27.

20:11-15​—Mini’ e piin kan yoloy fithingrad nga lan “babyoren e piin kar fosgad”? U lan e re ke babyor ney e bay fithingan e piin ni rayog e yafas ni manemus ngorad. Ni aram e piin ni kristiano ni kan dugliyrad nge girdien fare ulung nib ga’ u fayleng, nge piin nib yul’yul’ ni kar m’ad ma ur pigpiggad ngak Got e yad ra un ko ‘fas ko yam’ ko piin ba mat’aw’.’ (Acts 24:15; Rev. 2:10; 7:9) Ma piin ni rayog e yafas ngorad u nap’an ni ‘yira faseg e piin ni de mat’aw’ e yira yoloy fithingrad nga lan ‘babyoren e piin kar fasgad’ ni faanra yad ra fol ko fapi thin ni “kan yoloy nga lan fa yu ke babyor” ni yira ni pithig u nap’an fare Biyu’ e duw. Machane, gathi ngan yoloy fithingrad nga but’. Ma fithingan e piin ni kan dugliyrad e ra par ni manemus ni faanra yad ra yul’yul’ nge mada’ ko yam’. (Rev. 3:5) Ma rayog ni nge par fithingan e piin rayog e yafas u fayleng ngorad ni faanra yad ra par nib yul’yul’ ko fa bin tomur e skeng u tungun fare biyu’ e duw.​—Rev. 20:7, 8.

Tin Gad Ra Fil Riy:

17:3, 5, 7, 16. “Fare gonop ni yib u tharmiy” e be ayuwegdad ni nge tamilang u wan’dad ko mang fare “n’en nib mith ni ir e be yip’ fan e re pin nem nge re gamanman nem ni ke af e re pin nem nga daken.” (Jas. 3:17) Fare gamanman e be yip’ fan e League of Nations nge United Nations. Ma fare n’en nib mith e be k’aringdad ni ngad pasiggad i machinag fare thin nib fel’ ni murung’agen Gil’ilungun Got nge rorran ni pufthin rok Jehovah.

21:1-6. Rayog ni nge mich u wan’dad ni fapi tow’ath nra pi’ Gil’ilungun Got e ra yib i m’ug ni riyul’. Mang fan? Ya bochan e ka nog ni “Ke m’ay!”

22:1, 17. Fare “lul’ ni bay e ran ko yafos riy” e be yip’ fan e pi n’en ni ma pi’ Jehovah ngak e girdi’ nib yul’yul’ ni nge chuwegrad u tan gelngin e denen nge yam’. Pi n’en ni be yip’ fan e ran e bay e chiney. Ere gathi kemus ni nge yog e tow’ath ni ‘ran ko yafas ni dariy puluwon’ ngodad machane thingar da weliyed ngak boch e girdi’!

[Footnotes]

[Picture on page 9]

Rib gel e fel’felan’ nra yib ngak e piin nib yul’yul’ u nap’an nra gagiyeg Gil’ilungun!