Mu Chuchugur Ngak Got

“Rib Tamilangan’ug u Gelngin e Gafgow ni Yad Be Tay”

Exodus 3:1-10

“BA THOTHUP, ba thothup, ba thothup! I Somol ni Gubin ma Rayog Rok.” (Isaiah 6:3) Pi thin nem ni kan thagthagnag e be yip’ fan ni Jehovah Got e th’abi machalbog ni dariy be’ ni taarebrogon ngak. Rayog ni ngam fith ni nge lungum, ‘Bochan nib thothup ma ke m’ay fan e girdi’ u wan’ ma ke mo’maw’ ni ngan chugur ngak? Rayog ni nge lemnageg ba Got ni aram feni thothup ni gub tadenen?’ Ngad guyed fapi thin ni yog Got ngak Moses ni bay ko Exodus 3:1-10.

Rebo rran ni be gafaliy Moses e saf me guy ban’en ni dawori guy biid, bochi ke gek’iy ni be daramram machane “der gak.” (Verse 2) Bochan ni baadag ni nge nang fan e re n’em me chugur i yan ngay ni nge guy. Me non Jehovah ngak Moses u daken ba engel ni gaar, “Dab kum chugur i yib. Mu chuweg e sus u em, ya gab sak’iy u daken e but’ nib thothup.” (Verse 5) Aygum lemnag, bochan fachi ke gek’iy ni be daramram e be dag ni bay Got u rom, ma aram fan ni ke thothup e re gi but’ nem!

Bay fan ni non Got ngak Moses. I gaar: “Kug guy nga rogon ni yibe gafgownag e girdi’ rog u Egypt; kug rung’ag lamrad ni yad be wenig ni nga ni ayuwegrad, rok e piin ni yad be gafgownagrad, yad be maruwel ni kar manged sib. Rib tamilangan’ug u gelngin e gafgow ni yad be tay.” (Verse 7) Manang Got gelngin e gafgow nge kireban’ ni be tay e girdi’ rok; ma be rung’ag lamrad ni yad be wenig ni ngan ayuwegrad. Ke thamiy Got e gafgow ni yad be tay me gaar: “Rib tamilangan’ug u gelngin e gafgow ni yad be tay.” Re thin nem ni gaar, “Rib tamilangan’ug” e bay ba ken e babyog ni be yog riy ni: “Re thin nem e be yip’ fan ni ma kireban’, ma ma runguyey, mab gol.” Thin rok Jehovah ngak Moses e be dag nri ma lemnag Got rarogodad.

Mang e rin’ Got? Gathi kemus ni ke kireban’ ngorad ni yad be gafgow ya ke ayuwegrad. I dugliy ni nge chuweg e girdi’ rok u Egypt me fekrad “nga reb e nam nib yong’ol e but’ riy.” (Verse 8) Rogon ni lebug e re n’ey, e yog Jehovah ngak Moses ni gaar, “Ngam fek piyu Israel ni girdi’ rog nga wuru’ e nam nu Egypt.” (Verse 10) Me fol Moses ko re thin nem, me fek yu Israel ngar chuwgad u Egypt ni chiney e ke gonap’an 3,520 e duw ni ke yan.

Dawori thil Jehovah. Tapigpig rok e chiney e rayog ni nge mich u wan’rad ni be guy e gafgow ni yad be tay ma be rung’ag ni yad be wenig ni nge ayuwegrad. Ri manang e gafgow ni yad be tay. Gathi ke mus ni be kireban’ ko tapigpig rok nib yul’yul’ “ya be lemnag” rarogorad.​—1 Peter 5:7.

Runguy rok Got e ke pi’ e athap ngodad. Bochan e ayuw rok, ma rayog ni ngad guyed rogon ni ngad rin’ed e tin nib mat’aw ni baadag Got ma gad fel’ u wan’. (1 Peter 1:15, 16) Bay be’ ni ppin ni Kristiano ni i athamgil u fithik’ e mochuch nge kireban’ e fel’ laniyan’ ko n’en ni buch rok Moses ni faani guy fachi ke gek’iy ni be daramram. I gaar: “Faanra rayog rok Jehovah ni nge thothupnag e but’ me ere sana bay buchuuw e athap rog. Re n’ey e ke ayuwegeg nib gel.”

Ga baadag ni nga kum fil boch muurng’agen fare Got nib thothup, ni Jehovah? Rayog ni nge fel’ e tha’ u thildad Jehovah ya “manang e n’en nni ngongliydad ngay; ma manang ni gadad e fiyath.”​—Psalm 103:14.