Ngan Nang Kanawoen Jehovah

“Ngam weliy ngog e tin kam lemnag ni ngam rin’, nge yog ni gu nang lanin’um.”​—EXODUS 33:13.

1, 2. (a) Mang fan ni rin’ Moses ni aram rogon u nap’an ni guy be’ u Egypt ni be gafgownag reb e Hebrew? (b) Mang e ba t’uf ni nge fil Moses, ni faanra nge mang tapigpig ku Jehovah?

MOSES e nni chuguliy u tabinaw rok Farao ngan fil ngak e llowan’ nu Egypt ni ma ta’ fan e piin ma gagiyeg. Machane, munmun me nang Moses ni gathi ir be’ nu Egypt. Ya l’agruw ni’ nu Hebrew e gallabthir rok. Nap’an ni ke gaman 40 e duw yangaren, me yan ni nge nang salpen girdien ni piyu Israel. Me guy bagayad nib kireb e ngongol ni be rin’ be’ u Egypt ngak ma daki k’adan’ me li’ faanem nu Egypt ngem’. Ke mel’eg Moses ni nge fol ngak e girdi’ rok Jehovah ya lem rok e Got e nge maruwel ngak nge chuweg pi walagen u tan pa’ yu Egypt. (Acts 7:21-25; Hebrews 11:24, 25) Nap’an ni kan nang ko mang e ke buch, ma fare tabinaw ko pilung nu Egypt e ke sap ngak Moses ni ke togopuluw ko am, e re thingari mil nge ayuweg e yafas rok. (Exodus 2:11-15) Faanra Moses e nge maruwel Got ngak, ma thingari nang kanawoen Jehovah. Gur, ba mom ni ngan skulnag Moses?​—Psalm 25:9.

² Bin migid e 40 e duw, e yan i par Moses nga bang nga i chuguliy e saf. Daki lemnag Moses e tin ke buch ni pi girdien nu Hebrew e dar felfelan’gad ko tin ke rin’, e re ke ta’ Moses ir nga tan pa’ Got. Yugu aram rogon ni ke yoor e duw ni ke yan ma dariy be’ ni ke lemnag, me pag Moses ir ngak Jehovah ni nga i yal’uweg. Gathi ir e nga i dugliy ko mang e nga i rin’, ya gelngin e kan ni thothup rok Got, aram me yoloy ni gaar: “Mi Moses e be’ nrib sobut’an’, ni ir e th’abi sobut’an’ u fithik’ e girdi’ nu fayleng.” (Numbers 12:3) I maruwel Jehovah ngak Moses ko bin th’abi fel’ e kanawo’. Faanra ku gad ra gay e sobut’an’, ma ra taw’athnagdad Jehovah.​—Zefaniah 2:3.

Kan Pi’ Reb e Maruwel Ngak

3, 4. (a) Mang maruwel e pi’ Jehovah ngak Moses? (b) Mang ayuw ni kan pi’ ngak Moses?

³ Reb e rran me l’og Jehovah reb e engel ni nge non ngak Moses u tooben e Burey nu Horeb u taban e M’uth nu Sinai. Me gaar ngak Moses: “Kug guy nga rogon ni yibe gafgownag e girdi’ rog u Egypt; kug rung’ag lamrad ni yad be wenig ni nga ni ayuwegrad rok e piin ni yad be gafgownagrad, yad be maruwel ni kar manged sib. Rib tamilangan’ug u gelngin e gafgow ni yad be tay. Ku gub ni nggu chuwegrad u tan pa’ piyu Egypt, mu gu fekrad nga wuru’ e nam nu Egypt nga reb e nam nib yong’ol e but’ riy ma ba ga’.” (Exodus 3:2, 7, 8) Ma aray rogon, ma ba’ e maruwel rok Got ni nge rin’ Moses, machane nge rin’ nrogon laniyan’ Jehovah.

⁴ Miki ulul fare engel rok Jehovah ngay ni gaar: “Ere chiney e nggol’igem ngam man ngak Farao ngam fek piyu Israel ni girdi’ rog nga wuru’ e nam nu Egypt.” De m’ag u wan’ Moses. De lemnag ni rayog rok ni ngan rin’ ni aram rogon. Yugu aram rogon, me micheg Jehovah ngak Moses ni gaar: “Bay gu un ngom.” (Exodus 3:10-12) Ke pi’ Jehovah mat’awun Moses ni nge fal’eg e maang’ang ni be micheg ni be maruwel ni riyul’ ni ke l’og Got. Ke un Aaron, ni walagen Moses ngak, ni ir e nge non. Bayi skulnagrow Jehovah ko mang e nga rognew nge tin ngar rin’ew. (Exodus 4:1-17) Gur, i yul’yul’ Moses ko maruwel rok ni nge mu’nag?

5. Mang fan ni ngongol rok piyu Israel e ke magawonnag Moses?

⁵ Fapi pumoon nu Israel e som’mon me mich Moses nge Aaron u wan’rad. (Exodus 4:29-31) Yugu aram rogon, ma “girdi’ ni ma yog e thin u Israel” e kar dabuyed daken Moses nge Aaron ni bochan e ke “dabuyrad” Farao nge girdi’ rok. (Exodus 5:19-21; 6:9) Nap’an ni kar chuwgad u Egypt, ma kar rusgad ya kar guyed e karrow ni ma girngiy e os rok piyu Egypt ni be l’ol’ograd. Bay e Red Sea nga m’on rorad ma ba’ e karrow ko mahl u keru’rad, dakuriy bang ni nga ranod ngay, kar ted nib kireb Moses. Susun mang e ngam rin’? Dariy e bowoch rok piyu Israel, me pow’iy Jehovah Moses me yog ni ngar fal’eged rogorad. Me chuweg e day ko fare Red Sea, me milik me yan piyu Israel nga barba’.​—Exodus 14:1-22.

Reb e Magawon ni Kab Ga’ ko Puf Rogon

6. Mang e tamilangnag Jehovah ngak Moses u nap’an ni l’og?

⁶ Nap’an ni ke l’og Jehovah Moses, ma ke tamilangnag feni ga’ fan fare ngochol rok. Ngan ta’ fan ere ngochol nem nge ani ir e fithingan e baga’ fan. Nap’an ni yira fith fithingan me yog Jehovah ngak Moses ni gaar: “Gu ra micheg e tin gu ra micheg.” Ngemu’, me yog Moses ngak piyu Israel ni gaar: “Jehovah ni fare Got rok pi chitamangimed, ni aram Abraham nge Isak nge Jakob e ke l’ogeg.” Mi ki gaar Jehovah: “Ereray fithingag ni bayi par ndariy n’umngin nap’an.” (Exodus 3:13-15) Jehovah e ka aram fithingan fare Got ni manang e pi tapigpig rok u ga’ngin yang e fayleng.​—Isaiah 12:4, 5; 43:10-12.

7. Mang e ke yog Got ngak Moses ni nge rin’ ni yugu aram feni gel e thin rok Farao?

⁷ Moses nge Aaron e ranow nga p’eowchen Farao ni nga rognew e thin rok Jehovah. Machane, me fulweg Farao nib gel e thin rok ni gaar: “I mini’ Jehovah, mang fan ni nggu fol rok nggu pag yu Israel nga ranod? Ri da gunang Jehovah, ri dab gu pag piyu Israel nga ranod.” (Exodus 5:1, 2, NW) Farao e ke micheg nib gelan’ ma ku ba sasalap, machane Jehovah e yigi i l’og Moses ni nge yog e thin rok ngak biyay nge biyay. (Exodus 7:14-16, 20-23; 8:1, 2, 20) Ke guy Moses ni ke damumuw Farao. Gur, ra yib angin ni faanra kiyi ra yan ni guy biyay? Piyu Israel e ri yad baadag ni ngan pagrad. Farao e kari gelnag e thin rok ni dabi pagrad. Faanra gur Moses, ma mang e ga ra rin’?

8. Mang angin ni ke yib u rogon e n’en ni ke rin’ Jehovah ni n’en ni ke buch nib muun Farao ngay, ma susun mang e ra rin’ e pi n’en nem ngodad?

⁸ Ke yan Moses biyay ngak Farao, me gaar: “Baaray e n’en ni ke yog Jehovah ni fare Got rok e Hebrew ke gaar: ‘Mpag e girdi’ rog nga ranod nge yog ni ra pigpiggad ngog.’” Mi ki gaar Got: “Faan mang e gu pug paag nga lang nggu pi’ e liliy ngom nge girdi’ ko nam rom, ma kam m’ad. Machane kug tiyem ndab mum’, ya nggu dag ngom gelngig, nge wer fithingag nga urngin yang u fayleng.” (Exodus 9:13-16) Bochan ni ba gelan’ Farao ko tin ke rin’, ma ra dag Jehovah gelngin nib gel u reb e kanawo’ ni ra ginang e girdi’ ni yad be dariy fannag. Biney e ba muun ngay Satan ni fare Moonyan’, ni faanem ni ma pining Jesus Kristus e “en ni be gagiyegnag e fayleng ngak.” (John 14:30; Roma 9:17-24) Ere fithingan Jehovah e ke garer u ga’ngin yang u fayleng. Gum’an’ rok Jehovah e ke ayuweg piyu Israel ma ke un boor e girdi’ ko liyor ngak. (Exodus 9:20, 21; 12:37, 38) Aram nap’an, ma fithingan Jehovah ni kan wereg e ke yib angin ngak bokum milyon e girdi’ u fayleng ka ra uned ko bin riyul’ e liyor.

Rogon e Ngongol Ngak e Piin Ba Mo’maw’ Laniyan’rad

9. Uw rogon ni dag e girdi’ rok Moses ni darir ted fan Jehovah?

⁹ Ke nang piyu Hebrew fithingan Got. Ma fanay Moses fare ngochol ko ngiyal’ ni ma non ngorad, machane da ra ted fan e Cha’ ni fithingan eram. Dawori n’uw nap’an ni kar chuwgad u Egypt ni ke fal’eg Jehovah e maang’ang, ma mang e ke buch u nap’an ndar pirieged e ran ni yima unum nib papey? Kar gun’gun’gad nib togopuluw ngak Moses. Ngemu’ ma ra gun’gun’gad ni fan ko ggan. Me ginangrad Moses ni re gun’gun’ nem ni yad be tay e gathi kemus ni ba togopuluw ngorow Aaron ya ba togopuluw ngak Jehovah. (Exodus 15:22-24; 16:2-12) U daken e Burey nu Sinai, me pi’ Jehovah fare Motochiyel ngak piyu Israel, nib muun ngay boch e maang’ang. Yugu aram rogon, ma fapi girdi’ e dar folgad riy ma kar ngongliyed ko gol yaan ba fak e garbaw yad be liyor ngay ni yad be yog ni “ba madenom ni fan ngak Jehovah.”​—Exodus 32:1-9.

10. Mang fan ni n’en ni yog Moses ni bay ko Exodus 33:13 e baga’ fan ngak e piin ni piilal ni Kristiano e ngiyal’ ney?

¹⁰ Uw rogon e ngongol rok Moses ko girdi’ ni Jehovah e ke weliy ni yad ba gelan’? I wenig Moses ngak Jehovah ni gaar: “Faanra gub fel’ u wan’um, me e re gu be wenig ngom ni ngam weliy ngog e tin kam lemnag ni ngam rin’, nge yog ni gu nang lanin’um, mu gu rin’ e tin nib m’agan’um ngay.” (Exodus. 33:13) Pi Mich Rok Jehovah e ngiyal’ ney nib sobut’an’rad e be ayuwegrad e piin piilal ni Kristiano ni bod e en tachugol saf. Machane, yad ma meybil ni bod fare psalmist ni gaar: “Got, mfil ngog e tirom e kanawo’; mu dag ngog nggu nang.” (Psalm 25:4) Tamilangan’ ko pi kanawo’ rok Jehovah e ra ayuweg e piin piilal u rogon e n’en ni ngaur rin’ed ko pi n’en ni be buch nib puluw ko Thin nge rarogon Got.

Mang e Baadag Jehovah ni Nge Rin’ e Girdi’ Rok

11. Mang fonow e ke tay Jehovah ni nge ayuweg Moses, ma mang fan ni baga’ fan ngodad?

¹¹ N’en ni baadag Jehovah ni nge rin’ e girdi’ rok e nge yog ban’en ngorad u daken e burey nu Sinai. Kan pi’ ngak Moses l’agruw yang i malang ni kan yoloy fa Ragag i Motochiyel ngay. Nap’an ni ke sul ko fare burey nga but’, me guy piyu Israel ni yad be liyor ko fare yaan fak e garbaw ni kan fal’eg mi ri damumuw me yin’ fa gali yang i malang nga but’ nge pil. Miki yoloy Jehovah biyay fa Ragag i Motochiyel nga daken e malang ni ke th’ab Moses. (Exodus 32:19; 34:1) Pi motochiyel ney e dan thiliyeg ni ka nap’an ni kan pi’ ko som’mon. Ma nga i fol Moses riy. I tamilangnag Got ngak Moses rogon e cha’ ni Ir, me dag ngak Moses rogon ni nga i ngongol ni ir mit e thin rok Jehovah. Pi Kristiano e da ku ra moyed u tan fare Motochiyel rok Moses, machane n’en ni ke yog Jehovah ngak Moses e ba muun ngay boor kenggin e motochiyel ni da ni thiliyeg ma ka be ulul i yan ni ka be rin’ urngin e Kristiano ni ma liyor ku Jehovah. (Roma 6:14; 13:8-10) Ngad weliyed boch e pi n’ey.

12. Susun mang e ra buch rok piyu Israel nbochan e ning chilen rok Jehovah ko pigpig ni polo’ ngak?

¹² Ngan pigpig ku Jehovah ni goo ir. Fare nam nu Israel e ur moyed fa ngiyal’ nem ni yog Jehovah ni baadag ni ngan pigpig ngak ni goo ir. (Exodus 20:2-5) Piyu Israel e kar guyed boor e mich riy ni Jehovah e ir e bin riyul’ e Got. (Deuteronomy 4:33-35) Ke tamilangnag Jehovah ni yugu demtrug rogon e pi n’en ni be rin’ e pi nam, ma dabi pag e girdi’ rok ngar uned ko meybil ko liyos ara ngongol ko pig. Pigpig rorad ngak Jehovah e gathi bod boch e yalen ni ma rin’ e girdi’ ko pi nam. Yad gubin ni ngari t’uf Jehovah rorad u polo’ i gum’ircharad ngu polo’ i lanin’rad ngu polo’ i gelngirad. (Deuteronomy 6:5, 6) Re n’ey e ba muun ngay e thin rorad, nge ngongol rorad, nge urngin yang ko yafas rorad. (Levitikus 20:27; 24:15, 16; 26:1) Ku arrogon Jesus Kristus ni i tamilangnag ni baadag Jehovah ni ngan liyor ngak ni goo ir.​—Mark 12:28-30; Luke 4:8.

13. Mang fan ni piyu Israel e bay rogon ni thingar ra folgad rok Got, ma mang e ra k’aringdad ni ngad folgad rok? (Eklesiastes 12:13)

¹³ Ngari mudugil ni nga un fol ko pi motochiyel rok Jehovah. Piyu Israel e ba t’uf ni ngkun puguran ngorad ni nap’an ni ra uned ko fare m’ag u thilrad Jehovah, mar micheged nib mudugil ni nguur folgad riy. Ke gel e puf rogon rorad ni be’ nge be’, machane ba t’uf ni thingara folgad ko pi motochiyel ni ke pi’ Jehovah ngorad. Yad ra rin’ ni aram rogon ma yad be micheg e t’ufeg rorad ngak Got ma ra yib angin ngorad nge pi fakrad ya bochan ni urngin ban’en ni ke yog Jehovah ngorad e ra fel’ rogorad riy.​—Exodus 19:5-8; Deuteronomy 5:27-33; 11:22, 23.

14. Uw rogon ni tamilangnag Got ngak piyu Israel ni baga’ fan ni ngan mon’eg e tirok?

¹⁴ Ngan mon’eg e tirok Got ban’en. Fare nam nu Israel e dabra paged ni ngar tiyan’rad ko tirorad nge ga’ fan me dakuriy e tayim nge gelngirad ni ngar rin’ed e tirok Got ban’en. Yafas rok piyu Israel e dar fanayed ni fan ko tin nu fayleng ban’en. Ra reb e wik ma bay e tayim ni ke dugliy Jehovah nib thothup, kemus ni ngan fanay ni fan ko n’en ni bay rogon ko liyor ko bin riyul’ e Got. (Exodus 35:1-3; Numbers 15:32-36) Ra reb e duw, ma bay e tayim ni kan dugliy nib thothup ni fan ko pi madenom ni baga’. (Levetikus 23:4-44) Ereray e ngiyal’ ni yima weliy murung’agen gelngin Jehovah nge tin ni ke rin’ nib fel’ ni ma puguran ni nga un pining e magar ngak. Nap’an ni yad ra pigpig ngak Jehovah, ma ra ga’ e t’ufeg nge madgun ma ra ayuwegrad ngaur leked kanawoen. (Deuteronomy 10:12, 13) Kenggin e motochiyel nib fel’ ko pi fonow nem e ke yib angin ngak e pi tapigpig rok Jehovah e ngiyal’ ney.​—Hebrews 10:24, 25.

Ba T’uf ni Ngada Nanged Pi Felngin Jehovah

15. (a) Mang fan ni ke yib angin ngak Moses e pi felngin Jehovah ni ke nang fan? (b) Mang deer e re ayuwegdad ni nga u da fal’eged i lemnag pi felngin Jehovah ni reb nge reb?

¹⁵ Pi felngin Jehovah ni ke nang Moses e ku ra ayuweg rogon ni nga i ngongol ngak piyu Israel. Exodus 34:5-7 e yog ni yib i th’ab Got p’eowchen Moses ni gaar: “I Somol, i Somol e ir fare Got nri ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad. Tin ni ke yog ngak boor i biyu’ e girdi’ ni bay rin’ ngorad e dabi thil, ma n’ag fan u wan’ e tin ni kan rin’ nde mat’aw, nge tin nib kireb, nge denen; machane dabi fek owchen fe pag ndabi gechignag pi fakay nge pi fak pi fakay nge mada’ ko bin dalip nge aningeg e mfen.” Ngan par nguun lemnag fapi thin. Ma ga fithem: ‘Ra reb e pi felngin nem ma mang fan? Uw rogon ni ke dag Jehovah e re n’em? Uw rogon ni ra fanay e piin piilal ni Kristiano e pi felngin ney? Uw rogon ni ra m’ug reb e pi felngin ney ko ngongol rok bagadad nge bagadad?’ Ngada lemnaged boch ban’en ni kan rin’.

16. Uw rogon ni ngad gelnaged e nang fan rodad ko runguy rok Got, ma mang fan ni ri baga’ fan ni ngan rin’?

¹⁶ Jehovah i ir fare “Got nri ma runguy e girdi’ ma ma kireban’ ngorad.” Faanra bay fare babyor ni Insight on the Scriptures rom, mang fan ni dab mu bieg e n’en ni be yog u tan e “Runguy”? Fa mu gay e re n’em ko Watch Tower Publications Index ara computer program Watchtower Library (CD-ROM).a Mu fanay e concordance ni ngan gay e thin nu Bible ni taareb rogon ko runguy. Yu ngiyal’, e yira guy ni ke baudnag Jehovah boch e gechig ni ma pi’ ni bochan e runguy rok nib muun ngay ni be kireban ngorad. Re n’em e k’aring Got ni nge rin’ ban’en nge chuweg e girdi’ rok ko gafgow ngar pogofangad. Mich ko re n’ey, e ayuweg Got piyu Israel ko tin ba t’uf ni fan ko dowef rorad nge tirok Got ban’en u nap’an e milekag rorad ko fare Binaw ni kan Micheg. (Deuteronomy 1:30-33; 8:4) Jehovah e ma n’ag fan e oloboch rorad ni bochan e ri ma runguyrad. Ma dag e runguy rok ngak girdien kakrom. Girdi’ rok e ngiyal’ ney e thingar ur daged e runguy rorad ngorad!​—Matthew 9:13; 18:21-35.

17. Uw rogon ma nang fan rodad ko kireban’ rok Jehovah e ra mon’ognag e bin riyul’ e liyor?

¹⁷ Runguy rok Jehovah e ba muun ngay e kireban’ rok. Faanra bay e dictionary rom, mu yaliy fare thin ni “kireban’ ngak” ara gol ngak (gracious). Mu taarebnag e biney ko re thin nu Bible ni be yog ni Jehovah e ma kireban’ ngak e girdi’. Fare Bible e be dag ni kireban’ e bayang ko t’ufeg rok Jehovah ni ma lemnag e girdi’ rok ni ke gafgow. (Exodus 22:26, 27) Demtrug e nam, ma piin ni wasol nge ku boch e girdi’ e yad ma pirieg ni yad be gafgow. Nap’an ni ma skulnag Jehovah e girdi’ rok, ni dab ur laniyan’gad ya ngar golgad ko wasol me puguran ngorad ni ur moyed u Egypt ni ku yad boch e wasol. (Deuteronomy 24:17-22) Ma uw rogon gadad ni gad girdien Got e chiney? Kireban’ ni bay rodad e ma ayuweg ni nge chagiydad nga taabang ma ra k’aring e girdi’ ngar uned ko liyor ku Jehovah.​—Acts 10:34, 35; Revelation 7:9, 10.

18. Mang e kada filed ko gin ni nge mus e girdi’ nu Israel riy ni ke fil Jehovah ngorad ndab ra leked kanawoen e pi nam?

¹⁸ Yugu aram rogon ni yad ma runguy e girdi’ u boch e nam, machane dabi war e t’ufeg rok piyu Israel ngak Jehovah nge motochiyel rok. Arfan, ni kan fil ngak piyu Israel ni dab ra folgad ko yalen e teliw nge rogon e par ni de yalen ko pi nam nib liyegrad. (Exodus 34:11-16; Deuteronomy 7:1-4) Ku aram rogon gadad e chiney. Ngada pired ni gad ba thothup, ni bod e Got rodad, ya Jehovah, e ba thothup.​—1 Peter 1:15, 16.

19. Uw rogon ni yira nang fan e lem rok Jehovah ko tin ni ba kireb ban’en ma ra ayuweg e girdi’ rok?

¹⁹ Rogon ni nge mudugil ni ke nang Moses kanawoen Jehovah me tamilangnag ni yugu aram rogon ni de fel’ u wan’ e denen, mab sowath ni nge yib e damumuw ngak. Ma pi’ e tayim ko girdi’ ni ngan fil e tin nib m’agan’ ngay min rin’. Nap’an ni yira kalngan’uy ko denen, ma ra n’ag Jehovah fan e denen, machane dabi pag e gechig nib t’uf ni ngan pi’ ko denen nib ubchiya’. I yog ngak Moses ni tin ni bay fini yib e mfen e ra yib wenegan ngorad nib fel’ fa ba kireb be yan u rogon e n’en ni ra rin’ piyu Israel. Ra tamilangan’uy u murung’agen e pi kanawo’ rok Jehovah ma rayog ni nge ayuweg e girdi’ rok Got ni dab nog e kireb ngak Got ko pi n’en ni yad e kar rin’ed ngorad ara rogned ni ke sowath Got.

20. Mang e ra ayuweg e ngongol rodad ko piin taareb e michan’ rodad nge piin gad ma mada’nagrad u nap’an ni gad be yan ko machib? (Psalm 86:11)

²⁰ Faanra ga baadag ni ngari gel e tamilangan’ rom u murung’agen Jehovah nge kanawo’ rok, ma nguum fal’eg i gay murung’agen ma nguum bieg e Bible mu um fal’eg i lemnag fan. Ngam yaliy nib fel’ rogon boch i rarogon Jehovah nib fel’. Mu lemnag ko meybil rom uw rogon ni ngam folwok rok Got ngari puluw e yafas rom ko tin nib m’agan’ ngay. Biney e ra ayuwegem ni ngam palog ko riya’, mu um ngongol nib puluw ngak e piin taareb e michan’ romed, ma ga ayuweg boch e girdi’ ngar nanged me t’uf rorad e Got rodad nrib fel’.

[Footnote]

Mang e Kam Fil?

• Mang fan ni sobut’an’ e ri baga’ fan ngak Moses, ma mang fan ni ku arrogodad?

• Mang angin ni ke yib ni bochan ni ka nog ngak Farao e thin rok Jehovah nib pire’ yay?

• Mang boch e pi kenggin e motochiyel nib fel’ ni kan fil ngak Moses ni ku baga’ fan ngodad?

• Uw rogon ni ngad gelnaged e nang fan rodad ko pi felngin Jehovah?

[Picture on page 7]

I yul’yul’ Moses ni nge i yog e thin rok Jehovah ngak Farao

[Picture on page 9]

Ke tamilangnag Jehovah ngak Moses e tin baadag ni ngan rin’

[Picture on page 10]

Ngan fal’eg i lemnag e pi felngin Jehovah