Moses e Ir Be’ ni Ma Dag e T’ufeg

MANG E T’UFEG?

T’ufeg e aram e ga be dag nib ga’ fan u wan’um rarogon e girdi’. Be’ ni ma dag e t’ufeg e ra m’ug ko thin nge ngongol rok ni be lemnag rarogon e girdi’ ni yugu aram rogon ni yu ngiyal’ mab muun ngay ni nge pag fan ir.

UW ROGON NI DAG MOSES E T’UFEG?

I dag Moses nib t’uf Jehovah rok. Ni uw rogon? Mu lemnag e n’en ni be yog e 1 John 5:3 ni gaar: “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed.” I fol Moses ko re kenggin e motochiyel ney. I yog Got ngak ni nge rin’ ban’en nib mo’maw’ ni aram e nge non ngak Farao ni pilung, me rin’. Maku i yog Got ngak ni nge rin’ ban’en nib mom ni aram e nge k’iyag e sog rok nga daken fare Red Sea, me rin’. Yugu demtrug feni ba mo’maw’ ara ba mom e n’en ni yog Got ngak, me fol riy. Be yog e Bible ni gaar: “Me rin’ ni aram rogon.”​—Exodus 40:16, NW.

I dag Moses e t’ufeg ngak e girdi’ nu Israel. Yad manang ni be fanay Jehovah Moses ni nge pow’iy e girdi’ rok, ere aram fan ni yad ma yib ngak Moses ni ngar weliyed murung’agen e magawon rorad ngak. I yog e Bible ni gaar: “Me par Moses nga tagil’ ni nge puf oloboch rok e girdi’ ni kadbul nge nep’.” (Exodus 18:13-16) Aygum lemnag rogon e magar ni ke tay Moses u lan boor e awa ni nge motoyil ko pi magawon rok e girdi’ nu Israel! Machane, ba felfelan’ ni nge ayuweg e pi girdi’ nem ni yad ba t’uf rok.

Gathi kemus ni ma motoyil Moses ko pi girdi’ ney, ya ku ma yibilayrad. Mus ngak e piin ni kar togopuluwgad ngak miki pi’ e meybil ni fan ngorad. Ni bod u nap’an ni gun’gun’ Miriam nib togopuluw ngak Moses, me gechignag Jehovah Miriam ko fare m’ar ni daraw. Ere, de felfelan’ Moses ko n’en ni ke buch rok walagen, ya i meybil e ngiyal’ nem ni fan ngak ni gaar: “Got mu golnag Miriam!” (Numbers 12:13, BT) Ere, mutrug ni bochan e t’ufeg rok Moses ngak Miriam e ir e ke k’aring ni nge meybil ni fan ngak.

MANG E RAYOG NI NGAD FILED KO RE N’EY?

Rayog ni ngad folwokgad rok Moses u nap’an ni gad be gay rogon ni nge gel e t’ufeg rodad ngak Got. Ya mit ney e t’ufeg e ra k’aringdad ni ngad folgad ko pi motochiyel rok Got “u polo’ i gum’ircha’dad.” (Matthew 22:37) Nap’an ni gad ra fol rok Jehovah u polo’ i gum’ircha’dad, ma aram e gad be felfelan’nag gum’irchaen. (Proverbs 27:11) Ma aram e ku ra yib angin ngodad. Ya faan gad ra fol rok Got ni bochan ba t’uf rodad, ma gathi kemus ni gad ra ngongliy e tin nib mat’aw, ya gad ra rin’ u fithik’ e felfelan’.​—Psalm 100:2.

Yugu reb e kanawo’ nrayog ni ngad daged ni gad be folwok rok Moses riy, e aram e gad be dag e t’ufeg ngak yugu boch e girdi’. Nap’an nra yib boch e fager rodad ara girdien e tabinaw rodad ni ngar weliyed e pi n’en ni ke magafan’rad ngay, ma t’ufeg rodad ngorad e ra k’aringdad ni ngad (1) motoyilgad ngorad u fithik’ e tayfan, (2) ma gad dag ngorad ni gad manang fan e pi magawon rorad, (3) ma gad dag ngorad ni gad be tayfarad.

Rayog ni ngad yibilayed e piin nib t’uf rodad ni bod rogon e n’en ni rin’ Moses. Ya yu ngiyal’ ma gad ma thamiy ni dabiyog rodad ni ngad ayuweged yad ko magawon rorad. Ma sana gad ra gaar, “Siro’, ma kemus nrayog ni nggu pi’ reb e meybil ni fanam.” Machane, dab mu pagtalin ni: “Meybil rok be’ nib mat’aw e ba’ angin ni ba ga’.” (James 5:16) Ere, ba ga’ fan e meybil rom u wan’ Jehovah, ya rayog ni nge lemnag rogon ni nge ayuweg faanem ni kam yibilay. Ma bin riyul’ riy e n’en nib fel’ ni ngad rin’ed ni fan ngak be’ nib t’uf rodad e aram e ngan yibilay.a

Ere, boor ban’en ni gad ra fil rok Moses, fa? Yugu aram rogon ni ir be’ ni bod gadad, machane ke dag e kanawo’ ngodad u rogon ni ngad daged ni bay e michan’ rodad, nge sobut’an’, nge t’ufeg. Ma nap’an ni gad ra athamgil ni ngad folwokgad rok u rogon nrayog rodad, ma aram e ra yib angin ngodad nge yugu boch e girdi’.​—Roma 15:4.