Rogon ni Ngam Nang Fan e Thin nu Bible
2. Mu Beeg ni Ga Be Lemnag ni Ngam Nang Fan e Thin Riy
Bay reb e fager rom ni ke yog ngom boch ban’en nib kireb u murung’agen be’ ndawor mu mada’gow biid? Gur, nap’an ni ga ra mada’nag facha’, ma rayog ni ngam guy fel’ngin nge salap rok ni bochan e ke weliy e fager rom thibngin ngom? Ere, ku taareb rogon u nap’an ni yira weliy murung’agen e Bible.
KE GINANGEY apostal Paul ni rayog ni nge buch ban’en rodad ni aram rogon ni faanra ud beeged e Bible ma darud lemnaged ni ngad nanged fan e thin riy. Bod rogon e pi Jew u nap’an Paul. Arfan ni gaar: “Rayog ni gu mang mich rorad nri yad be tiyan’rad ngak Got, machane tiyan’ ni yad be tay e ke thum’ nga wuru’ e wo’, ya dar nanged e tin riyul’.”—Roma 10:2.
Boch e Jew kakrom e de mich u wan’rad ni Jesus e ir fare Messiah ni yugu aram rogon nrib tamilang ni be weliy e Bible nni yoloy som’on nthin ni Hebrew murung’agen. Jesus nu Nazareth e ir e ke lebug fapi yiiy u daken. Machane boor piyu Jew ndar nanged fan e thin rok Got ni bochan e yad ba gelan’.
Mang e gad ra fil ko re n’ey? Gad ra fil riy nib ga’ fan ni nguud beeged e Bible ni gad be lemnag ni ngad nanged fan e thin riy. Faanra ga be beeg e Bible ma dabum ni ngam thilyeg e lem rom ko tin ke mich u wan’um, ma dabiyog ni ngam nang fan e tin riyul’ u Bible.
Bod ni be’ ni ma fil murung’agen e teliw ngak e girdi’ u bang u Meriken ni ka nog yu North Carolina ngay e yog ni Bible e “ba ke babyor ni llowan’ ko girdi’ nib thilthil e bay riy ma dariy bang riy ni be weliy murung’agen rogon nsusun e nge par e girdi’.” Faanra lemnag be’ e Bible ni ba ke babyor ni thin ko girdi’ e bay riy ma gathi Got, ma rayog ndabi fol ko pi motochiyel ni bay riy.
Machane, be tamilangnag e Bible nrib ga’ fan ni ngad filed e thin rok Got nib fel’ rogon. Ke weliy e Bible murung’agen piyu Beroea u nap’an Paul ni gaar: “Mi yad motoyil ko thin rok Got ni kar uthumed telrad ngay, ma gubin e rran ni ur gayed u lan e babyor nib thothup ni ngar guyed ko riyul’ e tin ni ke yog Paul fa.” (Acts 17:11) Ere, thingar kum bod e pi girdi’ nu Beroea nem, ni ngam beeg e Bible ni ga be lemnag ni ngam nang fan e thin riy, ni aram e thin rok Got.