Salpiy e Ir e Gin Ma Yib e Bin Riyul’ e Felfelan’ Riy, Fa?
SONIA e ni gargelnag u Spain. Nap’an ni kab bitir ma i un ngak e chitiningin ko pi muulung ni ma tay e Pi Mich Rok Jehovah. Ma nap’an ni ilal me yan i par nga London u England, ma aram me un nga reb e maruwel ni ir e bond broker ara be’ ni ma maruweliy murung’agen e salpiy.
Ri baadag Sonia e maruwel rok. Boor e salpiy ni ma yog ngak ya ma maruweliy murung’agen boor e salpiy rok e girdi’. I felfelan’ ko maruwel rok ma ba fel’ rogon ni ma maruwel. Ma maruwel Sonia ni 18 e awa u reb e rran, ma boch e nep’ e kemus ni l’agruw fa dalip e awa ni ma mol. Kemus ni maruwel rok e ma lemnag. De n’uw nap’an, me yib e m’ar ngak nib tomgin me stroke ni sana bochan e der gaman e toffan rok. Ka fini gaman 30 e duw yangaren.
Ke yaf barba’ i dow Sonia, ma de nang e togta ko rayog ni nge non bayay fa dabkiyog. Ka ngiyal’ nem me yib e chitiningin nga England ni nge ayuweg. Nap’an ni yog ni nge yan bayay me gaar e chitiningin ngak, “Nga gu wan ko muulung ma ngam un ngog ya dabiyog ni nga gu pagem ngam par ni goo gur.” Ke m’agan’ Sonia ni nge un ngak. Mang e n’en ni buch?
Ke gaar Sonia: “Gubin ban’en ni kug rung’ag e ba riyul’ ma rib fel’. Kug felfelan’ ni ke fil bagayad fapi girdi’ ni gu mada’gad ko som’on ni gu un nga Kingdom Hall e Bible ngog. Boch e girdi’ ni yad manangeg e kar talgad ni dakurur bad ra guyed gag, machane tin nib beech e fager rog e yad ma t’ufegeg ma ku yad ma ayuwegeg.”
Boch nga tomuren ma ki yog ni non Sonia bayay, ma ki mon’og ko fol Bible. Ke un ko taufe ni dawori gaman reb e duw ni ke fil e Bible. Boor e fager rok nib beech e yad ma un ko machib ni gubin ngiyal’ ma ke guy ni ri yad ba felfelan’. Ere gaar u wan’: ‘Gu baadag ni nggu rin’ e n’en ni be rin’ e pi fager rog. Gu baadag ni nggu rin’ e tin rayog rog ni fan ngak Jehovah Got!’ Ere chiney e be un Sonia ko machib ni gubin ngiyal’.
Ere mang e ke fil Sonia ko n’en ni i rin’ ko som’on. Ke gaar: “Yugu aram rogon ni i yog boor e salpiy ngog, ma der yog ni gu toffan ma dariy ban’en ni rayog ni nge pagan’ug ngay u tabon e maruwel ere der yog ni gu par ni gub felfelan’. Ere kafin gu nang ni n’en th’abi ga’ fan ko yafas rog e nge fel’ thilmow Jehovah. Chiney e kar gu felfelan’.”
Be gaar apostal Paul: “Chogowen e salpiy e ir lik’ngin urngin mit e kireb. Boch e girdi’ e ri yad ba adag ni nge yog ngorad ni aram tapgin ma kar mal’afgad u rogon ni nge mich Kristus u wun’rad, ma ke m’ingan’rad ke yib e kireban’ ni pire’ ngorad.” (1 Timothy 6:10) Rayog ni nge micheg Sonia nib riyul’ e pi thin ney ni bochan e n’en ni ke buch rok.