Ra Ba Gafgow Be’, Ma Gur, Be Yip’ Fan Nder Tow’athnag Got?
I YOG Got ngak piyu Israel kakrom ni gaar: “Dariy taabe’ u fithik’ e pi girdi’ romed nra gafgow.” I yog e re thin ney ni bochan e bay ko Motochiyel ni pi’ ngak piyu Israel ni ngan ayuweg e piin nib gafgow ma dab kun lemnag e malfith rorad. (Deuteronomy 15:1-4, 7-10, BT) Aram fan ndariy be’ nib gafgow u Israel ni bochan e ke micheg Got nra tow’athnagrad. Machane tow’ath nra pi’ e be yan u rogon ko yad ra fol ko pi Motochiyel rok fa danga’, ni aram ban’en nde rin’ piyu Israel.
Re n’ey e gathi be yip’ fan ni piin nde yoor ban’en rorad e der tow’athnagrad Got, ya boor e pi tapigpig rok Got kakrom ni yad ba yul’yul’ ngak, machane yad ba gafgow. Amos ni profet e ir be’ ni ma chugol saf maku ma ayuweg yungi woldug. (Amos 1:1; 7:14) Nap’an Elijah ni profet me yib ba uyungol nga Israel. Ere thingari taga’ Elijah ngak be’ nib pin nib gafgow ni kem’ e pumoon rok. Yugu aram rogon ma de m’ay e flowa nge gapgep rok fare pin u nap’an fare uyungol. De yoor ban’en rok Elijah ma ku er rogon fare pin, machane ke pi’ Jehovah e tin nib t’uf rorow.—1 Kings 17:8-16.
Yu ngiyal’ e ma buch boch ban’en ndan lemnag, me k’aring e gafgow ko girdi’. Rayog ni nge buch ban’en nib tomgin ara m’ar be’ ndabkiyog ni nge maruwel. Maku rayog ni nge yim’ chitamangin ara chitiningin reb e tabinaw me gafgow fare tabinaw. Pi n’ey e der yip’ fan nder tow’athnagey Got. N’en ni buch rok Naomi nge Ruth e be micheg ngodad rogon ni ma ayuweg Jehovah e piin nib gafgow. Yugu aram rogon ni kari gafgow Naomi nge Ruth ni bochan e kem’ e pumoon rorow, machane ke tow’athnagrow Jehovah ma ke pi’ e tin nib t’uf rorow.—Ruth 1:1-6; 2:2-12; 4:13-17.
Ere, faanra ba gafgow be’ ma gathi be yip’ fan nder tow’athnag Got. Piin ni yad ba yul’yul’ ngak Jehovah Got e rayog ni nge pagan’rad ko fapi thin ni yog David ni Pilung ni gaar: “Chiney e kug pilibthir, ni gathi ku gub pagel, machane dawor gguy be’ nib fel’ ni gomanga ke pag Somol faanem, ara gguy pi fak ni yad be man ggan.”—Psalm 37:25.
[Picture on page 7]
Yugu aram rogon nib gafgow Naomi nge Ruth, machane ke tow’athnagrow Got ma ke ayuwegrow