Flaab Ni Ma Yib Rok Got

FAAN ga ra par ni gab yul’yul’ ngak Got, ma ra flaabnagem, fa? Dabisiy nra flaabnagem, machane sana ra rin’ u reb e kanawo’ ndamur lemnag. Am lemnag Maria ni chitiningin Jesus. I m’ug fare engel ni Gabriel ngak me yog ni ke fal’eg Got ‘waathan ni ba ga’’ ma bayi diyen nge gargeleg bochi Pagel ni fak Got. (Luke 1:28, 30-32) Yugu aram rogon, ma ir be’ nib gafgow. Nap’an ni yan ni nge pi’ e maligach ngak Jehovah u tomuren ni ka fini gargeleg Jesus, ma “l’agruw i bulogol ara l’agruw i pifak e bulogol” e pi’, ya ba ga’ ni aram e maligach ni ma pi’ e piin ni yad ba gafgow ngak Jehovah.​—Luke 2:24; Levitikus 12:8.

Bochan nib gafgow Maria, ma gur, aram e be yip’ fan nde tow’athnag Got? Danga’, ya nap’an ni yan i guy Elizabeth, me non Elizabeth nib ga’ laman ni gaar: “I gur e ke fal’eg Got waatham u fithik’ e ppin! Ma ke fal’eg Got waathan e re tir ni bay mu gargelnag!” (Luke 1:41, 42) Ere, ba tow’ath Maria ni bochan e ir e ke mang chitiningin Fak Got.

Jesus e gathi ir be’ nib flaab, ya ni gargeleg u ba tabinaw nib gafgow, ma n’umngin nap’an e yafas rok u fayleng ni i par nib gafgow. Immoy be’ nib moon ni baadag ni nge mang reb i gachalpen, machane me gaar Jesus ngak: “Gamanman ni fox e bay e low ni taferad, ma arche’ e bay taferad ni kar toyed, machane en ni Fak e Girdi’ e dariy bang ni nge pag ir riy nga but’ nge toffan.” (Luke 9:57, 58) Machane, wub ni tay Jesus nga fayleng e ke bing e kanawo’ ngak pi gachalpen ni ngar flaabgad. I yoloy apostal Paul ni gaar: “Me pag ir nge gafgow ni fan ngomed, ni fan e nge yognag e flaab ngomed u daken e gafgow ni ke tay.” (2 Korinth 8:9) Ba miti mang flaab e yognag Jesus ni fan ngak pi gachalpen? Ma uw rogodad e ngiyal’ ney, ba miti mang flaab e bay rodad?

Ba Miti Mang Flaab?

Ra boor e salpiy rok be’, ma ra magawonnag e michan’ rok, ya piin ni boor e salpiy rorad e aram e n’en ni be pagan’rad ngay ma gathi Got. I yog Jesus ni gaar: “Rib mo’maw’ rok e piin ni pire’ ban’en rorad ni ngar uned ko gagiyeg rok Got!” (Mark 10:23) Ere, ba tamilang ni flaab ni ke ognag Jesus ngak pi gachalpen e gathi salpiy nge chugum.

Boor e Kristiano kakrom nib gafgow. Nap’an ni yib be’ nib moon nib mugutgut i ning e salpiy ngak Peter, me gaar Peter ngak: “I gag e dariy e salpiy rog, machane bay gu pi’ ngom e n’en ni ba’ rog: gu be yog ngom u fithingan Jesus Kristus nu Nazareth ni ngam un ko yan!”​—Acts 3:6.

Thin rok James nreb i gachalpen Jesus e ku be dag ni pi Kristiano kakrom e boor i yad e ba gafgow. I yoloy ni gaar: “Pi walageg ni girdien Kristus, mu telmed ngog! I Got e ke mel’eg e girdi’ ni gafgow u roy u fayleng ni ngari gel e michan’ rorad ngak Got nguur pired nib pagan’rad ngak me yog ngorad e gin nsuwon Got ni yog nra pi’ ngak e piin nib t’uf Got rorad.” (James 2:5) Ki yog apostal Paul nde yoor e girdi’ ni “immoy nib gonop” ara “ma yog e thin” ara “ba tolang u rogon e tafinay ni ma tay e girdi’” nra manged bang ko ulung ni Kristiano.​—1 Korinth 1:26.

Ere, faanra gathi salpiy nge chugum e flaabnag Jesus pi gachalpen riy, me ere mang e ke flaabnagrad riy? Nap’an ni pi’ Jesus e thin nge yan ko ulung nu Smyrna, me yog ni gaar: “Gu manang e pi n’en ni ga be gafgow riy; ma gu manang ni gab gafgow.” (Revelation 2:8, 9) Machane, yugu aram rogon ma bay ban’en ni yad ba flaab riy ni kab tolang puluwon ko silber nge gol. Yad ba flaab ni bochan e yad ba yul’yul’ mab michan’rad ngak Got. Ba ga’ fan e michan’ ni bochan e “gathi urngin e girdi’” ni bay e michan’ rorad. (2 Thessalonika 3:2) Piin dariy e michan’ rorad e yad ba gafgow u mit Got.​—Revelation 3:17, 18.

Flaab ni Ma Yog u Daken e Michan’

Uw rogon nib ga’ fan e michan’? Piin nib michan’rad ngak Got e ra fel’ rogorad u “feni gol Got, nge feni k’adan’, nge feni gum’an’.” (Roma 2:4) Ku yad ra felfelan’ ya ke “n’ag Got fan e denen” rorad ni bochan e ke mich u wan’rad e biyul ni pi’ Jesus nib maligach. (Efesus 1:7) Maku, ra yog e gonop ngorad ni ma yog ngak e piin ni ma mich u wan’rad e “thin ni ir e ba th’ab feni fel’, ni weliy Kristus.” (Kolose 3:16) Nap’an ni yad ra meybil ngak Got u fithik’ e michan’, ma “gapas rok Got ndabi chuchugur ni nge nang e girdi’ fan” e ra yororiy gum’ircha’rad nge tafinay rorad, me yibnag e felfelan’ ngorad.​—Filippi 4:7.

Reb e tow’ath ni kub muun ko pi tow’ath nra yog ngak e piin ra mich Got nge Jesus Kristus ni Fak u wan’rad e aram e yafas ni manemus. Boor e girdi’ ni manang fapi thin ni yog Jesus Kristus ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Ra gel e l’agan’ rok be’ ni faanra i fil e tin riyul’ u murung’agen e en Chitamangiy nge Fak, ya yog Jesus ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.”​—John 17:3.

Yugu aram rogon ni tow’ath nra yog ngodad e ra fel’ e tha’ u thildad Got, machane ku ra yib angin nga lanin’dad nge dowdad. Am lemnag e n’en ni buch ku Dalídio ni be’ nu Brazil. U m’on ni nge fil e Bible ma ir reb e ta chingaw. Kari magawon e tabinaw rok ni bochan e re n’em. Maku reb e ki pirieg e magawon ko salpiy. Machane, nap’an ni fil e Pi Mich Rok Jehovah e Bible ngak ma aram me thil e yafas rok.

N’en ni ke fil Dalídio u Bible e ir e k’aring ni nge pag e ngongol rok ni kafram. Rib gel e mon’og ni ke tay, ma aram me gaar: “Kafram e gu ma yan u reb e tafen e muun rrum nga reb ni gu be chingaw, ma chiney e gu ma yan u reb e tabinaw nga reb ni gu be machib.” Chiney e ma fanay Dalídio yooren e tayim rok ni fan ko machib. Bochan ni ke thil e yafas rok ma aram e ke fel’ rogon boch fithik’ i dow ma ke yog ni nge ayuweg reb e salpiy. I yog Dalídio ni gaar, “Salpiy ni ug n’ag ko alkul kafram e gu be fanay ni nggu ayuweg boch e girdi’ ngay fa gu chuw’iy ban’en ngay ni fan ngog.” Ke yog ni nge pirieg boch e fager nib fel’ ni bochan e yad ma chag e piin nib taareb e michan’ rorad. Ku ke gapas laniyan’ ma ke fel’ u wan’ e tin ni bay rok ni kari thil nga rogon ko ngiyal’ ni baaram ndawori fil murung’agen Got.

Kum lemnag e n’en ni buch rok Renato ni ku be dag e pi flaab ara tow’ath nra yog ngak be’ nra maruweliy e michan’ rok ngak Jehovah Got. Chiney e ga ra guy e cha’ney, ma dabi mich u wan’um e n’en ni buch rok kafram nge gelngin e gafgow ni tay. I n’ag e chitiningin u nap’an ni kafin ni gargeleg, nni fek ngan tay nga lan e brif min yan nni tay nga tan e benchi ni ke magur dow ma dawor nni th’ab e biy rok. Ma nap’an ni yib l’agruw i ppin mi yow guy fare brif u tan e benchi ni be mithmith, mi yow lemnag ni fak e gatuw ni ke tay be’ e ngaram. Machane, nap’an nra guyew ni bochi tir ni kafin nni gargelnag ma aram mi yow fek nga aspital.

Bay bagayow fagali ppin ni ir reb e Mich Rok Jehovah. Ere yog ngak reb e ppin ni ku ir reb e Mich ni Rita fithingan murung’agen fachi tir. Ri baadag Rita ni nge fakay reb e pagel ya ke yoor yay ni ke maraggil ma kemus ni taareb e ppin ni fak. Ere ke pof Renato ni nge fakay.

Kab achig Renato me yog Rita ngak ni gathi ir e diyennag. Machane ma ayuweg nib fel’ rogon, mma t’ufeg, mma athamgil ni nge fil e thin nu Bible ngak. Nap’an ni ke ilal boch Renato, ma ri adag e thin nu Bible. Kub gel e felfelan’ ni ke tay nga rogon ni kan ayuweg e yafas rok. Ri ma yor u nap’an nra beeg fapi thin ni yog David ni gaar: “Ra n’igeg e chitamag nge chitinag, machane Somol e ra ayuwegneg.”​—Psalm 27:10.

Rriyul’ ni kari felfelan’ Renato ma be pining e magar ngak Jehovah ko urngin ban’en ni ke ayuweg riy, ya nap’an e duw ni 2002 me un ko taufe ma bin migid e duw ngay me un ko machib u yooren e tayim rok. Ke mada’ ko chiney ma dawori nang ko mini’ e chitamangin nge chitiningin, ma sana ku dabi nang. Machane, ma lemnag ni bin th’abi fel’ e tow’ath ni ke yog ngak e aram e ke nang Jehovah ma ke mich u wan’ ma ke mang Jehovah e Chitamangin nri ma t’ufeg.

Dabisiy nri ga baadag ni nge fel’ me chugur e tha’ u thilmew Got, ya ra fel’ rogom riy. Gubin e girdi’, ndemtrug ko yad ba flaab ara yad ba gafgow ma rayog ni nge fel’ e tha’ u thilrad Jehovah Got nge Fak ni Jesus Kristus. Ra fel’ e tha’ u thildad Jehovah nge Jesus ma sana dabi yoor e salpiy nge chugum rodad, machane ra gapas lanin’dad me fel’ u wan’dad e tin bay rodad. Ireray ban’en ndabiyog ni nge yog ngak e piin ni boor ban’en rorad. Ere rriyul’ fapi thin ni bay ko Proverbs 10:22 (BT) ni gaar: “I Somol e ke fal’eg waatham kam flaab. Math’ kenyil’ e dabi yon’ daken e flaab rom.”

Ri baadag Jehovah ni nge ayuweg e piin ni yad ra fol rok. Faan gad ra fol ko pi motochiyel rok ma ra yib e gapas nga lanin’dad ni bod e ran ni be yan u lan e lul’ nib ga’, ma tin nib mat’aw ni gad ma rin’ e ra yoor nge bod e n’ew u maday. (Isaiah 48:18) Ke micheg Jehovah ngodad ni piin ni yad ra pigpig ngak u fithik’ e yul’yul’ e yira flaabnagrad, ya be gaar e Bible: “Um par ni bay madgun Somol u wan’um, ma ba sobut’an’um, me yoor ban’en rom, ma ga par ni yibe ta’ fam, me n’uw nap’am.”​—Proverbs 22:4, BT.

[Picture on page 5]

Yugu aram rogon nib gafgow e tabinaw rok Jesus u fayleng, machane ke tow’athnagrad Got