Ga Ra Pigpig Ngak Got Ma Ra Flaabnagem, Fa?

‘Baadag Got ni ngam flaab, nge yoor e karrow rom, me fel’ e siyobay rom. Nge mich Got u wan’um, ma ga pi’ urngin e salpiy ni bay rom ngak.’

ROGON ni yog reb e shimbung u Brazil, e ireray e n’en ni ma yog boch e teliw ko girdi’ riy. Ma boor e girdi’ ni ma mich u wan’rad e re n’ey. I yog reb e babyor nnap’an ni kan fith boch e girdi’ u Meriken ni yad ma yog ni yad e Kristiano ma: “Nel’ i ragag nge taareb e pasent ko pi girdi’ nem e ba mich u wan’rad ni baadag Got ni nge flaab e girdi’. Ma 31 e pasent . . . e ka rogned ni faanra mu pi’ e salpiy rom ngak Got ma ra yoornag e salpiy rom.”​—Time magazine.

Mit ney e lem e bay ko girdi’ ko pi nam u yimuch u Meriken, ni bod u Brazil. Boor e girdi’ ko yungi n’ey e yad ma un ko pi yurba’ i teliw ni yad ma yog ko girdi’ nra yoornag Got e salpiy rorad. Machane, riyul’ ni ke micheg Got nra flaabnag e piin ni yad ra pigpig ngak, fa? Gubin e tapigpig rok Got kakrom ni yad ba flaab, fa?

Riyul’ ni gad ra beeg fapi thin ko Bible nni yoloy som’on nthin ni Hebrew ma boor yang riy ni be weliy murung’agen e piin ni i flaabnagrad Got kakrom. Gad ra guy e Deuteronomy 8:18, ma be gaar: “Dab mu paged talin ni Somol ni Got romed e ir e be pi’ gelngimed be yoor ban’en romed.” Re thin ney e ke micheg ngak piyu Israel ni faan yad ra fol rok Got, ma ra fel’ rogorad.

Ma uw rogon e pi tapigpig rok Got ni be’ nge be’? Job nreb e tapigpig rok Got kakrom e ir be’ ni boor ban’en rok. Tomuren ni fek Satan gubin ban’en rok nge m’ay, me sulweg Jehovah urngin ban’en ni immoy rok nga rogon ni “ruw yay e ke mun ngay.” (Job 1:3; 42:10) Ku aram rogon Abraham ni ir be’ nib flaab. Be yog e Genesis 13:2 nib “pire’ ban’en rok, ni aram e saf, nge kaming, nge garbaw, ma ku er rogon e silber nge gol.” Nap’an ni chagil e salthaw rok e pi pilung nu lan e ngek ngar koled Lot ni fak walagen Abraham, “me kunuy e pumoon ni be par rok ni piin nib yul’yul’, ma ranod ra gamangad 318 u gubin.” (Genesis 14:14) Ere, faanra 318 e “pumoon” u tafen Abraham ni ranod ko cham, ma riyul’ ni boor chon e tabinaw rok. Ma reb, e dabisiy ni ir be’ nib flaab ni bochan e rayog ni nge ayuweg e girdi’ nge gamanman ni boor.

Riyul’ ni immoy boor e tapigpig rok Got kakrom ni yad ba flaab ni bod Abraham, Isak, Jakob, David nge Solomon. Ere, gur, re n’ey e be yip’ fan ni gubin e piin ni yad ra pigpig ngak Got e ra fel’ rogorad? Ma reb e, faanra ba gafgow be’, ma gur, aram e be yip’ fan nder tow’athnag Got? Gad ra weliy e fulweg ko gali deer ney ko bin migid e thin.