Bay E Michan’ Rom Ni Bod Abraham?

“Ra sul e en ni Fak e Girdi’ ma gur ra pirieg e girdi’ nu fayleng ni yad be par ni kab michan’rad ngak?”​—LUKE 18:8.

1. Mang fan nib mo’maw ni nge par e girdi’ nib gel e michan’ rorad ko ngiyal’ ney?

DANI mom ni ngan par nib gel e michan’ ko ngiyal’ ney. Ya fayleng e be diliiy laniyan’ e pi Kristiano ni nge chafegrad nga orel ko tirok Got ban’en. (Luke 21:34; 1 John 2:15, 16) Boor i yad e ba gel e athamgil ni yad ma tay ni ngar pired u fithik’ e mahl nge gafgow nge misilpig, nge mak’iy. (Luke 21:10, 11) U boch e nam ma ba gel e yalen ko binaw, ma piin ni ma par ko michan’ rorad e yibe lemnag ni yad e girdi’ ni dabi yib fan, ara yad ba pasig nib pag rogon. Maku boor e Kristiano e yibe togopuluw ngorad ni bochan e michan’ rorad. (Matthew 24:9) Bpuluw fare deer ni fith Jesus 2,000 e duw faram ni gaar: “Ra sul e en ni Fak e Girdi’ ma gur ra pirieg e girdi’ nu fayleng ni yad be par ni kab michan’rad ngak?”​—Luke 18:8.

2. (a) Mang fan ni ba t’uf e michan’ nib gel ko piin Kristiano? (b) Mini’ e ba gel e michan’ rok mab fel’ ni ngad lemnaged?

² Ma rriyul’ ni ba t’uf e michan’ nib gel ni nge yib angin ko par e chi ngiyal’ ney nge gabul nge langleth. I yoloy apostal Paul e thin ni yog Jehovah ku Habakkuk ni gaar: “‘Piin ni yad mmat’aw, ni girdieg, e bay ra pired nib mich Got u wun’rad mi yad fos,’ machane, ‘faanra sul bagayad nga riyel, ma dab ki felan’ug ngak.’ . . . Dariy be’ nra fel’ u wan’ Got ni faanra de mich Got u wan’.” (Hebrews 10:38–​11:6; Habakkuk 2:4) Yog Paul ku Timothy ni gaar: “Mu athamgil ngam un ko cham ni ke musmus rogom ko cham ni yibe tay u rogon nib mich Got u wun’uy, ngam yognag ngom e yafos ndariy n’umngin nap’an; ya ereray e re yafos ni ke piningem Got ngay.” (1 Timothy 6:12) Ere uw rogon nrayog e michan’ ndabi kireb? Ngad lemnaged be’ nib moon ni immoy 4,000 e duw faram, machane rogon ni ke par nib gel e michan’ rok e ma tay fan e pi yuraba’ i teliw nib gilbuguwan ni​—Islam, Judaism, nge Kristiano. Re moon nem e Abraham. Mang fan ni rib lingagil e michan’ rok? Rayog ni ngad folwokgad rok ko ngiyal’ ney fa?

I Fol ko N’en ni Yog Got

3, 4. Mang fan ni chuw Terah nge tabinaw rok u Ur ma ranod nga Haran?

³ Yay nsom’on ni kan weliy morngaagen Abraham (ni Abram fithingan ko som’on) e bay u tabolngin e Bible. Be weliy u Genesis 11:26 ni gaar: “Terah . . . e chitamangin Abram, Nahor nge Haran.” I par Terah nge tabinaw rok u lan fare binaw nu Ur u Kaldea, ni aram ba mach nib fel’ rogon ni bay ko yimuch u Mesopotamia. Machane dakura pared u rom. “Me fek Terah Abram ni be’ nib moon ni fak, nge Lot, ni be’ nib moon ni fak fak, mi Lot e be’ ni fak Haran, mi ki fek Terah Sarai [Sarah] ni leengin Abram ni fak me un ngorad ngar chuwgad ko re binaw nem nu Ur ni bay u lan e nam nu Kaldea, ma ranod ko nam nu Kanaan. Mi yad yan ngar mada’gad nga Haran mi yad par u rom.” (Genesis 11:31) Nahor ni walagen Abraham e ki fek e tabinaw rok nga ranod nga Haran. (Genesis 24:10, 15; 28:1, 2; 29:4) Machane mang fan ni chuw Terah u Ur ni aram bang nib fel’ rogon me yan i par nga Haran ni bangi binaw nib orel?

⁴ Gonapan 2,000 e duw u tomren Abraham me weliy Stefen ko girdien e Sanhedrin ni yad piyu Jew ko mang fan ni chuw e tabinaw rok Terah u rom. Ke gaar: “I Got ni ir e ba th’abi flaab e yib i m’ug ngak e chitamangidad i Abraham ko ngiyal’ ni be par u lan yu Mesopotamia u m’on ndawori yan i par nga lan yu Haran, me gaar ngak, ‘Mpag e girdi’ rom nge nam rom ngam man nga reb e nam ni gag e bay fin gu dag ngom.’ Ma aram me chuw ko nam nu Kaldea nge yan i par nga lan yu Haran.” (Acts 7:2-4) I fol Terah ko tin nib m’agan’ Jehovah ngay ni fan ku Abraham ya ke fek e tabinaw rok ka ranod nga Haran.

5. I yan Abraham ngan u tomren ni yim’ e chitamangin? Mang fan?

⁵ I par Terah nge tabinaw rok u lan e re mach nem. In e duw nga tomren me yog Abraham ni gaar, “binaw rog,” ma be weliy u morngaagen Haran, ma gathi Ur. (Genesis 24:4) Machane Haran gathi aram e gin nra par Abraham riy ndabki chuw biid. Ya rogon ni yog Stefen e, “faani yim’ e chitamangin Abraham me pow’iy Got Abraham nge yib ko re nam ney, ni ir e gimed be par riy e chiney.” (Acts 7:4) I fol Abraham ko n’en ni yog Jehovah ni nge rin’ mi yad yan Lot mar th’abed fare lul’ ni Eufrates nga ranod nga lan e binaw nu Kanaan.a

6. Mang e yog Jehovah ku Abraham ni bayi rin’?

⁶ Mang fan ni yog Jehovah ku Abraham ni nga ranod nga Kanaan? Ya bay ban’en ni ke m’agan’ ngay ni fan ko re moon nem nib yul’yul’. Yog Jehovah ku Abraham ni gaar: “Mpag e nam rom, nge girdi’ rom nge tabinaw rok e chitamam ngam man nga ba nam ni bay fin gu dag ngom. Bay gu gagiyeg nge yib owchem ni pire’ ni pire’, ni yad e bay ra manged girdien ba nam ni pire’ girdien. Bay gu fal’eg waatham mu gu gagiyeg nge gilbuguwan fithingam, nguu nog ko ngiyal’ ni yibe yibil ngak Got ni nge fal’eg waathan be’. Gu ra fal’eg waathan e piin ni yad ra fal’eg waatham, ma gu ra bucheg waathan e piin ni yad ra yibiliyem ni nge kireb waatham. Urngin e nam nu fayleng e bay i fel’ waathrad ni bocham.” (Genesis 12:1-3) Ra mang Abraham chitamangin ba nam nib gilbuguwan mi yad par u tan pa’ e ayuw rok Jehovah ma yad ra tafanay fare binaw nu Kanaan. Rib fel’ e re n’em ni kan micheg! Machane thingari thiliyeg Abraham boch ban’en ko yafas rok ni nge yog ni nge tafanay e re binaw nem.

7. Mang e thingari thiliyeg Abraham ko par rok ni nge yog ngak e n’en ni ke micheg Jehovah ni bayi pi’ ngak?

⁷ Nap’an ni chuw Abraham u Ur, me digey e mach nib fel’ rogon ni i par riy nge girdi’ ko tabinaw rok e chitamangin​—ni aram ban’en ni baga’ fan ko ngiyal’ nem ya girdien e tabinaw e ya ma ayuwegrad. Nap’an ni chuw u Haran, me par nib dar ko tabinaw ko chitamangin, nib muun ngay e tabinaw rok Nahor ni walagen ma aram me yan i par nga reb e binaw ni de nang morngaagen. Ma nap’an ni ke par u Kanaan ma de par u lan e mach ko re binaw nem ni bay u lan e yoror. Mang fan? Ya de n’uw nap’an u tomren ni taw ko re binaw nem me yog Jehovah ngak ni gaar: “Ere mu fal’eg rogom ngam lekag daken e re nam ney, ya aram e nggu pi’ ngom ni ga’ngin.” (Genesis 13:17) Ma ke gaman 75 e duw rok Abraham ma ke 65 e duw rok Sarah, mar folgow ko re n’em. “Mu daken e michan’ rok ngak Got e ir e yog riy ni nge yan i par ko fare nam ni yog Got ni bayi pi’ ngak, ni gowa be par u lan ba nam ni gathi nam rok. I par u lan e tent.”​—Hebrews 11:9; Genesis 12:4.

Michan’ ko Ngiyal’ Ney ni Bod Abraham

8. Susun mang e ngad athamgiliyed nge yog ngodad ni bochan e kanawo’ ni dag Abraham nge yugu boch e pi mich kakrom?

⁸ Ka nog morngaagen Abraham nge tabinaw rok ni yad boch ko fapi girdi’ ni yad bod e “manileng ni baga’ ko pi mich [u m’on ko ngiyal’ ko Kristiano]” ni bay ko Hebrews guruy ni 11. Rogon e michan’ ko pi tapigpig rok Got nkakrom me yog Paul ko pi Kristiano ni ngad “paged urngin ban’en ni be magawon ngodad, nge denen [ni michan’ ni dariy] ni ke m’agdad ni ke chichiiy pa’ rodad.” (Hebrews 12:1) Arrogon, ra dariy e michan’ rok be’ ma mom ni nge mit ko magawon. Machane nap’an Paul nge ngiyal’ ney e ke yog ko pi Kristiano ni ngar gelnaged e michan’ rorad ni bod rogon Abraham nge yugu boch e girdi’ nkakrom. I weliy Paul u morngaagen nge pi walag ni Kristiano ni gaar: “Gathi gadad e piin ni kar pied keru’rad ngak Got kar maloggad; ya gadad e ke michan’dad ngak Kristus kad thapgad ngak Got.”​—Hebrews 10:39.

9, 10. Mang e be micheg ni boor e girdi’ ko ngiyal’ ney e ba gel e michan’ rorad ni bod Abraham?

⁹ Rriyul’ ni ke thil rarogon e fayleng e chiney ko ngiyal’ i n’em u nap’an Abraham. Machane ka gad ma pigpig ku Got ni ir fare “Got rok Abraham,” ma ir e dawori thil. (Acts 3:13; Malaki 3:6) Bay rogon ngak Jehovah ni ngan liyor ngak ni bod rogon u nap’an Abraham. (Revelation 4:11) Boor e girdi’ e kar ognaged yad ku Jehovah ma bod Abraham ni kar thiliyeged e pi n’en nib t’uf ko yafas rorad ni nge yog ni ngar rin’ed e tin nib m’agan’ Got ngay. Fa binem e duw ma 316,092 e girdi’ e kar tamilangnaged ni kar ognaged yad ku Got ya kar uned ko taufe u fithik’ e ran “nga fithingan e Chitamangiy nge Fak nge fare kan ni thothup.”​—Matthew 28:19.

¹⁰ Pi Kristiano ney nib biech e de t’uf ni nga ranod nga ba nam nib palog ni nge yog ni ngar lubeged e tin ni kar ognaged yad ngay. Machane rogon nib spiritual ma boor iyad e kar milekaggad nib n’uw e kanawo’ rorad. Susun, u Mauritius, ma be’ ni Elsie fithingan e immoy ni ir e sothuw. Urngin e girdi’ ni ur rusgad ngak. Reb e pioneer e ke fil e Bible ngak fare rugod ni fak Elsie, ma aram me bing e kanawo’ ni nge pi’ Elsie ‘keru’ ko lumor me sap ko tamilang.’ (Acts 26:18) Ma bochan ni baadag fak me fel’ u wan’ Elsie ni nge fil fare ke babyor ni Babyor Rog ni Chep nu Bible. Kan fil e Bible ngak dalip yay u reb e wik nge reb ya ba t’uf ni nguun pi’ e athamgil nga laniyan’. De par nib falfalan’ ko ngongolen e pig ni be un ngay, maku boor e magawon rok. Ma munmun ma ke yog ni nge mu’nag e milekag rok me chuw ko ngongolen e moonyan’ me thap ko bin riyul’ e liyor. Nap’an ni yib e girdi’ ngak ni nge ayuwegrad ko pig, ma ra weliy ngorad ni goo Jehovah e rayog ni nge ayuwegrad ngar siyeged e tin kireb ban’en. Chiney ma Elsie e reb e Pi Mich Rok Jehovah ni ke un ko taufe, ma 14 e girdi’ ko tabinaw rok ni kar uned ko tin riyul’.

11. Piin ni kar ognaged yad ku Jehovah e ke m’agan’rad ngay ni ngar thiliyeged e mang rorad?

¹¹ Boor e girdi’ ni kar ognaged yad ku Got fa binem e duw ni gathi rib gel e pi n’en ni thingara thiliyeged ko yafas rorad. Machane yad gubin e kar piliyegad ya faram e yad ba yam’ ko tirok Got ban’en ma chiney e yad ba fos ko tirok Got ban’en. (Efesus 2:1) Yugu aram rogon ni ka yad bay u fayleng machane gathi yad bang riy. (John 17:15, 16) Aram rogon e pi Kristiano ni kan dugliyrad ni yad “girdien e tharmiy,” e yad bod e “milekag nge wasol.” (Filippi 3:20; 1 Peter 2:11) Kar puluwnaged e yafas rorad ko pi motochiyel rok Got, ya ba t’uf Got rorad nge piin buguli yoror rorad. (Matthew 22:37-39) Da ur ma leked e tin nib siin ban’en ma daan yad ma chogow, ma dar lemnaged ni thingara pared nib fel’ rogon u lan e re fayleng ney. Ya kar yiluyed owcherad ko fa ‘bin nib biech e tharmiy nge bin nib biech e fayleng ni tin nib mat’aw e ngongol e bay i par riy.’​—2 Peter 3:13; 2 Korinth 4:18.

12. Mang e kan reportnag ko fa binem e duw ni be micheg ni nap’an e ngiyal’ ni bay Jesus ma ke pirieg e “girdi’ nu fayleng ni yad be par ni kab michan’rad ngak”?

¹² Nap’an ni yan Abraham nga Kanaan, ma ir nge tabinaw rok e yad be par ni goo yad ma kari mus ni Jehovah e be ayuwegrad. Machane pi Kristiano ney ni yad 316,092 ni ka fin ra uned ko taufe e gathi goo yad. Rriyul’ ni be ayuwegrad Jehovah u daken e kan ni thothup rok ni bod ni rin’ ku Abraham. (Proverbs 18:10) Machane ku be ayuwegrad u daken e “nam” ni bay u ga’ngin e fayleng ma kab boor e girdi’ riy ko boch e nam ko fayleng ko ngiyal’ ney. (Isaiah 66:8) Fa binem e duw ma ke gaman 5,888,650 e girdi’ ko re nam nem ni kar micheged e michan’ rorad ya kar weliyed e tin ni micheg Got ngak e piin buguli yoror rorad. (Mark 13:10) Ma ke gaman 1,186,666,708 e awa ni kar ted ko re maruwel ney, mar gayed e piin ni ba adag e machib. Ma angin ni ke yib riy e 4,302,852 e girdi’ ni kar uned ko Bible study ni yad e piin ni baadag ni nge gel e michan’ rorad. Ma 698,781 e girdi’ ko re “nam” ney ni kar uned ko pioneer kar micheged ni yad ba pasig ko machib mar rin’ed u lan reb e pul fa boch. (Rayog ni ngam guy morngaagen e maruwel ni tay e Pi Mich Rok Jehovah ko page 12 nge mada’ ko 15.) Pi n’en ney e be pi’ e fulweg ko deer ni fith Jesus ni, “Ra sul e en ni Fak e Girdi’ ma gur ra pirieg e girdi’ nu fayleng ni yad be par ni kab michan’rad ngak?”

Par nib Yul’yul’ u Fithik’ e Skeng

13, 14. Mu weliy boch e magawon ni yib ngak Abraham nge tabinaw rok u Kanaan.

¹³ Boor yay ni ke magawon Abraham nge tabinaw rok u Kanaan. Bay biyay ni ke yib e uyungol ngaram ma thingara chuwgad u Kanaan nga ranod nga lan yu Egypt. Machane fare pilung nu Egypt nge fare pilung nu Gerar (nib chugur nga yu Gaza) e kar guyew rogon ngar fekew Sarah ni leengin Abraham ngar parew rok. (Genesis 12:10-20; 20:1-18) Ku immoy e magawon u thilin e pi tachugol gamanman rok Abraham nge pi tachugol gamanman ku Lot, ma aram me dar e gali tabinaw nem. Ma de siin Abraham ye yog ku Lot ni nge mel’eg e binaw ni ra yan i par riy, ma aram me turguy Lot ni nge yan nga lan yu Jordan, ni aram ba binaw ni bod Eden ya fel’ yaan mab yong’ol e but’ riy.​—Genesis 13:5-13.

¹⁴ Ma aram me l’ag Lot ko cham u thilin fare pilung nu Elam ni ba nam nib palog nge pi nam ni be un ngak nge fa lal i mach ni bay u lan e loway nu Siddim. Fapi pilung nu bang e kar gelgad ngak e pi pilung ko re loway nem mar feked boor e chugum rorad nib muun Lot ngay nge tirok ban’en. Faani rung’ag Abraham e n’en ni buch me lol’og e pi pilung nem me fulweg Lot nge tabinaw rok nge urngin e chugum ko pi pilung ko re binaw nem. (Genesis 14:1-16) Machane gathi aram e n’en nth’abi kireb ni buch ku Lot u Kanaan. Dan nang ko mang fan machane ke yan i par nga lan yu Sodom, ni yugu aram rogon nib lingagil e re mach nem ni bochan e ngongol nde yalen ni yad ma rin’ nib elmirin.b (2 Peter 2:6-8) Nap’an ni yib l’agruw e engel ni ngan ginangrad ni ran gathey e re mach nem, me mil Lot nge leengin nge fagal rugod ni fak. Machane de fol e ppin ku Lot ko n’en ni yog e gali engel nem me sap nga tomur ma aram me ngal’ ni bangi sol ni ke el. Ma aram me yan i par Lot nge fagali rugod in fak nga lan ba yiy u Zoar. (Genesis 19:1-30) Dabi siy ni ke magawon laniyan’ Abraham ko re n’ey ya ke un Lot ngak nga lan yu Kanaan ni yad taab tabinaw.

15. Yugu demtrug e pi magawon ni yib ngak Abraham u nap’an ni be par ko tent u lan e binaw nu bang, machane mang lem nib kireb ni ke siyeg?

¹⁵ Kaa lemnag Abraham ni susun ni ngar pired Lot u Ur ni yad urngin e girdi’ ko chitamangin fa ngar pired u Haran ni yad Nahor ni walagen fa? Kaa lemnag ni dayigi par nib pagan’ u lan ba mach ni kan yororiy ma gathi ngar pared u tent? Kaa maruwaran’ ko urngin ban’en ni ke pag ni bochan e nge par ni ir e milekag u lan e binaw nib palog fa? Weliy apostal Paul u morngaagen Abraham nge tabinaw rok ni gaar: “Ma daki sul e lem rorad ko fare nam ni kar chuwgad riy; ya faan mang e yodorom, ma rayog ni ngar sulod.” (Hebrews 11:15) Machane dar sulod. Demtrug e magawon ni yib ngorad ma kar pired ko gin ni ba adag Jehovah ni ngar pired riy.

K’adan’ ko Ngiyal’ Ney

16, 17. (a) Mang boch e magawon ni yib ko pi Kristiano ko ngiyal’ ney? (b) Uw rogon e lem ko pi Kristiano nib fel’? Ma mang fan?

¹⁶ Aram rogon e k’adan’ ni ma tay e pi Kristiano ko ngiyal’ ney. Yad ba falfalan’ ni ngar pigpiggad ku Got machane de mom e par ko Kristiano ko ngiyal’ ney ni tin tomren e rran. Yugu aram rogon ni yad be par u paradis nib spiritual, machane ka yad ba gafgow ko salpiy ni taareb rogon ko piin buguli yoror rorad. (Isaiah 11:6-9) Boor e girdi’ e kar m’ad ni bochan e mahl ko pi nam, ma boch e kar gafgowgad ni bochan ban’en ni buch ni gathi kireb rorad. Ma yad ma k’adan’ u fithik’ e magawon ni yad ba thil ko yugu boch e girdi’ ma yad buch uw. U boor e binaw ma yad ma wereg fare thin nib fel’ ngak e girdi’ ni dariy fan ban’en u wan’rad. Ma boch e girdi’ e ma gafgow ni bochan e piin ni kar ‘makathgad nib togopuluw ngorad’ mi yad “turguy e kireb ko piin dariy e kireb rorad.” (Psalm 94:20, 21, NW) Boch e binaw ni dani togopuluw ko piin Kristiano riy ma yibe pining e magar ngorad ni bochan e ngongol rorad nib fel’ machane, ku yad ba lingagil ya yad ba thil ko piin ni yad ma skul nge piin ni yad ma maruwel​—yad bod Abraham, ni ke par in e duw u lan e tent ma girdi’ u charen e ur pired u lan e mach. Arrogon, daani mom ni ngan par u fayleng ma ngan par nib “dar riy.”​—John 17:14.

¹⁷ Ere ke maadaban’dad ni bochan e kad ognaged gadad ku Got? Gad be lemnag ni manga yugu da pired ni gad bang ko fayleng, ni bod yugu boch e girdi’ fa? Ke kireban’dad ni bochan e pi n’en ni kad paged ni fan ni ngad pigpiggad ku Jehovah fa? Ri danga’! Ya daruda sapgad nga tomur ko tin ni kad paged ya gad manang ni demtrug e n’en ni kad paged ma gathi kab fel’ ko flaab ni bay rodad e chiney nge flaab ni bay nga m’on rodad. (Luke 9:62; Filippi 3:8) Ma rriyul’, nib falfalan’ e girdi’ nu fayleng fa? Bin riyul’ riy e boor i yad e yad be gay e fulweg ko boch e deer ni goo gad manang e fulweg riy. Yad ba gafgow ya dar folgad ko n’en ni gad ma fol riy nthin rok Got ni bay ko Bible. (Psalm 119:105) Ma boor i yad e yad ba adag ni ngar pired nrogon e Kristiano nib fel’ thilin e girdi’ riy ma taareb e michan’ rorad ni bod gadad.​—Psalm 133:1; Kolose 3:14.

18. Mang angin ni ma yib ko pi Kristiano ko ngiyal’ ni dar rusgad ni bod Abraham?

¹⁸ Rriyul’ ni yu ngiyal’ ma thingar dabda rusgad ni bod Abraham u nap’an ni ke lol’og e piin ni kar koled Lot. Machane nap’an ni gad ma yodor ma ma yibnag Jehovah angin ngodad. Susun, boor e fanenikay u Northern Ireland ni bochan e cham nge wagey, ma ba t’uf ni ngan par ndariy e marus ni ngan par u mathilin e re magawon nem. Machane, pi Kristiano nib yul’yul’ e kar folgad ko n’en ni yog Jehovah ku Joshua ni gaar: “Mu gelnigem ma dab mu rus! Dab mu tamdag ma dabi mulan’um, yi gag, Jehovah ni Got rom e gu ba’ rom ko yungi n’en ni bay um man riy.” (Joshua 1:9, NW; Psalm 27:14) U lan in e duw ni ke yan ma kan tay fan e girdi’ ku Jehovah ya kar pired nib mudugil ndar rusgad, ma ngiyal’ ney e rayog ni ngar machibgad nib puf rogorad u lan e re binaw nem ni ga’ngin.

19. Pi Kristiano e kar falfalan’gad ni ngar pired u uw, ma mang wenegan ni ke l’agan’rad ngay nra yib ngorad nfaanra yad ra fol ko n’en ni yog Jehovah?

¹⁹ Dariy tapgin ni nge maruwaran’dad ni demtrug e n’en nra buch ngodad ma faanra gad ra fol rok Jehovah ma tomur riy e ra yan i aw ni ran n’uf Got ma ra yib angin ngodad. Demtrug e magawon nge tin ni kad paged fadad riy, ma dariy ban’en ni gad ba adag ko bin ni ngad pigpiggad ku Jehovah, ma gad falfalan’ u taabang ko pi walag ni Kristiano ma gad sap nga m’on ko yafas ni ndariy n’umngin nap’an ni ke micheg Got ni bayi pi’.

[Boch e Thin nra Tamilangnag Murung’agen]

Ka Ga Manang?

◻ Mang fan nib t’uf e michan’ nib gel?

◻ Uw rogon ni dag Abraham ni ba gel e michan’ rok?

◻ Uw rogon nib peth e ognagey ku Got nge ngan thiliyeg boch ban’en ko par?

◻ Mang fan ni gad ba falfalan’ ni ngad pigpiggad ku Got ni yugu demtrug e pi magawon ni ma yib ngodad?

[Sasing ko page 7]

I m’agan’ Abraham ngay ni nge thiliyeg boch ban’en ko par rok ni nge yog ngak e n’en ni ke micheg Got ni bayi pi’

[Sasing ko page 9]

Bay e mich riy ni ke pirieg Jesus e “girdi’ nu fayleng ni yad be par ni kab michan’rad ngak” u nap’an e ngiyal’ ni bay