“Mfal’eg Gum’erchaem Nge Mudugil”

“Thingari gum’an’med, ni fan e nge yog ni mu ngongliyed e tin nib m’agan’ Got ngay me yog ngomed e tin ni ke yog nra pi’ ngomed.”​—HEBREWS 10:36.

1, 2. (a) Mang e ke buch ko boch e Kristiano u nap’an e bin som’on e chibog? (b) Mang fan nib mom ni nge war e michan’?

DARIY yugu be’ ni ke yoloy e thin ko Bible ni ke weliy u morngaagen e michan’ ni kab gel rok apostal Paul. Ma boor yay ni ke weliy u morngaagen e piin ni ke war e michan’ rorad ara ke m’ay. Susun, Hymenaeus nge Alexander “e kar kirebnagew rogon nib mich Kristus u wan’row.” (1 Timothy 1:19, 20) Ma ke digey Demas Paul ya “ke t’uf rok e ngongol nu roy u fayleng.” (2 Timothy 4:10) Ma boch e girdi’ e dar ngongolgad nib puluw ko ngongol ko Kristiano me ere “kar n’aged rogon nib mich Got u wan’rad.” Ma yugu boch e girdi’ e kan bannagrad ko gonop ni googsur ma “da ku ranod u rogon kanawoen nib mich Got u wun’uy.”​—1 Timothy 5:8; 6:20, 21.

² Mang fan ni kar wargad ko pi n’en nem ni yad e pi Kristiano ni kan dugliyrad? Ya, “ra nge michan’dad ma aram e ke pagan’dad ko pi n’en ni ir e ke l’agan’dad ngay, ma ke michan’dad ko pi n’en ndarid guyed nga owchedad.” (Hebrews 11:1) Ma michan’dad ko tin darid guyed nga owchedad. Ma de t’uf e michan’ ni fan ko tin ni yima guy nga owchey. Kab mom ni ngan athamgil ni fan ko fel’ rogon ni yima guy ko bin ni ngan athamgil ni fan ko fel’ rogon nib spiritual. (Matthew 19:21, 22) Boor ban’en ni yima guy​—ni bod e “tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad”​—pi n’en ni ri baadag dowdad nde flont ma rayog ni nge n’igin nge war e michan’ rodad.​—1 John 2:16.

3. Miti mang michan’ ni ba t’uf ni nge yog ko pi Kristiano?

³ Machane gaar  Paul, “en nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.” Aram rogon e michan’ ku Moses. Ya i “par ni ke yip’ owchen ko tin ni ka ba’ nga m’on ni bayi pi’ Got ni puluwoy” me par ni “gowa ke guy fare Got ndab ni guy nga owchey.” (Hebrews 11:6, 24, 26, 27) Aram rogon e michan’ nib t’uf ko piin Kristiano. Rogon ni kan weliy ko fa binem e article ma i dag Abraham e kanawo’ nib fel’ ko re n’ey.

Kanawo’ ni Dag Abraham ko Michan’uy

4. Uw rogon ma michan’ rok Abraham e ke gagiyegnag e par rok?

⁴ Immoy Abraham u Ur u nap’an ni ke yog Got ngak ni bayi mang chitamangin ba owchen ni ra yibnag e flaab ko urngin e girdi’ ko pi nam. (Genesis 12:1-3; Acts 7:2, 3) Bochan e re thin nem me fol Abraham ku Jehovah, me yan nga Haran nge migid me yan nga Kanaan. Mu rom e ke yog Jehovah ngak riy ni bayi pi’ e re binaw nem ko piin ni owchen Abraham. (Genesis 12:7; Nehemiah 9:7, 8) Machane, boor e n’en ni yog Jehovah e ra lebug u tomren ni ke yim’ Abraham. Susun, dariy biyay ni ke tafanay Abraham e binaw nu Kanaan​—kari mus ni fare bokngo nu Machpelah, ni ke chuw’iy ni fan ko yam’. (Genesis 23:1-20) Machane kaa michan’ ko n’en ni yog Jehovah. Ma ke michan’ ko ngiyal’ ni be sonnag “fare binaw ni Got e ke gonopiy yaan ke toy, ni fare binaw ni ba’ taan u but’ ndabi chuw biid.” (Hebrews 11:10) Bochan ni ke michan’ ngak Got ni aram rogon ma aram e n’en ni ke ayuweg u n’umngin nap’an e yafos rok.

5, 6. Uw rogon ni kan skengnag e michan’ rok Abraham ni fan ko n’en ni yog Jehovah ngak ni bayi pi’?

⁵ Ba tamilang e re n’em ko n’en ni kan micheg ngak Abraham ni piin owchen e bay ra manged ba nam nib baga’. Ra nge riyul’ e re n’ey ma ba t’uf ni nge diyennag Abraham e bitir ni pumoon, ma ke son nib n’uw nap’an mfini taw’athnag me diyennag e bitir. Dada nanged ko in e duw rok u nap’an ni ke yog Got e pi thin nem ngak, machane nap’an ni ke milekag iyan nga Haran, ma dawori pi’ Jehovah e bitir ngak. (Genesis 11:30) Immoy u Haran nib n’uw nap’an ya ke fek ‘urngin ban’en ni immoy rorad nge urngin e sib ni yog ngorad u Haran’ ma aram ma ranod nga Kanaan, ma ke gaman 75 e duw rok ma 65 e duw rok Sarah. Ma dawora fakew e bitir. (Genesis 12:4, 5) Nap’an ni ke pag 70 e duw rok Sarah, me lemnag ni kaygi pillibthir ma dabkiyog ni nge diyennag e bitir. Ma aram me fol ko yalen ko ngiyal’ nem me pi’ Hagar ni sib rok ngak Abraham, me diyennag bochi pagal. Machane gathi ir fare tir ni kan micheg ngak Abraham. Munmun ma kan nog ku Hagar nge bitir rok ni nga ranow. Ma i wenig Abraham ku Jehovah ni fan ngorow ma aram me yog Jehovah ni bayi fl’eg waathan Ishmael.​—Genesis 16:1-4, 10; 17:15, 16, 18-20; 21:8-21.

⁶ Nap’an ni ke taw ko ngiyal’ nib m’agan’ Got ngay​—ni ba ngiyal’ nib n’uw nap’an u tomren ni kan nog e pi thin nem​—ma ke 100 e duw rok Abraham me 90 e duw rok Sarah aram nap’an me gargeleg bochi pagal ni Isak. Rib fel’ e re n’em! Ya rogon nib puluw ko re wu’ i mabgol nem e bod e fas ko yam’ ya dowrow e gowa “ba yam’” ma aram me sum reb e yafos nib biech riy. (Roma 4:19-21) Ke n’uw nap’an ni kar songow, machane nap’an ni ke lebug e n’en ni kan micheg, ma kari felan’row ngay.

7. Uw rogon ma michan’ e ba l’ag ko gum’an’?

⁷ Kanawo’ ni dag Abraham ko michan’ e be tamilangnag ngodad ni michan’ e gathi fan ko ba ngiyal’ nib ngoch nap’an. I puluwnag Paul e michan’ ko gum’an’ faani gaar: “Ya thingari gum’an’med, ni fan e nge yog ni mu ngongliyed e tin nib m’agan’ Got ngay me yog ngomed e tin ni ke yog nra pi’ ngomed. . . . Gathi gadad e piin ni kar pied keru’dad ngak Got kar maloggad; ya gadad e ke michan’dad ngak Kristus kad thapgad ngak Got.” (Hebrews 10:36-39) Boor e girdi’ ni ke n’uw nap’an ni kar sonniged e ngiyal’ nra lebug e pi n’en ni kan micheg ngorad. Boch i yad e kar songad n’umngin nap’an e yafas rorad. Ma michan’ rorad e ke ayuwegrad kar gum’an’gad. Ni bod Abraham, mab mutrug ni ra pi’ Jehovah e taw’ath ngorad ko ngiyal’ nib m’ag ngay.​—Habakkuk 2:3.

Ngan Motoyil ku Got

8. Uw rogon ni gad ma motoyil ku Got ko ngiyal’ ney, ma mang fan ni aram e n’en nra gelnag e michan’ rodad?

⁸ Aningeg ban’en ni ke ayuweg Abraham me par nib gel e michan’ rok, ma ku rayog ni nge ayuwegdad. Som’on e ke dag ni ke ‘mich u wan’ ni ba’ Got’ ya ke motoyil ku Jehovah u nap’an ni ke non. Ere ba thil ko piyu Jew u nap’an Jeremiah ya ke mich Jehovah u wan’rad machane de michan’rad ko thin rok. (Jeremiah 44:15-19) Ngiyal’ ney ma ma non Jehovah ngodad u daken e Bible, ni aram e Thin rok ni ke thagthagnag nga laniyan’ e girdi’, me yog Peter ni aram e bod ba “magal ni be mat ramaen u fithik’ e lumor . . . u gum’erchamed.” (2 Peter 1:19) Nap’an ni gad ma poy e Bible, ma yibe “duruw’iydad ko thin ko mich u wun’uy ngak Kristus.” (1 Timothy 4:6; Roma 10:17) Ma ngiyal’ ney ni tin tomren e rran ma “fare tapigpig nib yul’yul’ mab gonop” e be pi’ e ggan nib spiritual ko “ngiyal’ ni yima pi’ riy,” mi yad weliy ko uw rogon ni ngan fol ko thin ko Bible ma yad ma tamilangnag e thin ni kan yiiynag u lan e Bible. (Matthew 24:45-47) Ran motoyil ku Jehovah u daken fare tapigpig nem ma aram rogon ra gel e michan’.

9. Mang wenegan nra yib nfaanra rriyul’ ni ke mich u wan’dad e n’en ni ke l’agan’ e Kristiano ngay?

⁹ Michan’ rok Abraham e ba l’ag ko n’en ni ke athapeg. “Par Abraham ni kab mich Got u wan’ ma be l’agan’ ko tin ni ke yog Got ngak, ma aram me yog ni mang chitamangin boor e nam.” (Roma 4:18) Aram e bin l’agruw e n’en nra ayuwegdad. Susun ndabda paged talin ni Jehovah e ma “tow’athnag e piin ni yad be gayiy Got.” Yog apostal Paul ni gaar: “Aram fan ni gadad be athamgil ma ba gel e maruwel ni gadad be tay, ni bochan e ke l’agan’dad ngak Got ni be par nib fos.” (1 Timothy 4:10) Faanra rriyul’ ni ke mich u wan’dad e n’en ni ke l’agan’ e piin Kristiano ngay ma rogon ni gad ma par e ra m’ug e michan’ rodad, ni bod Abraham.

Non ku Got

10. Miti mang meybil ni ra gelnag e michan’ rodad?

¹⁰ I non Abraham ku Got, ma aram e bin dalip i n’en ni ke gelnag e michan’ rok. Ngiyal’ ney ma rayog ni ngad nonad Jehovah u daken e meybil ni aram ba taw’ath ni ke yog ni bochan Jesus Kristus. (John 14:6; Efesus 6:18) Tomren ni ke weliy Jesus e fanathin ni be tamilangnag fene ga’ fan e meybil me fith e deer ni gaar: “Nggog ngomed nra turguy ni nge ayuwegrad me rin’ nib papey. Machane ra sul e en ni Fak e Girdi’ ma gur ra pirieg e girdi’ nu fayleng ni yad be par ni kab michan’rad ngak?” (Luke 18:8) Rogon e meybil ni ma gelnag e michan’ e gathi yugu ma meybil nder lem. Ya ba toar ma bay fan. Susun, baga’ fan ni ngad meybilgad u polo’ i gum’erchadad u nap’an ni bay ban’en ni baga’ fan ni thingarda turguyed fa nap’an ni ke magawon lanin’dad nga ban’en.​—Luke 6:12, 13; 22:41-44.

11. (a) Uw rogon ni kan gelnag Abraham u nap’an ni ke bing gum’erchaen ngak Got? (b) Mang e rayog ni ngad filed rok Abraham?

¹¹ Nap’an ni ke pillibthir Abraham ma dawori pi’ Jehovah owchen ni ke yog nbayi pi’, ma aram me non ku Got u morngaagen e re n’em. Me fl’eg Jehovah laniyan’. Ma mang wenegan? “Me pagan’ Abraham ko tin ni ke yog Jehovah, ma aram me matheeg Jehovah ngak Abraham ni be’ ni ke mat’aw ni bochan e ke pagan’ ko tin ni ke yog ngak.” Me pi’ Jehovah e pow ngak ni nge micheg e n’en ni yog ngak. (Genesis 15:1-18) Faanra gad ra bing gum’erchadad ku Jehovah u fithik’ e meybil ma nge michan’dad ko n’en ni yog Jehovah u lan e Thin rok ni bay ko Bible, ma gad fol rok u fithik’ e michan’, ma aram ma ra gelnag Jehovah e michan’ rodad.​—Matthew 21:22; Jude 20, 21.

12, 13. (a) Uw rogon ni kan tow’athnag Abraham faani fol ko n’en ni yog Jehovah ni nge rin’? (b) Mang e ra gelnag e michan’ rodad?

¹² Bin dalip e n’en ni ke gelnag e michan’ ku Abraham e ayuw ni pi’ Jehovah ngak u nap’an ni ke fol ko n’en ni yog Got ni nge rin’. Nap’an ni lol’og Abraham Lot nge ayuweg u pa’ fapi pilung, me ke ayuweg Jehovah ni nge gel ngorad. (Genesis 14:16, 20) Nap’an ni par Abraham ni bod e milekag u lan fare binaw ni ke yog Got ni bayi tafanay e piin owchen, ma ke flaabnag Jehovah me yognag boor e chugum ngak. (Mu taarebnag ko Genesis 14:21-23.) Me pow’iy Jehovah fare tapigpig rok ni nge pateg reb e ppin nib fel’ nge mang leengin Isak. (Genesis 24:10-27) Arrogon, i Jehovah “e ke fal’eg rogon Abraham u urngin ban’en ni i rin’.” (Genesis 24:1) Ere kari gel e michan’ rok ma rib fel’ thilrow Jehovah ma aram me pining Jehovah Abraham ni gaar “fager rog.”​—Isaiah 41:8; James 2:23.

¹³ Rayog ni nge gel e michan’ rodad ni aram rogon ko ngiyal’ ney? Arrogon. Faanra gad bod Abraham ma gad skengnag Jehovah ya ngad folgad ko n’en ni yog, ma ra flaabnagdad, ma aram e ra gel e michan’ rodad. Fare 1998 Service Year Report e be dag ni boor e girdi’ e kan taw’athnagrad u nap’an ni kar folgad ko motochiyel rok ni ngan wereg fare thin nib fel’.​—Mark 13:10.

Ba Report ko Michan’ ko Ngiyal’ Ney

14. Uw rogon ni ke flaabnag Jehovah fare maruwel u nap’an ni kan wereg fare tract ni Kingdom News No. 35?

¹⁴ Nap’an e pul ni October 1997, ma fare report ko fare babyor ni kan wereg u ga’ngin e fayleng ni Kingdom News No. 35 e be dag ni ke yib angin, ni bochan e Pi Mich ni yad bokum milyon ni ur pasiggad i wereg e pi babyor nem. Aram rogon u Ghana. Ke chugur ni  2.5 milyon yang e babyor ni kan wereg u aningeg mit e thin ma ke chugur ni 2,000 e girdi’ ni ur ninged e Bible study ni bochan. U Cyprus ma l’agruw e Pi Mich e kar weregew fare Kingdom News ma reb e prist e be lekrow. Munmun mar piew ba yang e Kingdom News ngak. Machane kan pi’ ba yang ngak faram me gaar: “Kari gu adag e pi thin ni bay riy me ere gu ba adag ni nggu pining e magar ko fapi girdi’ ni kar fl’eged.” U Denmark ma 1.5 milyon yang e Kingdom News e kan wereg ma ke yib angin. Reb e ppin ni ma maruwel ko public relations e ke gaar: “Re gi babyor ney e bay e thin riy nib puluw ko urngin e girdi’. Ma ba mom ni ngan nang fan ma ma pug lanin’uy ma ma n’igin ni ngam mu adag ni ngkum fil boch ban’en. Ri ma kan ko n’en ni kan yangliy!”

15. Mang boch ban’en ni buch ni ma dag ni ke flaabnag Jehovah e athamgil ni kan tay ni ngan machibnag e girdi’ u gubin yang?

¹⁵ Nap’an e 1998 ma kan athamgil ni ngan machibnag e girdi’ u gubin yang ma gathi ke mus u taferad. U Côte d’Ivoire ma ba wu’ i mabgol ni yow e missionary e ka ranow ko 322 e barkow ni bay u gampek. Kar weregew 247 e babyor nge 2,284 e magazine nge 500 e brochure nge bokum miriay yang e tract nge boch e video ni rayog ni nge guy e sala u nap’an ni yad be yan u maday. U Canada ma ke yan reb e Mich nga tafen e mongongol karro. Fa an ni ir e fen e ba adag e machib me ere ke par fare walag u rom mi yow non ni aningeg nge baley e awa n’umngin nap’an, machane n’umngin nap’an ni kar machibgow e ke gaman reb e awa nge boch ya kan machib ko ngiyal’ ndariy be’ ni ke yib ngaram. Munmun ma kan dugliy ni ngar studygow ko 10:00 p.m. Machane yu ngiyal’ e ke pag lukngun e nep’ nfin ra studygow iyan ko l’agruw e kolok ni kakadabul. Dabi siy nib mo’maw e re n’em machane ke yib angin. Ya ke turguy fare moon ni nge tal ko maruwel ko Madenom ni fan ni nge un ko muulung. Ma munmun ma ir nge tabinaw rok e kar mon’oggad iyan.

16. Mang boch ban’en ni be dag ni fagali babyor ni Mang e Ba T’uf nge Knowledge aram e talin e maruwel ni baga’ fan ni ngan machibnag e girdi’ min fil e Bible ngorad?

¹⁶ Fare ke brochure ni Mang e Ba T’uf ni Ngada Rin’ed ku Got? nge fare ke babyor ni Knowledge That Leads to Everlasting Life e aram e talin e maruwel nib baga’ fan ni fan ni ngan machibnag e girdi’ min fil ban’en ngorad. U Italy ma kan pi’ ba yang e tract ni Kingdom News ngak reb e sibester ni be sonnag e bus. Bin migid e rran ma kan pi’ fare babyor ni Mang e Ba T’uf ngak me fek. Mu tomren ma gubin e rran e kan fil e Bible ngak ni 10 ara 15-minute n’umngin nap’an ko gin ni ma tal e bus riy. Reb nge baley e pul u tomren ma ke turguy ni nge chuw ko convent me sul nga tabinaw u Guatemala ni nge ul’ul’ i fil e Bible. U Malawi ma be’ nib pasig ko teliw rok ni Lobina fithingan e de falfalan’ ya fapi rugod ni fak e be fil e Bible ko Pi Mich Rok Jehovah. Machane fapi rugod e kar weliyed e thin riyul’ ko Bible ngak e chitiningirad. Nap’an e June ko 1997, ma guy Lobina fare ke babyor ni Knowledge ma ke guy boch e thin ni ke pug e tafinay rok ni “Tamilangan’ ni ma Pow’iyey Iyan.” Ma nap’an e pul ni July ma ke felan’ ni nge fil e Bible. Ma nap’an e pul ni August me un ko fare district convention me motoyil ko urngin ban’en ni kan weliy. Ma nap’an ni taw nga tungun e re pul nem me chuw ko teliw rok ma ke bung rogon ni nge mang reb e publisher ni dawori un ko taufe. Kan taufenag ko November 1997.

17, 18. Uw rogon ni pi video ko Society e ke ayuweg e girdi’ ni ngar “guyed” e tirok Got ban’en?

¹⁷ Pi video ko Society e ke ayuweg boor e girdi’ ni ngar “guyed” e tin nib spiritual ban’en. U Mauritius me chuw reb e pumoon ko teliw rok ya bochan e de taareban’ e girdi’ riy. Be’ ni ir e missionary e ke dag ngak rogon ni ma par e Pi Mich Rok Jehovah nib taareb lanin’rad, me dag fare video ni United by Divine Teaching. Ri ba adag fare moon e re n’em me gaar: “Gimed e Pi Mich Rok Jehovah e goo kam thapgad nga Paradis!” Ke felan’ ni ngan fil e Bible ngak. Reb e walag ni ppin u Sapan e ke dag ngak e an figirngin ni de mich Got u wan’ fare video ni Jehovah’s Witnesses​—The Organization Behind the Name, ma aram min k’aring ni nge un ko fol Bible. Ma tomren ni ke guy fare video ni United by Divine Teaching, ma ba adag ni nge mang reb e Mich Rok Jehovah. Ma fare video ni dalip guruy ni The Bible​—A Book of Fact and Prophecy e ke ayuweg ni nge fol ko thin ko Bible ko yafas rok. Ma fare video ni Jehovah’s Witnesses Stand Firm Against Nazi Assault e tamilangnag ngak ni ma gelnag Jehovah e girdi’ Rok ko togopuluw ni ma tay Satan ngorad. Ke un e re moon nem ko taufe ko October 1997.

¹⁸ Aram boch e girdi’ ni kan ayuwegrad ko fa binem e duw ma ka bay boor. Yad ma dag ni ma maruweliy e Pi Mich Rok Jehovah e michan’ rorad ma be gelnag Jehovah e michan’ rorad ya be tow’athnag e tin ni yad ma rin’.​—James 2:17.

Ngan Muruwliy e Michan’ ko Ngiyal’ Ney

19. (a) Uw rogon ni kab fel’ salpedad ku Abraham? (b) Uw urngin e girdi’ ni kar uned ko fare madenom ko yam’ ni tay Jesus? (c) Mang boch e nam nib lingagil ni bochan urngin e piin ni kar uned ko fare Puguran ko fa binem e duw? (Mu guy fare chart ko page 12 nge mada’ ko 15.)

¹⁹ U boor e kanawo’ ma gadad ko ngiyal’ ney e kab fel’ salpedad ku Abraham. Ya gad manang ni ke lebguy Jehovah urngin ban’en ni ke micheg ngak Abraham. Ya pi fak Abraham e kar tafanayed fare binaw nu Kanaan, ma kar manged ba nam nib gel. (1 Kings 4:20; Hebrews 11:12) Maku gonapan 1,971 e duw u tomren ni chuw Abraham u Haran, ma Jesus ni be’ ni owchen, e ke un ko taufe ni John ni Ta taufe e taufenag u fithik’ e ran nge mu’ ma Jehovah e taufenag ko kan ni thothup me mang fare Messiah, ni Owchen Abraham u rogon nib sor fan ko tirok Got ban’en. (Matthew 3:16, 17; Galatia 3:16) Nap’an e Nisan 14, 33 C.E., me pi’ Jesus e yafas rok nib maligach ni nge biyuliy e piin nra michan’rad ngak. (Matthew 20:28; John 3:16) Ere bokum milyon e girdi’ e rayog ni ngar flaabgad ni bochan. Fa binem e duw ma 13,896,312 e girdi’ ni kar muulunggad u taabang ko Nisan 14 ni ngar madenomnaged e n’en ni rin’ u fithik’ e t’ufeg. Aram e be tamilangnag nib sorok Jehovah, ni ir e An ma Rin’ e tin ni Ke Micheg!

20, 21. Uw rogon ma girdien e pi nam e kar flaabgad u daken Owchen Abraham u nap’an e bin som’on e chibog, ma uw rogon ni kar flaabgad ko ngiyal’ ney?

²⁰ Nap’an e bin som’on e chibog ma boor e girdi’ ko pi nam​—ni yu Israel e som’on​—ni ke michan’rad ngak e re Owchen Abraham ney ma kan dugliyrad ni yad pi fak Got, mar uned ko fare nam nib biech mab spiritual ni fare “Israel rok Got.” (Galatia 3:26-29; 6:16; Acts 3:25, 26) Kan micheg ngorad ni yad ra un nga tharmiy mi yad par u rom ndabra m’ad biid mi yad mang pilung ko Gagiyeg rok Got. Ke mus ni 144,000 e girdi’ e ran taw’athnagrad ni aram rogon ma ka bay boch i yad u fayleng. (Revelation 5:9, 10; 7:4) Fa binem e duw ma 8,756 e girdi’ ni kar micheged ni yad bagayad e pi cha’ nem ya kar uned ko abich nge garbod u nap’an fare madenom ko Puguran.

²¹ Ke chugur ni urngin e Pi Mich Rok Jehovah ko ngiyal’ ney e yad bang ko fare “ulung ni baga’” ni kan yiiynag ko Revelation 7:9-17. Kar flaabgad u daken Jesus, ma aram e ke l’agan’rad ko yafas ndariy n’umngin nap’an u paradis u fayleng. (Revelation 21:3-5) Ma 5,888,650 e girdi’ ni kar wereged e machib ko 1998 ma yad e mich riy ni rriyul’ ni “baga’” e re ulung ney. Ma rib fel’ ni ngan guy ko yay nsom’on ni yu Russia nge yu Ukraine e boor ko 100,000 e girdi’ ni yad e publisher. Ma kub lingagil e report ko yu Meriken ni​—1,040,283 e girdi’ ni yad e publisher ko pul ni August! Aram dalip ko 19 e binaw ni bay boor ko 100,000 e girdi’ ni yad e publisher ko fa binem e duw.

Dabki N’uw Nap’an me Riyul’ e N’en ni Kan Athapeg

22, 23. (a) Mang fan nsusun ni ngad athamgilgad nge mudugil gum’erchadad ko ngiyal’ ney? (b) Uw rogon nrayog ni ngad boded Abraham, ma gathi fa piin ndariy e michan’ rorad ni ke weliy Paul morngaagen?

²² Piin ni kar uned ko fare Puguran e kan weliy ngorad ko uw fene chugur ko ngiyal’ ni bayi lebug e pi n’en ni ke micheg Jehovah. Nap’an e 1914, ma kan pilungnag Jesus ko Gil’ilungun Got u tharmiy, ma aram me tabab ko gagiyeg. (Matthew 24:3; Revelation 11:15) Arrogon, Owchen Abraham e be gagiyeg u tharmiy! Yog James ko pi Kristiano ko ngiyal’ nem ni gaar: “Thingar mpired ni gimed ba gum’an’! Mpired nib mudugil gum’erchamed ko n’en ni ke l’agan’med ngay, ya chirofen ni nge sul Somol riy e ke chugur.” (James 5:8, NW) Ke riyul’ e chiney! Ere bay fan ni nge mudugil gum’erchadad!

²³ Nguuda gelnaged e michan’ rodad ko tin ni yog Got ni bayi pi’ ya ngada filed e Bible u gubin ngiyal’ ma ngada meybilgad nib fel’ rogon. Ma dabi siy i flaabnagdad Jehovah ya nguuda folgad ko Thin Rok. Ma aram e gad ra bod Abraham, ma gathi bod e piin ni ke war e michan’ rorad ke m’ay, ni bod ni yog Paul. Dariy ban’en nra daregdad ko michan’ rodad nib thothup. (Jude 20) Gad ma yibilay ni ra aram rogon urngin e pi tapigpig rok Jehovah u nap’an e duw ni 1999 iyan ndariy n’umngin nap’an.

Ga Manang?

◻ Uw rogon nrayog ni ngad motoyilgad ku Got ko ngiyal’ ney?

◻ Mang angin nra yib ni ngan meybil ku Got u rogon nib toar ma baga’ fan?

◻ Faanra gad ra fol ko n’en ni yog Jehovah ni ngada rin’ed ma uw rogon nra gelnag e michan’ rodad?

◻ Mang boch ban’en ko fare report ko fa binem e duw (page 12 nge mada’ ko 15) ni ga ba adag?

[Chart ko page 12-15]

1998 SERVICE YEAR REPORT OF JEHOVAH’S WITNESSES WORLDWIDE

(Mu guy e re ke babyor ney)

[Sasing ko page 16]

Faanra gad ra motoyil ko Thin Rok Jehovah, ma ra gel e michan’ rodad ko tin ni ke yog nra rin’

[Sasing ko page 18]

Yibe gelnag e michan’ rodad u nap’an ni gad ra un ko machib