Ngan Nameg e Bin Riyul’ e Flaab

1, 2. Mang fan ni gubin ngiyal’ nra i moy e girdi’ ni gafgow ko biney e m’ag ni gad be par riy?

NGIYAL’ NEY e bay boch e girdi’ ndemtrug gelngin e maruwel ni yad be tay ma der gaman puluwrad ni ngar yognaged e tin nib t’uf ko par rorad, ma boch e girdi’ e kaygi pag urngin e salpiy rorad. Bod ni, boor e girdi’ nib mo’maw’ ni ngar pirieged e maruwel. Ma boch e yad be tay e yafos rorad nga thatharen e riya’ ni fan e nga ranod ra pared nga boch e nam nib fel’ rogon e par riy. Mus ko pi nam nib fel’ rogon ni boor e girdi’ ni gafgow riy. Bin riyul’ riy e, ke yoor e girdi’ ni gafgow ko girdi’ nib flaab. Rogon ni kan susunnag e 1 e pasent ko tin th’abi flaab e girdi’ u roy u fayleng e taareb urngin e salpiy ni bay rorad nga urngin e salpiy ni bay rok gubin e girdi’ u roy u fayleng ni kan puthuy nga taabang. Yugu aram rogon ndabiyog ni ngan micheg e re n’ey, machane bokum bilyon e girdi’ u roy u fayleng e ri yad ba gafgow, ma boch e girdi’ e kaygi pag urngin e salpiy rorad. I guy Jesus nriyul’ e re n’ey, ere aram fan ni yog ni gaar: “Piin ni gafgow e gubin ngiyal’ ni yad ba’ romed.” (Mark 14:7) Mang fan ni be buch e re n’ey?

² Manang Jesus ndabi thil rogon e siyobay nge rogon e maruwel ko salpiy ni yibe tay u roy u fayleng nge taw ko ngiyal’ ni ke yib Gil’ilungun Got. Be yog e Revelation 18:3 ni fapi “girdien e tafolchuway’” ara pi siyobay, nge pi am, nge pi yurba’ i teliw u roy u fayleng e goo ba muun ko re fayleng rok Satan ney. Yugu aram rogon nder un e girdi’ rok Got nga ngongolen e am nge pi yurba’ i teliw, machane yooren i yad e dabiyog ni ngar pared ndab ra uned ko pi n’en ni yima rin’ u roy u fayleng ni bay rogon ko siyobay nge salpiy.

3. Mang deer e gad ra weliy e fulweg riy?

³ Gadad e piin Kristiano e ba fel’ ni ngad fal’eged i yaliy rogon ni gad ma lemnag ngongolen e siyobay nge rogon ni yima maruwel ko salpiy ko re fayleng ney. Ere, ba fel’ ni ngad fithed gadad ni nge lungudad: ‘Uw rogon ni nggu maruwel ko pi flaab ni bay rog u reb e kanawo’ nra m’ug riy ni gub yul’yul’ ngak Got? Uw rogon ni nggu buchuuwnag e tayim rog ni fan ko pi n’en ni yima rin’ u roy u fayleng ni bay rogon ko siyobay nge salpiy? Mang boch ban’en ni ke buch rok boch e walag ni be micheg ni pi tapigpig rok Got e ngiyal’ ney e rib pagan’rad ngak?’

FARE FANATHIN NI MURUNG’AGEN FARE MOON NDE MAT’AW NI MA KOL BABYOREN E CHUGUM

4, 5. (a) Mang e buch ko fare moon ni ma kol babyoren e chugum ko masta rok ni faani weliy Jesus murung’agen ko fanathin rok? (b) Mang e fonow ni pi’ Jesus ngak pi gachalpen?

⁴ Mu beeg e Luke 16:1-9a. Fare fanathin rok Jesus ni murung’agen be’ nib moon ni ma kol babyoren e chugum ko masta rok e ra k’aringdad ni ngad fal’eged i lemnag e re n’ey. Tomuren nnog ngak fare masta ni be adbey e re moon nem e salpiy rok, ma aram me maruwel fare moon ko “gonop” rok ni nge yognag “boch e fager” ngak ni yad ra ayuweg u nap’an ni kan chuweg ko maruwel rok.b Gad manang nder yog Jesus ngak pi gachalpen ni ngar uned ko sasalap ya nge yag e tin nib t’uf ko par rorad ko re fayleng ney. Bin riyul’ riy e, yog ni yigoo “girdi’ nu roy u fayleng” e aray rogon e ngongol rorad. Machane, i weliy e re fanathin ney ni nge fil ban’en nib ga’ fan ngak pi gachalpen.

⁵ Manang Jesus ni yooren pi gachalpen e ra mo’maw’ ngorad ni ngar yognaged e tin nib t’uf ko par rorad u lan e re fayleng ney nde mat’aw, ni bod rogon fare moon ni ke mada’nag ba magawon nrib ga’. Ere, aram fan ni yog ngorad ni gaar: “Mmaruwelgad ko pi flaab ko re fayleng ney nde mat’aw ngam yognaged boch e fager ngomed, ya nap’an e nge m’ay e pi flaab nem, ma rayog ni ngar ayuweged gimed [ni aram Jehovah nge Jesus] u nap’an ni kam marod ko tabinaw romed ni bayi par ndariy n’umngin nap’an.” Ere, mang e gad be fil ko re fonow ney ni pi’ Jesus?

6. Uw rogon ni kad nanged ni pi n’en ni yibe rin’ u roy u fayleng ni bay rogon ko siyobay nge salpiy e gathi bang ko n’en nib m’agan’ Got ngay?

⁶ Yugu aram rogon nde weliy Jesus fan ni yog “nde mat’aw” e pi flaab ni bay ko re fayleng ney, machane be tamilangnag e Bible ni pi n’en ni yibe rin’ u roy u fayleng ni bay rogon ko siyobay nge salpiy e gathi bang ko n’en nib m’agan’ Got ngay. Ba gaman e tin nib t’uf rok Adam nge Efa ni i pi’ Jehovah u lan fagi milay’ nu Eden. (Gen. 2:15, 16) Boch nga tomuren u nap’an ni pi’ Got gelngin nib thothup ngak e piin ni kan dugliyrad ko bin som’on e chibog, ‘ma dariy bagayad ni yog ni tin ni bay rok ban’en e goo ir e fen, machane urngin ban’en ni bay rorad e ur ayuweged yad ngay ni yad gubin.’ (Acts 4:32) I yiiynag Isaiah ni profet murung’agen ba ngiyal’ nra fel’ rogon e girdi’ ko pi n’en ni bay ko re fayleng ney mar pared u fithik’ ni yad ba felfelan’. (Isa. 25:6-9; 65:21, 22) Machane, chiney ndawor da tawgad ko ngiyal’ nem e ba t’uf ni nge maruwel pi gachalpen Jesus ko “gonop” rorad, ya nge yag nra maruwelgad ko “pi flaab ko re fayleng ney nde mat’aw” ni ngar yognaged e tin nib t’uf ko par rorad ma ka yad be par ni yad ba fel’ u wan’ Got.

ROGON NI NGAD MARUWELGAD KO PI FLAAB KO RE FAYLENG NEY NDE MAT’AW

7. Mang fonow e bay ko Luke 16:10-13?

⁷ Mu beeg e Luke 16:10-13. Fare moon ni weliy Jesus murung’agen ko fare fanathin rok e m’ag fager ngak boch e girdi’ ni bochan e nge fel’ boch ban’en riy ngak. Machane, baadag Jesus ni pi gachalpen e ngar m’ag fagergad ngak e piin ni yad ma par u tharmiy ni gathi bochan e nge fel’ boch ban’en riy ngorad. Tin ni ka bay e verse nga tomuren e re fanathin ney e be tamilangnag nrogon ni gad ma maruwel ko pi “flaab” ni ke yag ngodad ko re fayleng ney e bay rogon ko yul’yul’ rodad ngak Got. N’en ni be yip’ Jesus fan e aram e rayog ni nge m’ug ni gad ba ‘yul’yul’’ u rogon ni gad ma maruwel ko pi flaab ni ke yag ngodad. Ni uw rogon?

8, 9. Mu weliy boch e kanawo’ ni be dag boch e walag riy ni yad ba yul’yul’ u rogon ni yad ma maruwel ko pi flaab ni bay rorad.

⁸ Reb e kanawo’ nrayog ni nge m’ug riy ni gad ba yul’yul’ u rogon ni gad ma maruwel ko pi flaab ni bay rodad, e aram e ngad pied e salpiy ni ayuw ni fan ko fare maruwel ni machib ni yibe tay u ga’ngin e fayleng ni ke yiiynag Jesus murung’agen. (Matt. 24:14) Bay bochi buliyel u India ni immoy bochi kahol ko salpiy ni fen ni ma chaariy e salpiy ngay. Ere, i yon’ e coin nga lan e chi kahol nem, miki tal ndaki chuw’iy e toys ya nge yag ni chaariy e salpiy ko chi kahol nem. Nap’an ni sug fachi kahol, ma aram me fek e salpiy riy nge pi’ ni ayuw ni fan ko fare maruwel ni machib. Reb e walag ni pumoon ni ma par u India ni bay e niw ni fiin e pi’ boor e uchub ni nge unum e pi walag ni yad ma maruwel u reb e ofis rodad ni yima pilyeg e babyor riy ko thin ni Malayalam ndariy puluwon, ya manang ni bayi n’en mab t’uf e uchub rorad. I rin’ e re n’ey ni bochan e rogon u wan’ e kab ga’ angin e binem e ayuw ni ke pi’ ko bin ni nge pi’ e salpiy ni ayuw. Riyul’ nib gonop e re walag ney. Ku arrogon e pi walag u Greece nib ga’ ni yad ma pi’ e olive oil, nge cheese, nge ku boch e ggan nga Bethel ni ngan kay ndariy puluwon.

⁹ Ku bay reb e walag ni pumoon ni be’ nu Sri Lanka ni ma par u yugu reb e nam ni ke pi’ ba naun ni tafen ni bay u rom u Sri Lanka ngak e pi walag ni ngaur ted e muulung nge assembly riy, ma be par boch e walag riy ni yad ma pigpig u polo’ e tayim rorad. Ba mudugil nrayog ni nge yag e salpiy ko re walag ney ko re naun nem, machane ba ga’ e ayuw ni be pi’ ko pi walag ni yad ba gafgow ko salpiy. Ku bay boch e nam ni kan taleg e machib riy ni ma pi’ boch e walag riy e pi naun ni taferad ni ngaun tay e muulung riy. Re n’ey e ma ayuweg e pi pioneer nge ku boch e walag ni yad ba gafgow ko salpiy ni ngar pirieged bang ni ngar uned riy ko muulung nde tolang puluwon.

10. Faanra ud golgad, ma mang boch e tow’ath nra yag riy ngodad?

¹⁰ Pi n’en ni kad weliyed e be dag rogon nib yul’yul’ e girdi’ rok Got ko “tin ni ba achig ban’en,” ni aram e be yip’ fan rogon ni yad ma maruwel ko pi flaab ni ke yag ngorad u roy u fayleng. Ma pi flaab ney e gad manang ndabi chugur ni nge taareb rogon ko flaab ni ke yag ngodad ko tirok Got ban’en. (Luke 16:10) Uw rogon u wan’ e pi walag ney ni yad boch e fager rok Jehovah e pi n’en ni kar paged fan ni fan ko tirok ban’en? Yad manang ni faanra ur golgad, ma aram reb e kanawo’ nrayog ni nge yag ngorad e “tin riyul’” e flaab. (Luke 16:11) Reb e walag nib pin ni gubin ngiyal’ ni ma pi’ e salpiy ni ayuw ni fan ko fare maruwel ni machib e weliy murung’agen reb e tow’ath ni ke yag ngak ni gaar: “Bochan ni gu ma gol, ma bay ban’en ni kug guy ni kari thil u rarogog u lan fapi duw ni ke yan keb i mada’ ko chiney. Kug guy ni bochan e gub gol ko salpiy ni ayuw ni gu ma pi’, ma ke ayuwegeg e re n’ey ni nggu dag e ngongol nib fel’ ngak yugu boch e girdi’. Kug guy ni ke mom ni gu ma n’ag fan e kireb rok yugu boch e girdi’, ma kug nang rogon ni ngaug gum’an’ u puluwrad, nge rogon ni nge dabi kireban’ug nib pag rogon ni faanra de yan i aw ban’en nga rogon nug lemnag, nge rogon ni nge m’agan’ug ko fonow ni kan pi’ ngog.” Boor e girdi’ ni kar guyed ni faanra ur golgad, ma ra ayuwegrad ko tirok Got ban’en.​—Ps. 112:5; Prov. 22:9.

11. (a) Uw rogon nra m’ug ni gad ba “gonop” ni faanra ud golgad? (b) Mang e be rin’ e ulung rok Got ni fan ko girdi’ rok e ngiyal’ ney? (Mu guy e sasing ni bay u tabolngin e re article ney.)

¹¹ Ku ra m’ug ni gad ba “gonop” ni faan gad ra fanay e salpiy nge chugum ni bay rodad ni ngad ayuweged pi walagdad ko machib ni yad ma tay. Piin ni boor ban’en rorad, machane dabiyog u rogorad ni ngar uned ko machib u polo’ e tayim rorad ara ranod ra pared nga yugu reb e nam nib t’uf e ayuw riy ko machib e ku rayog ni ngar felfelan’gad ni bochan e yad manang ni salpiy ni ayuw ni yad ma pi’ e ma ayuweg yugu boch e walag ko machib ni yad ma tay. (Prov. 19:17) Salpiy ni ayuw ni gad ma pi’ e yima fanay ko fare maruwel ni machib min pi’ e pi babyor rodad nge yan nga boch e binaw nrib gafgow e girdi’ riy, machane boor e girdi’ riy ni yad be yib ko tin riyul’. Pi walagdad ni yad ma par u boch e nam ni bod rogon yu Congo, nge Madagascar, nge Rwanda e boor e duw nthingar ra dugliyed ko ngar chuw’iyed e ggan ni fan ko tabinaw rorad fa ngar chuw’iyed e Bible ko chuuw i salpiy ni bay rorad. Ya bay yu ken e Bible ni yima pi’ ni chuway’ ni taareb tolngin puluwon nga puluwon be’ ni ke maruwel u lan reb e wik ara reb e pul. Machane, bochan e salpiy ni ayuw ni ma pi’ e pi walag nge ku bochan ni yibe maruwel ngay u reb e kanawo’ ni nge yan i aw nib “mat’aw” ngak urngin e pi walag, ma aram fan ni ke yarmiy e ulung rok Jehovah ni ngan pilyeg e Bible min wereg ko girdi’ ko pi tabinaw i yan ndariy puluwon nge piin ni yima fil e Bible ngorad nri yad baadag ni ngar nanged e tin riyul’. (Mu beeg e 2 Korinth 8:13-15.) Bochan e re n’ey ma aram fan ni piin ni yad be pi’ e ayuw nge piin ni yibe ayuwegrad e yad gubin ni kar manged fager rok Jehovah.

NGAD LICHNAGED E TAYIM NI FAN KO “PI N’EN NI YIMA RIN’ U ROY U FAYLENG NI BAY ROGON KO SIYOBAY NGE SALPIY”

12. Uw rogon ni dag Abraham ni be pagan’ ngak Got?

¹² Reb e kanawo’ ni ku rayog ni ngad m’ag fagergad riy ngak Jehovah e aram e ngad lichnaged urngin e tayim ni gad ma fanay ni fan ko pi n’en ni yima rin’ u roy u fayleng ni bay rogon ko siyobay nge salpiy, ma gad nameg e bin “riyul’” e flaab. Abraham ni ir be’ ni immoy kakrom nib yul’yul’ ngak Got e digey e flaab rok u Ur nga i par u lan e tent ni bochan e baadag ni nge mang fager rok Jehovah. (Heb. 11:8-10) Gubin ngiyal’ ni i l’agan’ ngak Got ni Ir e Ma Pi’ e bin riyul’ e flaab ngodad, ma de nameg e pi flaab ko re fayleng ney, ya faan gomanga rin’ ni aram rogon ma ra m’ug nder pagan’ ngak Got. (Gen. 14:22, 23) I yog Jesus ngak boch e girdi’ ni ngar folwokgad ko michan’ rok Abraham. Bod ni yog ngak fare moon ni boor ban’en rok ni gaar: “Faanra gab adag ni ngam yal’uw me ere mman ngam pi’ ni chuway’ urngin ban’en ni bay rom ma ga fek e salpiy riy ngam pi’ ngak e piin ni yad ba gafgow, ma aram e ke yog e flaab ngom u tharmiy; ma ga yib ngam un ngog.” (Matt. 19:21) Re moon nem e dariy e michan’ rok ni bod Abraham, machane bay boch e girdi’ ni kar daged nri be pagan’rad ngak Got.

13. (a) Mang fonow e pi’ Paul ngak Timothy? (b) Uw rogon nrayog ni ngad folgad ko fonow rok Paul e ngiyal’ ney?

¹³ Timothy e ir be’ nrib gel e michan’ rok. Tomuren ni yog Paul ni Timothy e ir reb e “salthaw rok Kristus, . . . nib yul’yul’,” ma aram me gaar ngak: “Ba salthaw ni be un ko mahl e der ma un ko tin ni be muruwliy e girdi’ ni gathi salthaw [“pi n’en ni yima rin’ u roy u fayleng ni bay rogon ko siyobay nge salpiy,” NW], ya ba adag ni nge yan nga laniyan’ e en ni pilungen e ba’ rok e salthaw.” (2 Tim. 2:3, 4) Pi gachalpen Jesus e ngiyal’ ney nib muun ngay e pi walag ni yad ma machib u polo’ e tayim rorad ni ke pag reb e milyon urngirad e yad ma athamgil ni ngar folgad ko fare fonow ni pi’ Paul u rogon nrayog rorad. Yad ma siyeg e pi n’en ni ma ognag e re fayleng ney nib chogow e girdi’ riy. Ku yad ma guy rogon ndab ra paged talin fare kenggin e motochiyel ni be gaar: “Ga ra man salpiy ni malfith ma ga ra mang sib ko en ni kam malfith ngak.” (Prov. 22:7, BT) Ri baadag Satan ni nge guydad ni gad be fanay e tayim rodad nge gelngidad ni fan ko pi n’en ni yima rin’ u roy u fayleng ni bay rogon ko siyobay nge salpiy. Bin riyul’ riy e, bay boch ban’en ni gad ma dugliy ni ngad rin’ed ni gad ma aw riy nga tabon e malfith u lan bokum e duw. Bay boch e girdi’ ni yad ma loannag e salpiy nib ga’ ni ngar chuw’iyed ara ra toyed e naun riy, ara ngar chuw’iyed e karrow, ara ngar pied puluwon pi fakrad ni nga ranod ko skul nib tolang, ara ra fanayed ni fan ko madnom ko m’agpa’ rorad. Rayog ni nge m’ug ni gad ba gonop ni faan gad ra momnag e par rodad, ma gad buchuuwnag e malfith rodad, nge urngin e salpiy ni gad be fanay nga boch ban’en, ma gad fanay e tayim rodad ni ngad pigpiggad ngak Got ko bin ni ngad manged sib ko pi n’en ni yima rin’ u roy u fayleng ni bay rogon ko siyobay nge salpiy.​—1 Tim. 6:10.

14. Mang e thingar da dugliyed u wan’dad ni ngad rin’ed? Mu weliy murung’agen boch e walag ni ireray e n’en ni kar rin’ed.

¹⁴ Ra ngad momnaged rogon e par rodad mab muun ngay ni ngad m’oneged Gil’ilungun Got u wan’dad. Bay ba wu’ e mabgol ni immoy ba siyobay rorow ni boor e salpiy ni i yag riy ngorow. Machane, bochan ni yow baadag ni ngar unew bayay ko machib u polo’ e tayim rorow, ma aram mar piew e re siyobay rorow nem, nge bbowoch ni ferow, nge ku boch e chugum rorow ni chuway’. Tomuren e re n’ey, ma aram mar ognagew yow ni ngar unew i pi’ e ayuw ko maruwel ni un tay u Warwick u New York ni yibe toy e bin nib beech e tochuch rodad. Reb e tow’ath ni ki yag ngorow ni yugu ba thil e aram e ke yag ni ngar unew ko pigpig u Bethel u lan in e wik ni yad reb e ppin ni fakrow nge pumoon rok nge gallabthir ko re pumoon nem. Yad gubin ni ur maruwelgad u taabang ni yad be pi’ e ayuw ko re maruwel nem ni un rin’ u Warwick. Ku bay reb e walag nib pin nib pioneer ni ma par u Colorado u Meriken ni pirieg e maruwel u reb e bank nrayog ni nge un ngay ni gathi ba polo’ e tayim rok. Ri baadag e piin ni yad ba ga’ ko re bank nem rogon e maruwel ni i tay. Ere, ra ognaged reb e maruwel ngak u polo’ e tayim rok nib tolang puluwon ko bin baaram e maruwel ni be un ngay. Machane, bochan nre maruwel nem e ra mo’maw’nag ngak ni nge tiyan’ ko machib, ma aram me siyeg ni nge fek. Kemus ni in e walag eray ni kad weliyed murung’agrad ni kar paged fan boch ban’en ya nge yag nra m’oneged e tirok Got ban’en, machane ka boor e walag ni ireray e n’en ni yad be rin’. Faan gad ra dugliy ni ngad m’oneged Gil’ilungun Got u wan’dad, ma aram e gad be dag ni tha’ u thildad Got nge pi flaab ni bay rogon ko tirok ban’en e aram e n’en nth’abi ga’ fan u wan’dad ma gathi chugum ni bay ko re fayleng ney.

NAP’AN NRA M’AY E PI FLAAB U ROY U FAYLENG

15. Mang boch e flaab nra yibnag e bin riyul’ e felfelan’ ngodad?

¹⁵ Ra boor ban’en rok be’ ma aram e gathi be yip’ fan ni be tow’athnag Got. Ya Jehovah e ma tow’athnag e piin ni yad be ‘ngongliy e tin nib fel’.’ (Mu beeg e 1 Timothy 6:17-19.) Bod nnap’an ni nang reb e walag ni ka nog Lucia ngak nib t’uf boch e tamachib u Albania, ma aram me chuw ko gin ni ma par riy u Italy ko duw ni 1993 nge yan i par e ngaram ni yugu aram rogon nder un ko maruwel. Yugu aram rogon me pagan’ ngak Jehovah. I fil e thin nu Albania nge mit ngak mab pag 60 e girdi’ ni fil e Bible ngorad mar uned ko taufe. Yugu aram rogon ni yooren e girdi’ rok Got e darur machibgad u boch e binaw ni aray rogon ni boor e girdi’ riy ni baadag e machib, machane pi n’en ni gad ma rin’ ni ngad ayuweged yugu boch e girdi’ ni ngar pirieged fare pa’ i kanawo’ ni be sor i yan ko yafos mar pared riy e ban’en nrib ga’ fan u wan’dad nge piin ni gad ma ayuwegrad.​—Matt. 6:20.

16. (a) Mang e bayi buch ko pi siyobay ni bay e ngiyal’ ney? (b) Mang e susun ni nge rin’ e re n’ey nga rogon ni gad ma lemnag e pi flaab u roy u fayleng?

¹⁶ I yog Jesus ni gaar: “Nap’an e nge m’ay e pi flaab nem” de gaar, ‘faanra m’ay e pi flaab nem.’ (Luke 16:9) Ngiyal’ ney ko tin tomuren e rran e bay boch e bank ni ke m’ay e salpiy riy, maku bay boch e nam ni be magawon ko salpiy. Machane, dabki n’uw nap’an ma bayi gel e ubchiya’ ko pi magawon ney. Ya bay ni thang e pi am, nge pi yurba’ i teliw, nge pi siyobay ko re m’ag rok Satan ney. Ke yiiynag Ezekiel nge Zefaniah ni profet nra taw ko ngiyal’ nem ma gol nge silber, ni aram e gali n’en ni kab kafram i yib ni ma maruwel e pi siyobay u roy u fayleng ngay nib fel’ rogon, e goo ra aw ni ke m’ay fan. (Ezek. 7:19; Zef. 1:18) Ere gur, ra uw rogon u wan’dad ni faanra gad be n’en ni ngad m’ad ndawor da thapgad ko binem e m’ag, ma gad nang ni kad paged fan e bin riyul’ e flaab ni fan e ngad yognaged e “pi flaab ko re fayleng ney nde mat’aw”? Sana rayog ni ngad lemgad ni bod rogon reb e pumoon ni ke maruwel u n’umngin nap’an e yafos rok ni fan e be nameg ni nge yoor e salpiy rok, me tomur riy me yan i nang ni fapi salpiy ni ke chaariy e dariy reb nib riyul’. (Prov. 18:11) Arrogon, bayi m’ay e pi flaab ni bay u roy u fayleng. Ere, mmaruwel ngay ni ngam ‘yognag boch e fager’ ngom u tharmiy, ya pi n’en ni gad ma rin’ ni fan nga Gil’ilungun Jehovah e aram e n’en nra yibnag e bin riyul’ e flaab ngodad ni aram e flaab ko tirok Got ban’en.

17, 18. Mang e bay nga m’on ni fan ngak e pi fager rok Got?

¹⁷ Nap’an nra yib Gil’ilungun Got, ma aram e daki t’uf ni ngan pi’ puluwon e naun ni yibe par riy ara ngaun loannag e salpiy. Ra yoor e ggan, ma dakuriy puluwon. Dabki t’uf e togta ara falay. Pi fager rok Jehovah e ra fel’ rogorad ko pi n’en nth’abi fel’ ni bay ko re fayleng ney. Gol, nge silber, nge malang nib tolang puluwon e yira fanay ni ngaun nunuw ngay, ma gathi ngaun pi’ ni chuway’ ni nge yag e salpiy riy. Tin th’abi fel’ e ren, nge malang, nge wasey e ra yag ko girdi’ ndariy puluwon ni ngar fanayed ni ngar toyed boch e naun riy nib fel’ yaan ni ngar pared riy. Pi fager rodad e ra ur ayuweged gadad ni bochan e yad baadag ni ngar pied e ayuw, ma gathi bochan e nge yag e salpiy riy ngorad. Gad gubin nrayog ni ngad maruwelgad ko pi n’en nrib manigil ni bay ko re fayleng ney.

¹⁸ Kemus nri in ko pi tow’ath nra yag ngak e piin ni yad ra yognag boch e fager ngorad u tharmiy e kad weliyed murung’agen u roy. Machane, rib gel e felfelan’ nra tay e pi tapigpig rok Jehovah u nap’an ni yad ra rung’ag lungun Jesus ni ke gaar: “Gimed e piin ni ke fal’eg e Chitamag waathmed: mired! Mired ngan pi’ e gin nsuwon Got ngomed, ni kan ngongliy rogon kan tay ni fan ngomed ni ka nap’an e ngiyal’ nsunumiy e fayleng riy.”​—Matt. 25:34.