Taareb e Machib Nde Riyul’ e Ke Sum Boor e Machib Riy
LUKNGUN e bin som’on e chibog me yol Paul ngak e piin Kristiano ni gaar: “Mu guyed rogomed.” Mang e ke ginangrad Paul riy? “Ri kolmed be’ ngam manged kalbus rok ni be’ ni be maruwel ko gonop rok e girdi’ nge sabanban ndariy rogon nga bayang, ni yib ko machib ni sum rok e girdi’.”—Kolose 2:8.
Yugu aram rogon e n’en ni ginangrad Paul riy, machane faani taw nga lukngun e bin l’agruw e chibog, me tabab boch e Kristiano i machibnag boch ban’en ni ke yib ko llowan’ nge gonop ko girdi’. Mang fan? Bochan e yad baadag ni ngar fel’gad u wan’ e piin nib tolang e skul rorad u Roma ya nge yog ni yoor e girdi’ ni ngar pingeged ngar uned ngorad.
Bagayad e pi Kristiano nem e Justin Martyr ni ir be’ nib gilbuguwan e ngiyal’ nem. Ba mich u wan’ nu m’on ni yib Jesus nga fayleng, me yib i m’ug ngak boch e girdi’ nu Greece ni yima yog ni yad ba llowan’ ma yad ba gonop. Rogon ni yog e re moon ney, e bochan ni kan fek e llowan’ nge gonop nge machib ko girdi’ nga lan e teliw ni Kristiano ma aram fan ni ke par ni aram e bin th’abi ga’ e teliw u fayleng.
Bochan e machib ku Justin Martyr ma aram me yoor e girdi’ nra piggad ngar uned ko teliw rok. Machane, bochan taareb e machib nde riyul’ ma aram fan ni ke sum boor e machib ni ke yoor e girdi’ e ngiyal’ ney ni ke mich u wan’rad, ya yad ma lemnag ni aram e machib ni yib ko Kristiano. Rogon ni nge gagiyel e pi machib nde riyul’ ney e ngan taarebrogonnag e n’en ni ke yog boch e babyor ko n’en nri be fil e Bible.
[Picture on page 3]
[Picture Credit Lines on page 3
Devil: Barrators—Giampolo/The Doré Illustrations For Dante’s Divine Comedy/Dover Publications Inc.; angels: Art Resource, NY; trinity relief: Museo Bardini, Florence