Machib Nde Riyul’—2: Piin nib Kireb e Yira Gafgownagrad u Infierno
Uw e sum e re machib ney riy? “U fithik’ urngin e girdi’ ni llowan’ nib ga’ e gonop rorad u Greece kakrom, ma Plato e th’abi elmerin i wereg fare machib u murung’agen e infierno.”—Histoire des enfers (Murung’agen e Infierno), ni yoloy Georges Minois, ko page 50.
“Sogonap’an 1,850 e duw ni ke yan ma immoy boch e Kristiano ni ur skulnaged murung’agen e llowan’ nge gonop ko girdi’ nra adaged ni ngar machibnaged e pi n’en ni kar filed rok boch e girdi’ ni llowan’ e ngiyal’ nem . . . N’en nra machibnaged e aram fare machib ni sum rok Plato.”—The New Encyclopædia Britannica (1988), Volume 25, page 890.
“Machib ko Galesiya e be micheg nriyul’ ni bay e infierno. Yugu ra yim’ be’ nib kireb me yan e yaal rok nga infierno, ara ‘fithik’ e nifiy ndabi math biid’ me par u rom ngi i gafgow ndariy n’umngin nap’an. Bin th’abi gel e gechig ni yira tay ngak be’ u rom e aram e ngan palognag rok Got.”—Catechism of the Catholic Church, 1994 edition, page 270.
Mang e be yog e Bible? “Dab mu tamdaggad ngak e piin ni yad ra li’ e dowef ngem’ machane dabiyog ni ngar li’ed lanin’uy ngem’; mu tamdaggad ngak Got, ye ir e rayog ni nge kirebnag dowey nge lanin’uy u fithik’ e nifiy.”—Matthew 10:28.
Mu tay fanam i yan riy nra gothey Got e dowef nge lanin’uy u fithik’ e nifiy. Piin nib kireb e yira gotheyrad, gathi yira tayrad nga bang ngaur gafgowgad ndariy n’umngin nap’an. Ba tamilang ni be yog e Bible ni “piin nib yam’ e dariy ban’en ni yad manang.” (Eklesiastes 9:5, 10, BT) Fare bugithin ni “fithik’ e nifiy” e kan fek ko fare bugithin ni Greek ni gehenna. Gehenna e aram fithingan ba teloor ni immoy u wuru’ e binaw nu Jerusalem kakrom. Aram e gin ni yima n’ag e yam’ nge dow ngay ngan urfeg. Yigoo girdi’ ni ma lemnag piyu Jew ndariy rogon ni ngan k’eyagrad fa ngar fasgad ko yam’ e yima yin’rad ngaram. Ere, ba puluw ni ngan fanathinnag e Gehenna ko piin ni yad ra yim’ ma dab kur fasgad biid.
Ere gathi aray e bin nib puluw i fan e nifiy ndabi math biid maku ba puluw ko Bible? Mang ban’en nrib gel e kireb riy nra k’aring ba Got ko t’ufeg ni nge gafgownag e girdi’ u bang ni aram rogon? (1 John 4:16) Machane faanra de riyul’ e machib u murung’agen e infierno ara nifiy ndabi math biid, ma uw rogon fare machib u murung’agen e yan nga tharmiy?
Kum guy e pi thin nu Bible ni baaray: Psalm 146:3, 4; Acts 2:25-27; Roma 6:7, 23
BIN RIYUL’ E:
Dar ma gafgownag Got e girdi’ u infierno ara u fithik’ e nifiy ndabi math biid
[Picture on page 5]
[Picture Credit Line on page 5]
Barrators—Giampolo/The Doré Illustrations For Dante’s Divine Comedy/Dover Publications Inc.