Machib Nde Riyul’​—3: Gubin e Girdi’ nib Fel’ e Ra Yan Nga Tharmiy

Uw e sum e re machib ney riy? U tabolngin e bin l’agruw e chibog u tomuren ni ke yim’ e pi apostal rok Jesus, me gel lungun e tin som’on e Padrey ko Galesiya. Ke tamilangnag reb e babyor e machib rorad ni gaar: “N’en ni yad ma machibnag e tomuren nra yim’ be’ ma bay bang ni ma yan e yaal rok ngay ni ngan beechnag mfini yan nga tharmiy nga tagil’ e felfelan’.”​—New Catholic Encyclopedia (2003), Volume 6, page 687.

Mang e be yog e Bible? “Piin ni yad mmat’aw e bay ra pired u daken e binaw [“fayleng,” NW] u fithik’ e gapas, me par ni taferad ni dariy n’umngin nap’an.”​—Psalm 37:29.

Yugu aram rogon ni micheg Jesus ngak pi gachalpen nra ‘ngongliy tagil’rad’ u tharmiy, machane de yog ni gubin e piin ni yad ba mat’aw e yad ra yan nga tharmiy. (John 3:13; 14:2, 3) Gathi yibilay Jesus ni ngan ‘rin’ e tin nib m’agan’ Got ngay u roy u but’ ni bod rogon ni yibe rin’ u tharmiy’? (Matthew 6:9, 10) Ere bin riyul’ riy, e l’agruw yang e gin nra yan e piin nib mat’aw ngay. Buchuuw i yad e ra un ngak Jesus ko gagiyeg u tharmiy, ma yooren i yad e ra par u fayleng ndariy n’umngin nap’an.​—Revelation 5:10.

Kakrom e munmun me thilyeg e bin som’on e teliw e machib rorad. Ere mang e buch? I yog reb e babyor ni gaar: “Bin nib ga’ e teliw e ke yon’ lon Gil’ilungun Got.” (The New Encyclopædia Britannica) I un e teliw ko pi ngongolen e am ma aram mar pared ni ke ga’ lungurad u boor ban’en, ma dakur folgad ko n’en ni yog Jesus ni pi gachalpen e gathi yad bang ko “fayleng.” (John 15:19; 17:14-16; 18:36) Bochan Constantine ni Pilung nu Roma ma aram me thilyeg e bin som’on e teliw boch e machib rorad nib muun murung’agen Got ngay.

Kum guy e pi thin nu Bible ni baaray: Psalm 37:10, 11; John 17:3; 2 Timothy 2:11, 12

BIN RIYUL’ E:

Yooren e girdi’ nib fel’ e yad ra par u fayleng ndariy n’umngin nap’an, ma gathi u tharmiy

[Picture on page 6]

[Picture Credit Line on page 6]

Art Resource, NY