Uw Rogon ni Ke Ayuwegem e Tin Riyul’ u Murung’agen e Nifiy Ndabi Math Biid?
PIIN ma machibnag nnifiy ndabi math biid e aram e gin ni yima gafgownag e girdi’ riy e ri be kirebnag murung’agen Got nge pi fel’ngin. Be yog e Bible nra thang Got e girdi’ ni kireb. (Isaiah 26:14) Machane damumuw nib mat’aw ni ma ta’ Got e gathi gubin ngiyal’.
Dabun Got ni nge gafgownag be’. Ke yog ni ke gaar: “Gimed be finey ma gub adag ni ngug guy be’ nib kireb ni nge yim’?” (Ezekiel 18:23) Faanra dabun Got ni nge yim’ be’ nib kireb, me ere uw rogon me adag ni nga i guy e pi girdi’ nem ni yibe gafgownagrad ni manemus?
Ma dag Got e t’ufeg ni gubin ngiyal’. (1 John 4:8) “Ba fel’ e tin ni ma rin’ [SOMOL] ngak urngin e girdi’, ma ma runguy urngin e tin ni ke sunumeg.” (Psalm 145:9) Maku, baadag Got ni ngad gelnaged e t’ufeg rodad ngak.—Matthew 22:35-38.
Ga Be Pigpig ku Got ni Marus Rom ko Nifiy fa T’ufeg Rom Ngak?
Fare machib nra gafgow e yaal u fithik’ e nifiy e be gelnag fare lem ni ma gafgownagey Got. Machane, en ni ke fil e tin riyul’ u murung’agen Got me t’uf Got rok e ra ayuweg nge dabi rin’ e tin dabun Got. Psalm 111:10 e be yog ni, “Dogwen Somol e ireram tabolngin e gonop; gubin e piin ma folwok rok e ra pi’ e tamilangan’ ngorad.” Re madgun Got ney e gathi marus ko gechig ni ma pi’ Got ya ta’ fan nib gel ngak e en Ta Sunmiy. Ra k’aringdad nge dabda rin’ed e tin dabun Got.
Mu lemnag rogon ni ke thil e ngongol rok Kathleen u nap’an ni fil e tin riyul’ u murung’agen e nifiy ndabi math biid. Ngiyal’ nem ma ke 32 e duw rok ma ka ma fanay fapi falay nib kireb. Gubin ngiyal’ ni ma un ko mur, nge wagey, nge ngongol ndarngal ma ke ngochan’ ngak. Yog ni gaar: “Gu ra sap ngak fakag ni fin taareb e duw rok me lungug, ‘Mu guy e n’en ni gu be rin’ ngak. Yira urfegeg u mit e nifiy ndabi math biid ko re n’ey.’” Ke gay rogon urngin ban’en ni nge tal i fanay e falay ni kireb, machane dariy reb ni ayuweg. Me yog ni gaar, “Gu baadag ni nggu mang be’ nib fel’, machane urngin ban’en u lan e yafas rog nge fayleng ni be k’aring e mochuch ngog. Gowa dariy fan ni nggu mang be’ nib fel’.”
Me yan i mada’nag Kathleen e Pi Mich rok Jehovah. Me yog ni gaar: “Kug fil u Bible ndariy e nifiy ndabi math biid, rib tamilang e re thin nem. Kar gu felfelan’ ni kug nang ndabni urfegeg u fithik’ e nifiy ndabi math biid.” Ma ki fil ni ke micheg Got nra par e girdi’ u fayleng ni manemus ndakuriy e girdi’ ni kireb riy. (Psalm 37:10, 11, 29) Me yog u fithik’ e felfelan’ ni gaar: “Kari yog e bin riyul’ e athap ngog ni nggu par u Paradis ni manemus!”
Gur rayog ni taleg Kathleen i fanay e falay ni kireb ndariy e marus ko nifiy ndabi math biid? Yog ni gaar: “Nap’an ni gu ra yim’ nbochan fapi falay ni kireb, mug meybil ni gu be wenig ngak Jehovah Got ni nge ayuwegneg. Gu ra lemnag rogon laniyan’ ko ngongol ni kireb ma kug dabuy ni nggu kirebnag laniyan’. Me fulweg taban e meybil rog.” (2 Korinth 7:1) Re madgun ney ndabni kirebnag laniyan’ Got e ke ayuweg Kathleen ni nge tal ko ngongol ni ke macham ngay.
Ngan maruweliy nge yog e t’ufeg ngak Got nge madgun nib fel’, ma gathi marus ko gechig, e ra ayuwegdad ni ngad rin’ed e tin nib m’agan’ Got ngay ma gad felfelan’ ni manemus. Fare psalmist e yoloy ni gaar: “Ba felan’ e piin yad ma fol rok SOMOL, ni yad ma par nrogon ni ke yog.”—Psalm 128:1.