Mang e Ma M’ug ko Meybil Rom u Rogon Thilmew Jehovah?
“Ga be rung’ag e meybil, ere urngin e girdi’ e ngar bad ngom.”—PS. 65:2, NW.
1, 2. Mang fan ni rayog ni nge pagan’ e pi tapigpig rok Jehovah ni ngar meybilgad ngak?
MA RUNG’AG Jehovah e meybil ko pi tapigpig rok nib yul’yul’. Ere rayog ni nge pagan’dad ni ma motoyil ko meybil rodad. Yugu aram rogon ni faanra be meybil bokum milyon e Pi Mich Rok Jehovah u taab ngiyal’ ma ‘be rung’ag’ e meybil rorad ni yad gubin.
2 Ke pagan’ David ni ke rung’ag Got e meybil rok ya ke yon’ ba tang ni gaar: “Ga be rung’ag e meybil, ere urngin e girdi’ e ngar bad ngom.” (Ps. 65:2, NW) Ke fulweg Got taban e meybil rok ni bochan e ba yul’yul’ ngak. Rayog ni ngad fithed ni nge lungudad: ‘Ma m’ug ko meybil rog ni ma pagan’ug ngak Jehovah ma liyor rog ngak e ba m’on u wan’ug, fa? Mang e ma m’ug ko meybil rog u murung’ageg?’
Ngam Meybil Ngak Jehovah u Fithik’ e Sobut’an’
3, 4. (a) Susun ni nge uw rogon e lem rodad u nap’an ni gad be meybil ngak Got? (b) Mang e susun ni ngad rin’ed ni faanra bay e denen “ni be magawonnag” lanin’dad?
3 Faanra gad baadag ni nge fulweg Got taban e meybil rodad, ma thingar da meybilgad ngak u fithik’ e sobut’an’. (Ps. 138:6) Thingar dogned ngak Jehovah ni nge skengnagdad ni bod ni yog David ni gaar: “Got, mu sap ngog, ngam guy lanin’ug. Mu skengnigeg ngam nang e n’en ni be magawonnag e lem rog. Ma gguy ko bay e kireb rog fa dariy, ma ga pow’iyeg u daken fare kanawo’ ni dabi mus.” (Ps. 139:23, 24, NW) Gathi kemus ni ngad meybilgad machane ngad paged Got ni nge skengnagdad me fonownagdad ko Thin rok u Bible. Rayog ni nge pow’iydad Jehovah ko “fare kanawo’ ni dabi mus,” ni yan ko yafas ni manemus.
4 Mang e ra buch ni faanra be gafgownagdad “e n’en ni be magawonnag” lanin’dad? (Mu beeg e Psalm 32:1-5.) Faanra da guyed rogon ni ngad mithaged e n’en ni be magawonnag e nangan’ rodad ma rayog ni ngad wargad ni bod ba ke gek’iy ni dakuriy e ran riy u nap’an e yal’. Bochan e denen rok David, ma dakiyog ni nge felfelan’ ma ke magawon laniyan’. Machane ke yog ngak Got e denen rok ma ke felfelan’! Kari felfelan’ David u nap’an ni ke nang ni ke n’ag Jehovah fan e denen rok. Ga ra felfelan’ ni faanra mog e denen rom ngak Got, ma ayuw ko piin piilal ni Kristiano e ku ra ayuweg e piin ni ke war e michan’ rorad.—Prov. 28:13; Jas. 5:13-16.
Mu Wenig Ngak Got ma Ga Pining e Magar Ngak
5. Mang e be yip’ fan ni ngan ning ban’en ngak Jehovah?
5 Faanra bay ban’en ni be magafan’dad ngay, ma susun ni ngad folgad ko fonow ni pi’ Paul ni gaar: “Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med.” (Fil. 4:6) Ra “ngan ning ban’en” ma be yip’ fan ni ngan “wenignag ban’en u fithik’ e sobut’an’.” Ba ga’ ni gad ma wenig ngak Jehovah ni nge ayuwegdad me pow’iydad u nap’an ni ke yib e magawon ngodad fa kan gafgownagdad.
6, 7. Mang fan ni thingar da pininged e magar ngak Got u nap’an ni gad be meybil ngak?
6 Faanra kemus ni ngad meybilgad u nap’an nib t’uf ni nge yog ban’en ngodad, ma mang e be dag e meybil rodad u rogon thildad Jehovah? I yog Paul ni susun e ngad ninged ban’en ngak Got ma gad “pining e magar” riy ngak. Bay fan ni ngad pininged e magar ni bod David ni gaar: “Ba gilbuguwam ma ga ba gel, mab sorom, ma dariy thibngim ma gil’ilungum e ba polo’ u fayleng. Gubin ban’en nu tharmiy ngu fayleng ni goo tirom, me gur e pilung, tagagiyeg ni th’abi tolang u gubin e gagiyeg. . . . Got romad, chiney e gamad be pining e magar ngom, ma gamad be pining e Sorok nga fithingam nib mathangeluwol.”—1 Kron. 29:11-13, BT.
7 Ke pining Jesus e magar ngak Got ko fare flowa nge wain u nap’an fare Abich ko Blayal rok Somol. (Matt. 15:36; Mark 14:22, 23) Thingar da “pininged e magar ngak Somol” ni “bochan e tin nib fel’ ni ke rin’” nge bochan e ma ‘tirigiliy’ e tin nib mat’aw, nge thin rok ni bay u Bible.—Ps. 107:15; 119:62, 105.
Ngan Meybil ni Fan Ngak Pi Walagdad
8, 9. Mang fan ni thingar da meybilgad ni fan ngak e pi Kristiano ni walagdad?
8 Gad ma meybil ni fan ngodad, machane thingar ku da uneged e pi Kristiano ni dad nanged yad ko meybil rodad. Sana de nang Paul e pi Kristiano ni gubin u Kolose machane ke gaar: “Gubin ngiyal’ ni gamow ma pining e magar ngak Got, ni Chitamangin e Somol rodad i Jesus Kristus, ko ngiyal’ ni gamow ma pi’ e meybil romed riy. Ya kug rung’aged rogon fene rib mich Kristus Jesus u wun’med, nge rogon fene rib t’uf romed urngin e girdi’ rok Got.” (Kol. 1:3, 4) Ki meybil Paul ni fan ngak e Kristiano u Thessalonika. (2 Thess. 1:11, 12) Meybil ni aray rogon e ma dag ko uw rogon ni gad ma lemnag e pi walagdad ni Kristiano.
9 Meybil rodad ni fan ngak e piin Kristiano ni kan dugliyrad nge “yugu boch e saf” e ma dag e mich riy ni gadad ma lemnag e ulung rok Got u fayleng. (John 10:16) Ke yog Paul ngak e pi Kristiano ni ngar meybilgad ya ‘nge yog nra weliyed fapi n’en nib mith ko thin nib fel’.’ (Efe. 6:17-20) Ere gad ma meybil ni aray rogon ni fan ngak boch pi walagdad ni Kristiano, fa?
10. Mang angin nra yib ngodad ni faan gad ra meybil ni fan ngak boch i walagdad?
10 Ngan meybil ni fan ngak pi walagdad e rayog ni nge thilyeg e lem rodad. Faan gad ra meybil ni fan ngak be’ ni dubdad daken ma rayog ni nge thil e lem rodad ngad adaged daken. (1 John 4:20, 21) Meybil ni aray rogon e rayog ni nge taarebnag laniyan’ e pi Kristiano. Maku reb riy, e ra dag ni bay e t’ufeg rodad ni bod rogon Kristus. (John 13:34, 35) T’ufeg e aram reb i fel’ngin gelngin Got nib thothup. Ere gad ma meybil ngak Got ni nge pi’ gelngin nib thothup ni nge ayuwegdad ni ngad daged e t’ufeg, felfelan’, gapas, gum’an’, gol, fel’ ngak e girdi’, yul’yul’, sobut’an’, nge t’ar laniyan’, fa? (Luke 11:13; Gal. 5:22, 23) Faan gad ra rin’ ni aray rogon, ma aram e ra m’ug ko thin nge ngongol rodad ni gelngin Got nib thothup e be gagiyegnagdad.—Mu beeg e Galatia 5:16, 25.
11. Mang fan ni rayog ni nga mog ngak pi walagdad nib fel’ ni ngar yibilayed gadad?
11 Faanra kad nanged ni ma guy rogon e bitir rodad u skul ni ngar sasalapiyed e skeng rorad, ma thingar da meybilgad ni fan ngorad ma da fanayed e thin rok Got ni ngad ayuweged yad ya nge yog ni ngar yul’yul’gad ko skeng rorad ma dabra rin’ed ban’en nib kireb. Ke yog Paul ko pi Kristiano nu Korinth ni gaar: “Gamad be meybil ngak Got ndab mu ngongliyed e kireb.” (2 Kor. 13:7) Faan gad ra meybil u fithik’ e sobut’an’ ma gad ra felan’nag Jehovah maku ra m’ug rarogodad riy. (Mu beeg e Proverbs 15:8.) Rayog ni nga dogned ngak boch i walagdad ni ngar meybilgad ni fan ngodad. Bod rogon ni yog Paul ni gaar: “Um pired ni gimed be yibiliymad ngak Got. Ya gamad e mmudugilan’mad ngomad ndariy ban’en ni be yog lanin’mad ngomad ni kug rin’ed nib kireb, ya gamad ba adag ni nguug rin’ed e tin nib mat’aw ni gubin ngiyal’.”—Heb. 13:18.
Boch Ban’en ni Ma Dag e Meybil Rarogodad Riy
12. Mang e tin nib ga’ fan ni nga dogned ko meybil rodad?
12 Ma m’ug ko meybil rodad ni gad e Pi Mich Rok Jehovah ni gad ba felfelan’ ma gad ba pasig, fa? Ma m’ug ko meybil rodad ni gad ma fol ko tin nib m’agan’ ngay, ni aram e ngan machibnag murung’agen Gil’ilungun min tamilangnag mat’awun Jehovah ma ni tayfan fithingan nib thothup, fa? Ireray e pi n’en ni thingari m’on u lan e meybil rodad, ni bod rogon ni ba’ ko meybil ni fil Jesus ngak pi gachalpen ni gaar: “Chitamangimad ni ga bay u tharmiy: Ngan tay fan fithingam nib thothup, ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.”—Matt. 6:9, 10.
13, 14. Mang e ma tamilangnag e meybil rodad u murung’agdad?
13 Meybil rodad ngak Got e ra dag e n’en ni bay u lanin’dad nge n’en ni gad baadag nge n’en ni gad be nameg. Manang Jehovah rarogodad. Be gaar e Proverbs 17:3 (BT): “Gol nge silber e yima skengnag ko nifiy ma gum’irchaen e girdi’ e Somol e ma skengnag.” Ma guy Got gum’ircha’dad. (1 Sam. 16:7) Manang ko uw rogon u wan’dad e muulung nge machib nge pi walagdad. Maku manang Jehovah ko uw rogon ni gad ma lemnag e ‘piin ni walagen’ Kristus. (Matt. 25:40) Manang ko riyul’ ni meybil rodad e ke yib u gum’ircha’dad fa kemus ni gadad be sul u daken. Girdi’ u nap’an Jesus e de mat’aw rogon e meybil ni ur ted, ere gaar Jesus: “Faanra mmeybilgad ma dab um sulod u daken taab bugithin ni pire’ yay ni bod ni ma rin’ e piin ni yad ma meybil ngak yugu boch e kan, ni yad be finey ni yira rung’ag e tin ni yad be yog ni bochan e ba n’uw e meybil ni yad be pi’.”—Matt. 6:7.
14 Pi thin ni gad ma yog u lan e meybil rodad e ma dag ko uw rogon ni ma pagan’dad ngak Got. Ke gaar David: “Ya gur [Jehovah] e manaf rog, ma yoror rog nib gel ngak e pi toogor rog. Mu pageg nggu par rom u tafenam nib thothup u n’umngin nap’an e yafos rog; mu teg nggu par u tan pom ndariy ban’en nra buch rog.” (Ps. 61:3, 4, BT) Jehovah e ra ‘yororiydad ni dabi buch ban’en rodad ni bochan e ba’ rodad.’ (Rev. 7:15) Ri ra fel’ rogodad ni faan gad ra chugur ngak u nap’an e meybil ni be pagan’dad ni ‘bay rodad’ u nap’an nra yib e skeng ngodad!—Mu beeg e Psalm 118:5-9.
15, 16. Meybil e ra ayuwegdad ni nge tamilang e mang u murung’agen e n’en ni gad be athapeg ni ngad rin’ed u lan e ulung?
15 Gad ra meybil ngak Jehovah u fithik’ e yul’yul’ ma ra ayuwegdad ni ngad nanged e n’en nib riyul’ ni gad be nameg. Gad baadag ni ngad ayuweged e girdi’ rok Jehovah nib sobut’an’dad ma gad pi’ e ayuw u rogon ni rayog rodad ya nge mon’og e machib nge ulung? Fa kemus ni gad baadag ni nga ‘dogned e thin’ fa nge ‘ga’ lungudad’ u lan e ulung? Gathi ireray e n’en ni nge lemnag e girdi’ rok Jehovah. (Mu beeg e 3 John 9, 10; Luke 22:24-27.) Faanra ba kireb e n’en ni gad be nameg, ma meybil ngak Jehovah u fithik’ e yul’yul’ e ra ayuwegdad ko magawon rodad ngad thilyeged u m’on ndawori kirebnagdad.
16 Pi leengiy ni Kristiano e sana ba m’agan’rad ngay ni nge pigpig e pi figirngirad ni yad e ministerial servant fa piin piilal. Ere yad ra ayuweg e piin figirngirad ni bod rogon ni ka rogned ko meybil rorad ma yad guy rogon ni ngar pared nib fel’ e ngongol rorad. Re n’ey e rib ga’ fan, ya ba ga’ ni ma lemnag e girdi’ u lan e ulung ni tabinaw ko piin ministerial servant nge piin piilal e ngaur rin’ed e ngongol nib fel’.
Ngan Meybil ni Fan ko Ulung
17. Mang fan nib fel’ ni ngam meybil u bang ni goo gur?
17 Yu ngiyal’ e i chuw Jesus u fithik’ e girdi’ nge yan i par nga bang ni goo ir nge meybil ngak e Chitamangin. (Matt. 14:13; Luke 5:16; 6:12) Ere kub t’uf ni ngam meybil u bang ni goo gur. Meybil u fithik’ e gapas e rayog ni nge ayuwegdad ni ngad nanged rogon ni ngad felan’naged Jehovah, maku rayog ni nge ayuwegdad ni nge gel e michan’ rodad. Machane, ki meybil Jesus u fithik’ e yoor, ma re n’ey e ba fel’ ni ngad fal’eged i lemnag ko uw rogon ni ngad rin’ed nib fel’ rogon.
18. Mang boch ban’en ni dabi pag e pi walag talin u nap’an ni yad be meybil ni fan ko ulung?
18 Nap’an e muulung rodad ma piin pumoon ni kar taufegad e yima pining bagayad ni nge meybil. (1 Tim. 2:8) Ma girdi’ ni gubin e thingar rogned e “amen” ni be yip’ fan e “arrogon,” u tomuren e meybil. Dabiyog ni nga rogned e amen ni faanra de m’agan’rad ko fare meybil. Dariy ban’en ni ngan gin ngay fa de puluw ko fare meybil ni fil Jesus ngak pi gachalpen. (Luke 11:2-4) Maku nap’an ni i meybil ma de yog e magawon rok be’ nge be’. Gad ma yibilay ngak Got e tirodad e magawon u bang ni goo gad ma gathi ngad weliyed u lan e ulung. Maku nap’an ni gad ra meybil u lan e ulung ma dab dogned boch ban’en nib mith fa de t’uf ni ngan weliy.
19. Thingari uw rogon e ngongol rodad u nap’an e meybil?
19 Nap’an ni gad be meybil u lan e ulung ma rib ga’ fan ni nge yib “madgun Got” u wan’dad. (1 Pet. 2:17) Yu ngiyal’ e ba’ nap’an ban’en ni ngan rin’ fa gin’en ni ngan rin’ riy ma de puluw ni ngan rin’ u nap’an e muulung. (Ekl. 3:1) Susun ni be’ e baadag ni nge kol e girdi’ ni gubin pa’rad u nap’an e meybil. Re n’ey e rayog ni nge magawonnag laniyan’ boch e girdi’. Boch e mabgol e sana yad ma kol pa’rad u nap’an e meybil ya yad ba mecham ngay, machane faan yad ra gumuchmuch nga taabang ma rayog ni ngar magawonnaged laniyan’ boch e girdi’. Sana yad ra lemnag ni yow be lemnag e adag rorow ma darur tew fan Jehovah. Thingar da ted fan Jehovah ma ‘gad rin’ urngin ban’en ni fan e nga nog e sorok ngak Got riy’ ma gad digey boch e ngongol nra magawonnag laniyan’ boch e girdi’.—1 Kor. 10:31, 32; 2 Kor. 6:3.
Mang e Ngan Yibilay?
20. Uw rogon ni ga ra weliy fan e thin ni bay ko Roma 8:26, 27?
20 Yu ngiyal’, e damur nang ko mang e nga mog ko meybil rom. I yoloy Paul ni gaar: “Faanra dad nanged e n’en ni ngad yibilayed, ma ra nang Got u gelngin e pi n’en ni dawor dogned. Machane en [Got] ni ma yaliy lanin’uy e manang ko mang e be yog gelngin nib thothup.” (Rom. 8:26, 27, NW) I gagiyegnag Jehovah ni ngan yoloy nga Bible boor e meybil. Gad ra fanay e pi n’ey ko meybil rodad ma aram e ra tay Got ni gowa thin rodad me fulweg taban. Manang Got rarogodad maku manang fan e thin nu Bible ni ke yoloy boch e girdi’ ni gelngin nib thothup e i ayuwegrad. Ra fulweg Jehovah taban e meybil rodad ya gowa be “ning” fa be yog gelngin nib thothup ban’en ni fan ngodad. Machane u nap’an ni ke yoor e tamilangan’ rodad ko Thin rok Got ma ra mom ni ngeb ngan’dad e pi n’en ni ngad yibilayed.
21. Mang e gad ra fil ko bin migid e thin?
21 Ere kad nanged ni ma m’ug rarogodad ko meybil ni gad ma tay. Ma m’ug ko uw feni fel’ e tha’ u thildad Jehovah nge feni yoor e tamilangan’ rodad ko Thin rok. (Jas. 4:8) Gad ra fil ko bin migid e thin boch e meybil ni bay u Bible. Faan gad ra fil e thin nu Bible, ma mang angin nra yib ngodad u nap’an ni gad be meybil ngak Got?
Uw Rogon ni Ga Ra Fulweg?
• Thingari uw rogon e lem rodad u nap’an ni gad be meybil ngak Jehovah?
• Mang fan ni thingar da yibilayed e pi walagdad?
• Meybil rodad e ra tamilangnag e mang u murung’agdad?
• Thingari uw rogon e ngongol rodad u nap’an e meybil u fithik’ e yoor?
[Picture on page 10]
Ga ma pining e sorok nge magar ngak Jehovah?
[Picture on page 12]
Ngongol rodad u nap’an e meybil u fithik’ e yoor e thingari pining e sorok ngak Jehovah